BETONG, 16 Mei — Nembiak SMK Ulu Layar enggau Pom 4 MRSM Betong nerima pemeri tablet nengah pengerami nyerahka tablet ke diatur nyadika pengeran ngenegapka akses belajar digital ngagai nembiak menua pesisir.
Pemeri nya inisiatif YB Datuk Gerald Rentap Jabu, Kaban Kunsil Nengeri (ADUN) N36 Layar, nengah Komiti Pemansang Pelajar Layar (LEDC), ke seruran bebendar ngenegapka pemansang pelajar ba sitak DUN Layar.
Nitihka penerang LEDC program tu mandangka pengibuh pengari rayat ti seruran dikemeranka dalam nentuka nembiak menua pesisir enda tinggal ari transformasyen pelajar digital, kelebih agi ngena teknologi nyadi medium belajar moden.
Enggau pemeri tablet nya dikearapka ulih mantu nambahka akses ngagai kereban belajar digital sereta nyukung penyulut akademik nembiak setipak enggau guna pelajar kemaya hari tu.
Inisiatif tu mega sebagi ari pengawa ti seruran dipejalaika pengari rayat enggau LEDC dalam ngenegapka pemansang modal mensia enggau ngerapitka seraka digital entara nembiak mengeri enggau menua pesisir di kandang menua Layar. — RBI
#Beritalban | Ruai Berita Iban
Rinduka | Titihka | Kunsika
