BINTULU, 16 Mei — Program Roadshaw Komuniti Digital ke diatur ba Rumah Elbert Mejang, Tubau nyadi pelasar beguna dalam ngenegapka literasyen digital komuniti menua pesisir seriris enggau agenda transformasyen digital menua.
Program nya dipenyadika Sapit Menteri Digital, Datuk Wilson Ugak Kumbong ti nyemetak madahka pengawa nguasa teknologi digital ukai agi nyadi pilih, tang nyadi pekara ti diguna besai dalam pengidup ninting hari mensia mayuh ba dunya moden.
Nitih ku iya, program baka tu meri peluang ngagai komuniti menua nya meretika agi pemaik teknologi digital dalam mayuh bengkah sukut pengidup nyengkaum pelajar, pengawa dagang, pengawa ninting hari sereta mega akses ngagai penerang enggau servis perintah.
“Ba dunya kemaya hari ti jampat mansang, pengelandik digital beguna amat ngambika mensia mayuh enda tinggal sereta ulih ngena teknologi enggau likun sereta efektif,” ku iya.
Iya mega pechaya pengawa ti enda ngetu nengah program komuniti baka tu ulih ngerapitka seraka digital, kelebih agi di menua pesisir, lalu enggau nya ulih nentuka mayuh agi orang ulih ngasaika limpah pemansang teknologi menua enggau chara inklusif.
Berebak enggau nya, iya ngenataika pengaga ati ngagai komuniti Rumah Elbert Mejang ketegal sambut ke chukup manah ke diberi sida ngagai iya sepemanjai program nya diatur.
Iya mega ngenataika pengaga ati ngagai MyDigital Corporation ti udah ngatur program nya, ti dikumbai iya siti inisiatif ti beguna dalam meri kuasa ngagai komuniti nengah agenda digitalisasyen nasional. -RBI
#ruaiberitaiban#newsiban#beritaiban
Rindu | Titih | Kunsika
