SIBU, 04 Mei — Loji Meresi Ai Nibong Tada ti ngena teknologi sistem akut diatu udah tembu penuh sereta beoperasyen tumu ari timpuh ti udah ditetap, lalu enggau nya ulih ngenegapka sistem bekal ai ba kandang menua Nibong Tada enggau ngelingi nya.
Nitihka penerang ari Menteri Perengka Guna enggau Telekomunikasyen Sarawak, Dato Sri Julaihi Narawi, loji nya dikemansang ngena ungkus RM12.0 juta nengah agih belanja ari Perintah Sarawak lalu nyengkaum perengka guna proses ai enggau kapasiti 4 juta liter sehari (4 MLD).
“Projek tu mega mungkur pengawa ngaga sistem pam, jeti enggau intake ti ngambi ai mentah ari Sungai Rajang, kelimpah ari ngaga tangki tikas tinggi enggau kapasiti 3.5 juta liter (3.5 ML),” ku iya nengah siti penerang sehari tu.
Ku iya, pengawa bejalaika projek nya ngembuan tuju deka ngemanah sereta ngenegapka sistem bekal ai ke bisi diatu, seraya nentuka peranak ba kandang endur ke kena bungkur ngasaika bekal ai ke meruan sereta bekualiti agi.
“Enggau penembu loji tu, kapasiti ngasilka ai ulih ditambah, lalu enggau nya ulih nyukung guna ke diatu enggau pemansang jemah ila ba kandang endur tu,” ku iya nerang.
Berebak enggau nya, iya mega ngenataika pengaga ati ngagai semua piak ke bisi kaul ngemujurka projek nya, mujur nembuka iya dulu ari timpuh ke udah ditetapka. — RBI
#Beritalban | Ruai Berita Iban
Rinduka | Titihka | Kunsika
