BETONG, 1 April — Kaban Parlimen Betong, Dato Dr. Richard Rapu, madahka projek ngaga replika Kuta Rentap di Bukit Sadok deka nyadi pematak ngintu pesaka sejarah enggau pemansang dagang temuai ba sitak nya.

Nitihku iya, pengerami nasih tanah enggau nyerahka palan projek nya nyadika sebengkah agi singkang beguna dalam pengawa meri basa ngagai sejarah enggau pengawa bujang berani menua tu, kelebih agi Rentap ti tebilang ngelaban perintah Rajah Putih ba abad ke-19 suba.

“Bukit Sadok ukai semina endur besejarah aja, tang kelai pemerani enggau semengat ngelaban rayat Sarawak dalam ngetanka menua asal.

“Pengawa ngaga replika kuta tu deka nentuka jerita pengawa ngentanka menua ambi terus dikeingatka rebak dudi,” ku iya.

Bukit Sadok ke urung 831 meter (2,726 kaki) peninggi ari tasik sebedau tu nyadi kuta besai Rentap, lalu enggau nya nyadika palan ke strategik dalam sejarah ngelaban munsuh.

Projek ke beungkus RM16 juta nya dipelaba deka berengkah dalam timpuh ke semak tu, disikap enggau perengka guna sukung dikena ngangkatka peneleba temuai kelimpah ari ngenegapka sektor dagang temuai di Bagi Menua Betong.

Pengerami nya bela digulu Sapit Premier Sarawak ti mega Menteri Wang enggau Ekonomi Baru II sereta Menteri Infrastruktur enggau Pemansang Palan Penyangkai Kapal, Datuk Amar Douglas Uggah Embas, enggau Penyanding Penemu Pansik Saintifik Sarawak, Tan Sri Datuk Amar Dr Alfred Jabu Numpang. Sama bisi datai Leftenan Jeneral (B) Datuk Stephen Mundaw begulai enggau ketuai opis perintah, ketuai komuniti enggau peranak menua nya.

Berebak enggau nya, Dr Richard Rapu madahka pemansang infrastruktur baka Jalai Besai Pan Borneo enggau Jalai Besai Menua Pesisir ti diperambu dikearap ulih nambahka akses ngagai Betong, lalu enggau nya muka mayuh agi peluang ekonomi ngagai peranak menua nya.

“Pengawa tu ukai semina deka ngetanka sejarah enggau identiti budaya, tang mega ulih nyungkak ekonomi menua tu nengah penambah penyampau temuai,” ku iya.

Iya ngarapka projek nya ulih dipejalaika enggau lanchar sereta meri penguntung ke besai ngagai rayat, setipak enggau aspirasyen pemansang Bagi Menua Betong nuju pengelantang enggau pengelantang dalam penyelai. -RBI

PUTRAJAYA, 1 April — Menteri Penyerakup Menua, Datuk Aaron Ago Dagang, madahka Akta Rukun Tetangga 1975 [Akta 751] (Ubah) 2025 diatu udah berengkah dipejalaika enggau rasmi berengkah sehari tu, nyadi singkang ke besai reti dikena ngenegapka pangku pengawa komuniti ke lantang sereta likun.

Nitih ku iya, ubah nya dikemendarka ba Dewan Rakyat kena 2 Disember 2025 lalu udah nya ba Dewan Negara kena 17 Disember 2025 nengah sukung majoriti Kaban Parlimen.

Lalu enggau nya ku Aaron, ngayanka komitmen perintah ti terus meri kuasa ngagai institusyen komuniti ba renggat baruh.

“Pengawa neritka ubah tu siti singkang ke berat dalam ngubah pangku pengawa Kandang Menua Rukun Tetangga (KRT) ngambika lebih dinamik, responsif sereta efektif napi pemar kemaya hari tu,” ku iya nengah sebengkah penerang sehari tu.

Ku iya nambah, entara batang ubah nya nyengkaum koordinasyen timpuh nyiri Kaban Komiti KRT (AJKRT) nengah pengawa ngelanjarka timpuh nyiri, dikena nentuka penerus pengawa nyadi ketuai enggau penegap program komuniti.

Kelimpah ari nya, ubah nya mega mungkur pengawa ngenegapka agih belanja ke udah bisi ngambika mengkang relevan enggau guna ke diatu sereta ulih mutarka pemar rama ke majak nyadi ba renggat komuniti.

Atur tu setipak enggau aspirasyen perintah dalam ngenegapka penyerakup bansa sereta ngenegapka pangku pengawa rayat nyadi tiang pengelantang menua ari baruh penemu Malaysia MADANI. -RBI

Ketuai Polis Pelilih Meradong, DSP Tansli Mering madah, pengawa ngetan nya digaga urung pukul 3 lemai nengah Ops Tapis Khas.

Nitihku iya, suspek udah nya dibai ngagai IPD Meradong ngambika atur silik agi dipejalaika sebedau beperesa nisih ai kemi ba Opis Bagian Tasat Jenayah Narkotik (BSJND) Pelilih Meradong.

“Asil peresa nya tetemuka saspek positif dadah bansa amphetamine enggau methamphetamine,” ku iya ba sebengkah penerang.

Ku iya, pengawa meresa baru rikod ke udah mega tetemuka saspek nadai ngembuan sebarang rikod jenayah sebedau tu tauka penyalah bekaul enggau dadah.

Kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit enda ngelui ari RM5,000 tauka jil nyentuk dua taun, nyema dikenuku salah.

Berebak enggau nya, polis nyemetak madahka sida enda belembut ba sebarang penyalah bekaul enggau dadah, lalu deka terus chakah agi bejalaika operasyen dikena ngelaban pengawa salah nya di pelilih tu.

Mensia mayuh ti bisi penerang bekaul enggau aktiviti dadah dipinta ngenataika penerang nya ngagai Balai Polis Bintangor nengah lumur 084-693222. -RBI

SIBU, 1 April — Perintah Sarawak tetap komited ngenegapka pemansang infrastruktur menua pesisir lebuh sesi nyerahka palan ungkup projek Program Transformasyen Menua Pesisir (RTP) ari baruh DUN N.59 Tamin diatur ba Rumah Panjai Tuai Rumah Lawrence Radin, Pasai Bon, kemari.

Projek tu mungkur pengawa ngaga palan entepan kerita ke lebih teratur sereta likun, setipak enggau guna komuniti rumah panjai ke diatu ke majak nambah.

Inisiatif tu dikearap ulih meri penguntung ke besai ngagai peranak menua tu, kelebih agi dalam nentuka pengelantang enggau pengelanchar aktiviti ninting hari sereta mega ngatur pengawa komuniti.

Kaban Kunsil Nengeri (ADUN) Tamin, Ir. Christopher Gira Sambang nyemetak madahka pengawa bejalaika projek RTP tu mandangka pengawa perintah ti enda ngetu dalam nentuka pemansang menua pesisir dipejalaika enggau inklusif, teratur sereta meri empas ti tinggi.

Nitihku iya, tetiap projek ti diperambu ukai semina ngembuan juluk deka nangkup guna rayat ke diatu, tang mega nyadika pelasar pemansang ti meruan ungkup pengelantang pendiau rebak dudi hari.

Pengawa bejalaika projek tu mega mandangka kerejasama rat entara Opis Kereja Raya (JKR) ti nyadi ejensi bejalaika pengawa enggau Palan Servis DUN N.59 Tamin dalam nentuka tetiap projek dipejalaika nitihka spesifikasyen teknikal, taga enggau standard ti udah ditetapka.

Sesi nyerahka palan nya digulu pengari JKR, Puan Nur Affifah, pengari Palan Servis DUN N.59 Tamin, Kaunsilor Ajan Dau, Tuai Rumah Lawrence Radin, peranak rumah panjai nya enggau kunteriktor ke bisi kaul enggau pengawa nya.

Berebak enggau nya, Tuai Rumah Lawrence Radin meri besai terima kasih ngagai perintah enggau ADUN sitak nya laban udah meri belanja dikena ngaga projek nya.

Iya nerangka pengawa ngaga palan endur entepan kerita nya amat besai reti dalam mutarka penanggul endur, kelebih agi maya musim pengerami enggau pengawa komuniti.

“Aku mega ngarapka projek tu ulih ditembu nitihka timpuh, kelebih agi sebedau pengerami Gawai Dayak ti deka datai, lalu enggau nya ulih meri pemaik ti meruan ngagai peranak menua tu” ku Tuai Rumah Lawrence Radin lebuh di randau Ruai Berita Iban. — RBI

PUTRAJAYA, 1 April – Opis Menteri Pelajar Malaysia (KPM) bebendar nyakal jaku viral ti madahka pemutus peresa Sijil Pelajaran Malaysia (SPM) 2025 dikeluarka bepelasarka bansa.

Nitihka penerang KPM, penerang ti dikerembaika ba media rama nya enda betul sereta terang bendar dikena ngenyarutka runding mensia mayuh.

Berindik enggau nya, opis menteri udah ngaga ripot ngagai piak bekuasa ngambika atur silik agi dipejalaika ngelaban pengawa ngerembaika penerang ti enda betul.

KPM mega ngelalau mensia mayuh anang mudah pechaya sereta ngerembaika sebarang penerang ke enda entas.

“Mensia mayuh dilalau ngulihka penerang ke tulin semina nengah jalai rasmi KPM aja,” ku penerang nya. – RBI

BALING, 1 April — Siku lelaki peranak menua tu beumur 39 taun balat bakal pengudah treler ke ngundan baja ke dideriba iya lenyau jaga sebedau tepawah ngagai parit ba tisi jalai ba penusah ke nyadi ba Gunung Inas, lemai kemari.

Nitihka ripot keterubah, mansa tepekul ba sepiak deriba lalu balat bakal ba gelang jari kiba.

Tim ari Balai Bomba enggau Penyah Penusah Baling terus dianjung ngesah ngagai endur nya ngambika ulih bejalaika operasyen nyelamat.

Mansa mujur dipansutka sebedau dianjung ngagai Sepital Baling ngena ambulans Opis Menteri Pengerai Malaysia (KKM) ngambika diperubat enggau silik agi.

Nadai mansa bukai bisi kaul enggau penusah nya. Udah nya kes nya diserah ngagai polis ngambika ulih bejalaika atur ke silik agi.

Mensia mayuh dilalau ngambika seruran bejejimat maya deriba kelebih agi ngaul perengka pengangkut berat, dikena nyeliahka penusah ke enda dikedekaka nyadi. — RBI

CYBERJAYA, 1 April — Suruhanjaya Komunikasyen enggau Multimedia Malaysia (SKMM) udah berengkah mansik tiga iku individu ti dipelabaka bisi kaul enggau nyadung penerang bula bekaul enggau peniki tarif kiasa karan ba sekeda pelasar digital.

Nitihka penerang media sehari tu, penerang ti bula nya ditemu dikerembaika nengah Facebook, Threads enggau WhatsApp, lalu enggau nya ngasuh mensia mayuh saru penemu.

Lebih ngirauka ati, penerang nya dipelabaka dikerembaika ngena elemen grafik ti sebaka enggau ejensi berita dikena nambahka kredibiliti isi penerang nya.

MCMC madahka asil pansik nya tetemuka penerang ke viral nya enda betul lalu udah diedit ari isi rasmi Astro AWANI.

Dikeirauka pengawa ngerembaika penerang ke baka nya tau nempa anggap negatif lalu ngujungka mensia mayuh irau sereta tekenyit.

Pansik dipejalaika ari baruh Akta Komunikasyen enggau Multimedia 1998 (Akta 588), spesifik Seksyen 233 ti nyendiaka ukum maksimum RM50,000 tauka jil nyentuk dua taun, tauka kededua ukum nya, enti dikenuku salah.

Berindik enggau nya, SKMM nyemetak madahka sida beratika enggau berat sebarang pengawa salah guna pelasar digital ti ngembuan tuju deka ngelimpangka runding mensia mayuh. Atur ti terit deka dipejalaika ngagai sebarang individu ti ngelanggar undang-undang ti udah bisi.

Berebak enggau nya, mensia mayuh dilalau ngambika lebih betanggungjawap lebuh nguna media rama sereta anang ngerembaika penerang ti enda dientaska, ngambika ulih nyaga pengelantang rama enggau atur mensia mayuh. – RBI

Program Ijazah Sarjana Perguruan (Bidang Pedagogi) Palan Pematih Pengajar (IPG) Malaysia Opis Pelajar (PISP Taun 2026).

SARIKEI, 1 April — Raban Penyaga Orang Periman Malaysia (APM) Pelilih Sarikei bejalaika pengawa enggau lengkas mutarka penanggul berindik ari siku ular sawa ditemu ba dalam agu sebuah palan pengentap pendiau di Jalai Nyelong, tumu pagi tadi.

Nengah penerang berita, Palan Penyaga Operasyen (PKOD) Pelilih Sarikei madahka sida nerima kangau ngenyit ari mensia mayuh urung pukul 5.24 pagi bekaul enggau penatai ular nya dalam rumah.

“Berindik ari ripot nya, empat iku kaban ari Tim Alpha udah dianjung ngagai endur nya lalu datai dalam timpuh ke pandak.

“Lebuh datai ba endur nya, bala APM tetemuka siku ular sawa urung lima kaki pemanjai ba agu palan pengentap pendiau nya,” ku penerang nya.

Nitihka penerang ke sama, operasyen nangkap nya dipejalaika ngena perengka khas baka penyepit enggau siti barang dikena nangkap ambi nentuka pengelikun orang ke nguan enggau kaban ke bejalaika pengawa.

“Ular nya mujur ditangkap enggau nadai sebarang penusah ke enda manah nyadi lalu operasyen nya tembu enggau penuh urung pukul 5.37 pagi,” ku penerang nya nerang.

Berindik enggau nya, APM Sarikei ngelalau mensia mayuh ngambika seruran bejejaga, kelebih agi maya musin panas, laban jelu siga baka ular bisi potensial ninggalka palan asal sida lalu tama ngagai kandang endur diau.

Mensia mayuh mega dilalau lengkas ngaga kaul enggau piak bekuasa nyema betapi enggau penusah ngenyit dikena nentuka pengawa jampat ulih diambi. – RBI

KUALA LUMPUR, 31 Mac — Grafik bekaul enggau rega runchit produk petroleum ungkup timpuh 2 ngagai 8 April 2026 ke udah viral ba media rama udah dientaska enda entas.

Nitihka penerang nengah laman Facebook rasmi Opis Menteri Wang Malaysia (MOF) grafik nya ukai dikeluarka piak bekuasa lalu enda tau nyadika referen.

Berindik enggau nya, mensia mayuh dilalau ngambika enda ngerembaika penerang ke enda dientas, kelimpah ari seruran merujuk ngagai jalai rasmi perintah dikena ngulihka penerang ke betul sereta pemadu baru.

Ba penerang ke sama, mensia mayuh mega diingat ngambika lebih bejejaga enggau isi ti tau nyaru sereta ngasuh mensia mayuh saru penemu, kelebih agi ba pelasar media rama.

Opis Menteri Wang Malaysia mega madahka pemadah rasmi rega runchit produk petroleum deka dipansutka ninting minggu ninting Hari Tiga nengah pelasar rasmi opis menteri nya.

Berindik ari nya, mensia mayuh dipinta nentuka tetiap penerang ke diterima nya ari pun penatai ke tulin nyadika atur dikena nagang pengerembai berita pelesu. — RBI