BELAGA, 27 Feb — Tiga iku lelaki menua tu ditangkap polis pengudah dipelaba bisi kaul enggau aktiviti salah guna dadah nengah operasyen ke dipejalaika ari 26 ngagai 27 Februari 2026.

Tim pemesai ari Bagi Pansik Jenayah Narkotik, Indu Opis Polis Pelilih Belaga, ngetan ketetiga saspek dalam gaya ke disyaki sebedau bejalaika pengawa meresa keterubah ba endur nya.

Taja pia, pengawa meresa nya nadai tetemuka sebarang barang ke enda entas.

Berindik ari nya, semua saspek dibai ngagai Balai Polis Sungai Asap ngambika atur ke silik agi dipejalaika.

Asil peresa ai kemi tetemuka sida tiga ditemu positif Amphetamine enggau Methamphetamine.

Kes tu dipansik ari baruh Seksyen 15(1)(a) Akta Dadah Berbahaya 1952.

Raban polis ngemeratka komitmen sida ti terus ngemuntanka pengawa salah guna dadah lalu minta mensia mayuh terus meri kerejasama dalam nyadung penerang dikena nentuka pengelikun enggau pengelantang komuniti seruran dijaga. — RBI

SONG, 27 Feb — Prinsip “Anang Rindang” tauka anang malas terus nyadi lalau Kaban Kunsil Nengeri (ADUN) Katibas YB Lidam Assan dalam komitmen iya gawa ke rayat di kandang menua Katibas, ari pagi nyentuk ke malam.

Tumu pukul 7.00 pagi kilah ensanus, iya udah ngatur penemuai begulai enggau staf sereta pemesai ari mayuh bengkah ejensi enggau opis perintah sebedau ngabas gaya pejalai projek Jematan Musah di Song.

Udah nya, iya nerima penerang pasal projek selapak pengerusak tanah di Kampung Gelam sereta nemuai ngagai palan projek dikena beratika pejalai pengawa bejalaika iya.

Ngalih hari, ADUN Katibas bejalai ke Kanowit ngabas Projek Jalai Nanga Kabah/SK Beguang/Sungai Song (Renggat 1).

Projek tu nyadi infrastruktur beguna ti nyambung beberapa buah rumah panjai enggau sekula, nyengkaum SK Beguang, dikena ngemudahka pemindah peranak kelebih agi pengudah mayuh servis ekspres diketu berindik ari penembu jalai Sibu/Kanowit–Song/Kapit.

Iya udah nya neruska aktiviti ke Sibu ngulu pengerami rasmi muak ke lemai nya.

Ba penerang iya, Lidam Assan ngenataika pengaga ati enggau pejalai pengawa ngaga jalai nya, ke diatu ngayanka pemansang ti meransang.

Iya nyemetak madahka pengawa matau projek pemansang ti enda ngetu nyadi tanggungpengawa pengari rayat dikena nentuka perengka guna asas ulih diasaika penuh komuniti menua pesisir. — RBI

MIRI, 27 Feb – Balai Bomba enggau Penyah Penusah (BBP) Lutong nerima pemeri chek ungkup guna Kelab BBP Lutong dalam pengerami pandak ke diatur ba Opis SUPP Pampang Piasau, sehari tu.

Pemeri nya disuaka Datuk Sebastian Ting Chiew Yew ke mega Sapit Menteri Dagang Temuai, Industri Kreatif enggau Seni Pemerindang (Dagang Temuai) sereta Kaban Kunsil Nengeri (ADUN) N73 Piasau.

Ketuai BBP Lutong, PBT II Henry Jugah madah, pemeri nya deka dikena penuh bejalaika mayuh bengkah aktiviti kelab ti ngaul kaban stesyen.

Nitihku iya, belanja nya deka dikena ngatur aktiviti pengelantang pendiau, lumba enggau main, rekreasyen enggau komuniti ti ulih ngenegapka semengat beraban enggau pengelantang bala kaban.

“BBP Lutong amat beterima kasih ngagai sukung enggau pengibuh ke diberi.Pemeri tu ukai semina mantu ngelancharka perambu aktiviti kelab, tang mega nyadi penambah kaul rat agi entara ejensi enggau komuniti,” ku iya lebuh dikerandau pengudah pengerami nyerahka pangku pengawa nya.

Ku iya nambah, inisiatif baka nya mandangka kerejasama ti seruran dipejalaika entara ketuai komuniti enggau ejensi pengelikun dalam nentuka pengelantang pendiau kaban seruran diberi perati.

Pengawa nyerahka chek nya diatur enggau chara ti mudah tang bisi reti, lalu enggau nya meri pengeransing baru ngagai raban BBP Lutong ngambika terus meri servis ke pemadu manah ngagai komuniti. -RBI

PAKAN, 27 Feb – Sepenyampau 20 iti setipikit nyiri Ketuai Komuniti enggau Ketuai Raban Bansa (KMKK) enggau 28 iti setipikit Komiti Pemansang enggau Pengelikun Genturung Pendiau (JKKK) udah disuaka kemari ba Pengerami Nyuaka Setipikit KMKK enggau JKKK di Dewan Masyarakat Pakan.

Dalam jaku dipansutka Pemesai Pelilih Menua Pakan, Mohd. Irwan Abdullah @ William Manggoi, nyemetak madahka bala ketuai renggat baruh bejalaika tanggungpengawa ti beguna dalam nyukung rayat sereta nentuka pemansang kandang menua nya bejalai enggau lanchar.

Iya mega ngemeratka pemesai guna media rama nyadika pelasar komunikasyen dikena bekunsika pemansang enggau pemujur di kandang menua Pakan terus ngagai komuniti.

Iya mega nyemetak madahka pengari rayat DUN N.47 Pakan, Tan Sri William Mawan Ikom seruran ngabas rayat sereta bisi ngangauka bala ketuai, nyengkaum Premier Sarawak, Sapit Premier, Menteri enggau Sekretari Perintah, datai ngabas lalu meda kediri empu utai ke diguna enggau pemansang ba sitak tu.

Nya alai ku iya madah, pengawa madahka ADUN Pakan nadai nurun ngabas rayat bejalaika pengawa ti disadung ba media rama nya enda betul.

Ari sukut pemansang, William Manggoi madahka sistem jalai alun diatu udah tembu, semua rumah panjai bisi akses, seraya bekal kuasa karan udah diasaika udah nyapai urung 99 peratus.

Bekaul bekal ai beresi, iya madahka diatu udah chukup, taja pan sekeda kandang endur agi begunaka perati tambah.

Berebak enggau nya, iya ngingatka bala kaban JKKK pasal tanggung pengawa sida nitihka TR F.5 enggau Bup Adat Iban 1993, lalu ngenataika pengaga ati iya ngagai tuai rumah ke dulu ari nya ketegal pemeri sida dalam nentuka pengawa lalu nyerahka pengawa enggau lanchar.

Ungkup 28 iku kaban JKKK ke baru tauka dikemaru nya, iya ngarapka sida nyadi sekretari JKKK ke chakah, landik sereta rajin bejalaika pengawa ungkup pengelantang komuniti di Pelilih Pakan.

Sama bisi datai ba program tu iya nya ADUN Pakan ke mega Penyanding Penemu ba Opis Premier (Industri Pemakai, Komoditi enggau Pemansang Kandang Menua Sarawak) Tan Sri William Mawan Ikom. -RBI

BAU, 27 Feb — Siku lelaki peranak menua nya ditangkap polis pengudah dipelabaka ngaul diri enggau aktiviti loteri ti nadai lisin dalam operasyen ti dipejalaika urung pukul 11.20 malam, ditu kemari.

Ketuai Polis Pelilih Menua, Mohd. Haide bin A. Rahman, madahka tim pemesai ari Indu Opis Polis Pelilih Bau udah bejalaika pengawa meresa saspek di belakang sebuah premis kedai di Bau.

“Asil peresa tetemuka lelaki nya dipelaba bisi kaul enggau aktiviti loteri enggau nadai lisin.

“Saspek ditangkap ba palan penusah ke nyadi lalu sekeda barang bekaul mega dirampas dikena mantu pengawa mansik silik agi,” ku iya nengah penerang.

Nitihku iya, keretas pansik udah dibuka ari baruh Seksyen 4A(a) Akta Rumah Judi Tebuka 1953.

Berindik enggau nya, mensia mayuh dilalau anang ngaul diri enggau sebarang aktiviti bejudi laban atur ke terit deka dipejalaika ngagai sebarang piak ke ngelanggar undang-undang ulih Polis Diraja Malaysia.

Mensia mayuh ke bisi penerang bekaul enggau aktiviti bejudi tau ngenataika penerang nya ngagai IPD Bau ba lumur 082-763311 tauka ngagai balai polis ke besemak ngambika ulih mantu pansik ke silik agi. — RBI

KUCHING, 27 Feb – Gerempung Tuai Rumah Sarikei ngarapka piak bekuasa nengeri ulih beratika isu ngaku ketuai rumah ngempung panjai 10 pintu dikena nentuka ketuai rumah panjai ke entas dikelala, ari nya ulih ngangkatka servis enggau pengelantang pendiau komuniti.

Pengari gerempung nya, Pitre enggau Keli Anggai mega meri langgur penemu ngambika ketuai rumah panjai ke diaku diberi elawin ninting bulan urung RM200 tauka lebih ngambika sida ulih bejalaika tanggungpengawa enggau manah.

Kaban Kunsil Nengeri (ADUN) Pakan, Tan Sri William Mawan Ikom andal amat gempung perintah nengeri iya nya Gempung Parti Sarawak (GPS) deka tebuka dalam mutarka isu nyiri sereta ngaku ketuai rumah panjai di Sarawak.

Presiden Gerempung Bansa Dayak Sarawak (SDNU) ke mega penyanding penemu Opis Premier Sarawak (Industri Pemakai, Komoditi enggau Pemansang Kandang Menua) nyemetak madahka isu tu ukai pekara ke baru, kelebih agi ba komuniti Iban ke alai pengawa ngatur rumah panjai bejalaika tanggungpengawa besai.

Ku iya nerang, nitihka garis lalau ke udah bisi, rumah panjai selalu iya begunaka timpuh manggai ba 20 pintu sebedau sebuah ketuai rumah panjai diaku enggau rasmi sereta diberi kuasa.

Taja pia ku Mawan, Kabinet nengeri sebedau tu udah bejalaika singkang proaktif iya nya nempa urung 500 pangku pengawa tuai rumah tambah dikena mutarka penanggul suntuk nyadi ketuai ba renggat rumah panjai.

“Dalam kandang berapa taun ke udah, beratus iti pangku pengawa tambah udah dikemendarka dikena mutarka penanggul suntuk ketuai ti diaku. Ba sekeda kes, tuai rumah dichiri taja sida enda nyapai ambang ti ditetapka, mandangka pengelengkas perintah dalam nangkup guna komuniti,” ku Mawan.

Iya madah munyi nya lebuh nerima penemuai basa ari Gerempung Tuai Rumah Bagi Menua Sarikei, ti betuaika Pitre Ambit Tayup enggau sekretari Keli Angai, ngangauka iya bejadika pengawa sida di Sarikei.

Mawan nyemetak madahka taja nyangka bisi enda puas ati ba sekeda piak, tang iya andal Kabinet nengeri ari baruh GPS deka nyikap diri beratika pengirau ke entas.

“Perintah enggau naka ulih nangkup peminta nya nengah bemacham bekal enggau atur ke bisi disediaka.GPS ngembuan peneleba enggau kapasiti ngiga jalai mutar,” ku iya seraya nyemetak madahka pangku pengawa iya ke nyadi ketuai komuniti iya nya meri sada ngagai rayat, ukai ngaga pemutus eksekutif.

Berebak enggau nya, Keli minta perintah nengeri ngaku enggau rasmi ketuai rumah panjai 10 pintu di Sarikei nengah chara ngeluarka surat chiri tauka setipikit rasmi.

Ku iya, pengangkun formal beguna ngambika bala tuai rumah ulih bejalaika tanggungpengawa sida enggau manah, kelebih agi ba pekara pengelikun, pentadbiran enggau aplikasyen pemansang.

“Sekeda rumah panjai mit nyengkaum ke bisi urung 10 pintu, beoperasyen enggau nadai dokumen rasmi ti ngentaska ketuai sida.

“Ketegal nya, tuai rumah tusah deka napi ejensi perintah tauka minta bantu enggau pemendar ungkup pengawa ngemanah enggau ngangkatmanah infrastruktur,” ku iya nerang.

KUCHING, 27 Feb — Sapit Premier Sarawak, Douglas Uggah Embas nyadi chairman Aum Lembaga Ketujuh Ejensi Pemansang Tanah Tinggi (HDA), kena Hari Tiga dikena beratika pejalai inisiatif pemansang di tanah tinggi, nyengkaum pemansang Projek Jalai Miri–Marudi, Marudi–Mulu (Kuala Melinau), Long Panai–Long Lama (MMMLL) ti nyadi penyungkak ngagai rentayan penyambung jalai ba kandang menua pesisir.

Aum nya bela digulu Sapit Chairman HDA, Dato Gerawat Gala, begulai enggau kaban Kaunsil, pengari industri enggau pemesai kanan perintah.

Randau nya ngemeratka pemerat ngenegapka pengawa bejalaika projek infrastruktur enggau program sosio-ekonomi nengah chara ti lebih beserakup, setipak enggau tagit pemansang ti meruan sereta inklusif di Sarawak.

Nitih ku Gerawat, pangku pengawa HDA beguna amat dalam ngerapitka seraka pemansang entara kandang mengeri enggau kandang menua ulu, kelebih agi di pelilih menua Baram ti ngembuan potensial ke besai dalam sektor dagang temuai, betanam betupi ti berega tinggi enggau ekonomi komuniti.

Taja pia, sitak nya agi napi pemar ari sukut perengka guna pemun nyengkaum rentayan jalai alun, bekal kuasa karan, ai beresi enggau bungkur telekomunikasyen.

Iya mega meri besai terima kasih ngagai Perintah Sarawak ti betuaika Premier Sarawak Datuk Patinggi Tan Sri Abang Johari Tun Openg ti bebendar mai pemansang infrastruktur ngagai menua ulu nengah HDA.

Dalam timpuh lima taun ke udah, ejensi nya udah nerima agih belanja sepenyampau RM1.5 bilion, enggau RM1.2 bilion dikena ngangkatmanah urung 400 kilometer jalai batang ke suba seraya RM300 juta agi diungkupka ngagai projek bekal ai beresi.

Sekeda ari projek nya udah tembu lalu ke bukai agi benung dipejalaika.

Gerawat nambah, pengawa ngaga jalai MMMLL ti benung dipejalai dikearapka ulih meransang penumbuh ekonomi kandang menua taja pengawa bejalaika iya begunaka ungkus ti besai sereta timpuh ti lama agi ketegal faktor logistik enggau endur ti jauh.

Nitihka penerang ari RECODA, aum nya mega mansik chara ti lebih koordinat ba pengawa ngenataika projek dikena nentuka penguntung ari pemansang ulih diasaika enggau komprehensif komuniti menua pesisir enggau menua pesisir.

Sama bisi datai Penyanding Penemu HDA Alfred Jabu anak Numpang; Ketuai Pemesai Eksekutif RECODA Ismawi Ismuni; Dennis Ngau; Anyi Ngau; Sekretari Mendam Opis Menteri Infrastruktur enggau Pemansang Palan Penyangkai Kapal Sarawak Chiew Chee Yau; Direktor Unit Perambu Ekonomi Sarawak Awg Mohd Fadillah Awg Redzuan; Direktor Kandang Menua HDA Juan Ubit; enggau Residen Bagi Menua Miri Galong Luang. — RBI

BAU, 27 Feb — Sepenyampau 13 iku lelaki beumur entara 21 ngagai 35 taun ditangkap dalam operasyen bersepadu ti dipejalaika raban Bagian Pansik Jenayah Narkotik begulai enggau Indu Opis Polis Pelilih Menua ari urung pukul 5.30 pagi nyentuk 9.30 pagi ba kandang pelilih Menua Bau, ditu kemari.

Ketuai Polis Pelilih Bau, P/Supt Mohd Haide bin A. Rahman, madahka operasyen nya mujur nangkap semua saspek ke dipelaba bisi kaul enggau aktiviti salah guna dadah asil ari pengawa peresa ngenyit enggau meresa ba endur ke ditagit.

Nitihku iya, dua ari saspek nya ditan ari baruh Seksyen 12(2) Akta Dadah Berbahaya 1952 pengudah tetiap iku sida ditemu ngembuan bungkus plastik lutsinar ti ngundan gumpal kristal ti dipelaba syabu.

“Asil peresa ai kemi keterubah tetemuka semua 13 iku saspek ditemu positif dadah lalu sida ditangkap ari baruh Seksyen 15(1)(a) akta ke sama dikena mantu pansik ke silik agi,” ku iya ba sebengkah penerang.

Iya nyemetak madahka Polis Diraja Malaysia enda bekompromi ba sebarang pengawa ngaul diri dalam aktiviti salah guna dadah lalu deka terus chakah agi bejalaika operasyen neritka atur ari sesiti maya ngagai sesiti maya.

Mensia mayuh ke bisi penerang bekaul enggau aktiviti dadah tau ngenataika penerang nya ngagai Opis Tasat Jenayah Narkotik di Bukit Aman nengah lumur 012-208 7222 tauka betanya ngagai talipaun Indu Opis Kontinjen Polis Sarawak ba lumur 017-592 9211. — RBI

BINTULU, 27 Feb — Siku lelaki bebadi nyawa pengudah van ke dideriba iya eksiden ba jalai besai besemak enggau Sepital Columbia Asia, Bintulu, ditu kemari.

Mansa beumur31 taun nya, dientas lesi ba palan penusah nyadi ketegal balat bakal pengudah entukar ke dideriba iya dipelabaka enda ulih dijaga sebedau ngelantak pun kayu ba tisi jalai ba penusah nya urung pukul 10.25 pagi.

Pengari Opis Bomba enggau Penyah Penusah Sarawak madah, seraban raban ari Balai Bomba enggau Penyah Penusah Bintulu berumban ngesah ke palan penusah nyadi pengudah nerima kangau ngenyit.

Nitihku penerang nya, raban penyelamat ngena perengka khas mansutka mansa ke tepekul ba penuduk deriba.

Taja pia, raban perubat ari Opis Menteri Pengerai Malaysia ngentaska mansa lesi ba palan penusah nyadi.

Tubuh mansa udah nya diserah ngagai polis ngambika atur silik agi dipejalaika.

Kebuah kebendar penusah tu nyadi agi benung dipansik piak bekuasa. — RBI

SRI AMAN, 27 Feb — Pengawa jampat raban Opis Bomba enggau Penyah Penusah Malaysia mujur napi penusah pun kayu tumbang ngempang jalai ba Jalai Taman Harmoni, Sri Aman, pagi tadi.

Palan Operasyen nerima kangau ngenyit bekaul enggau penusah nya urung pukul 7.54 pagi sebedau tim raban enggau Fire Rescue Tender (FRT) enggau unit EMRS dianjung ngagai endur ke bepalan urung satu kilometer ari stesyen nya.

Operasyen nya betuaika PBK I (TBK I) Mohd Fadhli Buyong. Lebuh datai ba endur nya, raban nya tetemuka pun kayu ke tumbang ngempang jalai.

Raban Bomba tekala nya beratika gaya enggau ngena perengka pengelikun diri penuh sebedau bejalaika pengawa ngupas sereta netak nyentukka penanggul nya diputarka.

Operasyen nya mega nerima bantu ari tiga iku raban Angkatan Pertahanan Awam Malaysia enggau pengari ejensi ke bekaul.

Nadai bakal diripotka nyadi sereta nadai komplikasyen nyadi sepemanjai operasyen nya.

Pengudah nentuka gaya nya likun bendar sereta nadai risiko penusah bukai, tim operasyen nembuka pengawa sida lalu pulai ngagai stesyen. — RBI