SIMANGGANG, 3 Jun – Tradisyen ngabang beserimbai Gawai terus nyadi pelasar beguna ba pengawa ngintu pesaka asal enggau ngerapitka kaul kaban belayan entara komuniti nengah Program Ngabang Gawai Dayak 2026 diatur ba Rh Suntie, Kampung Sebujok, Ulu Undop, sehari tu tadi.
Program ke diatur Komiti Pemansang enggau Pengelikun Genturung Pendiau (JKKK) Rh Suntie begulai enggau SUPP Pampang Simanggang nya betuaika Sapit Menteri Pemansang Bakat Sarawak ke mega Kaban Kunsil Nengeri (ADUN) Simanggang, Datuk Francis Harden Hollis begulai enggau bini iya, Datin Simba Nalang.
Pengerami nya mega matak penatai mayuh temuai ari rumah panjai ngelingi ti ngambi peluang nyadi pengabang beserimbai enggau pengerami Gawai Dayak 2026.
Ba jaku bejadika pengerami nya, Francis Harden meri besai terima kasih ngagai JKKK Rh Suntie ke udah bebendar ngemeran sereta negika adat enggau budaya komuniti Iban dalam ngatur program nya.
Ku iya, elemen budaya ti dipandangka nengah pengawa ngena pekayan asal enggau mantaika main asal nyadi kelai identiti ti patut ditan sereta diturunka ngagai nembiak rebak baru.
“Aku meri pengaga ati ngagai JKKK Rh Suntie laban udah mujur mantaika penyelai main asal komuniti Iban ba atur pengawa nyambut temuai.Pengawa baka tu beguna dikena nentuka adat pesaka enggau main asal terus ngerembai dalam komuniti,” ku iya.
Nitih ku iya, tradisyen Ngabang Gawai ke udah dikemeran kenyau ari setiap rebak, ukai semina nyadi kelai terima kasih pengudah musin ngetau, tang mega beguna nyadi medium dikena ngerapitka kaul diri sebilik, penyerakup enggau semengat begulai entara komuniti bemacham renggat.
Ba atur pengawa nya, temuai mega disambut enggau pengawa mandangka Ngajat Ngalu Pengabang iya nya sebengkah main asal komuniti Iban ti dikelala enggau adat ngelaluka penatai temuai dipebasa ngagai rumah panjai.
Kelimpah ari nya, bala temuai bepeluang meda pemanah pekayan asal komuniti Dayak, nyengkaum Ngepan Baju Burung ti nyadi ngepan lelaki Iban, pia mega pekayan asal indu nitihka suku bansa sida empu.
Dulu agi ari nya, sebedau ngulu program Ngabang Gawai, Francis Harden udah nembuka pengawa bejadika Projek Transformasyen Menua Pesisir (RTP) dalam tukuh jematan konkrit ke beungkus RM550,000 meraka Sungai Undop di Kampung Sebujok.
Ba pengerami ke sama, iya bisi nyuaka chek agih belanja Projek Mit Menua Pesisir (MRP) ngagai empat buah JKKK enggau sebuah Biro Indu sepenyampau RM28,000 dikena mantu bejalaika aktiviti enggau program komuniti di kandang menua nya.
Sama bisi nyempulang raban pengabang iya nya Temenggong Leonard Libau Anol, Pemanca Lee Siang Hua, Pemanca Denneil Saweng, Penghulu Mingging Sigan, Penghulu Biju Anggat, Shawn Hollistini, Cr Wong Yii Hong, Cr Jacylin Goh Boon Fay enggau Cr Dilang Jungai.
Program tu ngayanka komitmen komuniti ti terus ngetanka pesaka asal Dayak seraya ngenegapka penyerakup enggau pengelantang ti nyadi pelasar pemansang komuniti menua pesisir di Sarawak. – RBI
#ruaiberitaiban#newsiban#beritaiban
Rindu | Titih | Kunsika
