LONG BANGA, 4 Mac — Jematan Sungai Peluan sepemanjai 43 meter diatu udah tembu penuh enggau meruan sereta dibuka dikena komuniti menua nya.

Nitihka penerang ari Opis Kereja Raya Sarawak, pengawa ngaga jematan nya siti singkang ke besai reti dalam ngenegapka rentayan infrastruktur menua pesisir, kelebih agi ba pengawa ngangkatka aksesibiliti enggau pengelikun ungkup peranak di menua pesisir.

“Pengawa ngaga jematan tu ngemuntangka pemindah komuniti menua pesisir sereta ngangkatka tikas pengelikun enggau penyambung rentayan jalai alun di menua pesisir,” ku penerang nya nambah.

Projek tu mega ngayanka komitmen opis nya terus bejalaika Program Transformasyen Jematan Menua Pesisir (RBTP) nyadi inisiatif strategik dikena ngenegapka perengka guna infrastruktur asas sereta ngangkatka kualiti pengidup komuniti menua pesisir di Sarawak.

Opis Kereja Raya Sarawak nandu baru komitmen sida deka terus bejalaika projek pemansang ti meri empas tinggi ungkup pengelantang rayat, setipak enggau aspirasyen pemansang nengeri tu. — RBI

KUALA LUMPUR, 4 Mac — Pengelama 33 taun nganti siku lelaki bansa Kenyah ari Sarawak, ke idup nadai peranak menua, udah mujur lebuh iya nerima MyKad iya enggau rasmi kena 29 Januari tu tadi.

Soliman Wan, 52, ke ada di Long Banga, Miri megai status peranak sementara tauka kad pengelala gadung kenyau ari umur iya 12 taun berindik ari status peranak menua apai indai iya bedau ditetapka ketegal nadai dokumen pengelala diri.

Lebuh iya nerima MyKad ba Opis Pengerejista Bansa (JPN) di Putrajaya, iya ngaku diri asai enda ulih pechaya pengudah melanja beribu ringgit lalu nyau deka putus pengarap ngiga jalai mutarka status peranak menua iya.

“Maya aku ngagai JPN empai lama, lebuh aku macha surat nya, aku macha lima kali baka orang ke enda nemu macha laban asai ke mimpi.”

“Sebedau tu, aku kala ngumbai diri deka lesi nyadi orang ke nadai nengeri laban udah putus pengarap,” ku iya madah ngagai Bernama lebuh ke betemu ba sebengkah gerija di Petaling Jaya sehari tu tadi.

Soliman ke udah nyadi pastor ba gerija nya kenyau ari 25 taun ke udah madah, apai indai iya nadai ngembuan dokumen pengelala ketegal sida sebilik diau di menua ulu, penanggul perengka pengangkut sereta kurang sedarka pemesai guna dokumen nya maya nya.

Nerangka pemendar peminta nya baka kereja ajih, Soliman meri besai terima kasih ngagai Menteri Dalam Nengeri Datuk Seri Saifuddin Nasution Ismail ketegal pengibuh iya beratika baru peminta iya, ke keterubah iya dikenataika ngagai JPN dalam taun 1993, enggau Opis Menteri Dalam Menua (KDN) dalam taun 1998.

Ngenang bemacham penusah ke udah ditengah iya taja pan bisi setipikit pengada, iya madahka status nadai peranak menua nyekat pemindah iya pansut ari Sarawak, kelimpah ari napi penanggul muka akaun bank, penanggul ngemaruka lisin deriba sereta syarat ke enda masuk akal dikena mansutka duit turu Wang Simpanan Pekereja Tabung Simpanan (Pekerja KWSP).

Taja pan betapi enggau bemacham penanggul rama, iya meri besai terima kasih ngagai Opis Imigresyen Sarawak ti udah meri surat sukung ngagai iya nampung pelajar dalam Biokimia ba Universiti Kebangsaan Malaysia (UKM) dalam taun 1994 suba.

Soliman bebendar deka mantu sereta nyadi sada ngagai individu ke bukai ti nadai peranak menua, kelebih agi ba raban bansa asal Sarawak baka bansa Iban enggau Kenyah ngulihka dokumen pengelala diri.

“Pemadu semak iya nya kami sebilik empu, tiga iku menyadi aku agi nadai menua lalu indai aku ke beumur 72 taun baru nerima setipikit iya pengudah ngerejista pengada iya tiga bulan ke udah,” ku iya. — RBI

KUCHING, 4 Mac – Jaku Menteri Undang-Undang ke dulu suba Zaid Ibrahim apin lama ke udah bekaul enggau Sempekat Malaysia 1963 (MA63) ukai semina ngasuh asa, ngemaruh, enda beradat, sereta ngayanka chara ti terang enda bebasaka penuduk konstitusyen Malaysia Timur.

“Nyadi siku peranak Sarawak ke udah meda enggau mata diri empu pengawa rayat kitai, aku nemu Zahid Ibrahim mansutka penerang ti ngasuh ati ringat sereta tau ngasuh saru.

“Sabah enggau Sarawak ukai ‘tatinf’ ngagai Malaysia. Kitai tu kaling ti sama rata, diikat MA63, 2019 enggau hak sereta autonomi ti mesti dipebasa.

“Dikena ngelengka peminta kami ti entas bekaul keadilan, pemansang enggau pengangkun nyadika penusah politik aja sekalika pengawa ti enda nemu tauka sengaja nguji deka muai kuasa ngena chara ngelenyauka nengeri-nengeri Borneo,” ku Peter John Jaban.

Tampung iya, pengawa nyadi ketuai ukai pasal nyaruka orang bukai, iya nya pasal nyaga integriti bansa.

Bala ketuai politik ti bemain-main enggau semaya konstitusyen nya beduan orang.

“Kami enda bemunyi sekumbang pemeri enggau hak kami dikemelika orang,” ku iya.

Bekaul jaku ti madahka pengawa Sabah enggau Sarawak ti deka nyaga konstitusyen sida nyadika main @ngalahka Malaya” nya sumbung, ngemaruhka diri, sereta ngasuh ati ringat. MA63 enda kala nyadi politik,” terang Peter.

Ku iya, menua tu iya nya sempekat ti ngikat ti nyadika pelasar menua Malaysia. Ngurangka iya ngagai jaku sindir ngemaruhka undang-undang, sejarah, enggau rayat Malaysia Timur.

“Sarawak enggau Sabah enda “ngalahka” sapa-sapa. Kitai numbuhka Malaysia nyadi bakih ti sama rata, enggau pengawa nyaga dikena nyaga autonomi, identiti, enggau perengka guna kitai.

“Ngangkatka isu-isu kemaya hari tu ukai bemunsuh, iya nya netapka hak kitai ari baruh undang-undang enggau semaya ti ngaga bansa tu.

“Realiti nya ngasuh iya beguna agi ngagai Sabah enggau Sarawak bediri beserakup nengah

Blok Borneo, bejaku enggau sada nyawa ti tunggal sereta tegap dikena ngetanka hak kitai, nempa pengidup kitai empu jemah ila, lalu nentuka nasib kitai lalu ukai ditentuka sida ti meda pengawa nyaga konstitusyen kitai ukai nyadika pengeruga ukai nyadika jamin,” ku Peter.

Peter nambah, jaku ke baka nya ngenegapka agi anggap ke udah lama bisi ti madahka sekeda menua Barat lslu raban elit Malaysia majak meda pengirau ati Malaysia Timur enggau ati ti enda rindu.

“Malaysia patut nerima pengawa ti tuai sereta bepelasarka fakta, ukai ‘soundbites’ ti provokatif.

Penyerakup bansa enda ulih digaga bepelasarka jaku sindir tauka jaku ngelesey. Iya mesti bepelasarka basa, integriti konstitusyen, lalu ngaku komitmen sejarah,” ku iya.

Iya nyemetak madahka enti ketuai politik lurus ati pasal penyerakup bansa, sida meseti berengkah

bebasaka hak Sabah enggau Sarawak.

“Sebarang utai ke kurang nya nimbak ari belakang,” ku iya. -RBI

LUTONG, 4 Mac – Atur jampat raban Balai Bomba enggau Penyah Penusah (BBP) Lutong mujur nyelamatka siku orang ke nepan mutosikal ke labuh ngagai parit ke besai ba penusah aksiden kediri empu semak Petronas Lutong, tengahari tu tadi.

Nitihka ripot, kangau ngenyit bisi diterima urung pukul 12.55 tengahari sebedau loceng ditebah urung pukul 12.55.30 tengahari.

Raban bomba ari BBP Lutong tekala nya ngesah lalu datai ba endur nya urung tujuh kilometer ari balai urung pukul 1.03 lemai.

Komander Operasyen, PBT II Henry anak Jugah ke mega Ketuai BBP Lutong madah, lebuh penatai Tim Timbal Operasyen (PKO) ba endur nya, ditemu endang amat bisi penusah bebadi ngaul sebuah mutosikal SYM 110 ke dipelabaka tepawah kediri sebedau labuh.

“Raban tekala nya ngaga ‘size-up’ lalu bejalaika pengawa mansutka tudah ari parit nengah bantu raban ari Opis Menteri Pengerai Malaysia (KKM).

“Tudah bakal lalu dianjung ke sepital ngena ambulans ngambika diperubat enggau silik agi,” ku iya ba sebengkah penerang.

Henry mega nusui, lebuh iya datai ba kandang endur nua ti deka ngagai Pos Opis ngambi surat.

“Aku meda Opis Menteri Pengerai enda ulih ngangkat tudah, aku terus betelefon ngagai bilik kawalan minta bantu ari raban aku ngangkatka tudah.

“Laban tugas kitai iya nya meri servis ngagai komuniti,” ku iya nerang.

Operasyen ke berengkah pukul 1.04 lemai nya mujur tembu enggau penuh pukul 1.06 lemai sebedau bomba bekejang pulai ngagai balai.

Sama bisi ba endur nya dua iku pemesai polis enggau tiga iku raban KKM/ambulans.Nadai ejensi bukai ngaul diri dalam operasyen nya. -RBI

JULAU, 4 Mac – Siku lelaki peranak menua nya beumur 43 taun udah didawa ba Kort Majistret Sarikei sehari tu berindik ari dawa munuh siku orang tuai ba penusah ke nyadi di Julau kena 24 Februari tu tadi.

Ketuai Polis Pelilih Menua Julau, DSP Alif Haiqal Ramesh bin Abdullah madahka, orang ke dituduh nya napi dawa ari baruh Seksyen 302 Kanun Keseksaan ti nyendiaka ukum mati tauka jil entara 30 ngagai 40 taun enggau minimum 12 kali sipat ngena rutan, enti enda diukum mati, enti ditemu salah.

Tuduh nya nunjukka penyalah munuh enggau niat deka ngujungka pemati.

Kelimpah ari nya, orang ke dituduh mega didawa ari baruh Seksyen 506 Kanun Keseksaan ketegal penyalah ngenakutka anak niang enggau Seksyen 39 Akta Senjata 1960.

Kort nadai meri sebarang jamin laban penyalah ari baruh Seksyen 302 diklasifikasyenka enda ulih dijamin. Nya alai, orang ke dituduh deka mengkang ditan ba rumah jil nganti prosiding ke bukai.

Akim Stella Augustine Druce netapka 5 Mei 2026 nyadi haribulan kes nya deka disebut baru, lalu pengawa bedawa deka dipejalaika Sapit Pendawa Raya Aiman ​​Zarith bin Zahrulail. -RBI

KUCHING, 4 Mac — Komuniti penengkebang muzik ti ngena teknologi Pemintar Tiru (AI) udah beratika pemansang pemadu baru bekaul enggau garis lalau hak cipta sereta ngena AI dalam industri kreatif menua tu.

“Kami bebasaka penetap ati Music Authors’ Copyright Protection (MACP) Berhad, ti ngemeratka pemesai guna nyaga asil ti ditempa mensia” ku Anthony William.

Berebak enggau nya, Anthony William, Siku ari penengkebang enggau Lirik Lagu AI, nerangka AI dikena nyadi kereban sukung teknikal enggau kreatif, lalu ukai nyadi ganti pengawa penempa mensia.

Nitih ku iya, dalam proses ngasilka muzik, elemen teras baka leka lagu, melodi, pesan, emosyen, enggau tuju seni agi ditentuka mensia.

AI bejalaika tanggungpengawa mantu dalam aspek tusun muzik, mansik tekstur bunyi, simulasyen instrumen, ‘analisis harmoni’, sereta mega proses teknikal baka nyampur enggau nguasa audio.

Iya nyemetak madahka kreativiti mensia mengkang nyadi pelasar tetiap asil muzik.

“AI ulih ngangkatka kualiti pemansut enggau chara ti lebih efisyen sereta profesional, tang teknologi nya patut gawa meri kuasa ngagai penengkebang, ukai nganti sida.

Pengelurus enggau etika ngena AI beguna amat dikena nyaga integriti industri,” ku Anthony William lebuh nerang ngagai Ruai Berita Iban.

Ku iya nambah, teknologi tu mega muka peluang ngagai bakat baru ti napi penanggul ari sukut ungkus studio, akses ngagai pemuzik profesional, tauka perengka guna ngerikod.

“Nengah iring mensia sereta tempa kreatif, AI ulih nyadi pelasar pengawa ke bekualiti manah agi, ti kompetitif, sereta nitihka standard industri global,” ku iya nambah.

Berindik enggau nya, iya minta AI dipeda nyadi kereban sukung enggau peluang, ukai nyadi keruga.

Chara ti seimbang entara nyaga hak cipta enggau inovasyen teknologi deka nentuka ekosistem kreatif menua tu mansang enggau bepengerai sereta meruan.

Iya mega nyemetak madahka ba jeman transformasyen digital, Malaysia nyingkang ngagai pemansang industri bepelasarka AI.

Nya alai, sektor muzik enggau seni kreatif patut nyikap diri ngambika ulih ngintu diri enggau progresif, enggau enda ngelalaika prinsip ti adil enggau hak penengkebang.

“Komuniti ngasilka muzik komited deka terus bekerejasama enggau badan industri, ejensi perintah, enggau komuniti kreatif dikena nempa jemah ila ungkup muzik Malaysia ti inklusif, bisi etika, sereta kompetitif ba renggat entarabansa,” ku Anthony William. — RBI

BARAM, 4 Mac — Direktor Kereja Raya Sarawak, YBhg Datu Adj Prof Ir Ts Gs Br PMr Dr Cassidy anak Morris udah bejalaika Penemuai Seraya Gawa, meresa dikena beratika baru pejalai Projek Pemasang Jematan Baru Bailey meraka Sungai Baleh di Baram.

Projek tu mujur tembu lima (5) bulan dulu ari timpuh ke udah ditetapka, lalu enggau nya ngenyampatka pengawa mulaika akses rentayan jalai penyambung ungkup peranak menua nya.

Pengawa nembuka projek tumu tu ngayanka komitmen tinggi tim bejalaika projek dalam nentuka pengawa ngenataika projek enggau efisyen sereta efektif, kelebih agi ba kandang menua pesisir.

Jematan Bailey ti dibekalka Ejensi Pengatur Penusah Ngenyit Menua (NADMA) nengah inisiatif sukung logistik dikena ngenyampatka pengawa nyendiaka jalai alternatif ba endur ti begunaka chara mutarka penanggul enggau lengkas.

Ari sukut teknikal, projek tu mungkur pengawa ngaga jematan Bailey Triple Double Reinforced (TDR) ngena Sistem Jematan Bailey enggau 17 panel.

Spesifikasyen nya digaga dikena nentuka pengelama struktur sereta pengulih nampung pemerat trafik enggau likun sereta optimum.

Pengawa bejalaika projek tu mega mandangka kerejasama strategik entara NADMA enggau Opis Kereja Raya Sarawak dalam ngenegapka pengawa nyendiaka infrastruktur sementara ti efisyen, lalu enggau nya nyukung mobiliti enggau pengelantang komuniti menua pesisir di Sarawak. — RBI

TEBEDU, 4 Mac — Palan Servis Parlimen Serian udah bejalaika pengawa mansik palan ungkup dua perambu projek ari baruh Program Transformasyen Menua Pesisir (RTP) 2027 ti ngaul pengawa ngangkatmanah perengka guna komuniti di kandang menua Tebedu.

Pengawa mansik palan keterubah iya nya ngaul perambu ngangkatmanah Padang Main Bol Kampung Temong Bengan, Tebedu.

Penemuai nya disempulang raban teknikal Opis Kereja Raya (JKR) Sarawak, Ketui Raban Bansa (KK) Ruben enggau pengari raban nembiak Kampung Temong Bengan.

Projek ke diperambu tu ngembuan tuju deka ngenegapka perengka guna lumba enggau main ke bisi diatu ngambika likun sereta nyamai agi dikena, lalu ari nya nyukung pemansang nembiak sereta ngelakuka gaya pengidup ke bepengerai ba peranak menua nya.

Kelimpah ari nya, pansik palan ke bukai mega dipejalaika ungkup perambu ngangkatmanah Dewan Siden OKP di Kampung Tebedu Bung Padus.

Penemuai nya mungkur tim teknikal Opis Kereja Raya Sarawak begulai enggau KK, Kennedy Gangig.

Projek tu diperambu dikena ngemanahka perengka guna dewan nyadi palan aktiviti komuniti ti kondusif agi ngatur program pemansang komuniti, rama enggau kandang menua.

Pengawa bejalaika pansik palan tu nyadi singkang keterubah ti beguna dikena nentuka perambu projek RTP 2027 ulih dipejalaika enggau teratur, nangkup guna peranak ke bendar sereta nitihka spesifikasyen teknikal ti udah ditetapka. — RBI

KUALA LUMPUR, 4 Mac — Kereja ngangkatmanah Klinik Pengerai (KK) Nyabor enggau Klinik Pengerai Roban ari baruh Parlimen P205 Saratok mujur tembu dalam bulan Disember 2025 lalu kededua fasiliti berengkah beoperasyen penuh dalam bulan Februari 2026.

Pekara tu dipadahka Sapit Menteri ba Opis Menteri Pengerai Malaysia, YB Dato Hajjah Hanifah Hajar Taib lebuh ti nyaut Tanya Lisan ti dibantaika YB Senator Tuan Pele Peter ba Dewan Negara.

Nitihku iya, projek ngangkatmanah nya dipejalaika nengah inisiatif Bitara MADANI Ngangkatmanah Klinik Repuk ba taun 2025 ti nyadi komitmen Perintah MADANI dalam ngenegapka infrastruktur pengerai menua pesisir sereta nambahka akses rayat ngagai servis pengerai ti bekualiti sereta likun.

Klinik Pengerai Nyabor diatu nyendiaka servis berubat luar, pengerai indai enggau anak mit, farmasi enggau servis penusah ngenyit ti beoperasyen 24 jam sehari, tujuh hari seminggu dikena nangkup peminta komuniti ngelingi.

Berebak enggau nya, Klinik Pengerai Roban mega bisi nyendiaka servis ke sebaka enggau perengka guna makmal patologi tambah dikena nyukung proses diagnosis enggau ngubat pesakit enggau betul sereta ngasi agi.

Ari sukut pengereja pengawa, Klinik Pengerai Nyabor udah diungkupka 15 pangku pengawa ti ngaul Pemesai Perubat, Farmasi enggau jururawat, lalu semua pangku pengawa tu udah diisi penuh.

Ungkup Klinik Pengerai Roban, sepenyampau 18 pangku pengawa udah diungkupka nyengkaum Pemesai Perubat, Farmasi, indu misi enggau Teknologi Makmal Perubat.

Diatu, semina seiti aja pangku pengawa Pemesai Perubat bedau diisi lalu proses ngisi nya deka dipejalaika berenggat dikena nentuka pengawa meri servis pengerai ulih dipejalaika enggau optimum.

Penembu projek tu dikearap ulih meri empas positif ngagai peranak ngelingi Saratok nengah chara nyendiaka perengka guna pengerai ti lantang agi, moden sereta komprehensif. — RBI

LONG BANGA, 4 Mac — Direktor Kereja Raya Sarawak, YBhg. Adj Prof Ir Ts Gs Br PMr Dr Cassidy anak Morris udah ngatur Penemuai Ngenegapka Projek Siri Kedua dikena beratika pejalai pengawa bejalaika projek ngemanahka Jematan Sungai Peluan di Long Banga, Baram.

Projek nya sebagi ari inisiatif ngemanahka sekeda jematan ba kandang menua Baram ti mega ngaul Jematan Sungai Merawa, Sungai Balong enggau jalai Long Banga–Bario.

Skop pengawa bejalaika nya nyengkaum nukar jematan lama, repuk enggau jematan besi baru dikena ngangkatka tikas pengelikun, pengelama struktur enggau guna rentayab jalai alun ba kandang menua pesisir.

Naka ke diatu, pejalai fizikal projek nya udah manggai 13 peratus, iya nya dua peratus tumu ari timpuh asal ti udah ditetapka.

Pemansang positif tu mandangka komitmen tinggi piak ti bejalaika pengawa dalam nentuka projek nya tembu nitihka pelin enggau standard teknikal ti udah ditetapka.

Penemuai nya ngembuan tuju deka matau pengawa bejalaika pengawa ba palan nya dikena nentuka iya bejalai enggau lanchar sereta nitihka spesifikasyen enggau jadual ke udah dipesetuju.

Inisiatif tu setipak enggau komitmen Opis Kereja Raya Sarawak ti deka ngenegapka pemansang infrastruktur menua pesisir enggau ngemanahka agi penyambung ungkup pengelantang rayat di Sarawak. — RBI