KUCHING, 28 Mei — Ex-Presiden Parti Bansa Dayak Sarawak (PBDS) Bobby William ngetanka Dr John Brian Anthony enggau nerangka iya siku orang politik ti bepeneleba ti udah lama ngaul diri dalam mayuh macham pelasar politik.
Ku Bobby, Dr John Brian udah lama ngaul diri dalam dunya politik meri peneleba sereta pemereti ati ti dalam senentang rampa politik di Sarawak.
Tandu Bobby, pengawa sekeda parti ngena “cyber troopers” dikena ngemesaika naratif enggau provokasyen bekaul enggau parti dikena nempa saru penemu, enda pechaya sereta penyarut dalam raban PBDS.
Iya madah munyi nya lebuh ngenang pasal serang media rama ngagai PBDS berindik ari penerang ke dipansutka presiden parti Dr John Brian dalam podcast apin lama ke udah.
Nitih ku iya, kaban parti patut anang guai lemi, tuai runding sereta beserakup sereta enda mudah teparuk enggau manipulasyen politik ti enda manah tauka agenda peribadi sekeda parti.
“Ba renggat ke beguna amat tu, parti begunaka penyerakup, penegap, disiplin enggau sukung kolektif, ukai pengawa ngachau ke enda patut ti tau ngelemika pengandal bala kaban enggau penyukung,” ku iya ba sebengkah penerang.
Bobby mega minta kaban parti bebasaka proses demokrasyen sereta meri sukung ngagai ketuai ke diatu dikena nentuka penegap enggau penyerakup dalam parti dijaga.
Ku iya, ketuai PBDS ke diatu dipilih nengah proses demokrasyen nitihka konstitusyen parti enggau prosedur dalam parti ke udah ditetapka.
Dalam pemansang ke bekaul, iya mega ngutuk pengawa ngerembaika jaku viral ba media rama ti ngait nama enggau gambar iya dalam utai ke dikumbai iya nyadi “kimpin publisiti ke jai”.
Nitih ku iya, tulis nya ngayanka pengawa putus pengarap sekeda piak ti dikumbai nguji mai penyarut enggau penyaru dalam parti enggau komuniti Dayak. – RBI
#ruaiberitaiban#newsiban#beritaiban
Rindu | Titih | Kunsika
