KUCHING, 18 Feb – AirBorneo minta ampun ngagai pesinjir berindik ari pengilap nganjung email notifikasyen bekaul enggau atur baru penerebai bilun sereta pengelaun penerebai bilun ti ditemu enda tembu.

Dalam penerang rasmi, kompeni penerebai bilun nya nerangka email nya dianjung enggau jaku ke beguna ke enda tembu, lalu enggau nya bisi potensial ngasuh penerima saru penemu.

Nitihka penerang nya, pekara nya pengilap teknikal ti enda sengaja lalu kompeni nya minta ampun enggau sebarang salah penemu ti tau nyadi ketegal penusah nya.

“Kami minta ampun ketegal pengilap tu sereta semua penyaru penemu ke nyadi.Kami beterima kasih ngagai penyabar enggau pemereti ati bala pesinjir,” ku penerang nya.

AirBorneo mega madahka atur ngemanahka ‘dalaman’ udah dipejalaika nyengkaum neritka agi proses meresa isi sebedau sebarang komunikasyen rasmi dianjung ngagai pengguna.

Kompeni nya ngemeratka komitmen sida ti seruran nentuka pengawa ngenataika penerang ti betul, sereta terang dikena ngetanka pengarap pesinjir ngagai servis sida. -RBI

#ruaiberitaiban#newsiban#beritaiban

Rindu | Titih | Kunsika

MIRI, 18 Feb – Sebengkah kes nyadi di Bandar Baru Permyjaya kemari lebuh siku lelaki peranak menua nya beumur 53 taun ditan polis pengudah enchuri ari sebuah kedai runchit di Jalai Dato Permaisuri.

Nitihka penerang ari Bagi Tasat Jenayah (BSJ) IPD Miri, saspek ditan berindik ari pansik ke silik, lalu polis mujur ngerampas sekeda barang enggi orang ke ngaga kompelin ari saspek.

Penusah nya nyadi kena 17 Februari 2026 urung pukul 1.30 lemai, ngujungka orang ke ngaga sebana nya lenyau kerepai ke ngundan dokumen diri enggau duit tunai ke berega RM350.

Mensia mayuh ba endur nya mega tekenyit meda polis mai saspek jauh ari palan nya, lalu mayuh muji pengawa piak bekuasa ti jampat bejalaika pengawa nya.

Saspek diatu ditan riman pengelama tiga hari ngambika dipansik silik agi. Kes tu dipansik nengah Seksyen 380 Kanun Keseksaan ti nyendiaka ukum jil nyentuk sepuluh taun enggau ukum mata duit. -RBI

Penatai Polis Daerah Miri

#ruaiberitaiban#newsiban#beritaiban

Rindu | Titih | Kunsika

BETONG, 18 Feb – Operasyen ngiga enggau nyelamat (SAR) benung dipejalai berindik ari penusah ke nyadi ke alai sebuah bot laju dipechayaka karam maya sesi nguji di Rumah Sitie, Tisak Ulu Sungai Skrang, tengahari tu tadi ngujungka siku lelaki beumur 20 taun diripotka lenyau.

Tudah nya dipadahka labuh ke sungai sebedau dipeda tekapai-kapai lalu udah nya lenyau ari peda urung pukul 3.51 lemai.

Nitihka penerang ari Palan Operasyen (PGO) Balai Bomba enggau Penyah Penusah (BBP) Betong Betong sida terus dianjung ngagai endur nya pengudah nerima kangau ngenyit.

Operasyen nya betuaika Yusof Tamin enggau lima iku kaban.

Pengawa ngiga keterubah iya nya fokus ngagai atas ai ngena chara ‘surface water searching’ bepelasarka penerang saksi sereta dibantu perau enggi peranak rumah panjai.

Bomba madah, kandang endur operasyen nya urung 21 kilometer ari tengah Pasar Betong lalu gaya arus sungai entara batang pemar ngagai tim penyelamat.

Pengawa SAR diatu benung dikerembaika ngelingi endur tudah kepenudi dipeda enggau kerejasama sekeda ejensi nyengkaum Raban Penyaga Orang Periman Malaysia (APM).

Naka berita tu ditulis, tudah bedau ditemu lalu operasyen diteruska enggau pengawa matau enggau silik kandang endur penusah nya nyadi.

JBPM Sarawak mega ngelalau mensia mayuh seruran ngemeratka pengelikun maya bejalaika bot nyengkaum nentuka ngena jaket pengelikun sereta meresa gaya bot sebedau nurun ke sungai. -RBI

#ruaiberitaiban#newsiban#beritaiban

Rindu | Titih | Kunsika

ASAJAYA, 18 Feb – Siku lelaki beumur 29 taun ke dipelabaka diserang baya maya nyala undang di Sungai Buluh udah ditemu lesi urung 200 meter ari endur penusah nyadi pukul 2.22 lemai sehari tu tadi.

Tudah ditemu seraban orang berikan ke mantu dalam operasyen ngiga enggau nyelamat (SAR) sebedau tubuh iya diserah ngagai polis ngambika atur nangkanka nya dipejalaika. Operasyen SAR udah tembu enggau rasmi urung pukul 3.15 lemai.

Sebedau tu, mansa diripotka lenyau urung pukul 11.55 pagi, 17 Februari 2026, pengudah bala bakih iya sedarka iya lenyau ngenyit lebuh sida benung nyala undang ba sungai.

Nitihka penerang Raban Penyaga Orang Periman Malaysia (APM) Pelilih Asajaya, sida nerima kangau ngenyit ari mensia mayuh sebedau seraban Tim Alpha dianjung ngagai endur nya bejalaika operasyen SAR.

Operasyen nya mega ngaul kerejasama Polis Diraja Malaysia (PDRM), Opis Bomba enggau Penyah Penusah Malaysia (JBPM), RELA enggau Kaunsil Pengintu Kampung Sarawak (SFC).

Pengawa nyidi nya dipejalaika ba sepemanjai Sungai Buluh dalam radius urung empat kilometer ari palan alai iya dipelabaka ditabanka jelu nya.

Operasyen hari keterubah diketuka urung pukul 7 lemai pengudah tudah enda mujur ditemu sebedau ditampung baru pagi tadi, ngujungka tubuh iya ditemu.

Piak bekuasa ngelalau mensia mayuh bejimat agi lebuh bejalaika aktiviti ba sungai kelebih agi ba kandang endur ke dikelala nyadi palan baya, dikena nyeliahka penusah ke sebaka nyadi baru. -RBI

#ruaiberitaiban#newsiban#beritaiban

Rindu | Titih | Kunsika

JOHOR BAHRU, 18 Feb – Yang di‑Pertuan Agong Sultan Ibrahim minta ngambika pengawa ngelaban penyalah makai suap dipejalaika enggau nadai belembut ba semua opis enggau ejensi Perintah Nengeri Johor.

Iya mega madah, integriti enggau pengawa ke terang dalam pentadbiran nyadi pelasar ke beguna dalam nentuka pengelantang enggau pengelikun nengeri nya dijaga.

Iya mega nyemetak madahka pentadbiran ti ngembuan integriti ukai semina ngenegapka pengarap rayat, tang mega nyadi pematak pemansang ti meruan sereta daya besemekih nengeri tu ba renggat nasional enggau antarabansa.

Iya mansutka penerang tu ba laman Facebook rasmi iya, lebuh iya nerima penatai Menteri Besai Johor, Datuk Onn Hafiz Ghazi enggau Sekretari Perintah Negeri, Datuk Mohammed Ridha Abd Kadir di Istana Pasir Pelangi, seharitu tadi.

Rambau aum semak dua jam nya, Sultan Ibrahim mega diberi penerang pasal pemansang ke diatu enggau penyulut ke jampat dijapai di Johor ulih Onn Hafiz.

Sama bisi datai Datuk Bandar Kaunsil Bandaraya Pasir Gudang, Datin Paduka Hazlina Jalil enggau Direktor Tanah enggau Galian Johor, Mohammed Shakib Ali. -RBI

Sumber Astro Awani

#ruaiberitaiban#newsiban#beritaiban

Rindu | Titih | Kunsika

PERANAK LAWAS DIPERANSANG NGUNA PEMANSANG INFRASTRUKTUR DIKENA NGEREMBAIKA EKONOMI

LAWAS, 18 Feb – Peranak di sitak Parlimen Lawas dipinta beambi ulih ari pengawa bejalaika projek pemansang jalai alun ke benung dipejalaika diatu sereta deka dipejalaika, lalu ari nya ulih meransang penumbuh ekonomi kandang menua.

Kaban Parlimen Lawas, Dato’ Henry Sum Agong madah, entara projek ke udah dikemendarka nyengkaum ngaga jalai nyambung Ba’kelalan ngagai Kalimantan enggau Bario, ke dipelabaka ulih muka akses ke lebih besai ngagai kandang menua ulu enggau garis entara menua.

Berebak enggau nya, iya mega ngemeratka pemesai guna neruska perambu projek jalai kereta api Trans Borneo, ti dianggap iya nyadi pematak strategik ungkup pemansang timpuh panjai pelilih menua tu.

Nitih ku iya, sistem pengangkut kereta api ulih ngenegapka rentayan penyambung entara pelilih menua di Borneo kelimpah ngurangka bepanggai ba perengka pengangkut darat ke udah bisi.

Ku iya nambah, projek ti meri empas tinggi nya bisi prospek besai dalam nyungkak sektor dagang temuai, ngenegapka industri pemakai sereta meransang pemansang teknologi enggau beranakka puku di serata Pulau Borneo.

Iya madah munyi nya pengudah nemuai beserimbai enggau Taun Baru Cina ngagai palan pengentap pendiau Penghulu Liaw Soon Teck di Trusan, ditu. -RBI

Sumber Jiwa Bakti

#ruaiberitaiban#newsiban#beritaiban

Rindu | Titih | Kunsika

NGEMAH, 18 Feb – Sebuah servis feri beungkus RM4.5 juta ba kandang endur N.49 Ngemah diatu meri pemaik ke besai ngagai peranak ari sukut komunikasyen enggau nyungkak aktiviti ekonomi kandang menua.

Kaban Kunsil Nengeri (ADUN) Ngemah, Anyi Jana madah, palan nya ngemudahka pengawa rayat ninting hari kelimpah nyadi pematak ngagai pemansang menua pesisir ke lebih nembam.

Iya mega madahka projek jalai alun sepemanjai tujuh kilometer di Simpang Nanga Jagau deka dipejalaika dalam timpuh ke semak ari baruh ejensi MiRRDA, dikena ngemanahka rentayan infrastruktur kandang menua nya.

Kelimpah ari nya, agih belanja sepenyampau RM3,000 mega udah dikenataika ngagai Komiti Pemansang enggau Pengelikun Genturung Pendiau (JKKK) dikena meli perengka dikena berami (PA Sistem) dikena nyukung ketuai renggat baruh.

Anyi madah munyi nya lebuh bejaku ba Program Ngabang Taun Baru Cina ungkup sitak N.49 Ngemah ke diatur enggau richah ba rumah kebun Kapitan Ngu Leong Hieh sehari tu enggau penatai bemacham renggat mensia mayuh.

Pengerami nya bela digulu bini iya, Gelim Utan, Ketuai Polis Pelilih Kanowit DSP Junical Ujal, Pemancha Leong Khing Hee, penghulu, kaunselor, kapitan, tuai-tuai rumah sereta mega Raban Nembiak N.49 Ngemah.

Dalam jaku pengelalu iya, Kapitan Ngu Leong Hieh ngenataika pengaga ati ke pemadu tinggi ngagai pengeran Anyi enggau raban iya ke udah ngelimpangka diri ngulu program nya, seraya nerangka penatai bala ketuai kandang menua nya nyadika bukti pengibuh ngagai komuniti pupu bansa di DUN Ngemah.

Ex-pengajar Benabas Alex ti ngarika komuniti China di DUN N.49 Ngemah mantaika pengandal iya, Anyi deka dichalunka baru nyadi pengari Gempung Parti Sarawak (GPS) ungkup sitak nya ba Pengawa Bepilih Nengeri (PRN) Sarawak ti deka datai.

Iya nerangka Anyi udah nyadi pengari rayat ti chakah sereta enda bechiping dalam merambu enggau bejalaika pemansang.

Pemancha Leong Khing Hee mega nesau semua peranak enggau penyukung komuniti Cina di kandang menua nya meri sukung penuh ngagai ketuai ke bisi diatu ungkup pemansang terus dipejalaika.

Berebak enggau nya, DSP Junical Ujal ngelalau rayat sitak N.49 Ngemah kelebih agi di Kanowit seruran ngemeratka pengelantang enggau pengelikun komuniti.

Iya mega ngingatka enti sema Pengawa Bepilih Nengeri Sarawak diatur taun tu, semua piak patut bekimpin enggau chara ti posifit, bejimat sereta dalam gaya ke likun.

Program Ngabang terang mandangka semengat beserakup, kerejasama enggau komitmen ti enda ngetu dalam ngemansangka N.49 Ngemah ungkup pengelantang rayat selampur. -RBI

#ruaiberitaiban#newsiban#beritaiban

Rindu | Titih | Kunsika

ASAJAYA, 18 Feb — Operasyen ngiga enggau nyelamat (SAR) siku lelaki ke dipelabaka diserang baya ba baruh Jematan Sungai Buloh, Sadong Jaya diteruska sehari tu enggau pengawa ngaul mayuh bengkah ejensi penyelamat enggau komuniti besemak.

Nitihka penerang ari Opis Pengerara Api enggau Penyah Penusah (JBPM) Sarawak, mansa dikelala enggau nama Mohd Faizal bin Abdilah, 30, diripotka lenyau maya berikan ba tebing sungai begulai enggau bakih iya.

Bala saksi ngeripotka mansa tama ke dalam ai enggau penalam paras punggung sebedau iya dipelabaka diserang jelu reptilia nya. Naka ke sehari tu mansa bedau ditemu.

Hari kedua operasyen berengkah pukul 9.30 pagi enggau ngena teknik ngiga atas ai ti ngaul radius ngiga lapan kilometer ari palan penusah nyadi.

Penyauh entara Palan Nagang Bomba (PKB) enggau palan penusah nyadi dipelabaka urung 20 kilometer.

Operasyen bersepadu nya mega digulu raban Polis Diraja Malaysia, Angkatan Pertahanan Awam Malaysia, Sarawak Forestry Corporation, volunteer RELA enggau peranak genturung tu.

Sepenyampau lapan iku raban bomba udah dianjung ngagai endur nya enggau bantu sebuah perengka pengangkut utiliti enggau sebuah bot aluminium dikena ngemudahka operasyen ngiga ba sepemanjai sungai nya.

Piak bekuasa madahka operasyen nya deka diteruska nyentukka mansa ditemu, seraya ngelalau mensia mayuh ngambika seruran bejejaga sereta nyeliahka aktiviti ti berisiko ba kandang sungai ti dikelala nyadi palan endur baya diau. — RBI

#RuaiBeritaiban#Newslban

#Beritalban | Ruai Berita Iban

#Rinduka | #Titihka | #Kunsika

Sumber, photo — BBP Asajaya

LIMBANG, 18 Feb — Siku sekuriti bebadi nyawa pengudah entukar ke ditepan iya lenyau ‘kawalan’ sereta tepawah ba penusah eksiden kediri ba Jalai Kampung Bakol, lemai kemari.

Ba penusah ke nyadi urung pukul 6.02 lemai nya, mansa ke beumur 24 taun ari Kampung Lubuk Tuan dipechayaka benung dalam pejalai deka ngepunka syif iya ba endur iya gawa.

Ketuai Polis Pelilih Limbang, Superintenden Parum Niot madah, asil pansik tumu tetemuka mansa ke deriba ari mengeri Limbang nuju ngagai Medamit dipelabaka lenyau ‘kawalan’ lebuh datai ba palan penusah nyadi.

“Entukar ke dideriba mansa tegelinchir ke sepiak kanan jalai lalu ngelantak paip besai sebedau tepawah ngagai semak ke besemak,” ku iya ba sebengkah penerang malam tu tadi.

Empas ti balat ketegal belantak nya ngujungka mansa balat bakal ba mua enggau pala.

Pemesai perubat ke datai ba palan penusah nyadi ngentaska mansa midang ba palan penusah nyadi.

Tubuh mansa udah dibai ngagai sepital ke besemak ngambika atur silik enggau pengawa buntas tasat dipejalaika.

Diatu kes nya benung dipansik ari baruh Seksyen 41(1) Akta Pengangkutan Jalan 1987.

Polis mega ngelalau penguna jalai alun ngambika seruran bejejaga sereta nentuka gaya perengka pengangkut sida enggau diri empu dalam gaya ke pemadu manah sebedau berengkah bejalai, kelebih agi maya jam mensia mayuh. — RBI

#RuaiBeritaiban#Newslban

#Beritalban | Ruai Berita Iban

#Rinduka | #Titihka | #Kunsika

Sumber, photo — IKBM

KANOWIT, 18 Feb — Atur jampat raban Opis Bomba enggau Penyah Penusah Malaysia (JBPM) mujur nagang penusah angus ti nuntung sebuah rumah peribit di Nanga Bawan, malam kemari (17 Februari).

Palan Operasyen nerima kangau ngenyit urung pukul 8.21 malam sebedau jentera ari Balai Bomba enggau Penyah Penusah Kanowit dianjung ngagai endur nya.

Tim nya datai urung pukul 9.08 malam pengudah bejalai urung 45 kilometer.

Nitihka penerang ari Komander Operasyen, penusah angus nya mungkur beranda belakang sebuah rumah tetap ke ngembuan pemesai 60 kaki x 40 kaki.

Taja pia, api mujur dijaga tumu agi ulih mensia mayuh sebedau penatai raban bomba.

Operasyen ngerara api nya dipejalaika ngena ‘hose reel’ enggau ai ari tangki jentera nyentukka api nya padam abis.

Penusah angus nya dipelabaka ngerusak urung 15 peratus struktur begunan lalu nadai ngaul sebarang bakal tauka bebadi nyawa.

Operasyen nya betuaika Pemesai Kanan Bomba, PPgB Rashid bin Songli begulai enggau tujuh iku kaban enggau dua jentera.

Sama bisi mantu ba endur nya iya nya empat iku pemesai polis enggau tiga iku pemesai ari SESCO dikena nentuka gaya likun.

Pengudah pengawa meresa pengelikun tembu, operasyen diketuka urung pukul 9.42 malam lalu semua kaban mulaika diri ngagai stesyen nya.

Penusah tu mandangka tikas penyikap raban penyelamat di Sarawak dalam nentuka pengelikun mensia mayuh seruran dijamin. —RBI

#RuaiBeritaiban#Newslban

#Beritalban | Ruai Berita Iban

#Rinduka | #Titihka | #Kunsika

Sumber, photo — BBP Kanowit