KUCHING, 28 Mei – Sarawak enggau rasmi udah berengkah nyendiaka diri keterubah nyadi sebagi ari tuai rumah begulai ngatur Lumba enggau Main SEA 2027 nengah pengawa numbuhka Sekretariat Lumba enggau Main SEA 2027 (Kluster Sarawak) dikena ngatur pengawa merambu enggau bejalaika semua lumba enggau main nya.
Pengawa numbuhka sekretariat nya diputuska ba Aum Sekretariat Lumba enggau Main SEA 2027 ti bechairmanka Sapit Sekretari Perintah (Operasyen) Sarawak, Datu Hii Chang Kee, kena Hari Dua tu tadi.
Nengah struktur Komiti Pengatur Kandang Menua (LOC) Kluster Sarawak, Datu Hii Chang Kee dipadu nyadi Chairman, enggau Sekretari Tetap Opis Menteri Pemansang Nembiak, Lumba enggau Orang Dagang (MYSED) Sarawak, Dzulkornain Masron, nyadi Sapit Chairman.
Pangku pengawa Sapit Chairman dipegai Nancy Jolhi, Mu’azamir Jili enggau Seroji Ludin, lalu Pemangku Ketuai Pemesai Eksekutif Kaunsil Lumba enggau Main Sarawak, Khairul Nizam Morshidi dipadu nyadi Sekretariat.
Struktur LOC Kluster Sarawak mega dibagi ngagai empat bagi besai dikena nentuka pengawa bejalaika organisasyen bejalai enggau lebih teratur, efisyen sereta efektif.
Bagi Strategik, Tadbir Urus enggau Komunikasyen betuaika Jenny Lee Siak Ne, lalu Bagi Servis Korporat enggau Hal Ehwal Komersial betuaika Asmawaty @ Siti Asmah Ahmad.
Berebak enggau nya, Bagi Penyedia Palan, Operasyen Main enggau Peneleba Raban Bekaul diketuaika Abdul Rani Abdullah, lalu Bagi Sistem Digital, Teknologi enggau Main megai tanggungpengawa ngagai Puvindra Pubeion Jayakumar.
Ungkup rikod, Sarawak deka nyadi tuai rumah 17 ari 38 bengkah lumba enggau main ke deka dipekitka ba Lumba enggau Main SEA 2027, ti diperambu deka diatur kena 18 ngagai 29 September 2027.
Entara lumba enggau main ke deka dipekitka di Sarawak nyengkaum akuatik, angkat berat, e-sukan, gimnastik, golf, kriket, nimbak, muay thai, petanque, squash, taekwondo, tenis, wushu, basketball, tenpin bowling, bowling padang enggau main nimbakka laja (memanah).
Kelimpah ari nya, Sarawak mega dipebasa nyadi palan pengerami rasmi bejadi Lumba enggau Main SEA 2027. – RBI
#ruaiberitaiban#newsiban#beritaiban
Rindu | Titih | Kunsika
