KUCHING, 15 Mei – Menteri Kereja Raya, Dato Sri Alexander Nanta Linggi nyemetak madahka pemansang di Bagi Menua Kapit meseti dipeda ari sukut guna rayat nengah chara nentuka tetiap projek tembu nitihka timpuh, penanggul bejalaika pengawa diputarka enggau lengkas lalu penguntung nya amat datai ba komuniti menua nya.
Nitihku iya, pekara tu nyadi batang fokus Aum Komiti Pemansang Bagi Menua (DDC) enggau Komiti Pengatur Pemansang Bagi Menua (JTPB) Kapit ti digulu iya di Kuching, sehari tu.
Aum nya mantaika status diatu senentang pejalai projek pemansang ke benung enggau deka dipejalaika di Bagi Menua Kapit, nyengkaum projek ari baruh Perintah Sarawak enggau Perintah Besai.
Kelimpah ari beratika pejalai projek, aum nya mega nyadi pelasar ngagai semua piak bekunsika penemu, ngatur pengawa sereta ngiga chara mutarka isu ti tau ngeruga pengelanchar bejalaika projek.
Iya pechaya pemansang ti amat meri penguntung ngagai rayat begunaka kerejasama rat entara ejensi ti bejalaika pengawa, opis teknikal, ketuai kandang menua enggau semua raban.
“Tetiap isu patut diputarka begulai lalu tetiap projek meseti ditentuka bejalai enggau lanchar ungkup pengelantang rayat,” ku iya ke mega Kaban Parlimen Kapit.
Sama bisi datai Sapit Menteri ba Opis Menteri Besai Sarawak (Undang-Undang enggau Adat Bumiputera), Datuk Jefferson Jamit Unyat ke mega Kaban Kunsil Nengeri (ADUN) N.63 Bukit Goram, Sapit Menteri Perengka Guna enggau Telekomunikasyen (Telekomunikasyen) Sarawak, Datuk Liwan Lagang sereta mega ADUN N.65 Belaga, Kennedy Chukpai Ugon, ADUN sitak N.66 Murum; Wilson Nyabong Ijang, ADUNN.61 Pelagus sereta mega pengari ejensi ke bekaul.
Iya mega ngarapka semua pengawa pemansang di Kapit terus ditegapka ungkup pengelantang rayat, kelebih agi sida di menua ulu. – RBI
