BETONG, 5 Mac — Pengawa nyendiaka diri tumu ungkup Regatta Betong edisiyen 2026 terus dipejalai nengah Aum Agih Belanja Khas ke diatur ba Opis Pelilih Betong pagi tadi.

Kaban Parlimen Betong, YB Dato Dr Richard Rapu madah koordinasyen tumu ti mungkur mayuh bengkah ejensi ti bekaul beguna amat dikena nentuka pengawa ngatur pengerami ninting taun nya ulih dipejalaika enggau teratur sereta lanchar.

Nitihku iya, pengari ari Palan Servis Rayat Parlimen P.204 Betong mega bisi datai ngulu aum begulai enggau ejensi ti bekaul berandauka aspek agih belanja enggau koordinasyen logistik program.

“Koordinasyen tumu baka tu beguna dikena nentuka pengawa ngatur Regatta Betong 2026 bejalai enggau lanchar, diatur sereta terus nyadi sebengkah pengerami ti richah ti dianti-anti komuniti di Betong,” ku iya ba sebengkah penerang.

Aum nya bechairmanka Pemesai Pentadbiran Opis Pelilih Betong, Encik Mohammad Shahril Gasit, enggau randau ti fokus ngagai pengawa ngatur belanja tetiap ejensi ti bisi kaul kelimpah ari nentuka langkar palan program besai baka pavilion tauka pelasar ti tinggi, panggau besai, palan langkau bejual enggau palan langkau.

Bela dikerandau iya nya isi program ungkup Regatta Betong taun tu nyengkaum ngatur ‘funfair’ ti diperambu deka diatur kena 16 ngagai 26 April 2026, seraya batang pengawa Regatta Betong deka diatur kena 24 ngagai 26 April 2026. — RBI

KUCHING, 5 Mac — Opis Kereja Raya (JKR) Sarawak ngingatka mensia mayuh, kunteriktor enggau pemekal ngambika seruran bejimat enggau individu tauka piak ti nyaru diri nyadi pemesai tauka pengari opis nya enggau tuju nipu.

Nitihka penerang ari JKR Sarawak, bisi piak ti nadai tanggungpengawa ti ngena nama opis tu, dokumen perintah enggau penerang projek dikena ngasuh mansa pechaya sida bisi kaul enggau pekara bekal, projek tauka kunterik enggau opis nya.

Terang bendar JKR Sarawak nadai kala nyiri sebarang orang nyadi orang tengah ngatur ‘tawaran’ projek tauka kontrak, bekal barang, mayar tauka mindahka duit enggau sebarang pekara rasmi opis tu.

Semua pekara bebelika barang perintah, nitihka penerang JKR Sarawak, semina dipejalaika nengah jalai rasmi enggau prosedur bebelika barang ti entas.

Berindik enggau nya, mensia mayuh ke nerima kangau, mesej tauka dokumen ti dipelabaka ngena nama JKR Sarawak dilalau anang nimbal mesej nya, anang bekunsika penerang diri tauka kompeni sereta anang ngaga sebarang bayar.

Mensia mayuh mega dilalau ngambika betanya ngagai JKR Sarawak ngambika dientaska dulu tauka ngaga ripot ngagai piak bekuasa nyema sida nyangka bisi pengawa nguji nipu.

Berebak enggau nya, mensia mayuh dilalau ngambika seruran bejimat sereta anang mudah teparuk enggau taktik nipu ngena nama opis perintah. -RBI

MIRI, 5 Mac — Sapit Menteri ba Opis Premier Sarawak (Buruh, Imigresyen enggau Pematau Projek) Datuk Gerawat Gerawat Gala ke mega Kaban Kunsil Nengeri (ADUN) Mulu, meri pengaga ati ngagai Opis Kereja Raya (JKR) ketegal dedikasyen enggau pengawa ti jampat nembuka dua jematan ke beguna ungkup sepemanjai bekau jalai batang Baram ti nyadi penyambung Long Banga enggau Bario.

Nitih ku iya, kededua jematan nya nyadi tali seput pengidup ke beguna amat ngagai komuniti ke diau ba kandang menua pesisir Sarawak.

“Aku meri besai terima kasih ngagai JKR ketegal dedikasyen enggau pengawa ti jampat nembuka dua jematan kritikal sepemanjai jalai tebang kayu Baram ke suba ba koridor Long Banga-Bario ti nyadi tali seput pengidup ngagai mayuh genturung pendiau di kandang menua Sarawak,” ku iya nengah penerang berita sehari tu.

Ku iya, Jematan Sungai Peluan diatu udah diganti enggau jematan besi baru, lalu Jematan Sungai Baleh udah digaga baru ngena struktur Jematan Bailey ti dibekal nengah sukung Ejensi Mutarka Penusah Ngenyit Menua (NADMA).

Ku Gerawat nerang, sebedau tu Jematan Sungai Baleh anyut laban arus ai ujung taun 2024, lalu enggau nya mutuska jalai darat ke semina nyambung genturung pendiau di Bario enggau Kelapang.

“Penusah tu udah meri pengeruga besai ngagai pemindah peranak, perengka pengangkut barang ke diguna enggau pengidup ninting hari komuniti di kandang menua ulu,” ku iya.

Ku iya, dikena nyeliahka kandang endur nya majak kediri, jematan kayu sementara digaga nyadi chara tekala nya dikena nentuka sambung asas agi ulih dijaga seraya chara mutarka penanggul ke meruan agi digaga.

Nitih ku iya, nengah komitmen tegap Sapit Premier Sarawak Yang Berhormat Datuk Amat Douglas Uggah Embas enggau Opis Kereja Raya, NADMA ngemendarka pengawa nyendiaka Jematan Bailey ke udah nya dipasang Opis Kereja Raya, lalu enggau nya mujur mulaika baru penyambung perengka pengangkut ke beguna amat ungkup peranak di tanah tinggi.

Berebak enggau nya, iya madahka pengawa ngangkatmanah infrastruktur ba sepemanjai koridor nya agi chakah dipejalaika dikena mutarka guna infrastruktur kritikal bukai.

“Beberapa jematan ke bukai diatu benung digaga kereja dikemanah enggau ngangkatmanah, nyengkaum jematan meraka Sungai Baram di Long San ti bejalaika tanggungpengawa beguna amat nyambung genturung pendiau di serata pelilih menua Baram sereta mega tanah tinggi,” ku iya.

Iya mega nyemetak madahka perintah Gabungan Parti Sarawak (GPS) tetap komited nentuka komuniti menua pesisir enggau menua ulu enda tinggal ari agenda pemansang nengeri tu.

“Pemansang infrastruktur enda tau enda datai ba genap sukut Sarawak nyengkaum kandang menua ke pemadu jauh.

“Rayat Baram patut ngasaika peluang penyulut enggau pemansang ke sebaka enggau sida di kandang mengeri,” ku iya nyemetak.

Ku iya nambah, nengah pemendar ari Kabinet Nengeri Sarawak, jalai batang ke dulu suba di tanah tinggi Baram deka diangkatmanah berenggat ulih perintah nengeri nyadi jalai ke likun agi.

“Inisiatif tu mandangka visyen timpuh panjai perintah nengeri ti deka ngangkatka penyambung, ngenegapka peluang ekonomi enggau ngangkatka kualiti pengidup komuniti menua pesisir.

Penyambung ukai semina bekaul enggau jalai alun enggau jematan aja, tang nentuka nadai seiti komuniti di Sarawak tinggal,” ku iya.

Nyimpulka jaku iya, iya mega meri besai terima kasih ngagai semua piak ti bisi kaul ngemujurka projek nya, kelebih agi bala kunteriktor ti mujur nembuka kereja nya tumu ari timpuh ti udah ditetap, kelimpah ari meri terima kasih ngagai penguna jalai alun enggau komuniti setempat ti udah sabar sereta meri timbal sepemanjai timpuh ngaga projek nya. — RBI

BINTULU, 5 Mac – Sepital Bintulu diatu benung ngiga orang ke sebilik tauka aris Joshua anak Limbang (800815-13-XXXX) lalu palan kepenudi iya ba Flat RPR, 97000 BINTULU. Pesakit tu agi nerima perubat ba Wad Beputunt Lelaki, Sepital Bintulu.

Berindik enggau nya, piak sepital minta kerejasama ari mensia mayuh ti ngelala sida sebilik tauka aris pesakit ngambika lengkas datai ngagai Unit Beputung Am, Sepital Bintulu tauka tau betanya ngagai sepital nengah lumur 086-859 000 ngambika atur ke bukai dipejalaika. -RBI

KUALA LUMPUR, 5 Mac – Sepenyampau 2,900 pintu rumah panjai di kandang menua Julau udah dikelala agi bedau nerima bekal ai beresi beresi, nitihka timbal betulis ari Opis Menteri Pemansang Menua Pesisir enggau Kandang Menua (KKDW) di Dewan Rakyat.

Saut nya dikena nimbal tanya ti dibantaika Kaban Parlimen Julau, Datuk Larry Sng Wei Shien, ba Aum Keterubah, Penggal Kelima, Parlimen Malaysia ungkup taun 2026.

Nitihka penerang ari opis menteri nya, kandang endur ke kena bungkur nya deka dibekalka ai beresi nengah dua projek ari baruh Program Bekal Ai Menua Pesisir (BALB) ti dipejalaika Opis Menteri Pemansang Menua Pesisir enggau Kandang Menua sereta siti projek Perintah Sarawak.

Dua bengkah projek ari baruh KKDW iya nya Projek Bekal Ai Menua Pesisir (BALB) Kandang Menua Julau Renggat II, Bagi Menua Sarikei ti disadang meri penguntung ngagai 2,028 ruang bilik, enggau Projek BALB Kandang Menua Nanga Lasi, Jalai KJD, Bagi Menua Sarikei ti deka meri pemaik ngagai 522 ruang bilik.

Kedua-dua projek nya diatu benung ba renggat nembuka dokumen tinda sebedau pengawa bejalaika fizikal berengkah.

Berebak enggau nya, Perintah Sarawak mega merambu deka ngemanahka agi sistem bekal ai ba sitak Julau nengah Projek “Perambu Sistem Bekal Ai Julau (Pakej 2)” ti disadang meri penguntung ngagai 350 ruang bilik tambah.

Pengawa ti ngaga enggau kerejasama entara Perintah Besai enggau Perintah Sarawak nya dipeda nyadi pengawa ti tegap dikena nentuka isu bekal ai beresi di Julau ulih diputarka enggau komprehensif, nitihka timpuh ti deka ditetapka pengudah proses tinda enggau pengawa bejalaika projek dipejuraika. -RBI

KUCHING, 5 Mac — Direktor Unit Pekara Jalai Pengarap Bukai (UNIFOR), YBhg. Dato Georgina Apphia Ngau begulai enggau raban UNIFOR sehari kenari udah bejalaika projek sereta nemuai ngagai palan nyadi timbal ngagai Woksyop Ngatur Pendam ke diatur kena 4 ngagai 5 Februari tu tadi.

Penemuai ke diatur ari pukul 9.00 pagi nyentuk pukul 4.00 lemai nya mungkur tiga palan besai iya nya Genturung Pendiau Kuching Buddhist Village di Tanjung Durian, Bau; Kuching Buddhist Society; sereta Malaysian Buddhist Association, Pampang Sarawak.

Nitihka penerang ari UNIFOR, penemuai nya ngembuan tuju deka beratika pejalai projek nya sereta ngulihka pekara ti komprehensif pasal guna enggau pemar ke diatu ba pengawa ngatur pendam, kelimpah ari ngenegapka koordinasyen entara ejensi enggau institusyen jalai pengarap.

Sesi pagi nya dipunka enggau penemuai ngagai Kampung Buddha Kuching lalu bela digulu Chairman Gerempung Buddha Kuching, Encik Andy Kho enggau Encik Gary Lim.

Ngalih hari, raban nya nampung pejalai sida ngagai Gerempung Buddha Kuching di Jalai Laksamana Cheng Ho sebedau ngatur sesi randau ke bukai ba Gerempung Buddha Malaysia, Pampang Sarawak.

UNIFOR dalam penerang iya nyemetak madahka inisiatif tu mandangka komitmen ejensi nya terus nyukung pengawa ngatur pendam ti lebih teratur, efisyen sereta meruan, setipak enggau guna komuniti pupu jalai pengarap di Sarawak. — RBI

KUCHING, 5 Mac — Perintah Sarawak tetap komited nentuka pengelantang pendiau indai enggau anak mit seruran dijaga nengah pengawa bejalaika Bantu Beranak (BIB) ti dipunka kenyau ari taun 2020.

Nengah inisiatif tu, bantu sepenyampau RM450.00 diberi ngagai genap iku indai ti ngadaka anak mit ke ada di Sarawak dikena mantu nampung guna asas sekumbang timpuh bepantang, nyengkaum pemakai ti bepengerai enggau ngintu diri empu.

Bantu tu diungkuoka enda ngira bansa, jalai pengarap tauka status sosioekonomi nyadi sebagi ari chara perintah ti inklusif nyaga pengelantang rayat.

Nitihka penerang, bantu tu dibuka ngagai indai peranak menua Malaysia ti bestatus ‘K’ (Sarawak) tauka bini peranak menua Malaysia ti bestatus ‘K’, ti ngadaka anak mit sekalika di dalam tauka luar Sarawak enggau umur kandung 22 minggu ke atas.

Peminta tau digaga tekala nya pengudah beranak nyentuk tiga (3) bulan pengudah ada.

Iya mega mungkur kes anak mit ke ada midang tauka gugur ti manggai umur ngandung 22 minggu ke atas.

Peminta enda tau enda dianjung sechara ‘online’ nengah pelasar iSarawakCare.

Peminta meseti nentuka akaun SarawakPass enggau SPayGlobal sida aktif sereta nyendiaka dokumen sukung ti lengkap baka kad pengelala, bup pengerai indai, surat pengentas lutur tauka surat pengada anak mit, enggau surat tikah.

Mensia mayuh ke patut dilalau anang muai peluang tu lalu lengkas nganjung peminta dalam timpuh ke udah ditetapka.

Sebarang tanya ke silik agi tau dituju ngagai Sekretariat Bantu Beranak nengah jalai rasmi ke udah disediaka. — RBI

LUNDU, 5 Mac — Pengerami Bejalai Bebala Mayuh beserimbai enggau Pengerami Chap Goh Mei ba taun 2026 Renggat Pelilih Lundu kena Hari Dua diatur enggau chukup pengeransing ngelingi Bandar Lundu, ti ngaul penyereta ti chakah ari komuniti menua nya sereta mega mayuh bengkah gerempung enggau gerempung komuniti.

Pengawa bebaris bala mayuh nya siti ari pengerami Taun Baru Cina ti diintu ninting taun.

Pengawa ngatur iya ukai semina ngangkatka agi gaya pengerami, tang mega nyadi pelasar dikena ngenegapka semengat beserakup, nerenakka pemereti ati sereta ngerapitka kaul entara komuniti pupu bansa di pelilih tu.

Pengerami nya mega dirichah enggau penatai Yang Berhormat Azizul Annuar Pehin Sri Haji Adenan, Kaban Kunsil Nengeri (ADUN) Tanjong Datu enggau Yang Berhormat Billy Anak Sujang, ADUN Opar.

Sama bisi datai iya nya Encik Abdul Aziz bin Datuk Abang Draup enggau Encik Niponi Undek, Sekretari Politik YAB Premier Sarawak, sereta mega Encik Zulkarnain bin Ismail, Pemesai Pelilih Menua Lundu.

Pengawa ngatur pengerami tu ngayanka komitmen ti seruran dipejalaika mayuh bengkah piak dalam ngetanka pengelantang enggau penyerakup komuniti, kelimpah ari ngerami penyelai budaya nyadi pelasar penegap rama di Pelilih Lundu. — RBI

SAN SEBASTIAN, 5 Mac – Derbi Basque ke balat angat tembu enggau munyi pengerichah penyukung lebuh Real Sociedad ngentaska penyulut sida ngagai renggat kepenudi Copa del Rey pengudah ngalahka, Athletic Bilbao, 1-0 ba Arena Reale.

Kapten ke Real Sociedad Mikel Oyarzabal mansutka diri nyadi hero lebuh iya enggau enda segaut ngemasukka gol ari penalti ba minit ke-87, lalu enggau nya madamka pengarap Athletic Bilbao.

Real Sociedad ke udah bisi pengelebih 1-0 ari main keterubah di San Mames, terang agi diatur lebuh jurulatih baru Pellegrino Matarazzo majak dikerandauka lebuh iya mujur numbuhka tim ti lebih disiplin sereta tuai runding dalam nguasa tempo main.

Athletic Bilbao ke dilatih Ernesto Valverde nguji deka majak nyerang ba setengah main kedua, tang tumpul ba mua gol. Nadai pemain sayap laju sida iya nya Nico Williams nekul kreativiti sida nyerang.

Lebuh tim temuai ngiga peluang kepenudi, penyaga gol Unai Marrero pansut nyadi orang beretan kepenudi dikena nyangkal pengawa nguji ngemasukkan gol, lalu enggau nya nentuka skor agregat mengkang 2-0 nyentuk ke wisel kepenudi disepu.

Diatu, final di Seville kena 18 April nganti. Real Sociedad deka napi pemar ke berat ari Atletico Madrid, ke udah ngalahka FC Barcelona ba semi-final.

Ba Athletic, pengasa ati nya terang dipeda ba mua penyerang sida, Inaki Williams, ti nerangka pemuntan datai ba renggat final nya nyadika kenang pait ke pemadu besai. -RBI

KOTA SAMARAHAN, 5 Mac — Dua buah ruang bilik nadai utai dikemisi pengudah rumah sida angus lengis ba penusah angus ke nyadi ba Kampung Bukit Berangan, tengahari kemari.

Nitihka penerang ari Opis Bomba enggau Penyah Penusah Malaysia (JBPM) Sarawak, sida nerima kangau ngenyit bekaul enggau penusah nya urung pukul 12.33 tengahari sebedau 15 iku kaban ari Balai Bomba enggau Penyah Penusah (BBP) Kota Samarahan, nengah bantu BBP Tabuan Jaya, dipindah ngagai palan penusah ke nyadi urung kilometers1.

“Lebuh datai ba endur nya, api ditemu benung mau lalu udah nganguska semua struktur dua buah rumah setingkat nya,” ku penerang nya.

Dua buah rumah struktur tetap ke ngembuan pemesai 30×50 kaki persegi enggau 30×40 kaki persegi nya diripotka udah angus 100 peratus.

Sebuah kerita Perodua Kancil ke paking semak endur nya mega kena empas enggau pengerusak dipelabaka 40 peratus.

Operasyen madamka api nya betuaika Komander Operasyen, Paul Senum begulai enggau Ketuai Zon 2, Gawai John, nengah chara ngena teknik madamka api serang enggau defensif dikena nagang api sereta nyeliahka api ari nyerarai ngagai rumah ke besemak.

Taja pan pengerugi reta tengkira dipelabaka besai, tang dua iku orang ke nguan rumah nya ke bisi ba endur nya maya penusah nyadi mujur ngelarika diri lalu diripotka nadai bakal.

Pansik silik benung dipejalaika unit forensik bomba JBPM dikena ngelala kebuah ke bendar penusah nya nyadi. — RBI