BAU, 26 April – Dua iku indu peranak menua tu diripotka tesat maya nyereta aktiviti niki Gunung Bung Muan, Kampung Peninjau, Siniawan di Bau, lemai kemari mujur mulaika diri.
Penusah nya dipelabaka nyadi urung pukul 1.45 lemai lebuh seduai iya limpang ari jalai asal maya aktiviti nya enggau raban sida.
Pansik tumu tetemuka raban nya berengkah bejalai urung pukul 8.42 pagi sebedau seduai iya beserara enggau kaban ke bukai.
Raban enggau seduai iya sedarka pengelenyau seduai lebuh raban nya datai ba kaki bukit urung pukul 5.30 lemai lalu nemu seduai nya nadai enggau sida.
Berindik ari nya, kangau ngenyit udah digaga nengah lumur 999 minta bantu.
Taja pia, dua iku indu nya mujur pansut ari kandang kampung nya kediri lalu datai ba Serembu Eco Park urung pukul 6.30 lemai sebedau minta bantu ari mensia mayuh pulai baru ngagai endur asal sida niki.
Raban pengelikun ti ngaul Polis Diraja Malaysia, Opis Bomba enggau Penyah Penusah Malaysia, Raban Penyaga Orang Periman Malaysia (APM) enggau RELA dianjung ngagai palan penusah nyadi. Pengawa meresa tetemuka seduai iya selamat sereta nadai bakal.
Udah nya seduai iya datai ngelawa Balai Polis Siniawan ngambika penerang dirikod dikena mantu pansik ke silik agi.
Berebak enggau nya, polis ngelalau sapa orang ke deka niki tauka neresa ba kampung dikingat ngambika enda ngambi mudah pengelikun lebuh ngaul diri ba aktiviti ba kampung tauka kandang endur bebukit.
Chara ke beguna nyengkaum merambu jalai tumu, enda beserara ari raban, nentuka perengka komunikasyen bisi bateri ke chukup sereta madah ngagai kaban belayan tauka piak ke bekaul pasal pejalai sida sebedau berengkah niki. -RBI
#ruaiberitaiban#newsiban#beritaiban
Rindu | Titih | Kunsika
