TENOM, 31 Mac – Siku lelaki nimbak menyadi biak iya nyentukka lesi sebedau ditimbak polis ba sebengkah penusah ke nyadi di Kampung Kangkawang, Jalai Kemabong, kena Hari Minggu tu tadi.

Ketuai Polis Pelilih Tenom, Superintenden Azmir Abd Razak madah, piak iya nerima penerang bekaul enggau penusah nya urung pukul 8.54 pagi sebedau tim pemesai enggau raban dianjung ngagai endur nya.

Ku iya nerang, penusah ke nyadi urung pukul 8 pagi nya, tudah ke beumur 54 taun ke gawa nyadi tukang kebun dientaska bebadi pengudah bakal lapan kali kena timbak ba belakang tubuh iya.

Saspek ke beumur 57 taun ke mega menyadi tudah nya diripotka ngena senyata senapang bansa bakakuk digaga diri empu lalu dipelabaka bisi penanggul pengerai runding.

“Lebuh datai ba palan penusah nyadi, peranak menua nya madah ngagai polis, saspek bisi ba dalam rumah megai senyata api lalu ngemba deka nimbak sebarang orang ke mansang semak ngagai endur nya.

“Polis udah nya ngelingi endur nya lalu ngasuh saspek nyerahka diri tiga kali, tang iya enggai pansut.”

“Beberapa kali gis pemedis mata udah ditimbak ke dalam rumah dikena mejal saspek pansut, tang iya tetap enda meri kerejasama,” ku iya nengah sebengkah penerang ditu.

Ku Azmir, gaya nya betukar penyarut lebuh saspek belanda nuju dapur seraya nunjukka senyata iya ngagai pemesai polis ke benung besemak enggau jenila rumah nya.

“Ba pengawa ngetanka diri, siku pemesai polis ka pan enda nimbak tiga kali ngagai saspek ba lengan kanan, dada kiba enggau rusuk kiba.

“Saspek udah nya rebah ba kandang dapur rumah sebedau dientasaka bebadi ba palan penusah nyadi.

“Peresa silik tetemuka senyata bakakuk saspek agi bisi seterum idup dalam senapang nya,” ku iya.

Ku iya, raban polis mega bisi ngerampas sekeda barang nyengkaum senapang api bakakuk, seterum, kerubung seterum enggau duku panjai ba palan penusah nyadi.

“Kes dipansik ari baruh Seksyen 302 Kanun Keseksaan kes bunuh enggau Seksyen 307 Kanun Keseksaan nguji munuh.Pansik silik agi dipejalai,” ku iya.

MIRI, 31 Mac — Raban Penyaga Pengelikun Mensia Mayuh Malaysia (APM) Pelilih Miri mujur bejalaika operasyen nangkap siku baya ke ditemu dalam rumah puang ba kandang endur ke benung digaga, kemari.

Nitihka penerang rasmi, Operasyen Nangkap Jelu Liar (MHL) dipejalaika Skuad Charlie ti mungkur empat iku kaban, betuaika Koperal (PA) Mariani binti Eddy.

APM nerima sebana ari mensia mayuh bekaul enggau bisi baya ba sebuah rumah ke bedau diuan lalu agi benung digaga.

Berindik ari nya, tim nya terus dipindah ngagai endur nya ngambika bejalaika pengawa meresa enggau atur ke silik agi.

Asil peresa nya tetemuka siku baya engkatak ti dipelabaka pemanjai urung 2.5 meter bisi ba kandang endur nya.

Tim nya mujur nangkap reptilia nya enggau likun nadai sebarang penusah ke enda manah nyadi.

Operasyen nya tembu enggau likun lalu semua kaban mulaika diri ngagai Palan Kawalan Operasyen (PKOD) Pelilih Miri pengudah nembuka pengawa sida.

Berindik enggau nya, APM ngelalau mensia mayuh ngambika seruran bejejaga, kelebih agi ba kandang endur ke besemak enggau sungai sereta palan pemansang baru, lalu lengkas ngeripot ngagai opis bekuasa nyema bisi tetemuka bisi jelu siga. — RBI

Sumber, photo — APM Miri

TAWAU, 31 Mac — Siku orang ke ngena mutosikal beumur 29 taun bebadi nyawa pengudah akside ba jalai alun ti mungkur sebuah pikap (pacuan empat roda) di Jalai Airport Baru, kilah ensanus.

Ketuai Polis Pelilih Tawau, Asisten Komisioner Jasmin Hussin, madahka piak iya nerima ripot bekaul enggau penusah nya urung pukul 2.30 lemai sebedau ngatur tim pemansik ngagai endur nya.

Pansik tumu tetemuka mutosikal tudah dipelabaka ngenyit pansut ari sepiak kiba jalai lalu tama ngagai jalai sebuah kerita pikap ke benung bejalai ari Sin On nuju Padang Bilun Tawau.

Ketegal ari takah ari kelalu semak, deriba pikap nya enda sempat nyeliah lalu ngelantak sepiak kanan mutosikal nya. Tudah ke ngena mutosikal dientaska pemesai perubat bebadi nyawa ketegal balat bakal.

KAPIT, 31 Mac – Pengelikun enggau pemeresi sungai ukai tanggungpengawa sebengkah piak aja, tang lebih agi begunaka penyedar, disiplin enggau pengibuh ti seruran ari semua renggat mensia mayuh, ku Kaban Kunsil Nengeri (ADUN) Pelagus, Wilson Nyabong Ijang.

Iya madah munyi nya lebuh bejadika Program Penyedar Pengelikun enggau Pemeresi Sungai di Rumah Arik, Antawau Ili, Sungai Bena, Kapit ke diatur Kaunsil Sungai-Sungai Sarawak (LSS).

Program ke diatur ari 27 ngagai 28 Mac 2026 nya empai lama nyadi inisiatif bersepadu dalam pengawa ngangkatka penyedar komuniti pasal pemesai guna nyaga pengelikun enggau pemeresi sungai nyadi batang penatai pemisi komuniti lokal.

Muak ke pagi, peranak menua nya begempung dalam aktiviti ngerupan meresi Sungai Bena nyadi kelai ubah bepun ari pengawa begulai.

Berebak enggau nya, muak ke lemai, sesi randau meri penyedar udah diatur enggau ngaul mayuh bengkah ejensi nyengkaum LSS, Opis Parit enggau Entali Ai Sarawak (JPS), Kaunsil Pelilih Kapit (KDC), Ejensi Pemansang Ulu Rajang (URDA), Kaunsil Pengeraja Asal enggau Rampa Menua sereta Opis Bomba enggau Penyelamat Malaysia (JBPM).

Sama bisi datai Pemesai Opis Pelilih Menua Kapit, Thomas Geoffrey Kendawang, Penulung Warden (Pengelikun Sungai) ngarika Warden LSS, Leo Nanang, AO Daniel Batin ngarika Residen Bagi Menua Kapit, pia mega ketuai opis perintah, ketuai komuniti enggau ketuai raban bansa.

Berebak enggau nya, Wilson Nyabong Ijang mega ngenataika pengaga ati iya ngagai semua piak kelebih agi LSS Bagi Menua Kapit ketegal komitmen sida ngatur program tu lalu ngarapka pengawa ke baka nya terus ditegapka ungkup pengelantang pendiau komuniti ke terus diau. -RBI

KUCHING, 31 Mac — Unit Pekara Jalai Pengarap Bukai (UNIFOR) udah bejalaika Hari Keterubah Aum Pra-Pemansik Peminta Bantu Tabung Rumah Sembiang Jalai Pengarap Bukai Fasa 1 Taun 2026 di Hotel Hilton Kuching, kemari.

Aum nya bechairmanka Direktor UNIFOR, YBhg. Dato Georgina Apphia Ngau, lalu bela digulu Raban Juruukur Bahan ari Opis Kereja Raya (JKR) Sarawak.

Sesi nya berengkah ari pukul 9.00 pagi nyentuk 4.30 lemai lalu ditampung lemai ari pukul 8.00 nyentuk 10.00 malam.

Pengawa bejalaika pra-aum tu nyadika penerus siri penemuai ngagai palan enggau sesi ngaul diri ti udah diatur sebedau tu, lalu enggau nya nyadika tanda transisyen ngagai renggat ti beguna dalam proses mansik peminta.

Batang fokus aum nya bekaul enggau pengawa ngentas, meresa enggau proses mansik ti komprehensif semua peminta ke diterima, sebedau dibantai ngagai Komiti Pemansik.

Tetiap peminta diperesa enggau silik dikena nentuka prinsip transparen, akauntabiliti enggau lurus seruran dikemeran dalam pengawa ngagihka bantu.

Berebak enggau nya, kaul pemesai Juruukur Bahan Kereja Raya Sarawak bejalaika tanggungpengawa ke besai dalam aspek meresa teknikal, kelebih agi bekaul enggau spesifikasyen kereja enggau anggar ungkus projek ke dibantaika bala peminta.

Pengawa bejalaika pra-aum tu ngayanka komitmen UNIFOR ti seruran dipejalaika dikena nentuka tetiap peminta diperesa enggau terang, sistematik sereta bepelasarka utai ti diguna ke bendar.

Iya mega ngenegapka kerejasama strategik entara UNIFOR enggau ejensi teknikal baka JKR Sarawak dalam pengawa ngangkatka penyikar bejalaika projek, nentuka kualiti sereta meri empas positif ngagai pemansang rumah sembiang jalai pengarap bukai di Sarawak. — RBI

Sumber, photo — Unit For Other Religions – Unifor

SARATOK, 30 Mac — Siti penusah angus ti ngaul kebun nyerarai ngagai kandang kampung diripotka nyadi di Kawit, Krian, ditu, sehari tu tadi.

Raban Penyaga Orang Malaysia (APM) Pelilih Saratok nengah siti penerang madahka sida udah nerima kangau ngenyit bekaul enggau penusah nya sebedau ngatur empat iku raban ngagai endur nya ngambika ulih dipejalaika enggau lengkas.

“Lebuh datai ba endur nya, ditemu api udah nyerarai ngagai kandang kampung ke besemak,” ku penerang nya.

Operasyen madamka api udah nya dipejalai ti mungkur tim APM, raban Balai Bomba enggau Penyah Penusah (BBP) Saratok sereta mega bantu ari mensia mayuh.

Penusah angus nya mujur dirara dalam timpuh urung sejam enam minit berindik ari kerejasama rat ari semua piak ti bekaul.

Berindik enggau nya, mensia mayuh dilalau ngambika seruran bejaga-jaga sereta nyeliahka diri ari aktiviti betunu chara tebuka ti tau ngasuh penusah angus nyadi, kelebih agi ba gaya hari ti angat sereta kemarau diatu.

Berebak enggau nya, APM mega ngelalau mensia mayuh jampat ngeripot sebarang penusah ngenyit nengah chara betelefon ngagai lumur 083-436094 tauka talipaun penusah ngenyit 999 dikena nentuka atur jampat ulih dipejalaika. -RBI

Lubok Antu, 30 Mac — Indu Opis Polis Pelilih (IPD) Lubok Antu mujur ngetan empat iku lelaki peranak menua luar enggau siku lelaki peranak menua tu dalam dua operasyen bebida ti dipejalaika ngelingi Engkilili, kemari.

Ba operasyen Op Pintas/Lejang, empat iku lelaki peranak menua luar ke beumur entara 22 ngagai 65 taun ditan tim Raban Petugas IPD Lubok Antu ketegal dipelaba ngelui ari timpuh di diau Malaysia.

Tim polis nitihka entukar ke alai semua saspek bejalai dalam gaya ngasuh ati irau ke dipelabaka ari jalai lama Lubok Tedung sebedau mujur ngetan sida ba pintu penama ngagai Engkilili.

Asil peresa tetemuka dokumen pejalai semua saspek udah abis timpuh entara tiga ngagai beberapa taun. Kes tu dipansik ari baruh Seksyen 15(1)(c) Akta Imigresen 1959/63.

Berebak enggau nya, dalam Operasyen Tapis Khas ti dipejalaika Bagi Pansik Jenayah Narkotik Pelilih Menua (BSJND), siku lelaki peranak menua nya ke beumur urung 40-an mega ditan ba kandang menua Engkilili laban dipelabaka bisi kaul enggau aktiviti salah guna dadah.

Peresa ai kemi keterubah tetemuka saspek positif dadah bansa methamphetamine enggau amphetamine. Kes tu dipansik ari baruh Seksyen 15(1)(a) Akta Dadah Berbahaya 1952.

IPD Lubok Antu ba sebengkah penerang berita ngemeratka komitmen terus ngelaban pengawa salah nyengkaum penyalah imigresen enggau dadah, lalu minta mensia mayuh meri penerang ngagai polis.

Sebarang penerang bekaul tau dikenataika nengah Talipun Hotline JSJN Bukit Aman ba lumur 012-2087222 tauka Talian Hotline JSJN Sarawak ba lumur 017-5929211. -RBI

Meradong, 30 Mac — Ketuai Polis Pelilih Meradong, DSP Tansli Mering madahka dua iku lelaki peranak menua nya udah ditan pengudah ditemu positif dadah dalam operasyen “Ops Tapis Khas”.

Nitihku iya, kededua saspek ke beumur 36 enggau 31 taun nya ditan urung pukul 5.50 lemai tadi ba kandang menua Bintangor ketegal dipelabaka bisi kaul enggau aktiviti salah guna dadah sebedau dibai ngagai IPD Meradong ngambika atur silik agi dipejalaika.

Asil peresa ai kemi ti dipejalaika ba Bagian Tasat Jenayah Narkotik (BSJND) Pelilih Meradong tetemuka kedua-dua saspek positif amphetamine enggau methamphetamine.

Pengawa meresa rikod ke udah tetemuka siku ari saspek bisi rikod penyalah bekaul enggau dadah, lalu siku agi nadai rikod jenayah tauka dadah.

Kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit enda ngelui RM5,000 tauka jil nyentuk dua taun enti dikenuku salah.

Berebak enggau nya, DSP Tansli Mering nyemetak madahka raban polis beratika isu salah guna dadah ba genturung pendiau enggau berat sereta enda belembut enggau sebarang pengawa ke salah.

Iya mega nesau mensia mayuh ngambika terus meri penerang ngagai polis dikena mantu ngelaban aktiviti dadah ba pelilih Meradong.

Sebarang penerang tau dikenataika ngagai Balai Polis Bintangor nengah lumur 084-693222. -RBI

SONG, 30 Mac — Projek ngaga tanju tauka rumah panjai di Rh. Surie anak Ujom, Ng. Temalat diatu benung chakah dipejalaika dikena ngemanahka perengka guna enggau pengelantang peranak menua nya.

Projek tu asil ari pemeri ari Kaban Parlimen Kapit YB Dato Sri Alexander Nanta Linggi enggau Kaban Kunsil Nengeri (ADUN) Katibas YB Lidam Assan nyadika pengawa ti enda ngetu dikena ngenegapka pemansang menua pesisir, kelebih agi ba kandang rumah panjai.

Nitihku Ambrose Abong Bugek, iya udah ngabas palan projek nya laban deka beratika pejalai pengawa ngaga nya.

“Projek tu dikearapka ulih meri pengelantang enggau pemaik ngagai peranak rumah panjai, kelimpah ari ngenegapka perengka guna enggau ruang endur begulai komuniti besemak,” ku iya ba sebengkah penerang.

Ku iya nambah, pengawa ngaga tanju nya ukai semina deka meri tambah, palan ke lantang agi, tang mega nyadi pelasar ke beguna ungkup aktiviti rama enggau ngerapitka kaul entara peranak.

Projek tu dikearapka ulih meri empas ti manah ngagai pengelantang pendiau Rh. Komuniti Surie anak Ujom kelimpah ari ngangkatka kualiti pengidup peranak menua nya lebuh udah tembu penuh. — RBI

MIRI, 30 Mac — Projek ngangkatmanah sistem parit Rumah Panjai Languyan Anak Ringia, Bukit Tinggi, ke beungkus RM300,000, diatu udah meri pengelantang ngagai pengidup 15 ruang bilik lebuh tembu tumu agi ari ke udah ditetapka, lalu enggau nya ulih ngangkatka pengelikun enggau pengelantang peranak menua nya.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi anak Utom, madahka projek ari baruh kemata Opis Parit enggau Entali Ai (JPS) Bagi Menua Miri ngaul pengawa ngaga parit semin (R.C. Drain) lebih 220 meter pemanjai diatu udah meri pengelikun ngagai peranak menua nya.

Nitihku iya, sebedau tu peranak betapi menua nya enggau pengirau setiap kali bisi ujan bangat, berindik ari sistem parit ke lama nyau repuk, lalu enggau nya ngenataika risiko ampuh bah enggau tanah tusur.

“Tang diatu, semua nya udah nyadi kenang. Infrastruktur ke manah tu meri pengelantang ngagai peranak menua nya, kelebih agi orang tuai enggau nembiak mit ke sebedau tu betapi enggau risiko pengelikun,” ku iya rambau penemuai ngagai kandang menua nya.

Iya mega mantaika asai ati iya ti teperansang lebuh meda timbal peranak menua nya ti terang gaga sereta beterima kasih enggau penembu projek nya, nerangka tuchum sida nyadi pengangkun pemadu besai reti.

Ku Rundi nambah, pemujur nembuka projek nya dulu ari timpuh asal iya nya bulan Mei 2026 ngagai 3 Mac 2026 mandangka komitmen kunteriktor ti tinggi sereta pengawa matau rat JPS dalam nentuka pengelantang pendiau rayat seruran dikemeratka.

Berindik enggau nya, iya ngenataika pengaga ati ngagai Ts. Henry Tuah enggau semua raban JPS Miri ketegal dedikasyen enggau pengeransing sida ti enda ngetu ngemujurka projek nya.

“Taja pan projek tu dipeda mit tang empas iya besai ngagai peranak menua nya. Pemansang ke bendar ukai semina bekaul enggau penyampau aja, tang bekaul enggau pengelantang rayat sereta kualiti pengidup ke manah agi,” ku iya. – RBI