Ba bakat, pengelembut bejaku enggau pengalus pekayan asal ti digaya ba atas panggau Kumang, bisi pejalai ti penuh enggau pengeliat ati, pengepuh enggau pengerindu ti dalam ngagai pesaka budaya Iban.
Nya meh cherita peranak asal Bintulu, Praty Sofia Ak Bantin, ke mujur nempa nama lebuh iya dipadu nyadi Kumang Bintulu 2026 ba Pekit Kumang Bagi Menua Bintulu 2026 ke diatur Gerempung Main Asal Dayak Sarawak (SDCA) kena 8 Mei tu tadi.
Pemenang nya ukai semina ngelala pemajik enggau gamal iya ba atas panggau, tang mega kelai pengeran siku indu biak Dayak dalam ngetanka identiti, adat enggau budaya komuniti Iban nyerumba pemansang dunya moden.
Ba Praty Sofia, maya nama iya dipadah nyadi pemenang nya siti peneleba ti tusah deka digambarka ngena leka jaku pengudah dua taun enda enggau sebarang pekit.
“Asai ati aku bechampur. Aku amat gaga, teperansang sereta beterima kasih. Pengudah dua taun ngatika diri, aku ngasaika semua pengawa enggau pengorbanan tu amat berega,” ku iya lebuh dirandau Ruai Berita Iban.
Taja pemujur baka tu, pejalai iya ba dunya pekit budaya kebendar iya bepun ari taun 2019 lebuh iya nyereta Kumang RPJ ari peransang sida sebilik, taja pan maya nya iya agi bedau meretika adat enggau budaya Iban enggau dalam.
Taja pia, nyereta Kumang Gawai PPB NGO Kakus 2019 nyadi ubah besai dalam pengidup iya lebuh iya berengkah ngelala reti ke bendar dunya Kumang, ke ukai semina bepelasarka gamal aja, tang mega bepelasarka reti budaya enggau tanggungpengawa nyadika budaya tradisional.
“Berengkah ari nya, aku belajar ari pelasar lalu berengkah labuh pengerindu ngagai budaya Iban, aku sedarka pengawa nyadi Kumang ukai semina ba atas panggau aja, tang mega mai tanggungpengawa meretika sereta negika budaya,” ku Praty.
Kenyau ari nya, iya udah chakah nyereta mayuh bengkah pekit lalu udah nyapai sekeda penyulut ti ngemegahka ati nyengkaum Penuduk Lumur Dua Kumang PBB NGO Kakus 2019, Penuduk Lumur Dua Miss Grand Sarawak 2020, Penuduk Lumur Dua Kumang Gawai2022, Ratu Sarawak Ngepan Kumang Iban Renggat Negeri Sarawak 2020. Penuduk Lumur 5 Ratu Pesta Tuai 2023, Karnival Kumang Selangau 2023 enggau Lumur 3 Kumang RNI 2024.
Ari semua peneleba tu, nyereta Kumang RNI 2024 nyadi pengingat ke pemadu meri empas ngagai iya.
Nitih ku iya, pengudah nguji nasit ba pekit ke sama ba taun 2022, iya bepekit baru ba taun 2024 enggau pengeransing baru lalu pengujung iya mujur bulih penuduk nyadi ‘3rd Runner-Up’
“Pejalai nya ngajar aku reti pengeliat ati sereta pemesai guna enda mudah putus pengarap. Uji kedua pengujung iya bebuah lebat. Peneleba tu ngingatka aku proses enggau pengawa beguna agi ari asil aja,” ku iya.
Taja pia, pejalai nuju pemujur ukai senang. Praty Sofia ngaku pemar ke pemadu besai ditapi iya nya nyeimbai awak entara latih, komitmen kereja enggau tanggungpengawa diri sebilik.
Bisi maya iya berasai lelak ba tubuh enggau runding nyentukka iya nyau deka putus pengarap.
Taja pia, enggau disiplin sereta ngatur jam enggau manah, iya mujur mutarka penanggul nya.
“Aku nemu pengering indu Iban ukai bepanggai ba pengawa ngereja semua pengawa kediri, tang ba pemerani minta sukung sereta meruan disiplin dalam tetiap pengawa,” ku iya nerang.
Kenu ku Praty Sofia nerang ngagai Ruai Berita Iban, batang penegap ti mantu iya teulihka gelar Kumang Bintulu 2026 iya nya pengeliat ati enggau semengat deka terus belajar sereta ngemanahka diri.
Iya pechaya gelar Kumang ukai datai sekelip mata, tang lebih agi datai ari proses ti panjai ti penuh enggau pengorbanan, peneleba sereta belajar.
Kelimpah ari nya, pengerindu iya ngagai budaya Iban nyadi batang motivasi ti seruran dibai iya ngagai tetiap pekit ke dipasuk iya.
“Aku seruran nguji belajarka adat, jaku enggau pengangkun budaya ari apai indai enggau komuniti aku. Lebuh kitai rinduka budaya diri empu, pengarap ati nya deka semula jadi manchar nengah panggau,” ku iya.
Nyadi siku pesereta ke udah nyereta pekit moden baka Miss Grand Sarawak 2020, Praty Sofia meda kededua pelasar nya ngembuan penyelai kediri empu dalam nempa personaliti siku indu.
Nitih ku iya, pekit moden ngemeratka pengarap diri, komunikasyen enggau isu kemaya hari, lalu pekit Kumang ngemeratka nilai basa, adat enggau identiti budaya.
“Pekit moden ngajar aku berani bejaku, lalu pekit Kumang ngajar aku ngemaruhka diri sereta temegah ati enggau urat budaya aku empu.Kededua pekara tu nambah aku nyadi siku indu peranak Sarawak ti andal sereta ngembuan identiti,” ku iya.
Ba pengeransing iya nyikap diri napi pekit Kumang, iya bulih mayuh penemu ari raban ke lebih teleba nyengkaum diri sebilik enggau orang siku-siku ti seruran ngiring iya sepemanjai latih.
Iya mega nyadika pengawa bekenaka jaku Iban dalam pengidup besehari-sehari nyadi siti ari pengawa dikena nentuka identiti budaya nya terus ditanka raban nembiak rebak baru.
“Nyadi Kumang ukai semina ngena pekayan asal aja, tang kitai patut mereti sereta beratika reti nya laban kitai megai tanggungpengawa nyaga maruah budaya Iban,” ku iya.
Berebak enggau nya, iya nyemetak madahka pemujur ke dijapai sehari tu enda ulih nyadi enti nadai sukung ari diri sebilik, bala bakih enggau komuniti ke seruran bediri ba belakang iya.
Kenu ku iya, diri sebilik nyadi pengering ke pemadu besai, seraya bala bakih mayuh mantu ari sukut jam, pengering enggau pengeransing nyengkaum nyempulang iya belatih nyentuk ke jauh malam sereta mantu ngatur pengawa nyendiaka diri bepekit.
“Ba aku, pejalai Kumang tu ukai pejalai kediri. Pejalai begulai enggau diri sebilik, bala bakih sereta komuniti. Nya ke ngasuh peneleba tu lebih besai reti,” ku iya.
Nyadi tokoh biak Dayak, Praty Sofia mega ngembuan pengingin ke besai deka nyaup ngangkatka main asal Iban ngagai nembiak rebak baru nengah media rama, program komuniti sereta ngaul diri enggau raban nembiak.
Iya pechaya, pengerindu rebak baru ba pesaka main asal baka Ngepan Iban enggau pekit Kumang agi bisi, iya semina patut diterenak enggau chara ti semak agi enggau pemansang kemaya hari.
“Enti ukai kitai ti ngintu sereta ngangkatka budaya kitai, sapa agi?” ku iya enggau penuh pengeransing.
Pengudah pemenang tu, iya bisi ati deka nyingkang ngagai pekit renggat tinggi agi nyengkaum Kumang Sarawak, kelimpah ari deka ngena pelasar ke dikembuan iya terus ngangkatka maruah budaya Iban.
Lebuh nyimpul randau enggau Ruai Berita Iban, Praty Sofia ninggalka jaku pesan ngagai nembiak indu Dayak ngambika enda malu enggau identiti diri sereta berani neruska mimpi diri.
“Belajarka adat, jaku enggau budaya kitai mimit-mimit. Ke beguna kereja enggau ati ti temegah. Enti aku ulih, nuan mega ulih. Pugu kitai nyadi ke tegap kitai, nya alai bediri enggau pengandal,” ku iya seraya tuchum. — RBI
