SONG, 4 Julai — Sebuah perau ke anyut nadai orang nepan ba ulu Sungai Bangkit, Katibas udah ngepunka operasyen ngiga enggau nyelamat (SAR) pengudah orang ke ngempu perau nya dikeirauka lemas kenyau ari lemai kemari.
Tudah benama Sumok Jugah, 56, dipelabaka labuh ari perau maya dalam rantau jalai pulai ke rumah pengudah meli gis nyumai ba sebuah kedai di Nanga Bangkit urung pukul 6 lemai.
Pengelenyau iya ditemu lebuh peranak rumah panjai tetemuka perau iya anyut nadai tepedaka iya ba ulu sungai.
Pengari Palan Gerakan Operasyen (PGO) Opis Bomba enggau Penyah Penusah Malaysia (JBPM) Sarawak madah, sida nerima kangau bekaul enggau penusah nya ari Balai Polis Song urung pukul 9.40 pagi tadi.
Berindik ari nya, seraban bomba ari Balai Bomba enggau Penyah Penusah (BBP) Song ti betuaika PB Mohamad Nor Azri ngelawa ngagai Balai Polis Song ngulihka penerang silik sebedau taklimat operasyen begulai enggau polis diatur pukul 10 pagi.
Operasyen SAR udah nya dipejalaika enggau pengering tiga iku raban bomba ngiga tudah ngelingi palan penusah nyadi.
Operasyen nya mega ngaul kerejasama Polis Diraja Malaysia (PDRM) enggau Raban Penyaga Orang Periman Malaysia (APM).
Naka berita tu ditulis, tudah agi bedau ditemu lalu operasyen ngiga mansa benung dipejalai. – RBI
#ruaiberitaiban#newsiban#beritaiban
Rindu | Titih | Kunsika
