BINTULU, 5 Mei — Sepenyampau 1,681 iku penerima di Bagi Menua Bintulu nerima bantu nengah Program Sejambak Kasih Hari Gawai 2026 ti mandangka komitmen perintah terus ngenegapka pengelantang pendiau rayat.
Kaban Kunsil Nengeri (ADUN) Samalaju, YB Datuk Majang Renggi madah, program ke diatur Opis Pengintu Pengelantang Raban Bansa Bagi Menua Bintulu ngemeratka raban B40, orang tuai enggau individu ke begunaka bantu, setipak enggau agenda pemansang inklusif sereta beratka rayat.
Nitihku iya, ba atur pengawa nya, sepenyampau 100 iku penerima nerima pemeri khas dalam tukuh mata duit tambah RM100 enggau hamper ke dipelanja Petronas.
“Sepenyampau 1,681 iku penerima di Bagi Menua Bintulu deka nerima bantu tu enggau penyampau agih belanja sepenyampau RM161,100,” ku iya lebuh bejadika pengawa nya sehari tu.
Iya mega madahka ungkup bulan April 2026 aja, sepenyampau 2,843 penerima bantu ninting bulan dirikod enggau penyampau agih belanja RM1.24 juta.
Berebak enggau nya, ungkup timpuh Januari ngagai April 2026, penyampau semua bantu ke diagih manggai RM5.0 juta.
Ku iya nambah, pengawa tu ngayanka pengeran perintah dalam nentuka nadai raban tinggal, kelimpah ari ngenegapka pengelantang pendiau rayat dalam napi pemar ungkus pengidup ke diatu.
Berebak enggau nya, iya ngenataika pengaga ati ngagai Petronas ti seruran meri sukung nyadi kaban strategik dalam mayuh bengkah inisiatif pengelantang pendiau enggau pemansang komuniti.
Sebedau pengerami Hari Gawai, iya minta bala komuniti terus nerenakka semangat begulai, besaup enggau seruran ngemeratka pengelikun.
“Selamat Hari Gawai, Gayu Guru Gerai Nyamai,” ku iya. — RBI
