KOTA SAMARAHAN, 13 Jun — Bagi Pansik Jenayah Narkotik Pelilih Menua (BSJND) IPD Kota Samarahan mujur nangkap siku lelaki peranak menua nya beumur 43 taun ketegal dipelabaka ngembuan ai ketum dalam operasyen ba mua sebuah rumah di Kampung Binyu, Kota Samarahan urung 11.40 pagi, Hari Dua tu tadi.
Asil ari pengawa meresa ti dipejalaika seraban pemesai polis ti betuaika Insp. Jasni anak Nimos bisi tetemuka enam (6) iti butul ti dilabel “MS Spring” ti ngundan ai bechura gadung keruh dipelabaka ai ketum.
Pekara ke dirampas nya dipelabaka 9,000 mililiter enggau rega urung RM270.00.
Saspek siku pengereja pengawa menua tu mega udah ngasaika peresa nisi keterubah polis lalu ditemu negatif dadah.
Pansik tumu tetemuka saspek ngaku ai ketum ke dirampas nya enggi iya lalu ngaku bisi kaul enggau pengawa ngena ai ketum kenyau ari pun taun 2026.
Saspek mega madahka diri bulih bekal nya ari siku lelaki ke dikelala enggau nama “Mie” nengah pengawa betunga mua.
Kes tu dipansik ari baruh Seksyen 30(3) Akta Racun 1952.
Nitihka atur undang-undang ke diatu, pengawa proses, nyadung tauka nyual ai ketum nyadi penyalah ari baruh Akta Racun 1952.
“Enti dikenuku salah, pesalah nya ulih diukum mata duit nyentuk RM100,000 tauka dijil nyentuk lima (5) taun tauka kededua nya sekali” ku penerang.
Saspek diatu benung ditan ba Lockup Balai Polis Kota Samarahan dikena mantu tasat silik agi.
Polis DiRaja Malaysia ngelalau mensia mayuh anang ngaul diri enggau sebarang pengawa bekaul enggau pengawa salah nguna tauka nyadung ai ketum laban atur ke terit deka dipejalaika nitihka penetap undang-undang ke dikena. — RBI
#Beritalban | Ruai Berita Iban
Rinduka | Titihka | Kunsika
Sumber, photo — Polis Pelilih Samarahan
