BATU NIAH, 28 Mei — Dua bengkah gerempung komuniti Iban Zon Niah nerima agih belanja sepenyampau RM55,000 beserimbai enggau Pengerami Mantar Gawai Dayak 2026 ke diatur ba Balai Mensia Mayuh Batu Niah, malam Hari Tiga tu tadi.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom, nyuaka agih belanja sepenyampau RM20,000 ngagai Gerempung Tuai Rumah Ulu Suai (PKKKUS) enggau Komiti Peranak Iban (JKPI) Zon Niah Kemena dikena nyukung pengawa bejalaika aktiviti pemansang komuniti enggau komuniti setempat.
Pengawa ke diatur begulai kededua serakup tu mega nerima bantu tambah sepenyampau RM15,000 ari Menteri Dagang Temuai, Seni enggau Main Asal, Dato Seri Tiong King Sing, ti nyadika penyampau semua bantu ke diagih malam nya manggai RM55,000.
Dalam jaku khas iya nyadi Temuai Dipebasa, Dr.Rundi ke mega Kaban Kunsil Nengeri (ADUN) Kemena nyemetak madahka tetiap belanja perintah ti disalur ngagai komuniti meseti diatur enggau terang, enggau integriti sereta penuh tanggungpengawa.
“Agih belanja tu iya nya duit perintah dikena mantu komuniti bejalaika program enggau aktiviti komuniti.Nya alai tetiap belanja meseti dirikod sereta diatur enggau pengandal sereta disiplin,” ku iya.
Iya mega meri besai terima kasih ngagai Tuai Rumah Bakong enggau Tuai Rumah Ulu Suai laban udah bebendar sereta bebendar ngemujurka pengawa nya, ti mujur ngempuruka lebih 122 mija temuai ti mungkur bala ketuai raban bansa, tuai rumah enggau ketuai raban bansa Iban ari serata kandang menua ngelingi.
Sama bisi datai nyadi Temuai Dipebasa kedua iya nya Residen Miri, Galong anak Luang. — RBI
#Beritalban | Ruai Berita Iban
Rinduka | Titihka | Kunsika
