DUYONG, 31 Mac – Dalam timpuh sejam aja, Kaban Kunsil Nengeri (ADUN) Duyong, Datuk Mohd Noor Helmy Abdul Halem mujur ngumpul belanja sepenyampau RM85,000 dikena ngaga baru sebuah rumah ba kandang menua iya ke udah retung ketegal angus kena Hari Enam tu tadi.
Nitihku Mohd Noor Helmy, rumah nya diripotka udah angus lengis lalu deka begunaka ungkus ngaga baru urung RM80,000, enggau pengawa nya deka dipejalaika tukang ari menua nya empu dikena ngelimat ungkus.
Ku iya nerang, chara tu diambi dikena nyeliahka pemerat ditanggung semina siti ejensi aja, tang nganti nya dikena ngerapitka mayuh macham piak datai ke mua mantu begulai.
NGEMATUPKA ATI... Roland Sagah madahka pemujur peresa SPM 2025 tu ngayanka komitmen nembiak enggau pengajar
KUCHING, 31 Mac — Sepenyampau 27 buah sekula di Sarawak ngerikod 100 peratus nyulut ba peresa Sijil Pelajaran Malaysia (SPM) 2025, lalu enggau nya ngemuntangka semua chalun bulih setipikit.
Lebih ngalitka ati agi, 19 ari sekula nya sekula menua pesisir, ti mandangka pengulih nembiak ba kandang menua nya nyapai penyulut akademik lebuh diberi sukung ti chukup.
Menteri Pelajar, Inovasyen enggau Pemansang Bakat Sarawak, Dato’ Sri Roland Sagah Wee Inn madah, pemujur nya ngayanka komitmen tinggi semua piak dalam ngenegapka sistem pelajar nengeri tu.
“Pemujur tu mandangka komitmen tinggi nembiak, dedikasyen pengajar enggau sukung ti enda ngetu ari mayuh bengkah piak dalam meransang penyulut pelajar di Sarawak,” ku iya.
Nitih ku iya, prestasi kesemua nengeri mega ngayanka pemanah lebuh Gred Purata Nilai Nengeri (GPN) mansang ngagai 4.79 dibandingka enggau 4.84 ba taun sebedau nya.
Ari penyampau 34,166 iku chalun ke ngambi peresa nya, 93.99 peratus mujur bulih setipikit SPM.
Pemujur tu terang mandangka pelajar ti bekualiti ulih dijapai ba semua bidang nyengkaum menua pesisir asil ari pengawa ti begempung enggau sukung ti enda ngetu ari semua piak. -RBI
KUCHING, 30 Mac – Siku lelaki peranak menua tu beumur urung 37 taun ditan polis tumu pagi tadi laban dipelabaka bisi kaul enggau kes nyerungkai rumah enggau enchuri ba sebuah palan pengentap pendiau di Jalai Bukit Mata, ditu.
Ketuai Polis Pelilih Menua Kuching, ACP Alexson Naga anak Chabu madah, pengawa ngetan nya digaga urung pukul 1.35 pagi ba palan penusah ke nyadi asil ari pengawa jampat dipejalaika raban polis.
Nitihku iya, pemutus peresa ai kemi keterubah tetemuka saspek positif dadah.
“Saspek udah ditan riman pengelama tujuh hari nyentuk 6 April 2026 dikena mantu pansik ke silik agi,” ku iya nengah sebengkah penerang sehari tu tadi.
Kes tu dipansik ari baruh Seksyen 457 Kanun Keseksaan ti netapka ukum jil nyentuk 14 taun sereta ulih diukum mata duit tauka sipat enti ngereja penyalah berulang.
Berindik enggau nya, Alexson Naga anak Chabu ngelalau mensia mayuh anang malut diri enggau sebarang pengawa salah sereta datai ke mua meri penerang ngagai raban polis.
Mensia mayuh ke bisi penerang ke bekaul tau betanya ngagai Palan Kawalan IPD Kuching ba lumur 082-244444 ngambika ulih mantu tasat. -RBI
SUAI, 31 Mac — Menteri Industri Pemakai, Komoditi enggau Pemansang Kandang Menua, Dato Sri Dr Stephen Rundi Utom, ngansak komuniti menua pesisir Sarawak lengkas ngalih ari chara betanam betupi tradisional ngagai chara moden bepelasarka mekanisasyen, seriris enggau agenda pengelikun nengeri ti majak tegap.
Iya mansutka jaku nya rambau ngabas palan projek ngangkatmanah jalai tama ari baruh Program Transformasyen Menua Pesisir (RTP) Rumah Panjai Steve Anak Lasan di Sg. Selasah, Suai, Niah baru-baru tu tadi.
Projek ke beungkus RM200,000 tu mungkur pengawa ngangkatmanah jalai tanah ngagai jalai batu pemanjai 1,200 meter enggau pemesai empat meter, meri penguntung terus ngagai 104 iku peranak ari 15 pintu penama.
Dipejalaika Opis Kereja Raya (JKR) Miri nengah kunteriktor Bumi Leza Enterprise, projek nya mujur tembu jauh dulu ari timpuh kunterik kena 22 Januari 2026, nyauka lima bulan sebedau haribulan tembu ti ditetapka kena 21 Jun 2026.
Berindik ari isu rentayan bekal enggau rega beras ti enda tentu, Dr Rundi meri langgur penemu ngambika peranak numbuhka raban orang bumai betanamka utai tanam komersial bedandang besai, kelebih agi nanas enggau padi SG1.
Chara ke baka tu dipeda ulih nempa ekonomi skala, ngemudahka peminta wang turu ejensi, sereta ngemendarka pengawa nyuwa jentera bepusat.
Dr Rundi mega ngemeratka pemesai guna ngatur tanah ti teratur nyadi prasyarat ba sebarang pengawa beranakka puku ba pengawa betanam betupi.
Iya ngasuh semua Komiti Pemansang enggau Pengelikun Genturung Pendiau (JKKK) enggau Tuai Rumah ngemujurka profil rasmi pengempu tanah Hak Adat Bumiputera (NCR) ari baruh Seksyen 6 enggau Seksyen 18, dikena nyeliahka penyarut tanah nyadi jemah ila.
Dalam jaku sosio-ekonomi iya, Dr Rundi ngingatka komuniti ngemeratka pengawa nyimpan belanja, kelebih agi dikena nampung ungkus pelajar anak sereta nyeliahka pengawa masau belanja enggau aktiviti judi online ti tau ngeruga penegap belanja ruang bilik.
Penembu projek RTP di Suai ngayanka komitmen Perintah Sarawak terus ngemansangka infrastruktur menua pesisir nyadi pelasar ke tegap ngagai penumbuh ekonomi komuniti ngelingi. — RBI
LUTONG, 31 Mac – Ketuai Balai Bomba enggau Penyah Penusah (BBP) Lutong, PBT II Henry Jugah madahka bisi penambah ke nyata ba kes angus tebuka kelebih agi bekaul enggau penusah angus babas, sepemanjai bulan Mac 2026, enti dibanding enggau dua bulan sebedau tu.
Bepelasarka statistik BBP Lutong ungkup timpuh ari bulan Januari ngagai Mac 2026, penusah angus babas ngerikodka pemadu mayuh iya nya 35 kes, ditangkan penusah angus uras (6 kes) enggau lalang (3 kes), seraya nadai penusah angus kampung dirikod dalam timpuh nya.
Bulan Mac ngayanka peniki ke pemadu besai lebuh 34 kes angus kampung dirikod, dibandingka enggau semina siti kes ba bulan Februari lalu nadai kes ba bulan Januari.
Penusah angus lalang mega nambah ngagai tiga kes dalam bulan Mac, lalu penusah angus uras ngerikod lima kes.
Berebak enggau nya, ungkup penusah angus ti ngaul struktur enggau reta tengkira, dua penusah angus rumah dirikod dalam timpuh tiga bulan nya, lalu semua nya nyadi dalam bulan Mac.
NIAH, 31 Mac — Komuniti Penan dilalau ngaga ubah runding nengah chara ninggalka pengawa betanam betupi ngidupka diri lalu ngalih ngagai pengawa betanam betupi komersial beraban dikena nentuka sosio-ekonomi komuniti nya meruan.
Tesau nya dikenataika Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Anak Utom lebuh bejadika Pengerami Penan “Tipun Pinum Pengida’ Penan” 2026 di Kampung Mareng, Jematan Suai, Niah, kena Hari Enam tu tadi.
Pengerami tiga hari berunggu ke diatur ari 27 ngagai 29 Mac tu, iya nya keempat kali diatur Gerempung Pemansang Tipun Penan Sarawak (PETIPUN), enggau rambai jaku “Empowering The Penan: Mapping Our Future” enggau juluk jaku “Jah Ha’ Jah Kenin”.
Ba jaku iya, Dato Sri Dr Rundi nyemetak madahka ubah runding nyadi pelasar pemansang komuniti menua pesisir.
Ku iya, gempuru nya ukai semina pengerami aja, tang nyadi pelasar dikena ngenegapka identiti bansa Penan sereta nyikap nembiak rebak baru napi pemar ekonomi jemah ila.
“Udah datai ba maya iya kitai mandangka penau komuniti Penan ngagai dunya.
“Image enggau reputasyen komuniti nyadi aset beguna ti patut dijaga,” ku iya.
Iya ngemeratka pemesai guna ngempung teknologi betanam betupi pintar, ngena Internet of Things (IoT), sereta ngempung tanah nyadi kluster nyadi kunchi dikena nambahka asil betanam betupi enggau status wang komuniti.
Ambika chunto, tanah pemesai dua ekar dipegulai nyadi kluster 36 pintu ulih ngasilka 72 ekar utai tanam ti ulih dijual.
“Pemujur enda ulih dijapai kediri. Kitai enda tau enda mindah beraban,” ku iya nyemetak.
Dr Rundi mega ngingatka nembiak rebak baru muai ati dengki ngagai pemujur orang bukai laban nya semina deka nekul penyulut komuniti.
Iya mega nyemetak madahka pemuntan ba pelajar formal ukai penentu mutlak pemujur individu, tang semua orang bisi pengering enggau pengulih kediri empu.
Iya minta komuniti Penan ke mujur nyadika ikon enggau inspirasyen sida, nyengkaum Temenggong Komuniti Penan, Datuk Hasan Sui, enggau Presiden PETIPUN ke mega Residen Bintulu, Datu Nyurak Keti, ke nyadi Penan keterubah mangku pengawa Residen dalam sejarah Sarawak.
Dalam konteks pemansang ekonomi, Dr Rundi madahka Sarawak diatu dikelala nyadi pelilih menua bepenatai pemisi tinggi, enggau tagit perintah deka nyapai penatai pemisi ambis nadai RM15,000 ungkup tetiap ruang bilik menua pesisir manggai ba taun 2030.
Nyadika manifestasyen komitmen perintah ngagai komuniti Penan, sepenyampau RM100,000 udah diungkupka iya nya RM50,000 ngagai PETIPUN, RM20,000 dikena meri kuasa ngagai Biro Indu, enggau RM30,000 ngagai Komuniti Kampung Mareng enggau Komiti Pemansang enggau Pengelikun Genturung Pendiau (JKKK) Kampung Mareng.
Pengerami nya bela dirami enggau pengawa mandangka main asal nyengkaum main asal Bolu Biduk, Ngiteu (Sayau Titot) ari Baram, enggau Sagak Penan ari Belaga.
Lumba enggau main asal mega bisi dipekitka iya nya Meput (Nyumpit), Ngelaveng (perejuk tinggi), Mapem (perejuk jauh), Selekit (Nikau gelung rutan) enggau Pelaboh (netak kayu). — RBI
KUCHING, 31 Mac — Pemansang infrastruktur di Sarawak majak ditegapka lebuh lapan projek jematan besai di nengeri tu dipelaba tembu nitihka timpuh manggai ba taun 2026.
Sapit Premier Sarawak, Datuk Amar Douglas Uggah Embas madah, pengawa bejalaika projek nya mengkang nitihka pejalai ke betul taja pan gaya dunya enda tentu tegap nyengkaum penyarut di Asia Barat.
Nitih ku iya, sebarang pemar ke diatu naka ke diatu nadai ngeruga pengawa bejalaika projek kesemua nya.
“Ungkup lapan buah jematan ke diperambu deka tembu taun tu, kitai enda kelalu irau ati.
“Engka bisi sekeda penanggul, tang nya enda ngeruga pengawa bejalaika selampur pengawa nya.
“Kitai andal semua projek tu deka bejalai enggau lanchar lalu ulih ditembu nitihka perambu,” ku iya.
Iya madah munyi nya lebuh dikerandau raban media pengudah bejadika Program Libat Urus Infrastruktur Sarawak 2026 ba sebuah hotel ditu, sehari tu tadi.
Uggah ke mega Menteri Infrastruktur enggau Pemansang Palan Penyangkai Kapal Sarawak madah, pengawa matau enggau silik deka terus dipejalaika nyengkaum ngatur randau ke enda ngetu enggau raban ke bisi pemerat.
Singkang tu beguna dikena nentuka pengawa ngulihka kereban ngaga enggau perambu projek mengkang teratur, kelebih agi napi gaya global ke enda tentu diatu.
“Ambika chunto, aku apin lama ke udah ngatur randau ba Palan Konvensyen Borneo Kuching (BCCK) dikena mansik sukut pengawa ngulihka kereban dikena ngaga rumah enggau perambu projek.
“Kitai deka nentuka semua perambu beratika gaya ke diatu ngambika pengawa bejalaika projek tu enda tekeruga,” ku iya nerang.
Ba pemansang ke bekaul, iya madahka projek Jematan Batang Lupar I diatu ngayanka penyulut ke chukup meransang sereta ba renggat dipejalaika enggau manah.
Entara lapan projek jematan ke dipelaba tembu taun tu iya nya Jematan Batang Lupar I enggau II, Jematan Batang Krian, Jematan Sungai Limbang, Jematan Batang Paloh, Jematan Batang Saribas II, Jematan Sungai Sejingkat enggau Jematan Batang Rambungan.
Dulu agi ari nya ba jaku iya, Uggah madahka Sarawak diatu masuk ngagai renggat baru pemansang infrastruktur ti jampat agi di baruh Atur Pemansang Malaysia Lumpar Ke-13 (RMK-13).
Nitihku iya, sepenyampau 852 projek infrastruktur ti beungkus sepenyampau RM52.4 bilion udah dikemendar ti ngaul agih belanja ari Perintah Besai enggau Perintah Sarawak ti deka dipejalaika Opis Kereja Raya (JKR) Sarawak.
Ari penyampau nya, 287 projek beungkus RM26.5 bilion diatu benung ba renggat ngaga, lalu 565 projek agi beungkus RM25.8 bilion benung ba renggat nyediaka tinda.
“Pengawa bejalaika projek besai tu begunaka koordinasyen tikas tinggi, disiplin bejalaika pengawa enggau kaul ti seruran dipejalaika entara semua raban,” ku iya. — RBI
BETONG, 31 Mac — Beserimbai enggau pengerami ngintu Hari Gawai Dayak 2026, pengawa ngatur Pekit Kumang Gawai Betong 2026 dikearap nyadi sebengkah ari batang pengerami ti ngempuruka penyereta ari bemacham serak pengidup, kelebih agi ba raban bansa Iban.
Pekit tu diatur nyadi pelasar dikena ngetan, ngenegap sereta negika pesaka main asal, kelebih agi dalam aspek ngena ngepan indu ti udah nyadi identiti beguna komuniti Iban kenyau ari rebak.
Kelimpah ari mantaika pemanah enggau penyelai pekayan asal, pengawa ngatur pengerami tu mega bejalaika tanggungpengawa dalam nerenakka semengat angkunka adat enggau budaya ba raban nembiak rebak baru ngambika ulih terus dijaga sereta ditampung.
Bala pengatur mega bisi meri perais ti mai penguntung ngagai pemenang nyadika peransang ungkup penyereta ti bekualiti sereta kompetitif.
Ungkup kategori besai, gelar Kumang deka nerima perais mata duit RM10,000 disempulang trofi, mahkota, bungai jari, sash enggau setipikit.
Penuduk lumur dua, Lulong deka nerima perais mata duit RM8,000 lalu penuduk lumur tiga, Selinggar Matahari deka mai pulai perais mata duit RM6,000, tetiap iku disempulang enggau trofi, bungai jari, sash enggau setipikit.
Kelimpah ari nya, pesereta mega bisi peluang bulih perais sagu ati dalam tukuh mata duit RM1,500 disempulang setipikit enggau bungai jari.
Bela disediaka Anugerah Video Pemadu Manah enggau perais RM500 sereta Anugerah Pemanah Ngepan ke beungkus RM2,000.
Mensia mayuh ti deka nemu penerang silik tauka bisi sebarang tanya bekaul enggau penyereta tau betanya ngagai pengatur nengah lumur (011-25142720) Dasion Anak Janting, (019-8559476), Olivia Serembang, (019-8864522), Chang Li Li enggau (019-4125732) Edward Batin Will.
Dikearapka pengawa ngatur Pengerami Pekit Kumang Gawai Betong 2026 ulih terus ngenegapka identiti budaya komuniti Iban sereta ngerichahka agi pengerami Hari Gawai taun tu. — RBI
KUCHING, 31 Mac — Sapit Premier Sarawak, YB Datuk Amar Douglas Uggah Embas sehari tu bejadika Program Libat Urus Infrastruktur Sarawak 2026: Randau Pemansang Infrastruktur Sarawak Begulai enggau Pengari Rayat ba sebengkah pengerami ke diatur ditu.
Iya ke mega Menteri Wang enggau Ekonomi Baru II sereta Menteri Infrastruktur enggau Pemansang Palan Penyangkai Kapal Sarawak madah, program tu nyadi inisiatif strategik Perintah Sarawak dalam ngenegapka pengawa ngenataika projek infrastruktur nengah chara merintah ti lebih responsif, efisyen sereta meri empas tinggi.
Nitih ku iya, pelasar program tu bejalaika tanggungpengawa ti beguna dalam nentuka koordinasyen ti lebih efektif entara ejensi ti bejalaika pengawa enggau pengari rayat, lalu ari nya ulih nambahka pemanah pengawa bejalaika projek pemansang di serata nengeri.
Program tu ngempuruka Kaban Parlimen enggau Kaban Kunsil Nengeri (ADUN) ari serata Sarawak begulai enggau ketuai Opis Kereja Raya (JKR) Sarawak dalam siti pelasar strategik berandau sereta ngatur pengawa bejalaika projek infrastruktur nengah chara ti lebih bersepadu sereta sistematik.
Sesi randau ti diperambu deka diatur ngalih hari nya mega bisi meda pengawa mantaika status projek ngagai pengari rayat nitihka sitak sida empu.
Randau nya ngemeratka pemar bejalaika pengawa ba renggat baruh nyengkaum isu koordinasyen palan, perengka guna, pekara tanah enggau pejalai belanja projek.
Berebak enggau nya, pengari rayat mega diberi awak ngenataika penemu, timbal enggau langgur penemu dikena ngemanahka agi, lalu enggau nya ngenegapka komunikasyen dua hala entara perintah enggau raban dalam nentuka pengawa bejalaika projek ti lebih efisyen, terang sereta responsif ngagai guna rayat.
Chara tu setipak enggau aspirasyen Sarawak ba pemansang ti meruan sereta inklusif, seraya nentuka tetiap projek infrastruktur meri empas ti optimum ngagai pengelantang pendiau rayat. — RBI
Ngangkatka jaku Iban, Madeline Dugat siku pemacha berita tebangkar di Sarawak
Dunya penabur berita Iban enda pungkang enggau penatai raban pemberita ke tebangkar nama, ti mandangka jaku Iban udah seriris enggau jaku bansa bukai.
Ke serak tu ba sukut personaliti Ruai Berita Iban (RBI) bisi udah ngerandau siku pemberita ke chukup chakah sereta tebangkar nama, pia mega suah dipeda ayan ba televisyen menua tu.
Nya alai, RBI deka mantaika Madeline anak Dugat, 35, ke asal ari Rumah Jalang Nanga Sumpa, Lubok Antu,Sri Aman Sarawak dikena meri peransang ngagai nembiak rebak baru seraya mantaika bakani iya ngepunka singkang ba dunya penabur berita.
“Ba keterubah aku dalam bidang tu kebendar mayuh pemar laban aku siswa bidang Seni Halus enggau nadai penteba enggau peneleba ba dunya pemberita.
“Aku bepun ari baruh dulu, belajar ari raban mentor keterubah aku ba Seksyen Berita Iban Utusan Borneo iya nya baka Niang Matthias enggau bakih aku Watson Menjang baka, meretika chara nulis berita, nyalin berita enggau ke bukai.
“Nengah pengeransing enggau minat, dia aku ulih ngemasaika diri enggau tangkup pengawa nyadi pemberita,” ku Madeline muka cherita enggau pemberita RBI.
Ku iya, kenang enggau peneleba ke diulih iya pengudah masuk dalam bidang media lebih agi maya iya ke gawa ba surat berita (newspaper) meri pengeludas iya pasal dunya pemberita.
Terang Madeline, beduduk ari nya, iya berengkah meretika guna tangkup pengawa nyadi pemberita TV dalam nyadung penerang ke beguna ngagai mensia mayuh.
“Pengerindu dalam pengawa tu majak besai lebuh aku meda peluang dalam ngangkatka lanting jaku Iban ba dunya penabur berita. Nya mih ngujungka aku bisi juluk deka ngemansangka diri nyadi pemberita TV,” tusui iya.
Ngenang pejalai iya nyadi pemancha berita enggau editor berita baka kediatu, Madeline madahka peneleba gawa ke diulih ngelama tu mayuh mantu ngemansangka iya dalam bidang.
“Pekara tu nengah latih, bekunsi penemu tauka peneleba enggau raban ke tebangkar dalam industri kelimpah belajar ari ‘online’.
“Sepemanjai gawa aku bisi belajar chara bekomunikasyen, nyendiaka berita ke betul, ngatur jam gawa enggau manah, meresa fakta tauka berita enggau silik, nisih berita, nyadung berita enggau chara mudah diperetika mensia mayuh.
“Semua tu nyadi pugu ke entap ngagai aku bejalaika pengawa enggau manah,” ku iya.
Madeline mega bekunsika pengawa diri sebedau gawa ba TVS iya nya iya kala gawa nyadi pengajar (guru ganti) ba sekula sekondari, primari sereta kala ngajar ba Tabika Perpaduan.
Pengudah nya iya diterima gawa nyadi sub-editor dalam seksyen Iban ba Utusan Borneo lebih kurang setahun lebih sebedau masuk TVS.
Ngenang tangkup pengawa nyadi pemacha berita enggau editor diatu, iya nerangka tanggungpengawa nyadi pemacha berita enggau editor ukai mudah.
“Pemacha berita mesti nyadung berita enggau terang, betul sereta professional. Ba awak ke sama, nyikap diri tumu sebedau ‘on air’ nyengkaum beratika skrip enggau fakta, ngaga ‘voice over’ berita enggau intonasi ke betul.
“Nangkan ke nya, editor orang ti ngesan tangkup pengawa nentuka pengamat sesebengkah berita tauka fakta, nisih berita sereta nitihka etika jurnalistik.
“Tanggungpengawa nyadi pemacha berita enggau penyerenih berita TV enggau surat berita enda sama,” terang Madeline enggau lenak.
Bekaul pengawa tauka proses nyediaka berita berengkah ari pengawa nulis skrip nyentuk ke ditabur terus, terang Madeline ketebal agi, pengarang berita ngumpul penerang enggau nulis skrip berita lalu dipasuk dalam buletin.
Pengudah nya ku iya, editor meresa fakta, nisih ayat berita sebedau skrip nya dibaca pemacha berita enggau ‘voice over’.
Pengudah semua kereban berita tembu digaga baru berita nya ulih dibantaika ba TV.
Bekaul penanggul dalam nentuka pemetul enggau kredibiliti berita ti dibantaika ngagai bala peninga, Madeline nyaut madahka pemar dalam nentuka pemetul enggau kredibiliti berita sebedau dibantaika dalam TV iya nya ngenukuka pengamat fakta, nyeliahka penerang pelesu, urus atur jam berita ke serekat, edit berita ngambika mudah diperetika mensia mayuh ti nadai nukar reti asal.
RBI mega nanyaka bakani chara iya ngetanka profesionalisme lebuh mantaika berita ti sensitif tauka berita angat lalu iya nyaut munyi tu.
“Aku ngetanka profesionalisme nengah chara nentuka pengamat berita dientaska dulu, nyadung penerang sechara objektif enggau neutral, nyeliahka ari meri penemu diri empu sereta nguna jaku ke engkeman, ngambika berita sensitif tauka angat dibantaika enggau chara manah sereta alus lalu enda meri penyaru tauka empas negatif ngagai semua,” ku saut iya.
Bekaul tanggungpengawa media dalam niri negika Jaku Iban, Madeline madahka media baka TVS ngesan tanggungpengawa ke besai ngangkatka Jaku Iban nengah mantaika berita sereta program dalam Jaku Iban.
Tu mega ku iya, seraya mantu komuniti meretika isu kemaya hari, ngenanka lanting budaya enggau identiti komuniti Iban, ngelatih pengawa media ngambika landik dalam pengawa nyadung berita enggau nisih berita nguna jaku Iban, sereta ngembuan chara nyadi platform rasmi ti ngetanka jaku Iban dalam media moden.
Iya mega madahka pengawa ngenataika berita ngena jaku asal ngagai komuniti lokal endang chukup beguna.
“Pekara tu amat beguna laban ulih ngemudahka komuniti meretika berita ti dikenataika, nentuka semua genap pupu bansa bulih akses berita pemadu baru, ngangkatka jaku enggau budaya Iban, negapka identiti komuniti,” ku iya.
Madeline mega bekunsika sekeda pengawa ti ulih digaga dikena narit ati nembiak rebak baru ngagai berita dalam jaku Iban.
Terang iya, entara inisiatif dikena narit ati nembiak rebak baru iya nya ngasilka konten berita video pandak ba media rama nguna jaku iban baka TIKtok, Instagram enggau youtube,
“Ngatur kuiz tauka program interaktif ti nguji tikas pengelandik jaku Iban enggau isu kemaya hari ke ngaul penyereta rebak biak.
“Pia mega pengawa ngatur woksyop jurnalistik jaku Iban ba sekula tauka Universiti dikena meri pengeludas sereta peneleba praktikal ngagai nembiak,” terang iya.
Iya mega bela nerangka bekaul pemar besai industri media maya diatu iya nya betapi enggau media rama ti nyadung berita ke jampat ngerembai.
“Penatai media rama mega mayuh udah ngubah rampa media nyengkaum empas teknologi baru baka pemintar tiru “Ai” ti ngemuntangka ngaga isi berita tauka sebarang konten ke bekaul ngujungka risiko berita pelesu tauka enda betul.
“Pemar ngagai pemberita maya diatu dibanding suba iya nya penanggul ngaga berita enggau jampat dikena besemekih enggau media rama sereta platform digital seraya nentuka fakta nya betul enggau kredibiliti tejaga.
“Kelimpah ari nya, pemberita diatu mesti enda nentuka konten ti ulih narit ati rebak biak, risiko penerang pelesu ngerembai jampat, sereta nguasa teknologi baru baka AI,” ku iya.
Ngenang TVS nentuka ‘releven’ ba jeman digital ti jampat mansang tu, Madeline mantaika penemu diri iya nya berita relevan dalam jeman digital iya nya berita ti mudah, jampat enggau manah lalu semitan enggau platform digital ngambika mudah diakses, diperetika sereta meri penerang ke beguna ngagai mensia mayuh.
Pia mega, nyadi siku orang ti udah mujur endang bisi orang mega dibelakang nyadi tiang sukung ti ulih meri inspirasyen pemaju enggau penyulut.
“Aku mayuh ngambi inspirasyen ari pengarang berita enggau editor ke mayuh peneleba sekalika ari menua luar tauka dalam Malaysia, ti bisi dedikasyen nyadung berita ke betul, profesionalisme , intergriti tinggi dalam nentuka fakta ke betul sebebau dipansutka kelimpah ngembuan nilai etika.
“Inspirasyen nya mega datai ari Mentor tauka pemekuh media ba stesyen TV lokal ke ngajar aku nilai etika, disiplin enggau chara nyadung berita ke terang,” ku iya.
Madeline mega nerangka nilai-nilai ti pemadu beguna ti patut dikembuan pengarang berita tauka pemacha berita.
“Nilai ke dipegai aku iya nya professional, lurus,ngembuan tanggungjawab ngagai mensia mayuh , ngemeranka etika jurnalistik, komitmen deka terus belajar seraya ngemasaika diri enggau teknologi tauka tren media baru,
“Pia mega enti aku betapi enggau pemar maya gawa, chara aku iya nya nyikap diri penuh sebedau ‘live’ baka meretika skrip enggau fakta berita dulu..
“Kelimpah ari nya, kerejasama ari editor, produser enggau tim produksyen mantu pengelancharka pengawa macha berita ba mua kemera,” ku Madeline nusui.
Madeline mega bisi ninggalka jaku lalau ngagai bala nembiak ke bisi minat ba pengawa naburka berita.
Ku iya, tanka integriti, tentuka fakta berita betul, nguasa pengelandik komunikasyen enggau teknologi media sereta sedia deka belajar enggau gawa ba baruh pemerat tating industri dunya media.
Iya meya ngarapka industri media di Sarawak terus mansang ngerembai, majak dikelala ba tikas dunya, ulih negapka jaku enggau budaya lokal di Sarawak
“Aku ngarapka diri ulih nyadi pemekuh media ti lebih professional sereta mayuh peneleba, landik dalam nyadung berita seraya ngetanka kredibiliti enggau ulih ngangkatka jaku Iban sereta budaya lokal Sarawak baka iban ngagai tikas ke lebih tinggi.
“Ba awak ke sama, ulih meransang enggau meri inspirasyen ngagai nembiak rebak baru dalam dunya media,” tampung Madeline. – RBI
MERADONG, 25 Mac – Datuk Ding Kuong Hiing, Kaban Kunsil Nengeri (ADUN) Meradong minta kaul rat entara komuniti enggau Polis Diraja Malaysia (PDRM) terus...
