BINTANGOR, 30 Mac — Siku ular ke ditemu ba sangkar manuk ba sebuah palan pengentap pendiau di Jalai Wong You Kee udah mujur ditangkap raban Balai Bomba enggau Penyah Penusah (BBP) Bintangor dalam operasyen pagi tadi.

Nitihka ripot, kangau ngenyit ari siku indu ke urung pukul 7.19 pagi sebedau luching ngenyit ditebah lalu raban bomba jampat ngesah ngagai endur penusah nya nyadi.

Tim bomba ke datai urung pukul 7.23 pagi tetemuka endang amat bisi ular ba kandang manuk enggi orang ke ngaga sebana nya.

Panglima operasyen, PBK II (TBBK I) Ahmad Jais bin Ahad udah nya ngasuh raban iya bejalaika operasyen nangkap ular nya ngena perengka panjuk.

Ular nya mujur ditangkap enggau likun lalu operasyen tembu enggau penuh pukul 7.29 pagi sebedau tim nya pulai ngagai stesyen nya.

Operasyen nya ngaul tiga iku kaban enggau sebuah entukar Land Rover lalu nadai ejensi bukai ngaul diri ba endur penusah nya nyadi. -RBI

MUKAH, 30 Mac — Pesta Kaul Mukah 2026 deka berengkah kena 25 April tu enggau pengerami tradisional Serahang Kakan nyadi pengawa bejadi simbolik rasmi.

Pesta Kaul nyadi sebengkah pengerami asal ke besai komuniti Melanau ti mandangka pengarap enggau adat asal sida, kelimpah nyadi pelasar meri kelala pesaka budaya ngagai rebak baru enggau temuai ari menua luar.

Pengawa tu ti ngaul mandangka perau ti diias ti mai “serahang” ti ngundan mayuh macham pemakai asal ti deka dibantai ngagai ipok, penyaga tasik nitihka pengarap komuniti Melanau.

Pengerami tu ngembuan tuju deka besampika pengelikun, asil berikan ari tasik ke manah sereta dikena nyeliahka penyakit, ku Kaban Kunsil Nengeri (ADUN) Balingian, Abdul Yaakub Arbi lebuh nyadi chairman Aum Komiti Besai Pengerami Kaul Mukah Lumur di Dewan Pentadbiran Perintah Sarawak.

Ku iya, sepemanjai pengerami nya nyentuk 3 Mei, bemacham aktiviti ti ngerinduka ati deka diatur nyengkaum Pekit Pemajik gamal Teluwaih Jinih, Lumba Bidar Lukut, Pekit Bermukun, Pekit Nyumai Melanau sereta mega pengawa mandangka seni enggau main asal.

Pengawa bejadika pengerami nya diperambu kena 2 Mei lalu deka dipenyadika Premier Sarawak, Datuk Patinggi Tan Sri Abang Abdul Rahman Zohari Openg ba Panggau Besai Pesta Kaul Mukah.

Pia mega Pengerami Keman Kaul ti ditaga kena 3 Mei disadang deka diintu enggau penatai Tuao Pemegai Menua (TYT) Negeri Sarawak enggau bini iya.

Berebak enggau nya, Sapit Presiden Serakup Melanau Mukah (PMM) ke mega ADUN) Tellian, Royston Valentine madah, kerejasama rat entara ejensi perintah enggau peribit nyadi pekara ti beguna dikena nentuka pemujur pengerami nya.

Iya nyemetak madahka Pekit Pemajik gamal Teluwaih Jinih ukai semina mantaika elegan indu dara Melanau, tang mega mandangka penulin pekayan asal enggau identiti budaya ke nyelai.

Abdul Yaakub mega ngelalau mensia mayuh ngambika merambu pejalai sida tumu dikena nyeliahka sebarang penanggul.

“Datai sama bela ngasaika penyelai Pesta Kaul Mukah 2026 ti udah tentu deka meri peneleba budaya ti enda ulih dilalaika,” ku iya. -RBI

KUCHING: Bekal dagin chapi di Sarawak mengkang chukup taja pan nengeri tu dipelaba napi rega ti niki ketegal ungkus logistik global ke majak niki.

Menteri Industri Pemakai, Komoditi enggau Pemansang Kandang Menua, Datuk Seri Dr Stephen Rundi Utom madah, pun penatai import dagin ari India, New Zealand enggau Australia ke nadai bekaul terus enggau penyarut nya nentuka bekal nya meruan tegap.

Nitihku iya, taja pan transaksyen import diatu nadai tekeruga, tang penambah ungkus pengangkut berindik ari rega minyak ti majak niki dipelaba deka ngeruga rega dagin chapi enggau pemakai jelu tupi ti diimport.

“Gaya import ke diatu di Sarawak nadai tekeruga, tang ungkus logistik ngimport dagin chapi enggau pemakai jelu tupi dipelaba deka nambah.

“Pekara tu bisi potensial ngasuh rega dagin chapi import enggau pemakai jelu tupi ke bukai niki,” ku iya.

BETONG, 30 Mac – Projek ngaga baru Sekula Kebangsaan (SK) Datuk Bandar Debak ke beungkus RM17.9 juta dipejalaika ari baruh Program Sekula Repuk (Agih Perintah Besai) lalu berengkah digaga dalam bulan Februari 2026 enggau timpuh ngaga dua taun.

Skop projek nya mungkur pengawa ngaga blok akademik, pentadbiran, prasekula, surau, kuarters pengajar kelimpah ari perengka guna infrastruktur moden ke lebih kondusif.

Pengerami nasih tanah projek nya udah dipenyadika Menteri Pelajar, Inovasyen enggau Pemansang Bakat Sarawak (MEITD), Dato Sri Roland Sagah Wee Inn, lalu enggau nya mandangka komitmen perintah ti terus ngenegapka pemansang pelajar menua pesisir di Sarawak.

Pemansang tu dikearap ulih ngangkatka kualiti ngajar enggau belajar nengah chara nyendiaka rampa ti lebih lantang, likun sereta meruan.

Kelimpah ari ngerembaika akses ngagai pelajar tumu, iya mega ngenegapka pengelantang pendiau nembiak sekula sereta ngurangka bida pemansang pelajar entara kandang mengeri enggau menua pesisir.

Sama bisi datai Sapit Menteri Pemansang Pengelantang Raban Bansa, Sarawak, Datuk Ricky @ Haji Mohamad Razi Sitam, Sapit Menteri Pemansang Bakat, Sarawak, Datuk Francis Harden Anak Hollis, Kaban Parlimen Betong, Dato Dr Richard Rapu @ Aman Begri, Sekretari Tetap MEITD, Datu Haji Adana Haji Jed, Pengari Kereja Raya Sarawak, Ir. Ts. Bujang Kanang enggau Direktor Pengari Opis Pelajar Nengeri Sarawak, Dr.Abang Adam Abang Deli begulai enggau bala ketuai opis ke bukai.

Ba selampur, projek tu ngayanka pengawa ti begempung entara Perintah Nengeri enggau Perintah Besai dalam nentuka akses ngagai pelajar ti bekualiti ungkup semua, lalu enggau nya ngasilka rebak dudi hari ti kompetitif. – RBI

SUAI, 30 Mac — Pengawa ngatur Pesta Penan ‘Tipun Pinum Pengida Penan’ terus nyadi pelasar ke besai reti dalam ngenegapka penyerakup komuniti sereta meransang ngubah runding nuju penyulut entara komuniti menua pesisir, kelebih agi komuniti Penan.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, program baka nya ukai semina gempuru rama aja, tang lebih agi nyadika pelasar ngenegapka kerejasama sereta mantaika potensial komuniti menua nya.

Nitihku iya, komuniti Penan begunaka pemerani mansang ke mua nyadi pelasar ubah nengah chara ngemanahka imej diri enggau pengandal diri ngambika ulih besemekih enggau arus pemansang kemaya hari tu.

“Udah datai maya iya kitai mandangka ngagai dunya kitai bisi penau ngubah sereta mansang.

“Imej sebengkah pekara ti beguna ti patut dijaga kitai,” ku iya lebuh bejaku ba pengawa nya di Kampung Mareng, Jematan Suai, kena Hari Enam tu tadi.

Iya ke mega Kaban Kunsil Nengeri (ADUN) Kemena nyemetak madahka pemujur sesebuah komuniti bepanggai ba pengawa ti enda ngetu sereta pengeran komuniti dalam ngangkatka tikas pengidup sida.

Berindik enggau nya, iya ngelalau peranak ngambi nyadika individu ti mujur nyadi pun peransang dalam ngangkatka pengidup sida, seraya ngemeratka pemesai guna pelajar nyadi pelasar ngadaka rebak ti kompetitif.

Berebak enggau nya, iya mega ngingatka komuniti ngambika nyeliahka diri ari kepapas, tang nganti nya ngena pemujur orang bukai nyadika pelasar motivasyen ngambika mega mujur.

Nambahka nya, tetiap iku individu bisi pengelebih kediri empu lalu patut pintar ngelala pangku pengawa diri empu dalam meri bantu ngagai pemansang komuniti.

Nerang silik, iya mega meri pengaga ati ngagai ketuai raban bansa ti bejalaika tanggungpengawa besai dalam meransang ubah sereta ngenegapka pemansang komuniti Penan ba kandang menua nya.

Entara ke bisi datai iya nya Residen Bintulu ke mega Presiden Gerempung Pemansang Tipun Penan Sarawak (PETIPUN), Datu Nyurak Keti, Ketuai Komuniti Penan ke mega Penyanding Penemu PETIPUN, Datuk Temenggong Hasan Sui enggau Direktor Opis Betanam Betupi Sarawak, Dominic Changgat.

Sama bisi datai Pemesai Pelilih Menua Telang Usan, Ezra Uda, Ketuai Komuniti Iban Bagi Menua Miri, Temenggong Boniface Bada Unjah, Ketuai Genturung Pendiau Mareng ke mega Ketuai Komiti Pengatur Pengerami Penan, Ketuai Raban Bansa (KK) Herman, Sekretari Politik ngagai Premier Sarawak, Collin Patan enggau Penulung Direktor Opis Pelajar Negeri Sarawak Dr Serina Keti. — RBI

KUCHING, 30 Mac – Sepenyampau 118 iku individu enggau 108 buah entukar udah diperesa lalu 65 buah mutosikal mega dirampas ari baruh Seksyen 60 Akta Pengangkutan Jalan 1987, kelimpah ari 350 iti saman PDRM ti dikeluar ketegal mayuh macham penyalah trafik.

Kepala Polis Pelilih Menua Kuching, ACP Alexson Naga Anak Chabu semua tu berindik ari operasyen ti dipejalaila Bagi Pansik enggau Penerit Adat Trafik Indu Opis Polis Pelilih (IPD) Kuching ba Ops Bayar Jalai.

Operasyen nya pengelama urung 11 jam berengkah ari pukul 3.30 lemai nyentuk 2.30 pagi ba kandang endur MASJA, Kuching, enggau pengawa ngelaban penyamun trafik.

Asil ari operasyen nya mega, dua iku lelaki peranak menua tu ke beumur entara 16 ngagai 20 taun udah ditan, lalu dua buah mutosikal dirampas laban dipelabaka ngereja penyalah ari baruh Seksyen 42(1) Akta Pengangkutan Jalan 1987.

Operasyen nya ngaul tiga iku pemesai kanan begulai enggau 32 iku raban ari Opis Pansik enggau Penerit Adat Trafik, Indu Opis Kontinjen Polis Sarawak enggau Bagi Pansik enggau Penerit Adat Trafik IPD Kuching.

ALexson mega ngelalau mensia mayuh ngambika seruran ngasika undang-undang jalai alun, anang ngaul diri enggau aktiviti geng jalai alun sereta nyeliahka diri ari ngubah struktur asal perengka pengangkut. -RBI

KUALA LUMPUR, 30 Mac – Menteri Penyerakup Menua, Dato Sri Aaron Ago Dagang madah, 22 buah mijum ari baruh Opis Mijum Malaysia terus nyadi pilih rayat enggau temuai, lalu enggau nya ngerikod pemujur ti chukup meransang.

Nitih ku iya, taun 2025 ngerikod pemujur ke chukup manah enggau penyampau semua temuai datai 2,457,051 iku, ngelui ari tagit 2.2 juta ke ditagit.

“Ari penyampau nya, 355,585 iku temuai antarabansa mega milih mijum di menua tu nyadi batang palan ditapatka sida,” ku iya.

Ku iya nambah, taun 2026 dipelaba richah agi enggau pengawa bejalaika tiga segmen besai iya nya Citra Nusa @ Mijum, Fiesta Uniti @ Mijum enggau Mijum begulai enggau Komuniti.

Berebak enggau nya ku iya, Opis Menteri Penyerakup Menua bebendar deka ngidupka baru mijum nyadi ruang penemu ke dinamik, inklusif sereta relevan ngagai rebak kemaya hari tu.

Pengawa nya nyengkaum ngemodenka pengawa pemandang, ngena teknologi interaktif sereta ngenataika program ti meri empas tinggi ngambika mijum ulih terus nyadi palan belajar sepemanjai umur.

Berebak enggau nya, iya madahka opis menteri mega ngemeratka pengawa ngemaruka baru mijum nyadi pelasar nyerakupka komuniti pupu bansa.

“Nengah chara bepelasarka komuniti enggau kerejasama strategik, mijum deka terus diberi kuasa nyadi ruang ti ngerapitka seraka, nerenakka pemereti ati sereta nanam semengat penyerakup bansa,” ku iya.

Iya nyemetak madahka mijum nyadi kedap identiti bansa, penyerakup enggau jemah ila. -RBI

SELANGAU, 30 Mac — Projek masang atap Rumah Rose Nana, Skim Sekuau udah mujur tembu, lalu enggau nya meri penguntung ngagai 20 buah pintu rumah panjai ba kandang menua nya.

Pengawa bejalaika projek tu nengah agih belanja Kaban Parlimen Selangau, Edwin Banta ari baruh inisiatif Projek Mesra Rakyat (MyKhas), ke ngembuan tuju ngangkatka pengelantang enggau pengelikun rumah peranak menua pesisir.

Pekara ti narit ati, pengawa masang atap dipejalaika nengah pengawa beripai peranak menua nya, ti ngayanka semengat kerejasama ti tinggi sereta pengibuh komuniti dalam ngemanahka rumah sida.

Sepenyampau 20 pintu udah teulihka penguntung terus ari projek tu, ti dipeda ulih ngangkatka kualiti pengidup enggau pengelantang peranak rumah panjai.

Inisiatif tu mega mandangka komitmen Edwin Banta ti seruran bejalaika pengawa dalam nentuka pengelantang pendiau rayat seruran diberi perati, kelebih agi ba pengawa ngenegapka pemansang komuniti menua pesisir.

Nitihka penerang ti ba Facebook rasmi iya, iya mega meri besai terima kasih ngagai semua piak kelebih agi peranak Rumah Rose Nana ti udah meri kerejasama enggau pengawa begulai ngemujurka projek nya. — RBI

MUKAH, 30 Mac — Siku lelaki peranak menua luar beumur 53 taun ditan polis pengudah ditemu ngembuan dadah bansa Methamphetamine ba pengawa datai ngenyit ba tisi kampung di Jalai Anggun, Mukah, lemai kemari.

Ketuai Polis Pelilih Mukah, DSP Muhamad Rizal Alias ​​madah, pengawa ngetan nya digaga urung pukul 3.40 lemai ari tim kaban Bagi Pansik Jenayah Narkotik Indu Opis Polis Pelilih (IPD) Mukah bepelasarka penerang pemansik bekaul enggau aktiviti salah guna dadah.

“Asil ari pengawa meresa saspek tetemuka bungkus plastik senayau ti ngundan gumpal kristal ti dipelaba methamphetamine tauka syabu enggau anggar pemerat kasar 0.68 gram,” ku iya nengah penerang media sehari tu.

Nitihku iya, saspek enggau barang ke dirampas udah dibai ngagai IPD Mukah ngambika atur silik agi dipejalaika, lalu peresa nisih ai kemi tetemuka lelaki nya positif amphetamine enggau methamphetamine.

Kes tu dipansik ari baruh Seksyen 12(2) Akta Dadah Berbahaya 1952 enggau Seksyen 15(1)(a) akta ke sama.

Kelimpah ari nya, keretas pansik mega udah dibuka ari baruh Seksyen 6(1)(c) Akta Imigresyen 1959/63 laban saspek enda mandangka dokumen pejalai ti entas.

Saspek ke gawa nyadi pekereja ladang sawit udah ditan riman pengelama empat hari dikena mantu pengawa mansik silik agi.

Berebak enggau nya, iya nyemetak madahka IPD Mukah bebendar ngemuntanka aktiviti salah guna dadah lalu ngansak mensia mayuh ngenataika penerang ti bekaul ngagai polis.

“Sebarang penerang ulih dikenataika nengah talipaun 084-871222 tauka datai ngagai sebarang balai polis ke besemak,” ku iya. – RBI

BINTULU, 30 Mac – Sapit Menteri Infrastruktur enggau Pemansang Palan Penyangkai Kapal Sarawak ti mega Kaban Kunsil Nengeri (ADUN) Samalaju, Datuk Majang Renggi muji pengawa Gerempung Peminat Main Asal Iban Bintulu (PEMANIS) ti majak chakah ngatur program enggau woksyop kelai bansa asal Iban.

Ku iya, nembiak rebak baru kelebih agi bansa Iban dilalau belajarka ngajat ti nyadi pesaka asal ti diturun ari serak ngagai siti serak ti nyadi kelai identiti budaya komuniti.

Kenu ku iya, pengawa ti enda ngetu patut dipejalaika semua piak dikena nentuka main asal tu enda lenyau jeman.

“Program baka tu nyadi pelasar beguna dikena nentuka main asal enggau pesaka asal terus meruan sereta enda lenyau ditabanka arus pemansang moden,” ku iya.

Iya madah munyi nya lebuh bejadika Pengerami Tamat Ngajat Batch 21 & 22/2026 enggau Malam Main Asal Dayak diatur PEMANIS ke udah nyadi ba Hotel Promenade Bintulu, kena Hari Enam tu tadi.

Berebak enggau nya, iya mega madahka inisiatif ke dipejalaika gerempung nya mantu meri awak ngagai penyereta mansik enggau dalam agi nilai budaya enggau seni ke bisi dalam main asal nya.

Ku iya nambah, pengawa nya ukai semina nerenakka asai temegah ati, tang mega nerenakka tanggungpengawa ba individu ngetanka pesaka asal aki ini sida ngambika terus dijaga ari serak ngagai siti serak.

“Pengawa terus dipejalaika nengah program baka tu besai amat reti dalam nentuka penerus pesaka asal sereta ngenegapka rega diri enggau identiti komuniti, kelebih agi ba raban nembiak rebak baru,” ku iya. – RBI