SELANGAU, 4 Mei — Pengerami Ngelanchar Hotel Roxy enggau Supamakit LePaPa di Selangau deka dipenyadika Kaban Kunsil Nengeri (ADUN) Tamin Ir. Christopher Gira Sambang kena Hari Enam (16 Mei 2026) ngelai siti agi pemujur ke beguna dalam pengawa ngenegapka pemansang ekonomi kandang menua.
Pengerami ke diperambu berengkah pukul 9.00 pagi nya dikearapka ulih nyadi pematak baru ngagai penumbuh ekonomi kandang menua nya, kelebih agi ba pengawa nyendiaka peluang gawa ngagai peranak menua nya sereta nyungkak aktiviti dagang ngelingi Selangau.
Program muka kedua-dua premis tu mega mandangka pengawa ngemanahka perengka guna enggau servis ngagai komuniti, setipak enggau pemansang ke diatu kandang menua pesisir ti jampat mansang.
Berebak enggau nya, pengawa beranakka puku tu ari sektor peribit ngayanka pengarap ti terus ngagai potensial pemansang ba kandang menua DUN Tamin.
Inisiatif baka tu mega setipak enggau aspirasyen deka ngenegapka ekonomi menua pesisir nengah chara ti inklusif sereta meruan.
Berindik enggau nya, mensia mayuh kelebih agi peranak DUN Tamin dilalau datai ngerichahka agi pengerami nya kelai sukung ngagai pengawa pemansang ti benung dipejalaika ba sitak nya.
Pengawa tu ukai semina nyadika pengawa muka dua premis baru enggau rasmi, tang mega kelai komitmen bekunsi dalam nempa pengidup jemah ila ti lebih mansang sereta lantang ungkup komuniti setempat. -RBI
#ruaiberitaiban#newsiban#beritaiban
Rindu | Titih | Kunsika
