KUCHING, 5 Julai — Malam Budaya Kelab Nembiak Asal Bukit Saban (KAABS) 2026 nyadi pelasar ke beguna dalam nyerakupka raban nembiak Bukit Saban ke diau di Kuching, kelimpah ari ngerapitka kaul pangan diri, nerenakka semengat begulai, beserakup sereta nentuka adat enggau budaya asal diteruska generasyen jemah ila.
Pengawa ti berambaika leka jaku “Celebrating Culture, Unity and Friendship” nya mega nyadi pelasar dikena ngenegapka penyerakup komuniti Dayak sereta penyambung rayat enggau ketuai nengeri, kelimpah muka ruang interaksyen dua piak bekaul enggau polisi enggau inisiatif pemansang Perintah Sarawak.
Sapit Premier Sarawak Datuk Amar Douglas Uggah Embas ke mega Kaban Kunsil Nengeri (ADUN) N.37 Bukit Saban, madah, program ti bepelasarka budaya baka tu ukai semina ngangkatka identiti enggau pesaka asal komuniti Dayak, tang mega bejalaika tanggungpengawa ke berat dalam ngenegapka kaul rama enggau penyerakup komuniti.
Iya madah munyi nya lebuh bejadika Malam Main Asal KAABS 2026 ti udah diatur ba sebengkah Hotel tebilang di Kuching, ditu malam kemari.
Nitih ku iya, ngatur aktiviti main asal mega nyadi pelasar beguna dalam ngenegapka identiti raban nembiak sereta ngerapitka kaul diri sebilik entara komuniti Bukit Saban ke ba luar kandang menua nya.
Berebak enggau nya, iya nyemetak madahka raban nembiak meseti ngerebut peluang ke disediaka nengah Strategi Pemansang Pengudah COVID-19 2030 (PCDS 2030), kelebih agi dalam bidang pelajar, pengawa dagang, ekonomi digital, tenaga gadung, pemansang pemintar tiru (AI) enggau modal mensia.
“Raban nembiak nyadi reta pemadu berega Sarawak. Sida patut ngerebut peluang ti disediaka perintah dikena ngangkatka penemu, pengelandik enggau daya besemekih sida, laban kuing nengeri tu jemah ila bepanggai ba penyereta rebak baru ti chakah,” ku iya.
Ngenang sukut pemansang di Bukit Saban, Uggah madahka Perintah Sarawak terus ngemeratka pemansang infrastruktur enggau ekonomi, nyengkaum pengawa ngenegapka potensial Bukit Sadok nyadi palan dagang temuai bepelasarka sejarah enggau pesaka asal.
Iya mega madahka Jematan Sungai Paku udah tembu digaga lalu deka dipenyadika ujung bulan Julai, lalu ari nya ulih ngemanahka agi rentayan penyambung jalai sereta nyungkak aktiviti ekonomi kandang menua.
Kelimpah ari nya, Perintah Sarawak udah ngemendarka agih belanja sepenyampau RM25 juta dikena ngangkatmanah Jalai Ulu Rimbas ti nyadi pengawa ti enda ngetu dikena ngenegapka perengkaguna infrastruktur ba sitak nya.
Uggah mega nerangka sepenyampau RM1.5 bilion udah diungkupka dikena bejalaika mayuh bengkah projek ari baruh Ejensi Pemansang Bagi Menua Betong (BDDA), enggau tetiap sitak Kunsil Nengeri (DUN) di Bagi Menua Betong nerima urung RM200 juta ungkup pengawa bejalaika projek pemansang rayat.
Ba sektor ekonomi menua pesisir, urung RM9 juta udah diungkupka ungkup projek betanam betupi di Bukit Saban nyengkaum nanam sawit enggau lada dikena nyungkak penatai pemisi ruang bilik peranak menua nya.
“Batang fokus Perintah GPS iya nya ngenegapka ekonomi rayat sereta nyungkak penatai pemisi ruang bilik.”
“Bemacham inisiatif udah disediaka lalu rayat diperansang ngerebut peluang ke bisi disediaka,” ku iya.
Iya mega ngelalau KAABS terus bejalaika tanggungpengawa enggau chakah dalam ngatur program pemansang nembiak ti mungkur pekara pelajar, lumba enggau main, pengawa dagang enggau nempa ulah dikena ngadaka rebak ti kompetitif sereta sedia ngiring Sarawak jemah ila.
Pengerami makai lemai nya mega dirichah enggau pengawa mandangka main asal Iban ari ASADIA enggau GOAS, mandangka seni, budaya enggau pesaka asal komuniti Dayak ke nyelai ngagai bala ke bisi datai.
Pengawa ngatur Malam Budaya KAABS 2026 sekali agi ngayanka pangku pengawa nyadi pelasar penyerakup raban nembiak di Bukit Saban di Kuching, kelimpah ari ngenegapka identiti budaya, ngetanka pesaka asal sereta nerenakka semengat begulai entara komuniti. — RBI
#Beritalban | Ruai Berita Iban
Rinduka | Titihka | Kunsika
