LONDON, 4 Mac – Dalam gaya ti penuh enggau pemerat sereta prestasi ti enda tentu, Wolverhampton Wanderers milih enda ngaku alah demalam maya ngelaban Liverpool FC dalam main Liga Premier ti richah ba Stadium Molineux.

Nyadi tim ke nyau deka tentu deka ditikika, Wolves baka nadai utai dikenangi. Sida ulih matahka serang Liverpool sepengudah tim Arne Slot ti benung bebendar deka ngulihka slot ba Liga Champions UEFA musin ti deka datai.

Liverpool nguasa tempo ari pun, tang pengujung main sida iya ngasuh sida irau.

Disiplin enggau penyabar tim tuai rumah pengujung iya meri asil ba minit ke-78 lebuh Rodrigo Gomes ngemasukka gol.

Lima minit udah nya, Mohamed Salah pansut nyadi penyelamat sementara ungkup The Reds enggau gol ba minit ke-83. Pengarap bala tim Liverpool diidupka baru.

Taja pia, malam nya enggi Wolves.

Lebuh main nya tama ngagai timpuh masa tambah, Andre ngulihka pemenang dramatik ungkup tim tuai rumah enggau gol penentu, meri sida tiga poin ti berega sereta pemenang liga keterubah beturut-turut kenyau ari bulan April 2025.

Seraya penuduk liga engka enda mayuh berubah, pesan Wolves terang, sida enda deka nyerah enti. – RBI

KUCHING, 3 Mac – Pengawa siku indu ngadaka anak mit ke enda chukup umur datai ba tikas ke pemadu tinggi lebuh iya diukum Kort Majistret RM4,000 ditu sehari tu ketegal ngelamun pengada anak mit nya nengah chara nguburka anak mit nya.

Indu nya beumur 24, ngaku salah ba mua Majistret Ling Hui Chuan ba dawa ari baruh Seksyen 318 Kanun Keseksaan ti nyendiaka ukum jil nyentuk dua taun tauka ukum mata duit tauka kededua ukum enti dikenuku salah.

Kort dipadahka, indu ke dituduh ke bedau belaki nya ngadaka anak mit lelaki ke enda chukup umur lebuh iya ngandung tujuh bulan ba bilik mandi rumah iya kena 28 Januari tu tadi, anak mit nya dientaska udah lesi pengudah ada.

Dalam gaya ti irau sereta enda besedia deka beranak, indu nya nguburka anak mit nya ba kandang babas ba mua rumah iya dikena ngelamun penusah nya.

Taja pia, pengawa iya tebantai pengudah iya minta perubat ba Sepital Besai Sarawak ketegal pedis perut sereta bedarah sebedau madah ngagai lutur iya udah beranak.

Ripot polis udah digaga lalu pansik ke silik ngujungka tubuh anak mit nya ditemu dikubur ba mua palan pengentap pendiau iya.

Kort netapka ukum mata duit RM4,000 tauka jil enam bulan enti enda mayar.

Iya diarika luyar Milton Foo lalu pengawa bedawa dipejalaika Sapit Pendawa Raya Ahmad Fauzulutfi Suriani. -RBI

BAU, 3 Mac — Polis Diraja Malaysia (PDRM) mujur nangkap siku lelaki peranak menua nya dipelaba bisi kaul enggau aktiviti judi online (JOL) maya pengawa meresa ba premis kedai di pelilih menua nya, lemai tu tadi.

Ketuai Polis Pelilih Bau, P/SUPT. Mohd. Haide bin A. Rahman ba sebengkah penerang iya madahka, pengawa meresa ti dipejalaika Bagi Siasatan Jenayah, Indu Opis Polis Pelilih (IPD) Bau urung pukul 2.00 lemai tetemuka saspek dipelabaka bisi kaul enggau aktiviti bejudi nengah ‘online’.

“Saspek ditangkap ba palan penusah ke nyadi lalu sekeda barang ke bekaul mega dirampas dikena mantu pengawa mansik silik agi,” ku iya.

Nitihku iya, keretas pansik udah dibuka ari baruh Seksyen 4B(a), Akta Rumah Judi Tebuka 1953 ngambika atur ke bukai dipejalaika.

Ku iya nambah, raban polis deka terus chakah agi bejalaika operasyen enggau pengawa matau dikena ngemuntanka aktiviti bejudi nadai pemendar di pelilih tu.

Berindik enggau nya, mensia mayuh dilalau ngambika enda ngaul diri enggau sebarang aktiviti bejudi ti enda beradat.

Sebarang penerang bekaul enggau aktiviti bejudi tau disalur ngagai IPD Bau ba lumur 082-763 311 tauka sebarang balai polis ke besemak ngambika ulih mantu tasat enggau atur ke nangkanka nya ari raban polis. — RBI

KUCHING, 3 Mac — Opis Rampa Menua (JAS) Sarawak, kemari udah bejalaika pengawa matau nangkan nya dikena ngelala kebuah ti tau nyadi ketegal bacha ba Stesyen Pematau Kualiti Ai Manual Sungai di Sungai Samarahan manggai ba ‘extreme value’.

Nitihka penerang ba Facebook rasmi opis nya, ‘extreme value’ nunjukka bacha ke ngelui ari jurai ke dirikod sebedau tu.

JAS Sarawak madahka pansik enggau pengawa matau ba palan udah dipejalaika ngelingi Sungai Samarahan dikena meresa sebarang faktor tauka aktiviti ke nyangka bisi meri pangka ngagai penambah bacha.

Kelimpah ari nya, pengawa matau ari langit ngena dron mega dipejalaika ba sekeda endur ke besemak dikena ngulihka gambar ke komprehensif gaya kandang endur ke kena penusah nya.

Berebak enggau nya, bacha ‘in situ’ mega diambi dikena beratika parameter kualiti ai terus ba palan penusah nyadi, lalu enggau nya ngemendarka pengawa beratika keterubah digaga ba gaya sungai ke diatu.

JAS Sarawak ngemeratka komitmen opis nya terus nentuka kualiti ai seruran dipatau sereta ba tikas ti nitihka standard ti udah ditetapka.

Pengawa matau ke silik agi deka terus dipejalaika ari sesiti maya ngagai sesiti maya bepelasarka asil pansik. — RBI

KAPIT, 3 Mac — Pengerami Nyerah enggau Nerima Pangku Pengawa Direktor Wilayah (RD) Ejensi Bekuasa Pemansang Ulu Rajang (URDA) udah diatur ba Opis Ejensi Bekuasa Pemansang Koridor Wilayah (RECODA)/URDA di Kapit sehari tu tadi.

Pengerami nya meda Sagu Unting enggau rasmi mangku pengawa nyadi RD ari Dr. Nelson Brandah ti sebedau tu mangku pengawa nya.

Pengawa nyerahka pengawa nya kelai penerus nyadi ketuai enggau komitmen ti terus dalam meransang agenda pemansang di pelilih menua Ulu Rajang.

Sagu sebedau tu ngambi pinchin wajib ari pangku pengawa Superintenden ba Opis Tanah enggau Survei (JTS) Bagi Menua Kapit.

Pengawa nyiri iya nyadi RD URDA ke baru dipechaya ulih ngenegapka pengawa merintah sereta ngenyampatka pengawa bejalaika projek pemansang ari baruh ejensi nya, setipak enggau pelin ke udah dilangkar.

Dr Nelson udah mangku pengawa nyadi RD URDA lebih setaun.

Dalam timpuh nya, iya mega mangku tanggungpengawa nyadi Ketuai, Perambu Sosioekonomi enggau Pemeranak Puku URDA, sereta bejalaika tanggungpengawa ke beguna amat dalam ngenegapka perambu enggau bejalaika inisiatif pemansang pelilih menua.

Tekala nya pengudah pengerami nya, aum khas diatur enggau RD baru berandauka tuju strategik enggau pemansang projek URDA ke diatu.

Aum nya mega digulu tujuh iku Pemesai Penyambung Komuniti (CLO) sereta mega staf RECODA enggau URDA.

Pengawa nyiri tu dikearap ulih nentuka pengawa bejalaika agenda pemansang diteruska enggau teratur sereta meri empas tinggi ungkup pengelantang komuniti di pelilih menua Ulu Rajang. — RBI

KUCHING, 3 Mac – Atur jampat dipejalaika polis ngujungka siku orang tuai beumur 70 taun dipelabaka bisi kaul enggau kes ngachau seksual dua iku menyadi indu ba sebengkah penusah ke nyadi ba Jalai Sultan Tengah, bedau lama tu tadi.

Ketuai Polis Pelilih Kuching, ACP Alexson Naga Chabu madahka saspek ditan urung pukul 11.25 malam kena 2 Mac pengudah ripot bekaul enggau penusah nya diterima piak bekuasa.

Nitih ku iya, pengawa ngetan nya digaga ngambika pansik silik ulih dipejalaika nyengkaum pengawa ngumpul bukti enggau ngerikod penerang saksi.

“Saspek diatu diriman dikena mantu pengawa mansik silik agi. Kes tu dipansik ari baruh Seksyen 354 Kanun Keseksaan,” ku iya nengah penerang media.

Nengah atur nya, enti diukum, orang ke dituduh tau dijil nyentuk 10 taun, kelimpah ari ukum mata duit tauka sipat.

Berebak enggau nya, iya nyemetak madahka polis beratika sebarang kes ti ngaul pengelikun enggau maruah nembiak mit enggau berat sereta nyamin atur ti terit deka dipejalaika enggau nadai belembut ngagai sebarang individu ti bisi kaul.

Polis mega ngingatka apai indai enggau penyaga ngambika seruran nambahka pengawa matau pemindah enggau pengelikun anak mit, kelebih agi ba genturung pendiau enggau palan mensia mayuh.

Mensia mayuh ti bisi penerang bekaul enggau kes tu dipinta betanya ngagai Palan Kawalan Indu Opis Polis Pelilih Kuching nengah lumur 082-244444 ngambika ulih mantu tasat.

Pansik ke silik agi benung dipejalai lalu pemansang ke pemadu baru deka dipadah ari sesiti maya ngagai sesiti maya. -RBI

MUKAH, 3 Mac -Pengawa bejalaika semua projek di Sitak Kunsil Nengeri ( DUN) Tellian ngayanka komitmen perintah dalam nentuka rentayan pemansang ba kandang genturung pendiau dia seruran manah sereta likun dikena.

Nambahka nya, projek tu ulih ngangkatka kualiti perengka guna pemun sereta ngubah rampa pemansang menua pesisir ngambika kondusif agi.

Kaban Kunsil Nengeri (ADUN) Tellian, Royston Valentine madahka empat projek infrastruktur ari baruh Program Transformasyen Menua Pesisir (RTP) DUN Tellian 2025 udah tembu penuh enggau ungkus penyampau RM650,000.

Projek nya meri penguntung ngagai peranak di kandang DUN Tellian sereta ngaul pengawa ngangkatmanah jematan kaki enggau jematan di Kampung Petanak, Kampung Petanak Hilir, Kampung Petanak Hulu enggau Kampung Tellian Laut.

Iya mansutka jaku tu lebuh bisi datai ngemataka pengawa nyerahka projek RTP DUN Tellian 2025, kemari.

Entara projek tu iya nya ngangkatmanah jematan kaki enggau jematan ti udah tembu penuh.

“Dikearap perengka guna tu ulih meri pemaik maksimum ngagai peranak menua tu.

“Taja pia, tanggungpengawa ngintu sereta nyaga infrastruktur tu iya nya amanah bekunsi ngambika ulih dikena dalam timpuh ke panjai agi,” ku iya.

Berebak enggau nya, Royston ngenataika pengaga ati iya ngagai Premier Sarawak, Datuk Patinggi Tan Sri Abang Johari Tun Openg ketegal agih belanja RTP ti dikenataika. -RBI

KUCHING, 3 Mac — Perintah Sarawak tetap ransing negapka autonomi nengeri dalam agenda ubah gaya hari setipak enggau pekara ti ditetapka dalam Sempekat Malaysia 1963 (MA63), seraya ngemeratka pengawa ngatur polisi ti tegap enggau Perintah Besai.

Premier Sarawak, Datuk Patinggi Tan Sri Abang Johari Tun Openg nyemetak madahka ari baruh MA63 enggau Konstitusyen Perintah Besai, Sarawak bisi kuasa signifikan ba tanah, kampung, marin enggau pengeraja asal.

Iya madahka, Sarawak enggau Sabah menua ba tetengah naratif iklim Malaysia ngembuan aset ti meri pangka positif ba pengawa nagang gaya hari ti angat laban ti ngembuan kampung besai, kaya biodiversiti sereta rampa menua mayuh karbon.

“Lebuh kitai bisi aset ti meri empas positif ba pengawa nagang gaya hari ti angat, kitai sama bejalaika tanggung pengawa begulai enggau raban antarabansa baka Bank Dunya, iya nya bakani chara ngatur aset nya ti bepelasarka undang-undang antarabansa enggau undang-undang menua.

“Lalu kitai (Sarawak) enggau Perintah Besai mega bekerejasama ba pengawa ngatur pekara bekaul enggau iklim tauka gaya hari tu, nya kebuah aku nyebut ulih begulai sama (coherence).

“Sabah enggau Sarawak iya nya aset besai Malaysia, kitai ti ngembuan aset ti signifikan, ti pemadu beguna baka kampung, tanah enggau mega pengawa nyaga (rampa menua),” ku iya.

Iya nerangka pekara nya lebuh dirandau raban pengarang berita pengudah iya bejadi ‘Subnasional Climate Change Institustional Assessment’ ti diatur Opis Menteri Energi enggau Pemeruan Rampa Menua (MEESty)ba sebuah hotel ditu, sehari tu.

Abang Johari ti mega Menteri MEESty lebuh bejaku ba pengerami bejadi madahka, pengawa ngatur gaya hari ti efektif di Malaysia begunaka pengawa ngaku pangku pengawa enggau tanggung pengawa Sabah enggau Sarawak nyadi nengeri ti ngembuan pengeraja asal kampung ti besai sereta rampa menua karbon kelimpah ari nentuka penyerakup menua dijaga.

Ku iya, chara nya ukai dikena ngaga adan tauka garis entara renggat perintah, tang dikena ngaga jematan ngambika aspirasyen polisi ba renggat Perintah Besai enggau pengawa bejalaika ba renggat nengeri ulih negapka agi pangan diri.

“Tu ukai pasal ngaga adan. Tu bekaul enggau ngaga jematan ngambika aspirasyen perintah besai enggau ke dipejalaika ba renggat nengeri ulih ngenegapka agi pangan diri.

“Sarawak tetap komited ngagai penyereta konstruktif begulai enggau perintah besai sereta Sabah dikena nentuka pengawa nyerariska polisi, pengawa ngatur beranakka puku enggau sama belajar.

“Nengeri ke tegap deka ngenegapka agi perintah besai, lalu pengawa ngatur ti seraris deka ngenegapka pengetan nasional,” ku iya.

Berebak enggau tu iya nyemetak madahka kerejasama Perintah Sarawak enggau Bank Dunya iya nya konstruktif, silik enggau bepenemu jauh.

Sama bisi datai ba pengerami tu Sapit Premier Sarawak, Datuk Amar Douglas Uggah Embas enggau Datuk Amar Dr Sim Kui Hian; Sapit Menteri MEESty, Datuk Dr Hazland Abang Hipni enggau bala menteri sereta sapit menteri, kaban kunsil nengeri (ADUN); Ketuai Tebangkar Ekonomi Malaysia, Bank Dunya, Apurva Sanghi enggau sida bukai.

SEBAUH, 3 Mac – Projek ngaga masjid baru di Sebauh diatu benung masuk renggat pengatur dikena nentuka rumah sembiang nya ukai semina tembu nitihka timpuh, tang mega likun ari penusah ngenyit.

Aum pengatur khas udah bechairmanka Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom kena Hari Dua tu tadi.

Aum nya ngembuan tuju deka nerangka enggau silik pelin pengawa dikena mutarka sekeda penanggul teknikal ke nyadi ba palan endur ngaga.

Entara batang fokus ke dikerandau iya nya pengawa mutarka risiko bah, mindahka infrastruktur utiliti, enggau status ngempu tanah ungkup institusyen pengarap ba kandang endur ke ngelingi.

Dikena nentuka struktur masjid nya dijaga ari ampuh bah jemah ila, komiti teknikal udah mutuska tikas tebing selapat deka ditambah. Tikas baru tu deka disemelaka enggau peninggi begunan gerija enggau mini stadium ke bepalan semak dia.

“Kunteriktor udah diasuh terit bejalaika kereja ngaduka tanah nya enggau lengkas enggau nadai betangguh agi,” ku penerang ti dipansutka pengudah aum nya.

Kelimpah ari isu tikas tanah, aum nya mega bisi ngenang pasal bisi dua kabel baruh tanah ke diempu Sarawak Energy Berhad (SEB) ke bepalan ba pintu penama besai entara masjid, gerija, enggau stadium mini.

Nyadika chara mutarka penanggul nya, SEB diberi tanggungpengawa bejalaika pansik silik ba palan projek, ngenataika langgur penemu teknikal ti pemadu likun ngagai bala konsultan enggau kunteriktor, lalu nentuka Opis Agama Islam Sarawak (JAIS) seruran dipadah pasal pejalai pengawa mindahka kabel nya.

Berebak enggau nya, sukut pengelantang komuniti ukai Islam mega diberi perati. Isu status pengempu tanah ungkup Na Tokong Sebauh enggau Gerija Methodist Siong Inn udah dibantaika pengari menua nya, Phang Leong Hui.

Dokumentasyen ngempu tanah ke entas nyadi peminta kunsi ngambika institusyen tu ulih minta geran ari Unit Pekara Pengarap Bukai (UNIFOR) ungkup tuju ngintu sereta ngangkatmanah perengka guna.

Nimbal pekara nya, Dr.Rundi nerangka pekara bekaul enggau ngempu tanah ari baruh kuasa Opis Tanah enggau Survei. Iya nyamin pekara tu deka dibai ngagai renggat opis ti bekaul ngambika diperunding enggau silik agi.

Kerejasama entara ketuai kandang menua, ejensi perintah baka JAIS enggau SEB, sereta mega ketuai komuniti (KMKK) dipeda nyadi pengerembai besai dalam nentuka pemansang di Sebauh meri pemaik inklusif ngagai semua peranak iya. -RBI

KUALA LUMPUR, 3 Mac – Perintah Besai udah ngemendarka belanja sepenyampau RM186.86 juta dikena bejalaika 117 projek pemansang ba sitak Parlimen Julau berengkah ari taun 2018 ngagai 2026.

Pekara nya dipadahka Menteri ba Opis Menteri Besai (Sabah enggau Sarawak), Datuk TS Mustapha @ Mohd Yunus Sakmud, nengah saut betulis ngagai tanya ukai lisan ba Dewan Rakyat.

Saut nya diberi lebuh nimbal tanya ari Kaban Parlimen Julau, Datuk Larry Sng Wei Shien, ti minta Menteri Besai madahka sekalika Perintah deka mansutka pechah silik agih belanja pemansang Perintah Besai ti diberi ngagai Julau kenyau ari taun 2018, nyengkaum nitihka sektor, projek, penyampau agih belanja ejensi ti bejalaika pengawa.

Nitihku Mustapha, ari semua penyampau RM186.86 juta, RM61.91 juta diungkupka ngagai sektor ekonomi, RM115.95 juta ungkup sektor rama enggau RM9 juta ungkup sektor pengelikun.

Ari sukut status bejalaika projek, bisi 36 projek udah tembu penuh, 32 projek benung dipejalaika diatu, 45 projek benung ba renggat pra-pejalai seraya empat projek udah dikinsil.

Ngenang silik, iya madahka bisi 71 projek dipejalaika Opis Kereja Raya (JKR) Sarawak, 15 projek Opis Kereja Raya Malaysia, enam projek Opis Parit enggau Entali Ai Sarawak (JPS) enggau 25 projek opis menteri bekaul.

Tanya nya dirikod nyadi Tanya No.218 ungkup Aum Keterubah, Penggal Kelima, Parlimen Kelima Belas 2026. – RBI