MIRI, 6 Mei — Bazaar Gawai Dayak enggau Festival Ethnocultural beserimbai enggau Pengerami Gawai Dayak Renggat Sarawak 2026 diatur enggau richah enggau bemacham pengerami main asal sereta pemerindang etnik ti mandangka pengaya pesaka asal rayat nengeri tu.
Entara batang pematak iya nya Pekit Dayung Sangon 2026 ke diatur di Bandar Baru Permyjaya, Miri ke mujur matak penyereta enggau penatai temuai ari mayuh bengkah kandang endur.
Pekit nya meri perais ke besai enggau champion mai pulai perais mata duit RM15,000, ditangkan lumur dua RM12,000, lumur tiga RM10,000 enggau perais sagu ati RM3,000, lalu enggau nya nyungkak agi semangat bepekit ba bala penyereta.
Kelimpah ari nya, program nya mega dirichah enggau pengawa ngatur Malam Bidayuh khas ti mandangka pengawa mandangka main asal enggau pemerindang ari raban Bidayuh Ring Ladies, artis Bidayuh Claudia Geres enggau pemerindang seni asal ari Arthur Borman ti mandangka penyelai pesaka asal etnik Bidayuh.
Pengawa ngatur pengerami tu ukai semina nyadika pelasar dikena ngelakuka seni enggau main asal etnik Sarawak, tang mega ngenegapka semengat beserakup, pengelantang enggau begulai entara komuniti pupu bansa.
Mensia mayuh diperansang terus datai dikena ngerichahka agi pengerami sereta belematika pemanah adat enggau main asal ke nyadi kelai sereta temegah nengeri Sarawak. -RBI
