BAU, 19 Mei — Raban Penyaga Orang Periman Malaysia (APM) di Pelilih Bau mujur bejalaika operasyen nangkap siku ular semanjai empat meter ba kes ke nyadi ba Jalai Tondong, Kampung Apar Segong, Bau, lemai tu tadi.
Nitihka penerang rasmi ari Unit Kaul Mensia Mayuh enggau Dokumentasi APM Bau, Palan Penyaga Operasyen Pelilih Menua (PKOD) nerima kangau ngenyit ari mensia mayuh bekaul enggau penatai ular nya ti tau mai penusah urung pukul 5.54 lemai.
Berindik ari ripot nya, raban APM Bau terus ngesah ngagai endur nya bejalaika operasyen nangkap ular dikena nentuka pengelikun peranak ke diau ngelingi.
Operasyen nya mujur dipejalaika enggau likun nadai sebarang bakal, seraya ular kobra nya mujur ditangkap sereta dibai raban ke bejalaika pengawa.
Mensia mayuh dilalau anang ngambi atur kediri empu nyema bisi betemu enggau jelu bisa tauka tau mai penusah, tang lengkas minta bantu ngagai piak bekuasa dikena nyeliahka sebarang risiko.
Sebarang penusah ngenyit tau ditanya ngagai APM Bau nengah lumur 082-762925 tauka talipaun penusah ngenyit 999. – RBI
#ruaiberitaiban#newsiban#beritaiban
Rindu | Titih | Kunsika
