KUCHING, 26 Feb — Perintah Sarawak nyendiaka Bantu Pengasih Pemati (BIK) sepenyampau RM1,800 ngagai pemegai Kenyalang Gold Card (KGC) ke layak ke udah mati, nyadi inisiatif pengasih dikena mantu ngelempungka tating ruang bilik ke ditinggalka.

Nitihka penerang ti dipansutka Servis Sarawak, peminta bantu nya dibuka ngagai pemegai KGC ti berejista enggau syarat niang nadai nerima bantu pemati ari Opis Perkhidmatan Awam sereta ukai peranak institusyen perintah.

Peminta meseti dianjung dalam timpuh empat bulan tauka 120 hari ari haribulan pemati.

Entara dokumen ke dipinta iya nya surat pemati, salin akaun bank penerima enggau salin kad pengelala tauka pasport penerima.

Peminta ulih digaga nengah ‘online’ nengah portal rasmi Servis Sarawak lalu proses peminta enda bebayar.

Mensia mayuh ti begunaka penerang silik tau betanya ngagai lumur 082-374888 tauka email ngagai kgc@sarawak.gov.my. — RBI

MELAKA, 26 Feb – Siku nembiak Primari 6 dipelaba kena kachau seksual, ditinggal ba babas semak sekula iya, kena Hari Tiga nyin tadi.

Nembiak nya sebedau tu udah diripotka lenyau lalu ditemu urung pukul 7 malam benung nyabak laban takut.

Nitihka penerang ari dibantaika sebengkah portal berita menua tu, nembiak nya ditemu lenyau lebuh siku pengajar sekula nya meda iya enda nurun kelas tambah pengudah sesi sekula tembu urung pukul 1.05 lemai.

“Pengawa ngiga tudah udah dipejalaika lalu pengawa meresa sistem televisyen litar tertutup (CCTV) sekula tetemuka tudah pansut ari kandang sekula urung tengah hari.

“Nembiak nya madahka diri pansut ari sekula pengudah tepedaka sebuah kerita ke dipelabaka enggi indai iya.

“Taja pia, iya pansut baru pengudah nemu kerita nya dipasang siku lelaki ke enda dikelala,” ku iya.

Sumber madahka tidah nembiak nya tekenyit lebuh lelaki nya ngagai iya ngujungka nembiak nya belanda nuju babas ngiga endur belalai.

Taja pia ku iya, saspek mujur tetemuka tudah sebedau ngasuh iya muka pekayan, lalu mega dipelabaka negu kuyu sereta ngambi beberapa iti gambar sebedau pansut ari endur nya.

Nitihka penerang sumber mega, sida nembiak nya sebilik tetemuka iya lalu dibai ngagai Sepital Melaka ngambika diperesa enggau silik agi.

Berebak enggau nya, Ketuai Polis Pelilih Melaka Datuk Dzulkhairi Mukhtar lebuh dikerandau ngentaska penusah nya lalu kes nya dipansik ari baruh Seksyen 14(a) Akta Penyalah Seksual Terhadap Nembiak Mit 2017. -RBI

SELANGAU, 26 Feb — Dua iku lelaki diripotka bakal ba penusah eksiden kediri ti ngaul sebuah entukar Perodua Aruz ba Simpang Bukut, Jalai Selangau/Mukah, lemai tu tadi.

Nitihka penerang ari Angkatan Pertahanan Awam Malaysia (APM) sida nerima kangau ngenyit ari Klinik Simpang Bukut urung pukul 5.10 lemai sebedau seraban raban dianjung ngagai endur nya.

Raban nya datai urung pukul 5.45 lemai lalu tetemuka kededua mansa ba tisi jalai, benung dibantu mensia mayuh.

Mansa keterubah semina bakal mimit aja. Mansa kedua napi telih tebuka ba jari sereta pedis ba punggung.

Tim APM Selangau meri perubat keterubah iya nya meresi sereta ngerapitka abi telih sebedau mansa dibai ke klinik ngambika diperubat enggau silik agi.

Kededua mansa udah diserah ngagai klinik lalu agi dipatau ngambika diperubat enggau silik agi. Operasyen nya tembu urung pukul 6.16 lemai.

Kes tu dipansik nitihka prosedur standard, lalu pun penusah bebadi nya agi dipansik piak bekuasa. — RBI

KANOWIT, 26 Feb — Beberapa kandang endur ke baruh di pelilih Kanowit diripotka ampuh bah berindik ari ujan semalam-malam, tang gaya kesemua diatu udah ulih dijaga enggau tikas ai ngayanka trend nurun.

Nitihka ripot rasmi ari Angkatan Pertahanan Awam Malaysia (APM), pengawa nyukat kandang ke dipatau udah dipejalaika urung pukul 5.00 lemai ti ngaul kandang endur dalam Parlimen P.210 Kanowit enggau DUN Ngemah.

Pengawa meresa tetemuka tikas ai ba sebengkah ari kandang sekula ngerikod bacha urung 0.1 ngagai 0.3 meter maya nyukat keterubah lalu niki sementara ngagai urung 0.42 meter sebedau berinsur surut.

Berebak enggau nya, dua endur bukai ke diperesa ditemu nadai ai lalu batang jalai nuju sebuah rumah panjai ke sebedau tu kena ampuh mega udah surut abis sereta ulih ditengah.

Operasyen matau ke tembu pukul 6.14 lemai nya ngaul tim siku pemesai enggau tiga iku kaban enggau bantu logistik ari sebuah entukar opis, perengka nyukat tikas ai, kasut pengelikun enggau jaket pengelikun. — RBI

KUALA LUMPUR, 26 Feb – Projek ngaga Klinik Pengerai (KK) enggau Klinik Ngeli di Daro dipelabaka tembu penuh manggai ba taun 2028, lalu enggau nya ulih ngemanahka perengka guna pengerai ungkup peranak Daro enggau Matu.

Pekara nya dipadahka Sapit Menteri Pengerai, Dato Hajjah Hanifah Hajar Taib lebuh nyaut sesi Tanya Lisan di Dewan Rakyat sehari tu tadi.

Ku iya, pengawa ngaga Klinik Pengerai Daro (Bansa 4) diatu benung ba renggat dipejalaika pengudah Surat Setuju Terima (SST) dikeluarka kena 21 Januari 2026, seraya pengawa ngempu palan berengkah kena 4 Februari 2026.

Projek nya, dipejalaika Opis Kereja Raya Sarawak ngagai suku ketiga taun 2028 lalu timpuh ngaga 30 bulan.

Klinik baru nya bepalan urung 5.3 kilometer ari palan sementara nya deka meri servis komprehensif nyengkaum berubat pesakit luar, penusah ngenyit, pengerai indai enggau anak mit, farmasi, fasiliti diagnostik enggau kuarters staf.

Berebak enggau nya, projek Klinik Ngeli Daro diatu benung ba renggat kepenudi nyiri kunteriktor lalu dipelaba nerima SST ba suku ketiga taun 2026 enggau timpuh ngaga pengelama 24 bulan.

Nitih ku iya, enti kededua fasiliti nya tembu ila, 70 pangku pengawa baru deka ditumbuhka, lalu enggau nya ulih ngenegapka pengawa ngenataika servis pengerai sereta nambahka akses ungkup peranak di kandang menua Daro enggau Matu. -RBI

SELANGAU, 26 Feb – Pengawa ngerembaika ngempu lisin deriba ti entas ba raban nembiak menua pesisir majak ditegapka lebuh Program Bantu Lisin Deriba Mutosikal Kelas B2 (BLM) diperambu deka dipejalaika di Selangau enggau Tamin nyengkaum di Bintulu.

Inisiatif ti betuaika Opis Perengka Pengangkut Jalai Raya (JPJ) Sarawak ngemeratka raban nembiak enggau raban ti kurang penatai pemisi, kelebih agi di menua pesisir ti betapi enggau penanggul ngulihka lisin deriba ti entas.

Dikena nentuka pengawa nya bejalai enggau lanchar, aum raban pengatur udah diatur nengah kerejasama Parlimen Selangau enggau Dewan Undangan Nengeri (DUN) Tamin.

Aum nya bechairmanka Pemesai Pelilih Menua Selangau, Yalin Asan, lalu bela digulu Ketuai Bagi Lisin Deriba JPJ Sarawak, Yusniman Mohammad, ti ngenataika penerang senentang prosedur enggau nitihka garis lalau JPJ Malaysia.

Institut Memandu Ngu Chung Beng & Sons Sdn. Bhd dichiri nyadi institusyen latih dikena ngemujurka program nya, enggau pengawa nitihka penuh Kurikulum Pelajar Deriba (KPP).

Ba pemansang ke sama, siti agi aum koordinasyen mega bisi diatur di Bintulu ke diatur Parlimen Bintulu.

Aum nya bechairmanka Yusniman, seraya penerang pengatur dibantaika Ketuai Unit Lisin Deriba JPJ Bintulu, Norhayati Rezali, ti nerangka enggau silik peminta penyereta, taga latih enggau chara bejalaika pengawa.

Program BLM Kelas B2 ukai semina mantu ngulihka lisin, tang mega nyadi singkang strategik dikena ngangkatka pengelikun jalai alun.

Nengah lisin ke entas, orang ke ngena mutosikal ukai semina lebih dilatih sereta bisi disiplin, tang mega bisi peluang ngerembaika akses sida ngagai pengawa sereta ngangkatka status ekonomi sida sebilik.

Pengawa ke diatur di Selangau, Tamin enggau Bintulu dikearapka ulih meri empas ke besai ngagai raban ke ditagit, lalu ari nya ulih ngurangka penyalah trafik enggau penusah bebadi ba jalai alun ba kandang endur ke bisi kaul.

SEBAUH, 26 Feb — Projek ngaga begunan ganti penuh di Sekolah Kebangsaan Hermanus Assan udah tembu meruan, lalu enggau nya ulih ngenegapka pengawa Opis Kereja Raya Sarawak ti seruran bejalaika pengawa ngemanahka perengka guna pelajar, kelebih agi di menua pesisir di Sarawak.

Projek ti dipejalaika di Sebauh nyengkaum pengawa ngaga mayuh bengkah perengka guna besai nyengkaum blok kelas, blok pentadbiran ungkup pengajar enggau Kepala Pengajar, kuarters pengajar, dewan makai, buding nembiak, sistem bekal ai, perengka guna sanitasyen, pondok pengelikun kelimpah ari pengawa luar baka jalai bejalai kaki ti betutup, sistem entali ai enggau pengawa mgerubuhka bengunan lama.

Nitihka penerang rasmi nya, penembu projek tu mandangka komitmen perintah nengeri nyendiaka palan belajar ti lebih lantang, likun sereta kondusif, kelimpah ari ngangkatka kualiti infrastruktur pelajar di menua pesisir.

Nengah penembu perengka guna baru nya, bala nembiak diatu ulih ngasaika rampa belajar ti bekualiti agi, seraya pengelantang enggau pengelantang raban pendidik mega udah diangkatka setipak enggau aspirasyen nengeri ba pemansang pelajar ti meruan. — RBI

KUCHING, 26 Feb — Opis Pengerai Bagi Menua Kuching madahka Klinik Pengerai Taman Malihah deka berengkah beoperasyen ba begunan baru berengkah ari Hari Satu, 2 Mac 2026 tu.

Nitihka penerang ba laman Facebook rasmi iya, operasyen klinik nya deka dipejalaika ba alamat Ringkat Baruh enggau Ringkat Satu, Lot 6835 (Sublot 5), Blok 8, Pelilih Menua Tanah Matang, Jalai Batu Kawa–Matang, Kuching.

Berindik enggau nya, mensia mayuh dilalau ngambi beratika ubah palan lalu datai ngagai alamat baru nerima servis pengerai baka selama.

Berebak enggau nya, opis pengerai mega meri besai terima kasih ngagai sukung, kerejasama enggau penyabar mensia mayuh sepemanjai proses mindahka klinik nya. — RBI

SPAOH, 26 Feb — Raban Penyaga Pengelikun Mensia Mayuh Malaysia (APM) Pelilih Spaoh nerima kangau ari mensia mayuh madahka sekeda pun kayu tumbang ngempang jalai entukar di Jalai Paku.

Tekala nya pengudah nerima penerang nya, empat iku raban Skuad Alpha dianjung ngagai endur nya ngena ambulans pacuan empat roda.

Raban nya begunaka timpuh urung sejam bejalai sebedau datai ba kandang endur entara Jalai Ulu Paku enggau Sungai Langit, ke alai dua pun kayu ditemu tumbang meraka jalai nya.

Sepun kayu ke nyekat setengah ari jalai nuju ngagai Ulu Paku mujur dikupas sereta diperesi raban APM, lalu sebatang agi dulu ditetak lalu diperesi mensia mayuh, lalu enggau nya nentuka jalai nya likun ditengah semua perengka pengangkut.

Nadai sebarang bakal diripotka maya operasyen nya dipejalaika, lalu raban ke bejalaika pengawa pulai enggau selamat ngagai PKOD enggau perengka sida dalam gaya ke manah.

Mensia mayuh dilalau jampat betanya ngagai lumur penusah ngenyit 999 tauka talipaun APM ba lumur 083-473006 nyema bisi sebarang penusah ngenyit nyadi.

Operasyen tu ngayanka komitmen APM ti terus ari baruh kemata Opis Menteri Besai dalam nentuka pengelikun komuniti seruran dijaga, setipak enggau rambai jaku “Sedia, Jampat, Integriti.”— RBI

MIRI, 26 Feb — Pemesai Opis Nembiak enggau Lumba Bagi Menua Miri Encik Roley anak Lagir, ngulu Pengerami Pengawa Nyiri enggau Anugerah Junior Chamber International (JCI) Miri enggau Lutong 2026 ungkup taun 2026 ti udah nyadi minggu nyin tadi.

Pengerami ninting taun tu nyadi pengawa rasmi JCI ti mandangka pengawa nyiri presiden enggau Kaunsil Direktor baru, kelimpah ari pengawa nyuaka anugerah ngagai kaban ketegal pemujur ke nyulut.

Pengawa ngatur program tu kelai penerus nyadi ketuai, komitmen ti terus sereta pemungkal penggal baru enggau visyen sereta semengat gawa ke komuniti ti tegap agi.

Sama bisi datai nyadi temuai dipebasa Menteri Perengka Pengangkut Sarawak YB Dato Sri Lee Kim Shin, ke mega Kaban Kunsil Nengeri (ADUN) N.75 Senadin, enggau Sapit Menteri Dagang Temuai, Industri Kreatif enggau Seni Persembahan Sarawak YB Datuk Sebastian Ting Chiew Yew, ke mega Kaban Kunsil Nengeri (ADUN) N.73 Piasau.

Opis Nembiak enggau Lumba Bagi Menua Miri ngenataika pengaga ati ngagai kaban komiti baru ungkup taun 2026 sereta ngarapka pengandal ke udah dilempaika ngagai sida ulih dipejalaika enggau manah, lalu enggau nya ulih ngiring organisasyen ngagai tikas ke lebih progresif sereta meri empas positif ngagai komuniti setempat. — RBI