SIMUNJAN, 28 April — Indu Opis Polis (IPD) Pelilih Simunjan udah bejalaika pengawa nemuai kemari ngenataika penyinu ati di Kampung Sungai Kakus, Ensika Sebangan ti nyadika kelai pengibuh enggau sukung moral terus ngagai raban tim enggau sida sebilik.
Penemuai nya betuaika Insp. Maxwell Richard Churt nyadi pengari Ketuai Polis Pelilih Simunjan ngabas ruang bilik ASP Mary Ong ari Bagi Mansik Penyalah Dadah (BSJD), IPD Miri berindik ari pemidang entua iya, niang Jayan anak Gaong.
Nitihka penerang ari Polis Simunjan, penemuai tu ngembuan tuju deka ngenataika penyinu ati ngagai ruang bilik ke bisi kaul kelimpah ari meri sukung moral dalam napi maya penusah ati tu.
“Inisiatif tu ngayanka opis tu seruran beratka pengelantang kaban kelimpah ari ngenegapka kaul pangan diri enggau semengat diri sebilik entara Polis DiRaja Malaysia (PDRM),” ku penerang nya.
Penemuai pengelantang pendiau baka tu mega ngayanka nilai solidariti enggau begulai dalam organisasyen, setipak enggau pengawa PDRM ti enda ngetu nentuka pengelantang enggau pengibuh kaban iya seruran dijaga. — RBI
