BATU NIAH, 25 Mac — Empat iku lelaki peranak menua tu ke beumur entara 16 ngagai 30 taun ditan polis dikena mantu pansik kes enchuri bateri entukar enggau wayar temaga ba belakang sebuah supermakit ditu.

Pengawa ngetan nya digaga Pampang Nagang Penyalah Balai Polis Batu Niah, Miri, bepelasarka penerang mensia mayuh enggau pemansik.

Berindik ari nya, seraban polis ngepunka pengawa ngerap ngagai sebuah genturung pendiau di Tanjung Belipat, Batu Niah lalu mujur ngerampas sekeda bateri entukar enggau wayar temaga ke dipelabaka dichuri dikena nyadi barang kes.

Semua saspek deka ditan riman dikena mantu pengawa mansik silik agi, lalu kes nya dipansik ari baruh Seksyen 379 Kanun Keseksaan.

Mensia mayuh dilalau ngambika seruran bejaga -jaga sereta lengkas ngeripot sebarang aktiviti ke dipelabaka nyadi ba kandang endur diri empu dikena mantu opis bekuasa ngelaban pengawa salah. -RBI

MUKAH, 29 Mac – Raban Penyaga Orang Periman Malaysia (APM) Mukah mujur nangkap siku ular sawa batik urung dua meter pemanjai pengudah nerima kangau ngenyit ari mensia mayuh.

Nitihka ripot, ular nya ditemu ba belakang sebuah rumah ti meri pengirau ati ngagai peranak ke diau ngelingi nya.

Tim APM ke datai ba palan nya terus bejalaika pengawa enggau jampat ngena teknik ‘sintak’ sebedau mujur nangkap ular nya.

Gaya ba palan kes nyadi diripotka ulih dijaga sereta likun, nadai penusah ke enda manah nyadi sepemanjai operasyen nya.

APM Mukah mega ngenataika pengaga ati sida ngagai mensia mayuh ti lengkas ngeripot penusah nya, lalu enggau nya mantu nentuka atur jampat ulih dipejalaika.

Mensia mayuh ke betapi enggau penusah ngenyit tau ngenataika ngagai APM Mukah nengah lumur 084-872814 ti beoperasyen 24 jam sehari. -RBI

MIRI, 29 Mac – Sekumbang Gerempung Gagasan Anak Dayak Sarawak (GADS) udah ditumbuhka, gerempung tu udah bejalaika tanggungpengawa ti beguna dalam ngenegapka penyerakup komuniti Dayak.

Nitihku Sapit Menteri Pengerai Mensia Mayuh, Pengawa Berumah enggau Kaunsil Kandang Menua, Datuk Dr Penguang Manggil, tu nyengkaum ngetanka pesaka asal sereta ngenegapka komuniti kelebih agi rebak baru.

Penguang mega ngelalau gerempung nya ngambika terus ngenegapka pangku pengawa nyadi pelasar ti inklusif sereta progresif dalam ngadaka mayuh agi ketuai biak ti kompetitif.

“Ba jeman globalisasyen, pengawa nyemelaka pemansang moden enggau pengawa ngetanka nilai enggau main asal aki ini patut ditegapka agi, kelebih agi ba raban nembiak rebak baru.

“Nembiak rebak baru meseti diberi ruang enggau peluang neruska legasyen tu ngambika enda punas nitihka jeman, pia mega nentuka identiti budaya terus dijaga dalam arus moden,” ku iya.

Iya madah munyi nya lebuh bejaku ba Pengerami Makai Lemai Ninting Taun gerempun nya beserimbai enggau genap 12 taun udah ditumbuhka.

Penguang mega meri pengaga ati ngagai komitmen enggau semengat volunteer ti dipandangka bala kaban gerempung dalam ngemujurka bemacham program ti ngaul pengawa dagang, raban pedagang enggau main asal.

“Tu nyata ngayanka komuniti Dayak majak mansang enggau semengat sepenemu sereta identiti ti tegap,” ku iya.

Berebak enggau nya, iya mega meri pengaga ati ngagai gerempung nya ba pemujur ngatur pengawa nya sereta ngintu genap taun ke-12, ti ku iya kelai pejalai ti penuh enggau pemar sereta penyulut ti ngemegahka ati.

Sama bela ngulu pengerami tu iya nya Pandang Semat, Hajis Japar Labau, Sekretari Politik ngagai Premier Sarawak, Melissa Labot pengari Residen Miri, Edward Anak Tawang pengari Pemesai Pelilih Menua Miri, DSP Bobby Bana pengari KPD Miri, Serawa Budol Menijar Besai Port Authority, Jimmy Anak Lawie Chairman GADS, Pemancha Alexander Isut, Jonathan Bedindang Penyading Penemu Undang – Undang GADS, David Upe Penyanding Penemu Tadbir Urus GADS enggau raban GADS. – RBI

SEKUAU, 29 Mac — Penatai lebih 100 iku Tuai Rumah ari serata kandang menua DUN Tamin ba Pengerami Bejadika JKKK Tinting Pegari Sekuau mandangka pengandal ke tegap komuniti renggat baruh ngagai kuing pemansang ti dipejalaika ari baruh Kaban Kunsil Nengeri (ADUN) Tamin YB Ir. Christopher Gira Sambang.

Pengerami nya ke diatur ba rumah Tuai Rumah Saong anak Dominic Daud, ngempuruka ketuai komuniti ari mayuh bengkah sitak nyengkaum Sekuau, Selangau, Ili Oya Tajam, Siong, Lemai enggau Tamin, enggau nya mantaika semengat beserakup sereta begulai rayat menua pesisir dalam napi segang pemansang ke jampat.

Ba jaku bejadika pengerami nya, Christopher Gira ngenataika pengaga ati ngagai peranak Rumah Panjai Tinting Pegari Sekuau ketegal komitmen sida ke tinggi sereta timbal ke diberi sida.

“Penatai lebih 100 iku Tuai Rumah nya kemari ukai semina penyampau aja, tang mandangka penyerakup, penegap enggau pengandal rayat ba tuju pemansang di DUN Tamin.

“Tu pelasar ti beguna dikena kitai terus nyingkang ke mua enggau lebih progresif,” ku iya.

Iya mega madahka ubah status tanah Sekuau ari Tanah Perintah Besai ngagai Tanah Nengeri muka ruang ke lebih luas endur bejalaika mayuh bengkah projek pemansang ari baruh inisiatif perintah nengeri, kelebih agi nengah Projek Transformasyen Menua Pesisir (RTP).

Ngenang silik agi, iya madahka sekeda projek pemansang ti meri empas tinggi ti deka dipejalaika, nyengkaum projek ngaga jalai ba kandang menua Ulu Oya ti beungkus RM60 juta nengah Opis Menteri Pemansang Menua Pesisir enggau Kandang Menua (KKDW), ti disadang deka ditender dalam bulan Mei 2026.

Kelimpah ari nya, projek ngemesaika jalai alun ari Nanga Pakoh ngagai Rumah Ronnie enggau agih belanja RM200 juta ari Perintah Nengeri Sarawak udah tembu nengah proses meresa baru, seraya projek jalai alun ari SK Pakoh ngagai Ulu Bunau beungkus RM160 juta di baruh MiRRDA dikearapka nyadi penyungkak besai pemansang kandang menua.

Berebak enggau nya, iya mega madahka sepenyampau RM300 juta udah diagih nengah MiRRDA ungkup pemansang kandang menua RASCOM nyengkaum Sekuau nyadi siti ari fokus besai.

Perambu pemansang ‘Sekuau New Township’ ti ngaul pengawa ngaga rumah teres baru mega dikemeratka dikena nangkup guna peranak sereta nyungkak penumbuh ekonomi kandang menua.

“Aku dekaka Sekuau mansutka diri nyadi palan pemansang menua pesisir ti teratur sereta kompetitif, lalu ari nya ulih nyadi chunto ngagai kandang menua bukai dalam DUN Tamin.

Nengah perambu strategik sereta bejalaika pengawa enggau efektif, potensial besai ke bisi ulih dikeamatka penuh,” ku iya.

Nitih ku iya, pemisi MiRRDA deka nyadi penyungkak ngagai pemansang komprehensif ti mungkur infrastruktur, betanam betupi enggau logistik, lalu enggau nya ulih ngenyampatka agi transformasyen ekonomi menua pesisir ba sitak nya.

Ngelansa pasal rampa politik ke diatu, iya mantaika pengandal rayat DUN Tamin deka terus meri mandat dikena nentuka penerus agenda pemansang ti udah diperambu ulih nyadi nyata enggau komprehensif sereta meri empas ke tinggi.

Ba pengerami ke sama, iya bisi nyuaka 52 iti chek Geran Projek Mit Menua Pesisir (MRP) sepenyampau RM590,000 ngagai penerima ti mungkur PIBG sekula, rumah sembiang enggau JKKK.

Nyadi sukung tambah, agih belanja MRP sepenyampau RM27,000 mega diungkupka ngagai JKKK Rumah Panjai Tinting Pegari Sekuau, kelimpah ari agih belanja Projek PPRMS dalam tukuh kereban dikena ngaga rumah ke beungkus RM100,000.

Sama bisi datai iya nya Kaban Dewan Negara Senator Rita Sarimah Patrick Insol; Pemesai Pelilih Menua Selangau, Yalin Anak Assan; Chairman Opis Kaunsil Pelilih Menua Pesisir Sibu (SRDC), Kaunselor Sempurai Anak Petrus Ngelai; Ketuai Raban Bansa enggau rayat ngelingi Sekuau. — RBI

MIRI, 29 Mac – Sapit Menteri ba Opis Premier Sarawak (Buruh, Imigresen enggau Pematau Projek), Dato Gerawat Gala nyemetak madahka pemujur ke bendar sesebengkah pekit ukai bepanggai ba menang aja, tang lebih agi ba kaul pangan diri, bebasaka pangan diri enggau pengaga ati ke dikunsi sepemanjai pekit.

Kenu ku iya, lumba enggau main patut nyadi medium penyerakup lalu ukai mechah, setipak enggau penyelai pengelantang Borneo ti mungkur bemacham budaya enggau penatai tang bekunsika nilai mensia ke sama.

Iya madah munyi nya lebuh bejadika lalu nutup Pekit Pickleball Borneo 2026 ke diatur ba Palan Lumba enggau Main Paragon Pickleball, Lutong, lemai tu tadi.

Pekit ke diatur pengelama dua hari nya mujur ngempuruka bala pemain ari serata menua Sarawak, Sabah enggau pengari ari Brunei Darussalam dalam gaya ke penuh enggau semengat berakup.

Pekit tu diatur Serakup China Sarawak ari baruh iring Presiden iya, Harry Lee, begulai enggau Chairman Pengatur, Lee Jun Tak, ti ​​mujur nentuka pengerami nya bejalai enggau lanchar, inklusif sereta teratur.

Gaya ba gelanggang mega mandangka penyereta pemain biak, pemain ti bepeneleba sereta penyereta ari mayuh macham penteba ti sama bisi pengerindu ba main pickleball.

Pekit tu dibuka ngagai semua renggat umur berengkah ari 10 taun nyengkaum kategori khas baka beraban lelaki enggau beraban champur ungkup penyereta ke beumur 45 taun ke atas, lalu enggau nya ngayanka lumba enggau main ngerembaika pengerindu enda ngira umur enggau penatai.

Kelimpah ari nya, pekit tu mega ngayanka pengerembai positif semengat Taste of Borneo, ke sebedau tu dikelala nengah pengawa ngatur pengawa budaya, pemakai enggau kraf, diatu benung mansang nuju gaya pengidup ke bepengerai nengah lumba enggau main, lalu enggau nya nempa identiti Borneo ke lebih komprehensif.

Penyereta ari Sarawak, Sabah enggau Brunei mega muka peluang besai ngagai pekit tu ngambika ulih mansang nyadi trofi lumba enggau main serantau ti nyambung kandang menua Borneo nyengkaum Kalimantan jemah ila. -RBI

SIBU, 29 Mac – Presiden Parti Demokratik Progresif (PDP), Dato Sri Tiong King Sing ngemeratka pemesai guna kaban parti mereti sereta nyukung polisi perintah nengeri ari baruh iring Premier Sarawak, Datuk Patinggi Tan Sri Abang Johari Tun Openg ti meransang Sarawak nuju hab kuasa kurang karbon.

Ku iya, agenda nya tuju nengeri tu jemah ila ti begunaka sukung ti komprehensif, kelebih agi ari kaban parti nya empu.

“Kaban parti patut meretika polisi perintah, nerangka ngagai komuniti sereta ngasuh rayat pechaya tu meh kuing ke pemadu manah ungkup Sarawak,” ku iya.

Berebak enggau nya, iya ke mega Menteri Dagang Temuai, Seni enggau Main Asal (MOTAC), ngingatka kaban parti ukai semina penyukung aja, tang lebih agi bejalaika tanggungpengawa ke beguna amat ngenataika polisi enggau pengawa parti ngagai renggat baruh.

Iya madah munyi nya nengah teks jaku iya ke dibacha Sekretari Politik Premier Sarawak, Joshua Ting, lebuh bejadika Aum Besai Tiga Taun Sekali PDP Bagi Menua Dudong di Padang Bola Keranjang Durin, sehari tu tadi.

Berindik enggau nya, iya meransang pengawa bejalaika mayuh agi program bepelasarka rayat kelimpah ari ngemeratka guna bala ketuai ngambika konsisten nurun ngagai renggat baruh.

“Anang nganti rayat datai ngagai kitai, tang kitai patut ngenyemakka diri enggau sida ngambi meretika penanggul enggau utai ke diguna ke bendar,” ku iya.

Tiong mega minta parti politik lurus enggau diri empu sereta ngemeratka penyerakup dalam diri dikena nentuka penegap enggau penerus pengawa begulai ditanka.

Ku iya, pengelemi sesebengkah parti selalu iya bepun ari penyarut dalam parti, ukai ari penanggul ari luar.

“Dalam pengawa politik, kitai patut lurus enggau diri empu, kekadang sesebengkah parti nyadi lemi ukai ketegal munsuh ari luar, tang ketegal penyarut dalam diri empu.

“Raban ketuai enggau kaban ba semua renggat patut ngetanka disiplin enggau penyerakup dikena nentuka parti meruan relevan dalam rampa politik ke diatu,” ku iya.

Ngelansa pasal pangku pengawa dalam gempung nya, iya madahka penyerakup dalam Gempung Parti Sarawak (GPS) meseti terus ditegap nengah semengat kerejasama sereta bebasaka pangan diri entara parti komponen.

Nambahka nya, penegap politik ke diasai Sarawak diatu asil ari penyerakup dalam GPS, lalu enggau nya nyadika pelasar pemansang nengeri tu terus.

Sama bisi datai Kaban Kunsil Nengeri (ADUN) Meluan, Dato Rolland Duat Jubin, Sekretari Politik Premier Sarawak Brian Fung enggau Chairman PDP Bagi Menua Dudong Teo Boon Siew begulai enggau kaban ke bukai. -RBI

KUCHING, 29 Mac — Media Borneo nyemetak madahka penetap ati enda mansut tauka ngasilka isi video muzik promosyen pandak (MV Short Promot) ti dipansutka sepenuh iya ngena teknologi pemintar tiru (AI) ti nadai kaul enggau kreatif mensia.

Nengah penerang rasmi, Ketuai Pengatur Pengawa Media Borneo, Nurul Diana Binti Suffian madahka pemutus nya setipak enggau komitmen gerempung nya ti deka negika industri muzik menua tu.

Nitih ku iya, piak iya bepenemu muzik ukai semina produk teknologi aja, tang nyadi pematak semengat, budaya enggau identiti sesebengkah komuniti ti begunaka tengkebang kreatif mensia.

“Media Borneo pechaya keranjai jari ti diasilka mensia mai rega runding, pengasai ati enggau kereja tulin ti enda ulih diganti enggau teknologi enggau penuh,” ku iya.

Iya nambah, singkang nya mega diambi dikena nentuka integriti industri muzik terus dijaga ba jeman pemansang teknologi ti jampat, kelebih agi ari sukut penulin asil, nitihka hak cipta enggau terang ngagai peninga.

“Kitai ngambi chara bejimat nentuka integriti industri muzik enda dikeruga, kelebih agi lebuh bekaul enggau isu pengamat enggau hak cipta,” ku iya nerang.

Berebak enggau nya, Media Borneo mega nandu baru komitmen sida deka terus nyukung artis menua tu nyengkaum artis, penanyi enggau komposer nengah chara nyendiaka pelasar ti ngemeratka penau enggau pengawa kreatif sida.

“Media Borneo mengkang komited nyukung artis menua tu nengah chara nyendiaka pelasar ti ngemeratka penau enggau pengawa kreatif sida,” ku iya nambah.

Berindik enggau nya, Media Borneo deka terus ngemeratka pengawa ngasilka isi ti bekualiti tinggi, tulin sereta relevan, setipak enggau aspirasyen ngenegapka industri kreatif ba renggat kandang menua enggau serantau. – RBI

KUCHING, 29 Mac — Media Borneo madahka berengkah 1 April 2026, timpuh isi Video Muzik Timpuh Pandak (MV-Short Promot) deka diseliris ari 40 sikin nyentuk 1 minit ngagai semina 10 ngagai 20 sikin aja.

Nitihka penerang rasmi ari Ketuai Pengatur Pengawa ba Media Borneo, Nurul Diana Binti Suffian, pengawa tu nyadi sebagi ari inisiatif strategik kompeni dalam ngatur pengawa nyadung isi digital ba selampur pelasar media rama.

Ku iya, chara baru tu ngemeratka pengawa ngena klip pandak (Short teaser clips) ti penuh enggau isi sereta meri empas tinggi, lalu ari nya ulih narit ati bala peninga enggau lebih efektif.

“Kami mega ngarapka iya ulih meransang bala peninga ngalih ngagai platform rasmi baka YouTube meda versyen penuh Video Muzik (MV), lalu enggau nya nyukung penambah peda enggau japai ngagai kompeni muzik enggau pengempu isi asal,” ku Nurul.

Nurul nyemetak madahka semua isi MV-Short Promot ti dipansutka Media Borneo semina ungkup tuju promosyen aja, lalu hak cipta tetap diempu pengempu asal.

Iya nambah, Media Borneo mengkang komited nyukung pemansang industri kreatif menua tu, nentuka strategi isi meri penguntung ngagai semua piak nyengkaum pemain industri, pengempu pengawa, enggau peninga. – RBI

Sapit Premier Sarawak, Datuk Amar Douglas Uggah Embas madah, sekeda endur udah dikelala nyadi ‘hot spot’ nyengkaum Kemuyang, Penasuk enggau kandang menua di Bintulu.

Nitihku iya, Opis Pengerara Api enggau Penyah Penusah Malaysia (JBPM) Sarawak udah nganjung bilun engkabang dikena bejalaika operasyen ngebom ai, kelebih agi ba kandang menua Penasuk enggau Sibu ti ngaul penusah angus tanah gambut.

“Pagi tu tadi, Opis Bomba enggau Penyah Penusah Sarawak nganjung sebuah bilun engkabang bejalaika pengawa ngebom ai ba kandang menua Penasuk.

“Kami mega minta sida ke Sibu laban penusah angus tu nyadi ba tanah gambut ti balat enchabar.”

“Taja pan semina asap aja ke bisi dipeda tang api ulih nyerarai ba baruh tanah lalu ngaul kandang endur ke lebih luas,” ku iya lebuh dikerandau pengarang ba Pengerami Hari Raya Aidilfitri begulai enggau Dato Sri Julaihi Narawi, sehari tu.

Berebak enggau nya, iya madahka Opis Rampa Menua (DOE) Malaysia begulai enggau Opis Pengeraja Asal enggau Rampa Menua (NREB) Sarawak sereta ejensi bekaul nambahka pengawa matau ngena dron ba kandang endur ti berisiko baka Kuala Baram enggau Mukah dikena nyidi kelai tumu penusah angus nyadi.

“Kitai ngena dron dikena matau kandang endur ti berisiko ngambika atur lengkas ulih dipejalai nyema bisi kelai sebun asap,” ku iya nerang.

Berindik enggau nya, iya ngelalau mensia mayuh nyeliahka diri ari betunu chara tebuka sereta nentuka api padam abis sebedau ninggalka kandang endur nya.

“Mensia mayuh dilalau ngambika enda ngaul diri ba pengawa nunu chara tebuka sereta nentuka api dipadamka abis dikena nyeliahka penusah angus balat agi nyadi,” ku iya nyemetak.

Berebak enggau nya, Uggah ke mega Chairman Komiti Mutarka Penusah Ngenyit Nengeri Sarawak (JPBNS) madah, perintah nengeri mega benung matau isu suntuk bekal ai ke udah berengkah nuntung sekeda kandang menua, kelebih agi ba tebing tasik enggau dalam menua, nyengkaum Betong.

“Taja pia, enti gaya hari majak angat dalam kandang berapa hari tu ila, mayuh genturung pendiau kelebih agi di menua pesisir enggau kandang menua dipelabaka deka ngasaika penanggul suntuk bekal ai lalu nya deka nyadi batang fokus ke patut diputarka,” ku iya.

Iya mega nerangka atur nanam awan semina deka dipejalaika nyadi chara kepenudi, bepanggai ba gaya awan ti engkeman. — RBI

MIRI, 29 Mac — Sebuah kerita ngelantak belakang sebuah lori sapu jalai alun udah nyadi ba mua Balai Bomba enggau Penyah Penusah (BBP) Sentral Miri, pagi kemari.

Ba penusah ke nyadi urung pukul 9.12 pagi nya, deriba kerita nya diripotka bisi bakal mimit pengudah enda mujur nyeliahka kerita berat nya.

Tim EMRS ke besemak terus dianjung ngagai endur nya ngambika ulih meri perubat ngenyit.

Nangkan ke nya, tudah ke agi dapat udah nya diengkah ba perengka sukung rekung sebedau dianjung ngagai Sepital Miri ngambika diperubat enggau silik agi.

Syukur amat tudah semina bakal mimit aja lalu palan penusah nya nyadi besemak enggau balai bomba ngemuntangka pengawa meri bantu enggau lengkas. — RBI