KANOWIT, 30 Mac — Kaban Kunsil Nengeri (ADUN) Machan, Allan Siden Gramong ngulu Pengerami Makai Lemai Ngintu Penumbuh Kuil Fung Kung Ke-19 ti diatur ba Kuil Fung Kung, Nanga Sah, ditu, kemari.

Pengerami nya diintu dalam gaya ti penuh enggau penyerakup sereta pengelantang, mandangka penyelai kaul komuniti lokal ti majak dijaga.

Sama bisi datai Sekretari Politik Menteri Penyerakup, Dr.Stephen William, Pemancha Leong Khiee Hee, bala kaunselor, kapitan enggau bala temuai bukai ke dikangau.

Dalam jaku dipansutka iya, Allan meri besai terima kasih ngagai raban pengatur pengerami laban udah ngelaluka sereta bebendar ngatur pengerami ti bisi reti.

Kenu ku iya, ngatur pengerami ke baka tu ukai semina ngetanka pesaka asal enggau pengarap komuniti, tang mega nyadi pelasar beguna dalam ngenegapka penyerakup entara bansa, kelebih agi ba kandang menua Machan.

Iya mega ngarapka semengat begulai enggau bebatak asur ti dikemeratka dalam pengawa nya terus ditegapka dikena nentuka pengelantang enggau pengelantang komuniti seruran dijaga. -RBI

KUCHING, 30 Mac – Perengka guna meresa pengerai diatu semak agi enggau komuniti lokal lebuh makmal satelit Palan Perubat Borneo (BMC) kedua dibuka enggau rasmi ba Pine Square, Batu Kawa kemari.

Datuk Amar Dr. Sim Kui Hian, Sapit Premier Sarawak ke mega Menteri Pengerai Mensia Mayuh, Pengawa Berumah enggau Kaunsil Kandang Menua Sarawak madah, pengawa muka makmal nya siti singkang ke besai dalam ngerembaika akses ngagai servis pengerai, kelebih agi meresa penyakit tumu ba rayat.

Nitihku iya, inisiatif nya mega nyukung pengawa bejalaika Skim Bantu Pengerai Orang Tuai (SCHB) RM500 setaun ti diberi kelala perintah Sarawak ari baruh iring Premier, Abang Johari Tun Openg.

“Chara tu ukai semina ngemuntangka rayat beperesa pengerai tumu agi, tang mega mantu mutarka penanggul penyakit enda berampit baka kolestrol tinggi, kemi manis, kanser nyengkaum meresa penanda kanser darah, pia mega pengerusak buah pinggang nengah peresa guna buah pinggang,” ku iya.

Iya mega muji kerejasama inovatif entara sektor peribit enggau perintah nengeri ti dipeda seriris enggau pengawa ngenegapka autonomi pengerai Sarawak ari baruh Sempekat Malaysia 1963 (MA63).

Berebak enggau nya, iya mantaika temegah ati ngagai Palan Perubat Borneo nyadi sebuah institusyen perubat menua tu ti jampat mansang kenyau ditumbuhka nyadi Palan Perubat Rejang di Sibu dalam taun 1997 suba.

“BMC diatu udah ngerembai enggau operasyen BMC Kuching kenyau ari taun 2013 lalu nangkanka nya ngaul enam palan perubat.

“Kebendar iya, pelin ngerembaika RM700 juta ke benung dipejalaika diatu deka nyendiaka lebih 1,000 katil, lalu nyadika nya siti ari palan perubat peribit ke pemadu besai diempu peranak Sarawak,” ku iya.

Iya mega meransang BMC terus besemekih sereta bisi potensial nyadi gerempung perubat renggat nengeri baka Johor Medical Group (KPJ), enggau nya bejalaika tanggungpengawa ke besai agi dalam pemansang modal mensia enggau sistem pengerai Sarawak. -RBI

SELANGAU, 30 Mac — Pengawa ngatur Kelas Pemun Sabun Pemajik enggau Woksyop Ngaga Skirt Burie di Rumah Simond Ulu Dijih nyadi pelasar beguna dalam pengawa ngenegapka ekonomi komuniti menua pesisir nengah pengawa ngemansangka pengelandik enggau pengawa dagang.

Program ti digulu 30 iku penyereta nya dipejalaika dalam dua sesi, ti mungkur latih praktikal ba pengawa ngasilka produk bepelasarka pengeraja asal menua tu kelimpah ari pengelandik bejait asal.

Ba sesi pagi, bala penyereta diajar enggau chara ngaga sabun pemajik ngena barang mata asal baka kunyit, daun subung, buah subung enggau bau wangi.

Chara tu ukai semina ngemeratka aspek nyaga diri, tang mega muka peluang ngasilka produk bepelasarka pengeraja asal menua tu ti bisi potensial dikomersial.

Berebak enggau nya, sesi ngalih hari ngemeratka pengawa ngaga skirt burie, iya nya siti ari elemen pesaka tekstil komuniti menua nya.

Penyereta belajarka pelasar bejait ngena kain burak nyadika batang kereban enggau ‘supit’ putih nyadika elemen pengias ti nyadi identiti chura burie.

Kaban Kunsil Nengeri (ADUN) Tamin, Ir. Christopher Gira Sambang madah, program ke baka nya ukai semina latih pengelandik aja, tang mega nyadi singkang pemungkal dikena nempa pengangkun diri sereta muka peluang mansutka penatai pemisi ngagai peranak menua nya.

Nitihku iya, inisiatif nya mandangka pengawa ti seruran dipejalai dikena ngangkatka potensial komuniti menua pesisir ngambika sida ulih ngatika diri lalu ukai semina bepanggai ba bantu aja.

“Lebuh komuniti belajarka pengelandik baka ngaga sabun pemajik enggau bejait skirt bechura, sida kebendar iya muka ruang ungkup penatai pemisi sida empu, lalu enggau nya nempa mayuh agi orang dagang ba renggat baruh,” ku iya lebuh bejadika program nya kena Hari Lima nyin tadi.

Iya mega nyemetak madahka pemansang di Sarawak ukai semina ngemeratka sukut fizikal baka infrastruktur aja, tang mega ngemeratka pemansang mensia.

Berebak enggau nya, iya madahka perintah Sarawak ari baruh iring YAB Premier Sarawak tetap komited ngenegapka pengelantang pendiau rayat menua pesisir nengah mayuh bengkah inisiatif, nyengkaum pengawa ngagihka bantu baka Skim Pengintu Pengelantang Anak Sarawak (SKAS), peluang pelajar enda bebayar ba institusyen diempu nengeri enggau sukung ngagai pedagang enggi nengeri.

Ku iya nambah, penyereta program diperansang ngena penuh penemu ke diulih lalu ukai semina meda nya nyadi pemujur sementara aja.

“Berengkah ari mit ba renggat komuniti, lalu udah nya ngerembaika dagang ngagai makit ke lebih besai.

“Produk ari sitak tu ulih rembus ngagai makit ba mengeri besai baka Sibu enggau Kuching,” ku iya.

Iya mega ngemeratka pemesai guna nentuka pemansang ti dipejalaika inklusif ngambika nadai raban komuniti tinggal, kelebih agi di menua pesisir.

Program tu diatur begulai enggau CC Akademi sereta Magbe Luxury lalu nerima sukung ari Komiti Pemansang enggau Pengelikun Genturung Pendiau (JKKK) Rumah Simond.

Pengerami tu tembu enggau pengawa rasmi bejadi woksop ari Ir. Christopher Gira Sambang. – RBI

BEIJING, 30 Mac – Preskripsyen keterubah di dunya ungkup chara ngubat penguat tubuh (antibodi) monoklonal ungkup virus hepatitis D apin lama ke udah dikeluarka ba sebuah sepital di Beijing, ku ripot Science and Technology Daily, ngambi penerang ari Xinhua.

Pemujur nya nyadika sejarah ke besai dalam pengawa ngubat penyakit virus hepatitis ba renggat global.

Ubat ke dikumbai Libevitug nya digaga raban pemansik ari Universiti Tsinghua enggau kerejasama kompeni biofarmaseutikal Huahui Health ke bepalan ba Beijing.

Iya nyadi penguat tubuh monoklonal keterubah dikemendarka ungkup virus hepatitis di serata dunya, ngisi bida berubat ke udah lama nyadi ungkup siti ari bansa penyakit ati ke pemadu balat.

Pentadbiran Produk Perubat Nasional China meri pemendar enggau syarat dalam bulan Januari 2026 berindik ari pengawa meresa baru ti dikemeratka.

Ari lebih 254 juta iku orang ke bisi mai hepatitis B raya di serata dunya, urung lima peratus sama dirampit virus hepatitis D. Pesakit ke bisi kena rampit tu udah lama nadai ‘terapi’ ke ditagit chara efektif.

Libevitug bekereja enggau chara nyekat virus hepatitis B enggau D tama ngagai sel ati. Uji klinikal ungkup ubat nya berengkah dalam taun 2018, seraya pansik mayuh palan entarabansa dilanchar dalam taun 2023 ba pesakit ke bisi rampit.

Asil klinikal mandangka pengeransing ke signifikan dalam balas virologi enggau normalisasyen guna ati, enggau penguntung kelebih agi ke manah ngagai pesakit ‘sirosis’.

Taun tu, sepenyampau 10 ubat inovatif udah dikemendarka dijual di China.

Gambar semina pengias aja

MERADONG, 30 Mac – Ketuai Polis Pelilih Meradong, DSP Tansli Mering nerangka polis udah ngetan dua iku lelaki beumur 32 enggau 28 taun urung pukul 1.15 lemai kemari lebuh tim polis bejalaika “Operasi Saringan Khas Sarawak” ba kandang menua Bintangor.

Ku iya, kedua-dua saspek ditan raban “Task Force” Indu Opis Polis Pelilih (IPD) Meradong pengudah dipelabaka bisi kaul enggau aktiviti dadah sebedau dibai ngagai IPD Meradong ngambika atur ke silik agi dipejalaika.

Nitihku iya, asil peresa ai kemi ti dipejalaika ba opis BSJND Meradong tetemuka kedua-dua saspek positif Amphetamine enggau Methamphetamine.

“Meresa baru rikod ke udah tetemuka kedua-dua saspek nadai ngembuan sebarang rikod jenayah tauka penyalah dadah sebedau tu,” ku iya nengah sebengkah penerang.

Ku iya nambah, kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit nyentuk RM5,000 tauka jil enda ngelui dua taun nyema dikenuku salah.

Berebak enggau nya, DSP Tansli Mering nyemetak madahka polis beratika isu salah guna dadah enggau berat sereta enda deka belembut enggau sebarang penyalah.

Iya mega minta mensia mayuh ngenataika penerang bekaul enggau aktiviti dadah ngagai polis ngambika ulih mantu ngelaban penanggul nya, kelebih agi ba pelilih Meradong. Penerang tau dikenataika nengah Balai Polis Bintangor nengah lumur 084-693222. -RBI

JULAU, 28 Mac – Projek masang meter api ba Rumah Panjai (Rh) Rose Banyun ke udah dipejalaika lebih setaun ke udah diatu udah tembu penuh, lalu enggau nya mai penguntung ke besai ngagai peranak menua nya laban sida diatu ngasaika bekal kuasa karan 24 jam.

Sebedau tu, peranak rumah panjai nya semina bepanggai ba injin generator nyadika pun penatai kuasa ninting hari.

Taja pia, nengah pengawa bejalaika projek nya, sida diatu udah bisi bekal kuasa karan ti lebih entap sereta enda meri pengelantang ngagai rayat dia.

Nitihku Kaban Parlimen Julau Datuk Larry Sng Wei Shien, pengawa ngagihka kuasa karan ngagai menua pesisir endang amat bisi pemar berindik ari ungkus nyambung ti tinggi.

Taja pia ku iya, ke mega Chairman Kaunsil Industri Kayu Ramu Malaysia (MTIB), perengka guna pemun tu agi diberi perati, kelebih agi ungkup rumah panjai baru di kandang menua Julau ke agi bedau bulih kuasa karan.

Ku iya, inisiatif nya dipejalai bepelasarka juluk deka mantu rayat, kelimpah ngarapka peranak ke bedau nerima bekal kuasa karan datai ke mua nganjung peminta.

“Diatu, urung 600 buah rumah panjai di Julau, lalu ninting taun penyampau nya majak nambah enggau pengawa ngaga baru rumah.

“Nya alai, pengawa ngagihka kuasa karan deka majak chakah dipejalaika,” ku iya.

Ku iya nambah, peniki rega minyak mega nyadi faktor besai begunaka bekal kuasa karan ke tetap, laban pengawa bekenaka injin api begunaka ungkus minyak ke tinggi sereta nating peranak menua nya.

Iya nandu baru madahka, bantu ke diberi nya ukai bepanggai ba sukung tauka penteba peranak menua nya, tang kebendar iya dipejalaika enggau komprehensif ungkup pengelantang rayat.

Inisiatif tu setipak enggau aspirasyen nentuka tetiap genturung pendiau menua pesisir ngasaika perengka guna pemun ti diguna, lalu enggau nya ngangkatka kualiti pengidup peranak menua nya. -RBI

BATU NIAH, 25 Mac — Empat iku lelaki peranak menua tu ke beumur entara 16 ngagai 30 taun ditan polis dikena mantu pansik kes enchuri bateri entukar enggau wayar temaga ba belakang sebuah supermakit ditu.

Pengawa ngetan nya digaga Pampang Nagang Penyalah Balai Polis Batu Niah, Miri, bepelasarka penerang mensia mayuh enggau pemansik.

Berindik ari nya, seraban polis ngepunka pengawa ngerap ngagai sebuah genturung pendiau di Tanjung Belipat, Batu Niah lalu mujur ngerampas sekeda bateri entukar enggau wayar temaga ke dipelabaka dichuri dikena nyadi barang kes.

Semua saspek deka ditan riman dikena mantu pengawa mansik silik agi, lalu kes nya dipansik ari baruh Seksyen 379 Kanun Keseksaan.

Mensia mayuh dilalau ngambika seruran bejaga -jaga sereta lengkas ngeripot sebarang aktiviti ke dipelabaka nyadi ba kandang endur diri empu dikena mantu opis bekuasa ngelaban pengawa salah. -RBI

MUKAH, 29 Mac – Raban Penyaga Orang Periman Malaysia (APM) Mukah mujur nangkap siku ular sawa batik urung dua meter pemanjai pengudah nerima kangau ngenyit ari mensia mayuh.

Nitihka ripot, ular nya ditemu ba belakang sebuah rumah ti meri pengirau ati ngagai peranak ke diau ngelingi nya.

Tim APM ke datai ba palan nya terus bejalaika pengawa enggau jampat ngena teknik ‘sintak’ sebedau mujur nangkap ular nya.

Gaya ba palan kes nyadi diripotka ulih dijaga sereta likun, nadai penusah ke enda manah nyadi sepemanjai operasyen nya.

APM Mukah mega ngenataika pengaga ati sida ngagai mensia mayuh ti lengkas ngeripot penusah nya, lalu enggau nya mantu nentuka atur jampat ulih dipejalaika.

Mensia mayuh ke betapi enggau penusah ngenyit tau ngenataika ngagai APM Mukah nengah lumur 084-872814 ti beoperasyen 24 jam sehari. -RBI

MIRI, 29 Mac – Sekumbang Gerempung Gagasan Anak Dayak Sarawak (GADS) udah ditumbuhka, gerempung tu udah bejalaika tanggungpengawa ti beguna dalam ngenegapka penyerakup komuniti Dayak.

Nitihku Sapit Menteri Pengerai Mensia Mayuh, Pengawa Berumah enggau Kaunsil Kandang Menua, Datuk Dr Penguang Manggil, tu nyengkaum ngetanka pesaka asal sereta ngenegapka komuniti kelebih agi rebak baru.

Penguang mega ngelalau gerempung nya ngambika terus ngenegapka pangku pengawa nyadi pelasar ti inklusif sereta progresif dalam ngadaka mayuh agi ketuai biak ti kompetitif.

“Ba jeman globalisasyen, pengawa nyemelaka pemansang moden enggau pengawa ngetanka nilai enggau main asal aki ini patut ditegapka agi, kelebih agi ba raban nembiak rebak baru.

“Nembiak rebak baru meseti diberi ruang enggau peluang neruska legasyen tu ngambika enda punas nitihka jeman, pia mega nentuka identiti budaya terus dijaga dalam arus moden,” ku iya.

Iya madah munyi nya lebuh bejaku ba Pengerami Makai Lemai Ninting Taun gerempun nya beserimbai enggau genap 12 taun udah ditumbuhka.

Penguang mega meri pengaga ati ngagai komitmen enggau semengat volunteer ti dipandangka bala kaban gerempung dalam ngemujurka bemacham program ti ngaul pengawa dagang, raban pedagang enggau main asal.

“Tu nyata ngayanka komuniti Dayak majak mansang enggau semengat sepenemu sereta identiti ti tegap,” ku iya.

Berebak enggau nya, iya mega meri pengaga ati ngagai gerempung nya ba pemujur ngatur pengawa nya sereta ngintu genap taun ke-12, ti ku iya kelai pejalai ti penuh enggau pemar sereta penyulut ti ngemegahka ati.

Sama bela ngulu pengerami tu iya nya Pandang Semat, Hajis Japar Labau, Sekretari Politik ngagai Premier Sarawak, Melissa Labot pengari Residen Miri, Edward Anak Tawang pengari Pemesai Pelilih Menua Miri, DSP Bobby Bana pengari KPD Miri, Serawa Budol Menijar Besai Port Authority, Jimmy Anak Lawie Chairman GADS, Pemancha Alexander Isut, Jonathan Bedindang Penyading Penemu Undang – Undang GADS, David Upe Penyanding Penemu Tadbir Urus GADS enggau raban GADS. – RBI

SEKUAU, 29 Mac — Penatai lebih 100 iku Tuai Rumah ari serata kandang menua DUN Tamin ba Pengerami Bejadika JKKK Tinting Pegari Sekuau mandangka pengandal ke tegap komuniti renggat baruh ngagai kuing pemansang ti dipejalaika ari baruh Kaban Kunsil Nengeri (ADUN) Tamin YB Ir. Christopher Gira Sambang.

Pengerami nya ke diatur ba rumah Tuai Rumah Saong anak Dominic Daud, ngempuruka ketuai komuniti ari mayuh bengkah sitak nyengkaum Sekuau, Selangau, Ili Oya Tajam, Siong, Lemai enggau Tamin, enggau nya mantaika semengat beserakup sereta begulai rayat menua pesisir dalam napi segang pemansang ke jampat.

Ba jaku bejadika pengerami nya, Christopher Gira ngenataika pengaga ati ngagai peranak Rumah Panjai Tinting Pegari Sekuau ketegal komitmen sida ke tinggi sereta timbal ke diberi sida.

“Penatai lebih 100 iku Tuai Rumah nya kemari ukai semina penyampau aja, tang mandangka penyerakup, penegap enggau pengandal rayat ba tuju pemansang di DUN Tamin.

“Tu pelasar ti beguna dikena kitai terus nyingkang ke mua enggau lebih progresif,” ku iya.

Iya mega madahka ubah status tanah Sekuau ari Tanah Perintah Besai ngagai Tanah Nengeri muka ruang ke lebih luas endur bejalaika mayuh bengkah projek pemansang ari baruh inisiatif perintah nengeri, kelebih agi nengah Projek Transformasyen Menua Pesisir (RTP).

Ngenang silik agi, iya madahka sekeda projek pemansang ti meri empas tinggi ti deka dipejalaika, nyengkaum projek ngaga jalai ba kandang menua Ulu Oya ti beungkus RM60 juta nengah Opis Menteri Pemansang Menua Pesisir enggau Kandang Menua (KKDW), ti disadang deka ditender dalam bulan Mei 2026.

Kelimpah ari nya, projek ngemesaika jalai alun ari Nanga Pakoh ngagai Rumah Ronnie enggau agih belanja RM200 juta ari Perintah Nengeri Sarawak udah tembu nengah proses meresa baru, seraya projek jalai alun ari SK Pakoh ngagai Ulu Bunau beungkus RM160 juta di baruh MiRRDA dikearapka nyadi penyungkak besai pemansang kandang menua.

Berebak enggau nya, iya mega madahka sepenyampau RM300 juta udah diagih nengah MiRRDA ungkup pemansang kandang menua RASCOM nyengkaum Sekuau nyadi siti ari fokus besai.

Perambu pemansang ‘Sekuau New Township’ ti ngaul pengawa ngaga rumah teres baru mega dikemeratka dikena nangkup guna peranak sereta nyungkak penumbuh ekonomi kandang menua.

“Aku dekaka Sekuau mansutka diri nyadi palan pemansang menua pesisir ti teratur sereta kompetitif, lalu ari nya ulih nyadi chunto ngagai kandang menua bukai dalam DUN Tamin.

Nengah perambu strategik sereta bejalaika pengawa enggau efektif, potensial besai ke bisi ulih dikeamatka penuh,” ku iya.

Nitih ku iya, pemisi MiRRDA deka nyadi penyungkak ngagai pemansang komprehensif ti mungkur infrastruktur, betanam betupi enggau logistik, lalu enggau nya ulih ngenyampatka agi transformasyen ekonomi menua pesisir ba sitak nya.

Ngelansa pasal rampa politik ke diatu, iya mantaika pengandal rayat DUN Tamin deka terus meri mandat dikena nentuka penerus agenda pemansang ti udah diperambu ulih nyadi nyata enggau komprehensif sereta meri empas ke tinggi.

Ba pengerami ke sama, iya bisi nyuaka 52 iti chek Geran Projek Mit Menua Pesisir (MRP) sepenyampau RM590,000 ngagai penerima ti mungkur PIBG sekula, rumah sembiang enggau JKKK.

Nyadi sukung tambah, agih belanja MRP sepenyampau RM27,000 mega diungkupka ngagai JKKK Rumah Panjai Tinting Pegari Sekuau, kelimpah ari agih belanja Projek PPRMS dalam tukuh kereban dikena ngaga rumah ke beungkus RM100,000.

Sama bisi datai iya nya Kaban Dewan Negara Senator Rita Sarimah Patrick Insol; Pemesai Pelilih Menua Selangau, Yalin Anak Assan; Chairman Opis Kaunsil Pelilih Menua Pesisir Sibu (SRDC), Kaunselor Sempurai Anak Petrus Ngelai; Ketuai Raban Bansa enggau rayat ngelingi Sekuau. — RBI