CYBERJAYA, 1 April — Suruhanjaya Komunikasyen enggau Multimedia Malaysia (SKMM) udah berengkah mansik tiga iku individu ti dipelabaka bisi kaul enggau nyadung penerang bula bekaul enggau peniki tarif kiasa karan ba sekeda pelasar digital.

Nitihka penerang media sehari tu, penerang ti bula nya ditemu dikerembaika nengah Facebook, Threads enggau WhatsApp, lalu enggau nya ngasuh mensia mayuh saru penemu.

Lebih ngirauka ati, penerang nya dipelabaka dikerembaika ngena elemen grafik ti sebaka enggau ejensi berita dikena nambahka kredibiliti isi penerang nya.

MCMC madahka asil pansik nya tetemuka penerang ke viral nya enda betul lalu udah diedit ari isi rasmi Astro AWANI.

Dikeirauka pengawa ngerembaika penerang ke baka nya tau nempa anggap negatif lalu ngujungka mensia mayuh irau sereta tekenyit.

Pansik dipejalaika ari baruh Akta Komunikasyen enggau Multimedia 1998 (Akta 588), spesifik Seksyen 233 ti nyendiaka ukum maksimum RM50,000 tauka jil nyentuk dua taun, tauka kededua ukum nya, enti dikenuku salah.

Berindik enggau nya, SKMM nyemetak madahka sida beratika enggau berat sebarang pengawa salah guna pelasar digital ti ngembuan tuju deka ngelimpangka runding mensia mayuh. Atur ti terit deka dipejalaika ngagai sebarang individu ti ngelanggar undang-undang ti udah bisi.

Berebak enggau nya, mensia mayuh dilalau ngambika lebih betanggungjawap lebuh nguna media rama sereta anang ngerembaika penerang ti enda dientaska, ngambika ulih nyaga pengelantang rama enggau atur mensia mayuh. – RBI

Program Ijazah Sarjana Perguruan (Bidang Pedagogi) Palan Pematih Pengajar (IPG) Malaysia Opis Pelajar (PISP Taun 2026).

SARIKEI, 1 April — Raban Penyaga Orang Periman Malaysia (APM) Pelilih Sarikei bejalaika pengawa enggau lengkas mutarka penanggul berindik ari siku ular sawa ditemu ba dalam agu sebuah palan pengentap pendiau di Jalai Nyelong, tumu pagi tadi.

Nengah penerang berita, Palan Penyaga Operasyen (PKOD) Pelilih Sarikei madahka sida nerima kangau ngenyit ari mensia mayuh urung pukul 5.24 pagi bekaul enggau penatai ular nya dalam rumah.

“Berindik ari ripot nya, empat iku kaban ari Tim Alpha udah dianjung ngagai endur nya lalu datai dalam timpuh ke pandak.

“Lebuh datai ba endur nya, bala APM tetemuka siku ular sawa urung lima kaki pemanjai ba agu palan pengentap pendiau nya,” ku penerang nya.

Nitihka penerang ke sama, operasyen nangkap nya dipejalaika ngena perengka khas baka penyepit enggau siti barang dikena nangkap ambi nentuka pengelikun orang ke nguan enggau kaban ke bejalaika pengawa.

“Ular nya mujur ditangkap enggau nadai sebarang penusah ke enda manah nyadi lalu operasyen nya tembu enggau penuh urung pukul 5.37 pagi,” ku penerang nya nerang.

Berindik enggau nya, APM Sarikei ngelalau mensia mayuh ngambika seruran bejejaga, kelebih agi maya musin panas, laban jelu siga baka ular bisi potensial ninggalka palan asal sida lalu tama ngagai kandang endur diau.

Mensia mayuh mega dilalau lengkas ngaga kaul enggau piak bekuasa nyema betapi enggau penusah ngenyit dikena nentuka pengawa jampat ulih diambi. – RBI

KUALA LUMPUR, 31 Mac — Grafik bekaul enggau rega runchit produk petroleum ungkup timpuh 2 ngagai 8 April 2026 ke udah viral ba media rama udah dientaska enda entas.

Nitihka penerang nengah laman Facebook rasmi Opis Menteri Wang Malaysia (MOF) grafik nya ukai dikeluarka piak bekuasa lalu enda tau nyadika referen.

Berindik enggau nya, mensia mayuh dilalau ngambika enda ngerembaika penerang ke enda dientas, kelimpah ari seruran merujuk ngagai jalai rasmi perintah dikena ngulihka penerang ke betul sereta pemadu baru.

Ba penerang ke sama, mensia mayuh mega diingat ngambika lebih bejejaga enggau isi ti tau nyaru sereta ngasuh mensia mayuh saru penemu, kelebih agi ba pelasar media rama.

Opis Menteri Wang Malaysia mega madahka pemadah rasmi rega runchit produk petroleum deka dipansutka ninting minggu ninting Hari Tiga nengah pelasar rasmi opis menteri nya.

Berindik ari nya, mensia mayuh dipinta nentuka tetiap penerang ke diterima nya ari pun penatai ke tulin nyadika atur dikena nagang pengerembai berita pelesu. — RBI

MUKAH, 31 Mac – Polis DiRaja Malaysia (PDRM) minta saup mensia mayuh ngiga siku nembiak indu beumur 15 taun ke diripotka lenyau di Mukah tumu pagi tadi.

Ketuai Polis Pelilih Mukah, DSP Muhamad Rizal Alias ​​nengah penerang media madahka tudah nembiak nya dikelala enggau nama Angel Binti Daina, bansa Melanau ditemu indai iya lenyau urung pukul 5.00 pagi, pengudah iya nadai ditemu ba bilik tinduk rumah sida.

Nitihka penerang iya, pengawa ngiga udah dipejalaika ngelingi kandang endur diau tang enda tetemuka iya, seraya telefon binching nembiak nya enda ulih ditelefon.

Angel ke diau ba No.9, Lot 1166, Jalai Tiong Hua, Mukah, kepenudi dipeda, ngena baju T lengan pandak chura mirah jambu enggau seluar panjai chelum.

Ari sukut gaya tubuh, iya nya kurus, urung 155 sentimeter peninggi, kulit burak, ngembuan mua segala enggau buk panjai ti ngelui ari bau iya.

Berindik enggau nya, mensia mayuh ti bisi penerang bekaul enggau penunga nembiak tu dipinta lengkas ngenataika penerang ngagai pemesai pemansik kes, Sarjan Nyantung Anak Libau nengah lumur 012-8800945 tauka datai ngagai sebarang balai polis ke besemak mantu mansik kes nya.

PDRM nyemetak madahka kerejasama mensia mayuh beguna amat dalam pengawa ngiga mansa enggau lengkas. -RBI

KUCHING, 31 Mac — Opis Kereja Raya (JKR) Sarawak udah ngerikodka penyulut ke chukup besai ba pengawa bejalaika projek pemansang lebuh 11,902 projek udah mujur ditembuka enggau penyampau semua RM27.6 bilion naka ke diatu, nitihka ripot TVS.

Pemujur nya ngarika 78 peratus ari semua penyulut, iya nya nambah 9.2 peratus, lalu dipelaba manggai 100 peratus ujung taun tu.

Ngambi ripot TVS, Sapit Premier Sarawak, Datuk Amar Douglas Uggah Embas madahka, agi bisi sekeda projek ke benung digaga diatu lalu deka diteruska dalam Atur Pemansang Malaysia Lumpar Ke-13 (RMK-13), enggau nya nyadi entara faktor ti ngujungka semua penyulut nya bedau datai ba tikas ke pemadu manah.

“Sekeda projek agi dipejalaika lalu deka dibai ngagai RMK ke-13, nya kebuah bisi laun mimit ari sukut timpuh.”

“Taja pia, kami andal amat juluk 100 peratus nya ulih dijapai taun tu,” ku iya baka ti diripotka TVS lebuh bejaku ba Program Libat Urus Infrastruktur Sarawak 2026 ditu, sehari tu tadi.

Ba pemansang ke bekaul, iya mega madahka ari baruh RMK Ke-13, Opis Kereja Raya Sarawak udah nerima pemendar ungkup 852 projek infrastruktur ti mungkur agih belanja RM52.4 bilion ari Perintah Besai enggau Nengeri.

Nitihka ripot TVS, ari penyampau nya, 287 projek beungkus RM26.5 bilion benung digaga diatu, lalu 565 projek agi beungkus RM25.8 bilion benung ba renggat nyendiaka tinda.

Ku iya nambah, pengawa bejalaika projek nya mandangka komitmen perintah nengeri ti seruran ngenegapka pemansang infrastruktur sereta nentuka pengelantang pendiau rayat dijaga.

Iya mega nyemetak madahka kerejasama rat entara ejensi ti bejalaika pengawa enggau perintah deka terus ditegapka dikena nentuka semua projek ulih dipejalaika nitihka timpuh ti udah ditetapka. — RBI

KUALA LUMPUR, 31 Mac – Lebih 15,000 endur bisi disediaka ba 106 buah institusyen Pelajar enggau Latih Teknikal enggau Vokasional (TVET) ungkup pengawa ngambi UP_TVET Perdana dalam pengawa ngambi pelajar bulan Julai 2026.

Sekretariat Kaunsil TVET Nasional (MTVET) dalam siti penerang sehari tu madahka, tawaran nya ngaul institusyen ari baruh lima opis menteri iya nya Opis Menteri Sumber Manusia (KESUMA), Opis Menteri Nembiak enggau Lumba enggau Main (KBS), Opis Menteri Pemansang Menua Pesisir enggau Kandang Menua (KKDW) enggau Opis Menteri Seni enggau Budaya (MOTAC) sereta Opis Menteri Betanam Betupi enggau Pengelikun Pemakai (KPKM).

Nitihka penerang nya, peminta deka dibuka berengkah pagila nyentuk 8 Mei.

Proses milih nyengkaum sesi interbiu ungkup sekeda kus deka berengkah 4 ngagai 8 Mei, lalu ditangkan enggau pemutus peminta ari 11 ngagai 22 Mei.

“Chalun ke mujur mesti ngentaska nerima tawaran nya entara 25 Mei enggau 7 Jun, seraya timpuh ngapil dibuka ari 8 ngagai 30 Jun,” ku penerang nya.

Sekretariat nya mega madahka peluang nampung pelajar dalam TVET dibuka sepemanjai taun nengah UP_TVET Flexi, ti nyendiaka kus timpuh panjai enggau timpuh pandak enggau chara ti lebih fleksibel.

Nitihka penerang nya, dalam konteks pelajar enggau kereja ti majak dinamik, TVET diatu nyadi pilih strategik ti majak bulih kelala ari komuniti.

Naka ke diatu, tikas pengulih gawa graduet TVET udah manggai 95.1 peratus, ti ngayanka pengulih iya nyendiaka jalai kereja ti entap sereta kompetitif.

“Trend ke diatu mandangka penambah ke nyata lebuh 53.56 peratus graduet Sijil Pelajaran Malaysia (SPM) enggau ke sebaka milih jalai TVET, mandangka ubah positif nuju pelajar bepelasarka pengelandik di menua tu,” ku penerang nya.

Ungkup penerang ke silik, tau ngenataika peminta ba https://mohon.tvet.gov.my. -RBI

JULAU, 31 Mac – Kaban Parlimen Julau, Datuk Larry Sng Wei Shien ngemeratka pemesai guna penerang enggau matau akaun bank entara Komiti Pemansang enggau Pengelikun Genturung Pendiau (JKKK) enggau Biro Indu dikena nyeliahka kes nipu duit nengah online ti majak nambah maya ke diatu.

Nitih ku iya, semua piak ti ngatur pekara wang komuniti patut seruran meresa akaun bank sida empu laban bisi bemacham chara nipu ti ngaul kangau telefon, kad kredit, bank enggau internet.

“Enti kitai enda meresa akaun, bisi peluang transaksyen ti enda diperatika.Lebih ngirauka ati, enti bisi pengelaun ngeripot, peluang duit nya pulai baru, sigi nadai,” ku iya lebuh bejaku ba Program Ketuai Begulai enggau Rayat di Rumah Dina, Lasi.

Program tu ngembuan tuju deka ngerapitka kaul entara ketuai enggau komuniti setempat kelimpah meri bantu dikena nyukung pemansang komuniti menua pesisir.

Ku iya nerang, orang dikena tipu agi bisi peluang ngulihka baru duit sida enti ripot nya digaga dalam timpuh tiga bulan, tang enti enda ngeripot pengawa nya tumu, tau ngenataika pengerugi ke enda ulih diputarka.

Berindik enggau nya, iya ngingatka pengawa ngatur akaun JKKK enggau Biro Indu enda patut dilempaika ngagai siku individu aja dikena nyeliahka ari salah guna kuasa.

“Pengawa ngatur akaun enda tau enda digaga begulai sereta terang.Anang semina ngasuh siku individu aja nguasa semua transaksyen laban tu ulih muka ruang ngagai pengawa nipu,” ku iya nyemetak.

Ku iya nambah, pengawa ngaul lebih ari siku individu dalam ngatur pekara wang beguna dikena nentuka tetiap transaksyen ulih dipatau enggau nyemetak sereta nyeliahka penyarut dalam komuniti.

Berebak enggau nya, Larry mega bisi mantaika pengirau ati bekaul enggau kes ke udah nyadi sebedau tu ti ngujungka penyarut ba rumah panjai ketegal isu belanja.

“Pekara baka tu enda patut nyadi ba genturung pendiau kitai.Sida ke dilempaika tanggungpengawa enda tau enda bejalaika tanggungpengawa enggau lurus sereta terang,” ku iya.

Ba pengerami ke sama, iya mega bisi nyuaka agih belanja sepenyampau RM77,560 ngagai sekeda JKKK enggau Biro Indu di sitak nya.

Antara penerima iya nya JKKK Rh Dina Lasi, JKKK Rh Medan Enturong, JKKK Rh Seman Lasi, JKKK Rh Liam ak Ganiang Ulu Sejugam, JKKK Rh Nanja Lasi, Jalai Sawit Sungai Sempit ( Tr Antau ) Gerempung Pekebun Ulu Lasi ( Tr Antau ), Biro Indu Rh Dina, Biro Indu Rh Seman Lasi enggau Biro Indu Rh Medan Enturong. -RBI

KUCHING, 31 Mac — Perintah Sarawak nengah Yayasan Sarawak muka peminta Inisiatif Bantu Pelajar Palan Pelajar Tinggi (IPT) Renggat 1 taun 2026 ngagai nembiak ke patut berengkah sehari tu.

Timpuh peminta ditetapka berengkah ari 31 Mac 2026 nyentuk 30 April 2026, ti ngaul peminta baru ungkup nembiak ke deka bulih penguntung ari inisiatif nya.

Entara bantu ke bisi disedia iya nya nyendiaka laptop pechuma, baucher bup, enggau bantu belanja khas dikena mantu ngelempungka tating ungkus belajar enggau utai ke diguna nembiak IPT.

Peminta tau digaga nengah chara online nengah portal rasmi Yayasan Sarawak ba link baka tu:

Berindik ari nya, nembiak ke nitihka syarat ke patut dilalau ngambika enda muai peluang minta inisiatif tu nyadika sukung ngagai penerus enggau penyulut akademik sida.

Penerang silik, mensia mayuh tau meda ba laman web rasmi Yayasan Sarawak. — RBI