MIRI, 4 Julai – Aum Pengari Tiga Taun Sekali Serakup Kayan Sarawak (PKS) 2026 nempa sejarah lebuh ngerikod penatai pemadu mayuh kenyau ditumbuhka dalam taun 1997, lalu enggau nya ngayanka komitmen tinggi komuniti Kayan dalam ngenegapka penyerakup sereta ngenegapka pangku pengawa gerempung.
Aum ke diatur dalam pengelantang enggau semengat diri sebilik ngempuru lapan pampang PKS ari serata Sarawak, ti mungkur urung 120 iku pengari enggau pemerati.
Presiden PKS, Dato Dennis Ngau, madahka aum tu ke pemadu richah sereta nerima penyereta ke pemadu mayuh sepemanjai iya ngaul diri dalam gerempung nya kenyau ari iya ditumbuhka nyauka tiga dekad ke udah.
Pengerami nya mega dirami enggau penatai Sapit Menteri Perengka Guna enggau Telekomunikasyen Sarawak ti mega Ketuai Kaunsil Penyanding Penemu PKS, Datuk Liwan Lagang, ti udah bejadika aum nya.
Sama bisi datai Sekretari Politik ngagai Premier Sarawak, Dominic Nyurang Ajeng enggau Thomas Balan Bang, sereta sekeda bala Pemancha, Penghulu, Tuai Rumah enggau Kaunselor.
Pengawa milih kaban Komiti Eksekutif (CEC) PKS ungkup sesi 2026–2028 diatur dalam gaya meruan enggau semengat diri sebilik ti nyadi pengawa komuniti Kayan.
Pemutus pengawa bepilih nya meda Dato Dennis Ngau ngetanka penuduk iya nyadi Presiden, lalu Thomas Balan Bang dichiri nyadi Sapit Presiden.
Pangku pengawa Sapit Presiden dipegai KK Gurung Wan, Pengajar Dorothy Ibau dipilih nyadi Sekretari Besai enggau bantu ari SAO Ping Ngau nyadi Penulung Sekretari Besai.
Berebak enggau nya, Daniel Jok Wan dichiri nyadi Tukang Wang Besai enggau Pengajar Melvin Sigo nyadi Penulung Tukang Wang, lalu Jillian Long mangku pengawa nyadi Ketuai Pemadah sereta dibantu KK Usun Stewart.
Kaban Komiti Tetap iya nya Pastor Dr Willy Sigo, Tommy Raymond Jok, MU Lahong Tajang, Peterus Paren Mering, Musa Wan, Ujang Anyie, MU Donny Dian Talik enggau Laing Uvang.
Ungkup pangku pengawa Audit Dalam, Cr Robert Uyo enggau Stephen Karim udah dipilih mangku tanggungpengawa nya.
Dennis ngarapka tim baru ke dipilih tu deka terus ngenegapka pangku pengawa PKS nyadi pelasar nyerakupka komuniti Kayan sereta bejalaika tanggungpengawa ke lebih proaktif ngetanka pemansang, pengelantang enggau penyulut komuniti Kayan di Sarawak. -RBI
#ruaiberitaiban#newsiban#beritaiban
Rindu | Titih | Kunsika
