PAKAN, 5 Mei — Gerempung Apai Indai enggau Pengajar (PIBG) Sekula Kebangsaan Nanga Pakan deka ngatur Pengerami Makai Lemai Gawai Mood Gawai 2026 nyadi pelasar ngerapitka kaul entara kaban sekula, apai indai enggau komuniti menua nya.
Pengerami ke diatur ba Balai Mensia Mayuh Pakan berengkah pukul 6.00 lemai nya disadang dipenyadika Tan Sri William Mawan Ikom ke mega Penyanding Penemu Opis Menteri Besai Sarawak (Industri Pemakai, Komoditi enggau Pemansang Kandang Menua).
Pengerami nya mega dirichah enggau bemacham aktiviti ti ngerinduka ati bepelasarka budaya Gawai, nyengkaum chabut tikit benasit, pekit “Raja & Ratu Malam” enggau pengawa pemerindang belagu “Suara Emas” ti meri awak ngagai temuai mantaika penau seni sida.
Kelimpah ari nya, pengawa pemerindang ti mandangka lagu bepelasarka Gawai enggau budaya menua tu deka mujur nambahka pengerichah pengerami nya.
Bala temuai mega diperansang ngena pekayan asal ti sedang setipak enggau atur pengawa nya, lalu enggau nya ngayanka penyelai identiti budaya komuniti setempat.
Pengawa ngatur pengerami tu ukai semina nyadi pelasar pemerindang aja, tang mega nyadi medium dikena ngenegapka penyerakup, nerenakka asai begulai sereta angkunka penyelai budaya dalam komuniti.
PIBG Sekula Primari (SK) Nanga Pakan ngarapka program baka tu terus nyadi pengerami ninting taun ke ulih ngerichahka pengerami Gawai dalam gaya ke lantang sereta rami. -RBI
#ruaiberitaiban#newsiban#beritaiban
Rindu | Titih | Kunsika
