MERADONG, 18 Jun — Pengawa nyerahka pampas tanah sepenyampau RM1,774,808.50 ngagai empat iku pengempu tanah nyadi siti agi singkang ke besai reti nuju pengawa ngamatka projek ngaga enggau nembuka projek Pegung Nyemerai Meradong ke beungkus RM22.4 juta ke udah lama dianti peranak pelilih menua tu.
Pengerami Nyuaka Chek Pampas Tanah ungkup projek nya udah diatur ba Bilik Aum Opis Pelilih Meradong kena Hari Dua tu tadi lalu dikemataka Kaban Kunsil Nengeri (ADUN) Meradong, Datuk Ding Kuong Hiing.
Nitihku Datuk Ding, iya berasai gaga endar ati lebuh palan endur ngaga Pegung Nyemerai Meradong pengujung iya mujur ditentuka pengudah nengah bemacham proses perambu enggau pemendar.
Ku iya, projek nya udah dianjung beberapa kali sebedau mujur bulih pemendar nengah Opis Menteri Nembiak, Lumba enggau Pemansang Orang Dagang Sarawak enggau penyampau ungkus sepenyampau RM22.4 juta.
“Pengawa nyabut undi ungkup projek tu dipelabaka deka diatur bulan Julai ti deka datai lalu aku ngarapka pengawa bejalaika projek renggat keterubah tu bejalai enggau lanchar nitihka timpuh ti udah ditetapka,” ku iya kena Hari Dua tu tadi.
Iya mega meri besai terima kasih ngagai pengempu tanah ke bisi kaul laban udah meri kerejasama sereta pengibuh ngemujurka projek pemansang nya.
Nitihku iya, pengeran sida ngelepaska tanah ungkup pemansang pelilih menua nyadi pemeri besai ti chukup dikerindu sereta deka seruran dikeingatka komuniti Meradong.
Datuk Ding madah, pengawa ngaga Pegung Nyemerai nya ukai semina nyendiaka perengka guna rekreasyen moden ungkup peranak menua nya, tang mega bisi potensial nyadi pelasar ngadaka mayuh agi atlit nyemerai ti landik ari Meradong jemah ila.
Ku iya nambah, palan nya mega deka ulih nyadi palan endur ngatur pekit lumba enggau main renggat nengeri enggau menua nyengkaum Lumba enggau Main Malaysia (SUKMA).
“Projek tu ukai semina meri penguntung ngagai pemansang lumba enggau main sereta rekreasyen ungkup komuniti menua nya, tang mega nyadi kelai penyulut enggau temegah ati ngagai peranak Meradong,” ku iya.
Pengawa mayar pampas tanah ke tembu ba pengerami nya dipeda nyadi sebengkah agi pemujur ke berat dalam nentuka projek ke meri empas tinggi nya ulih dipejalaika enggau lanchar ungkup pemaik rayat pelilih menua nya dalam timpuh ke panjai.- RBI
#ruaiberitaiban#newsiban#beritaiban
Rindu | Titih | Kunsika
Sumber, photo — UKAS
