KUCHING, 5 Jun — Pengajar baru ke diengkah di Sarawak ari Semenanjung Malaysia, Sabah enggau Wilayah Persekutuan Labuan dikemendarka tama ke nengeri tu ngena Pas Temuai Sosial enggau enda ibuh ngembuan pasport dulu ungkup tuju ngeripot diri.
Pekara nya dipadahka nengah penerang berita ti dikunsi Opis Pelajar Nengeri (JPN) Sarawak ba laman Facebook rasmi sida.
Nitihka penerang, bala pengajar ti bekaul tau dulu nembuka pengawa ngeripot nya kediri empu sebedau minta pasport.
“Pengajar ke baru diengkah di Sarawak ari Semenanjung enggau Sabah sereta mega WP Labuan ulih terus tama ke Sarawak ngena pas nemuai tetap enggau enda ibuh minta pasport.
“Pasport ulih dipinta pengudah semua dokumen ngeripot diri tembu digaga,” ku penerang nya.
JPN Sarawak mega madahka sesi meri penerang ti mungkur Opis Pelajar Nengeri enggau Suruhanjaya Perkhidmatan Pendidikan (SPP) deka diatur kena 10 Jun tu ba Opis Pelajar Pelilih Menua (PPD) ke bekaul dikena meri penerang silik ngagai bala pengajar ti bekaul.
Kelimpah ari nya, semua pengajar baru dipinta ngeripot ngagai PPD ke udah ditetapka, lalu pemesai PPD deka ngaga kaul enggau sida ngatur pekara bekaul enggau palan enggau proses ngeripot diri.
“Pemesai PPD deka ngaga kaul enggau kita ila,” ku penerang nya.
JPN Sarawak mega ngarapka semua pekara ti bekaul enggau penama enggau endur pengajar baru ke nengeri tu bejalai enggau lanchar sereta dipemuntang. – RBI
