PETRA JAYA, 19 Mei — Perintah Sarawak majak chakah agi ngemansangka infrastruktur betanam betupi enggau menua pesisir ti nyadi pengeran ngenegapka ekonomi menua pesisir, nambahka produktiviti betanam betupi sereta ngangkatka pengelantang pendiau rayat menua pesisir.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom madah, sepenyampau RM103.3 juta udah dikemendarka Perintah Sarawak enggau Perintah Besai ba taun 2026 dikena bejalaika lebih 300 projek jalai ladang ti ngaul penyampau penyauh lebih 1,900 kilometer di serata Sarawak.
Nitihku iya, projek nya disadang meri penguntung ngagai lebih 18,000 iku orang bumai.
“Jalai ladang nyadi pemangkin beguna dalam nyambung komuniti bumai menua pesisir ngagai pasar, ngurangka ungkus pengangkut sereta ngurangka pengerugi pengudah ngetau,” ku iya rambau nyimpul jaku iya ba Dewan Kunsil Nengeri (DUN) Sarawak
sehari tu.
Taja pia, iya madahka opis menteri iya agi nerima peminta tinggi ari orang bumai di serata nengeri ti ngaul 841 projek jalai ladang enggau anggar penyampau ungkus sepenyampau RM347 juta.
Berebak enggau nya, Opis Parit enggau Entali Ai (JPS) Sarawak nerima agih belanja sepenyampau RM1 bilion ari baruh mayuh bengkah program pemansang nengeri dikena ngangkatmanah infrastruktur betanam betupi, sistem parit enggau entali ai sereta mega pengawa ngaga tebing ai tebing tasik.
Ku iya, lebih 10,000 iku orang bumai enggau komuniti menua pesisir dipelaba deka bulih pemaik ari pengawa bejalaika projek nya.
Berebak enggau nya, ari baruh Atur Pemansang Malaysia Lumpar Ke-13 (RMK-13), Opis Menteri Pemansang Menua Pesisir enggau Kandang Menua (KKDW) ngemendarka belanja sepenyampau RM1.93 bilion dikena bejalaika 28 projek Program Jalai Menua Pesisir (JALB) enggau Program Jematan Menua Pesisir (JMLB) di Sarawak.
“Projek tu beguna dalam nambahka aksesibiliti, ngenegapka pengelikun pemakai enggau ngangkatka kualiti pengidup komuniti menua pesisir,” ku iya nerang.
Iya mega madahka Program Perumahan Rakyat Sejahtera (PPRS) Fasa 1 ungkup taun 2026 nerima agih belanja sepenyampau RM32.8 juta ti ngaul pengawa ngaga 217 buah rumah baru enggau pengawa ngemanah 721 buah rumah di serata Sarawak.
Kelimpah ari nya, sepenyampau RM33 juta dikemendarka dikena bejalaika Projek Pemansang Ekonomi Genturung Pendiau (PROSPEK) di Lawas, Sebuyau, Betong enggau Samarahan.
Nitihku iya, perintah nengeri bebendar nentuka pemansang menua pesisir dipejalaika enggau lebih sistematik, inklusif sereta meruan dikena nyungkak tikas pengidup rayat. — RBI
#Beritalban | Ruai Berita Iban
Rinduka | Titihka | Kunsika
