BEKENU, 13 Jun — Opis Perengka Pengangkut Jalai (JPJ) Pampang Miri udah mujur bejalaika Kus Kurikulum Pelajar Deriba (KPP) 01 ungkup Program Bantu Lisin Deriba Kelas B2, Parlimen Sibuti P218 ti diatur ba Balai Mensia Mayuh Bekenu.
Program tu nerima timbal ti chukup meransang enggau penyereta 857 iku chalun, lalu enggau nya ngayanka komitmen enggau pengerindu komuniti lokal ngulihka lisin deriba ti entas nengah jalai ti betul sereta teratur.
Dikena nentuka pengawa bejalaika pengawa lanchar, kus tu dipejalaika dalam dua sesi dikena meri pengelantang ngagai pesereta sepemanjai program nya.
Kus KPP01 tu nyadi komponen asas ti beguna dalam proses ngulihka lisin deriba Kelas B2, ti ngemeratka aspek pengelikun jalai alun, meretika undang-undang trafik enggau penumbuh ulah deriba ti betanggungjawap, disiplin sereta bejimat ba jalai alun.
Program tu asil kerejasama strategik entara JPJ Malaysia Pampang Miri, JPJ Sarawak, Palan Servis Parlimen P218 Sibuti enggau Institut Deriba Hisafe Bekenu dalam pengawa ngerembaika akses lisin ngagai komuniti setempat, kelebih agi di menua pesisir.
Sama bisi datai ngerichahka agi program nya, Sapit Menteri Luar Malaysia YB Dato Lukanisman bin Awang Sauni, merangkap Kaban Parlimen P218 Sibuti, ke mega bisi ngelimpangka awak begulai enggau bala pesereta sereta mantaika sukung iya ti terus ngagai pengawa ngenegapka inisiatif lisin deriba renggat rumput.
Pengawa bejalaika program tu dikearap ulih terus meri pemaik ngagai komuniti, kelimpah ari meri pangka ngagai pengawa nambahka penyedar pengelikun jalai alun enggau penumbuh budaya deriba ti lebih likun sereta bedisiplin di nengeri Sarawak.
Sama bisi datai Ketuai JPJ Pampang Miri, Tuan Yusuf bin Andan, ke bela matau pejalai program sereta beinteraksyen enggau bala penyereta sepemanjai sesi nya. — RBI
#Beritalban | Ruai Berita Iban
Rinduka | Titihka | Kunsika
