KUALA LUMPUR, 8 April – Opis Menteri Pelajar Malaysia (KPM) madahka sepenyampau 6,717 iku chalun ke bulih pemutus peresa nyulut iya nya 10A ke atas ba peresa Sijil Pelajaran Malaysia (SPM) 2025 deka diberi endur ba Program Matrikulasi ungkup sesi 2026/2027.

Nitihka KPM, tawaran nya automatik diberi ngagai semua chalun ke udah minta masuk Program Matrikulasi enda ngira bansa enggau penatai.

Berebak enggau nya, KPM nyemetak madahka kuota penerima ke diatu iya nya 90 peratus ungkup raban Bumiputera mengkang sereta enda dikeruga. -RBI

KUALA LUMPUR, 8 April – Kort Tinggi ditu dipadah sehari tu, dua iku raban polis bebadi nyawa ba sebengkah penusah di Balai Polis Ulu Tiram, Johor, dua taun ke udah, siku ketegal telih ba mua enggau kena timbak ba pala.

Saksi keterubah piak bedawa, Koperal Mohd Khairul Azhar Abbi Paisa, 25 taun, madahka dalam penusah nya urung pukul 2.30 pagi, 17 Mei 2024, iya enggau Koperal Mohd Hasif Roslan, 40 taun, ke benung bejalai matau nagang jenayah nengah nerima perintah ari Ketuai Balai, Inspektor Mohd Hisyam Ezahar nengah aplikasyen WhatsApp ngasuh seduai iya tekala nya pulai ngagai balai laban bisi kes penyarut nyadi.

Nitihka penerang iya, lebuh datai ba endur nya, iya meda niang Ahmad Azza Fahmi Azhar, 22 taun, gali entara berek enggau begunan stesyen dalam gaya bedarah enggau bekau abi ba mua iya ari pending nyentuk ke mulut.

“Maya nya, gaya ba stesyen nya balat petang sereta sunyi sebedau Lans Koperal Muhammad Aznel Salleh nyerauh madahka Ahmad Azza udah dipantap,” ku iya rambau peresa Sapit Pendawa Raya, Mohamad Mustaffa P Kunyalam.

Mohd Khairul Azhar madahka, lebuh datai dia, iya enggau Mohd Hasif ngiga endur belalai lebuh siku lelaki pansut ari tunga barek lalu nimbak seduai iya.

Ku iya, saspek ke ngena gari chelum, ngena topeng sereta mai beg sandik, ngereja pengawa kasar enggau nimbak beberapa kali ngagai pemesai polis ba balai nya.

Dalam gaya ke charut nya ku iya, sida nguji meresa alai saspek ba belakang balai nya, tang lelaki ke bisi kaul nya nimbak baru ngagai sida.

Iya mega madahka Koperal Mohd Hasif kena timbak dua kali ba bau kiba enggau punggung kiba lebuh iya nguji surut ngulihka alai endur belindung.

Kelimpah ari nya, siku agi kaban, Muhamad Syafiq Ahmad Said, 24 taun, ditimbak ba pala lebuh nguji ngiga endur belalai semak enggau sebuah kerita kebal.

“Aku meda saspek nguji deka ngerampas submachine gun enggi Muhamad Syafiq, tang aku mujur nimbak saspek.

“Timbak kedua aku nimbak kena ba tubuh lelaki nya sebedau iya rebah semak kerita kebal nya,” ku iya.

Ku iya nambah, bantu raban khas datai urung pukul 3.30 pagi sebedau gaya ba stesyen nya ulih dijaga, lalu iya udah nya dipinta ngelala tubuh dua iku bakih ke sama enggau iyq gawa sereta saspek.

Ba penusah nya, dua iku konstabel polis iya nya Ahmad Azza Fahmi enggau Muhamad Syafiq bebadi, lalu Mohd Hasif ditimbak lalu bakal, ngujungka saspek lesi ditimbak ba palan penusah nyadi.

Saspek dikelala enggau nama Radin Luqman Radin Imran, 21 taun, ti ngujungka lima iku sida sebilik ditangkap.

Bepelasarka dawa nya, apai iya, Radin Imran Radin Mohd Yassin, 64 taun, didawa meransang pengawa ganas nengah chara nanam ideologi Islamic State (IS) ngagai bala sida sebilik ba sebuah rumah di Jalai Rabani, Kampung Sungai Tiram, Johor Bahru entara ujung taun 2014 nyentukka 17 Mei 2024.

Iya nuduh ari baruh Seksyen 130JG(a) Kanun Keseksaan ti nyendiaka ukum jil maksimum 30 taun enggau ukum mata duit, enti ditemu salah.

Ungkup dawa bukai, lelaki nya mega didawa meri sukung ngagai aktiviti penganas nengah chara nyimpan empat iti senyata api nyengkaum senapang angin ke digaga ba endur ke sama.

MIRI, 8 April — Aum Ke-2 Pekit Kumang Sarawak 2026 udah diatur dikena ngelengkaska agi perambu enggau penyikap ngatur program beserimbai enggau Bazar Gawai Dayak & Pesta Etnobudaya 2026.

Aum tu ngembuan tuju deka nentuka tetiap aktiviti ulih dipejalaika enggau teratur, betukuh sereta lanchar.

Entara agenda ke bisi dipejurai nyengkaum jaku ari Charilady, Mdm Vivienne Nasat, ngatur kangau enggau ngerejista pesereta, ngatur perais, trofi enggau setipikit, rintai enggau ngatur temuai dipebasa, pengawa ngatur logistik program, pengawa nyendiaka pengerami makai lemai ti rasmi, ngatur penerang pesereta, pengawa nyiri bala akim enggau mantaika bajet dikena nentuka agih belanja dikena enggau manah.

Aum tu beguna dikena nentuka tetiap komiti meretika tanggungpengawa sida empu sereta ngatur kerejasama entara semua piak ti bekaul.

Enggau komitmen sereta koordinasyen ti tegap, Pekit Kumang Renggat Sarawak 2026 dikearap ulih mujur dipejalaika, lalu mantaika agi penyelai pesaka enggau main asal komuniti Dayak di nengeri tu.

Sama bisi ngulu aum tu iya nya Pemancha Alexander Isut, Pengulu Wilfred Mac, enggau Pengulu Ngadan. — RBI

KUALA LUMPUR, 8 April – Opis Menteri Pelajar Malaysia (KPM) madahka bisi 300 iku raban Penulung Warden MySTEP (MyPWA) udah dichiri berengkah 1 April 2026 ngambika diengkah ba sekula bemalam di serata menua.

Menteri Pelajar, Fadhlina Sidek madah, inisiatif MyPWA diberi kelala dikena ngangkatka tikas pengelikun ba sekula bemalam, kelimpah ari mantu ngurangka tating pengawa bala pengajar.

Nitih ku iya, MyPWA bejalaika tanggungpengawa mantu warden, kelebih agi matau maya malam hari dikena nentuka pengelikun, pengelantang enggau pendiau nembiak bemalam ba buding terus ditegapka.

Iya nambah, pengawa bejalaika inisiatif MyPWA deka terus dikerembaika nyadi siti ari pengawa seriris enggau agenda reformasyen pengelikun ba semua palan pelajar ari baruh pegai KPM.

Inisiatif tu mega beserimbai enggau Langgur Pelajar Malaysia (RPM) 2026-2035 ti ngerintaika pematut pengajar ngemeratka aktiviti ngajar enggau belajar (PdP). -RBI

KUCHING, 8 April — Graduet Sijil Pelajaran Malaysia (SPM), Sijil Tinggi Persekolahan Malaysia (STPM) enggau syarat layak ke sebaka di Sarawak dilalau ngulu Jom Masuk Universiti 2026 (JMU 2026) Zon Sarawak I, nyadi inisiatif dikena ngerembaika akses ngagai pelajar tinggi komprehensi.

Karnival ke diatur Opis Menteri Pelajar Tinggi nya ngembuan tuju deka ngembing bala nembiak ke agi berundingka pilih jurusan pelajar, kuing kereja enggau pematut kus nitihka pengelandik akademik sida empu.

Nengah pengawa ngatur program tu, bala temuai bisi peluang ngulihka jaku lalau enggau servis kaunseling terus ari pengari mayuh bengkah palan pelajar tinggi, nyengkaum Universiti Awam (UA), Politeknik, Kolej Komuniti, Bagian Pelajar Tinggi MARA (MARA BPT) Institusi Pendidikan Tinggi Swasta (IPTS) ari serata menua.

Bemacham aktiviti ti narit ati mega bisi disediaka sepemanjai karnival nya, nyengkaum sesi berunding pasal aplikasyen UPUOnline, penerang enggau palan pelajar tinggi awam enggau peribit, penerang ari ejensi ti ngundang, program interaktif Learning Fun Games Science (LFG Science), chabut tikit benasit, fasiliti pemandang produk inovasyen enggau trak pemakai.

Pengawa tama ngagai karnival tu enda bebayar sereta dibuka ngagai mensia mayuh kelebih agi nembiak enggau apai indai ke deka bulih eksposur tumu pasal peluang pelajar tinggi.

Berindik ari nya, mensia mayuh diperansang datai bebala mayuh ngambika ulih beambi ulih ari peluang tu dalam merambu pelajar jemah ila enggau chara ti lebih fokus sereta bepenemu. — RBI

IGAN, 8 April — Pengawa ngangkatmanah Jalai Igan–Kebuaw diatu benung chakah dipejalaika, dikemata enggau silik ari raban Kawalan Kualiti enggau Jamin Kualiti (QAQC) ba palan projek nya.

Nitihka penerang Facebook PJP Barisan Hem JV, tetiap renggat pengawa bejalaika projek mega disukung enggau pengawa bejalaika pengawa nguji in-situ (on-site testing) dikena nentuka tikas kualiti, pengelama sereta nitihka spesifikasyen teknikal ti udah ditetapka.

Chara tu ngayanka komitmen tinggi piak ti bejalaika pengawa dalam nentuka tetiap komponen pengawa ngaga nitihka standard ti udah ditetapka, lalu enggau nya ngurangka risiko pengerusak tumu sereta nambahka timpuh jalai alun.

Projek ngangkatmanah tu dikearapka ulih meri penguntung ke besai ngagai penguna jalai alun nengah chara nyendiaka jalai ke lanchar, nyamai sereta likun agi, kelimpah ari nyukung penambah penyambung enggau aktiviti ekonomi kandang menua.

Pengawa ti enda ngetu tu mega setipak enggau aspirasyen pemansang infrastruktur ti meruan sereta bekualiti ungkup pengelantang rayat. — RBI

BETONG, 8 April — Palan Servis Rayat Parlimen P.204 Betong begulai enggau ejensi ti bejalaika pengawa bejalaika pengawa meresa palan ungkup Projek Ngangkatmanah Jalai Penyambung Menua Pesisir (JPD) di Rumah Panjai Pelepok Padeh, sehari tu.

Pengawa meresa nya mega nyengkaum pengawa meresa palan enggau tuju ngeluarka Setipikit Tembu Praktikal (CPC), iya nya penetap rasmi ti madahka projek nya udah dipejalaika penuh nitihka spesifikasyen ti udah ditetapka sereta nitihka standard teknikal ti udah ditetapka sebedau diserah ngagai piak ti bekaul.

Projek ngangkatmanah jalai alun tu dikearapka ulih mai penguntung ke besai ngagai peranak menua tu, kelebih agi ba pengawa ngemanahka perengka guna komunikasyen menua pesisir sereta nentuka jalai alun ke nyamai agi, likun sereta efisyen ungkup guna ninting hari komuniti.

Kaban Parlimen Betong, Dato Dr. Richard Rapu, ba sebengkah penerang nyemetak madahka pengawa bejalaika projek tu mandangka komitmen perintah ti terus ngenegapka pemansang infrastruktur menua pesisir, setipak enggau pengawa ngangkatka kualiti pengidup rayat ba kandang Parlimen Betong. — RBI

KUCHING, 7 April — Sapit Menteri Pengerai Malaysia, YB Dato’ Hajjah Hanifah Hajar Taib, bejalaika penemuai kereja rasmi ngagai Sepital Besai Sarawak beserimbai enggau Jelajah Pengerai Nengeri Sarawak Siri 1, beratika baru tikas penyikap enggau penau servis pengerai ba sepital rujukbesai nengeri tu.

Penatai iya disambut Direktor Sepital Besai Sarawak, YBrs. Ngian Hie Ung, sebedau diberi penerang silik pasal operasyen sepital nya selampur.

Penerang nya mungkur kapasiti servis, pemar kemaya hari enggau bemacham inisiatif ti benung dipejalaika dikena ngangkatka kualiti berubat enggau servis ngagai pesakit.

Penemuai nya ngemeratka pengawa ti enda ngetu dikena nentuka perengka guna pengerai mensia mayuh seruran ba tikas ti optimum, kelebih agi dalam nangkup guna rayat di Bagi Menua Kuching ti betapi enggau penyampau pesakit ti majak nambah sereta begunaka akses berubat ti lebih efisyen sereta efektif.

Naka ke diatu, Sepital Besai Sarawak majak ngerembai nyadi palan rujuk besai ti nyendiaka 26 servis pakar enggau 53 subspesialis, enggau kapasiti 1,020 katil sereta disukung sepenyampau 4,409 pengereja pengawa pengerai.

Rambau penemuai nya, YB Dato’ Hajjah Hanifah Hajar Taib mega bisi ngabas sekeda perengka guna besai sepital nya nyengkaum Opis Penusah Ngenyit enggau Trauma (ETD), Palan Pemansik Klinikal (CRC), Opis Makmal Bersepadu, Pending, Idung enggau Rekung (THT) enggau Unit Rawatan Rapi Neonatal (Neonatal).

Pengawa meresa tu ngembuan tuju ngulihka gambar ti komprehensif pasal operasyen servis ba bidang nya kelimpah ari meretika utai ti amat diguna pengereja pengawa pengerai enggau pesakit.

Sama bisi datai Dr.Alex Kim Ren Jye, Sapit Direktor I (Perubat); Wing Kee Ging, Sapit Pengarah II (Perubat); Norinawaty Abg Daud, Sapit Direktor III (Perubat); Encik Banges Munga, Sapit Direktor Pengerai Nengeri (Pengatur); Azlee bin Ayub, Sapit Direktor Pengerai Nengeri (Perubat) enggau Encik Ahmad Rizal bin Khalit, Sapit Sekretari Bagi (Pemansang), Opis Menteri Pengerai Malaysia. — RBI

CYBERJAYA, 8 April – Suruhanjaya Komunikasyen enggau Multimedia Malaysia (SKMM) udah muka 36 keretas pansik bekaul enggau pengawa ngerembaika berita pelesu bekaul enggau krisis kuasa global ba media rama enggau pelasar digital.

Sepenyampau 22 iku individu ari mayuh bengkah endur di serata menua udah dikangau ngambika dirikod penerang sida dikena mantu pansik, lalu enam keretas pansik udah dianjung ngagai Sapit Pendawa Raya ngambika dipansik enggau dipejalaika enggau silik agi.

Pansik dipejalai ari baruh Seksyen 233 Akta Komunikasyen enggau Multimedia 1998 (Akta 588), ti nyendiaka ukum maksimum RM500,000 tauka jil nyentuk dua taun, tauka kededua nya, enti dikenuku salah.

MCMC nyemetak madahka sebarang pengawa salah guna pelasar media rama tauka digital dikena ngelimpangka runding mensia mayuh endang berat lalu deka diambi enggau atur ke terit.

Mensia mayuh diingat ngambika betanggungjawap lebuh bekenaka media rama lalu anang ngerembaika isi ti tau ngeruga pengelantang enggau atur mensia mayuh. -RBI

MANCHESTER, 8 April — Menijar penyaga Manchester United, Michael Carrick nerima sukung penuh ari pemain ti deka ke iya dipadu chara tetap pengudah ngayanka prestasi ti chukup manah kenyau ari iya megai tim nya dalam bulan Januari tu tadi.

Ex-pemain tengah ke beumur 44 taun nya udah ngiring United menang tujuh kali, dua kali seri enggau semina alah sekali dalam 10 main Liga Premier, lalu ngengkahka tim nya ba penuduk lumur tiga sereta ba jalai ke betul ngambika ulih masuk Liga Champions musim baru.

Pemain sayap Amad Diallo nerangka Carrick nyadi orang ke patut ngiring tim nya, taja pan iya ngaku pemutus kepenudi bepanggai ba piak pengatur kelab nya.

“Ukai pemain nya nentuka kuing iya jemah ila, tang iya chukup manah.

“Iya mayuh mantu tim, bisi peneleba sereta meretika kelab tu,” ku Amad.

Amad mega nyemetak madahka pemanah kaul entara Carrick enggau bala pemain nyadi pekara ti beguna dalam pengawa ngangkatka baru tim nya.

“Kadang-kadang nuan begunaka menijar baka tu ngambika kelab tu ulih pulai ngagai endur ke patut.

“Ba penemu aku, iya orang ke patut,” ku iya.

Siku agi pemain, Bryan Mbeumo mega muji chara Carrick, ti ​​meretika budaya kelab enggau chara berandau enggau bala pemain.

“Iya nemu chara kelab tu gawa sereta chara berandau enggau kami.

“Nya ngemuntangka agi laban iya nemu rampa menua ditu,” ku Mbeumo.

Diatu United benung ngasaika kem latih intensif di Ireland dikena nyendiaka diri napi main ke beguna amat ngelaban Leeds United ba Old Trafford, enggau batang tuju nentuka kelab nya nembuka musim tu ba renggat ke manah ba atas.

Sukung ngagai Carrick mega udah ditambahka agi enggau legenda kelab baka Paul Scholes enggau Nicky Butt, ti pechaya iya patut bulih peluang tetap, ngujungka raban pengatur pengawa agi kakang sebedau pemutus besai ba ujung musim. -RBI