SERIAN, 9 Jun — Perintah Sarawak ari baruh iring Gabungan Parti Sarawak (GPS) tetap komited ngetan sereta ngenegapka hak Tanah Adat Bumiputera (NCR) nengah mayuh bengkah polisi enggau pengawa ke tegak, lalu enggau nya nulak jaku penyakal ti madahka perintah nengeri enda ibuhka pemerat tanah adat nengeri.
Sapit Premier Sarawak, Datuk Amar Douglas Uggah Embas madah, perintah nengeri seruran beratika isu ke bekaul enggau tanah NCR enggau berat laban tanah nyadi reta ke chukup berega ngagai komuniti Dayak sereta patut diintu ungkup pengelantang rebak dudi hari.
Ku iya, komitmen tu diasaika nengah bemacham inisiatif nyengkaum ubah Kanun Tanah Sarawak ba taun 2018 ti ngaku kandang menua Pulau Galau enggau konsep Pemakai Menua, lalu enggau nya ngenegapka agi pengawa nyaga hak tanah adat komuniti setempat.
“Penyakal suah nuduh perintah enda ibuhka reta enggau pemerat komuniti Dayak.
“Kebendar iya, perintah seruran bebendar nyaga hak tanah adat nyengkaum ngubah undang-undang tanah ngambika ngaku Pulau Galau enggau Pemakai Menua,” ku iya.
Iya madah munyi nya lebuh bejaku ba Pengerami Nyambut Gawai Dayak 2026 Bukit Semuja ke diatur ba Kampung Riih Daso, semak ditu, kemari.
Nitih ku Uggah, pengawa ngaku Pulau Galau enggau Pemakai Menua nengah ubah Kanun Tanah Sarawak (KTN) siti singkang ke berat dalam meri penetap enggau jamin nyaga hak pengempu tanah NCR di serata Sarawak.
Kelimpah ari nya, perintah nengeri mega udah bejalaika bemacham pengawa bukai nyengkaum ngenyampatka proses nyukat tanah, ngaga gazet kandang endur ke bekaul sereta ngeluarka surat pala tanah dikena nentuka hak pengempu tanah adat terus dijaga sereta diatur enggau sistematik agi.
Iya nyemetak madahka semua singkang ke udah dipejalaika perintah nengeri nyata ngayanka dawa penyakal ti madahka perintah enda ibuhka isu tanah NCR nya nadai pengamat.
Ba pemansang ke bekaul, Uggah mega nyemetak madahka nadai siku peranak Sarawak deka dikelaung ari arus pemansang laban perintah nengeri komited nentuka penguntung ari pemansang ulih diasaika enggau sama bela semua rayat enda ngira endur tauka penatai.
Ku iya, prinsip tu nyadi teras Strategi Pemansang Pasca COVID-19 2030 (PCDS 2030) ti ngemeratka pengelantang ekonomi, penyerakup rama enggau pengelantang rampa menua.
“Nadai siku orang deka dikelaung. Tu ukai semina retorik aja, tang dipejalaika nengah polisi, perambu enggau pengawa ti terang ti ngemendarka rayat meda kediri empu asil pemansang ti dipejalaika di serata Sarawak,” ku iya.
Ku iya, komitmen perintah ngagai pemansang inklusif mega disalin nengah pengawa numbuhka ejensi pemansang pelilih menua ti bejalaika tanggungpengawa ngenyampatka pengawa bejalaika projek pemansang di serata Sarawak, kelebih agi di menua pesisir.
Nitih ku iya, tetiap ejensi pemansang pelilih menua mega nerima agih belanja ke besai dikena bejalaika projek infrastruktur, perengka guna mensia mayuh enggau inisiatif ngangkatka ekonomi rayat dikena nentuka pemansang ulih diasai enggau lebih setimbang sereta komprehensif.
Pengerami Gawai Dayak Bukit Semuja 2026 diatur enggau richah enggau penatai bemacham pupu raban bansa ari ngelingi Bukit Semuja enggau kandang menua besemak, lalu enggau nya mandangka semengat beserakup enggau pengelantang ti nyadi pelasar pemansang Sarawak ti meruan.
Sama bisi datai Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn; Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom; Menteri Kereja Raya Malaysia, Dato Sri Alexander Nanta Linggi; Sapit Menteri Industri Pemakai, Komoditi enggau Pemansang Kandang Menua Sarawak, Datuk Martin Ben; Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan; Kaban Kunsil Nengeri (ADUN) Bukit Semuja, John Ilus enggau Kaban Kunsil Nengeri (ADUN) Serembu, Miro Simu — RBI
#Beritalban | Ruai Berita Iban
Rinduka | Titihka | Kunsika
