SAMARAHAN, 23 April — Program Kelas Main Asal Ngajat ke diatur Gerempung Main Asal Dayak Sarawak (PEMADAS) begulai enggau Dayak Bukit Kelingkang (DBK) Pampang Melikin ke diatur ba Dewan Taman Samarindah diatu nyau deka tembu pengudah ngerikod penyereta ti meransang ari mayuh bengkah renggat komuniti.
Program tu dipejalaika nyadi inisiatif ti enda ngetu dalam pengawa ngetan sereta negika pesaka asal seni main asal komuniti Dayak, kelimpah ari nyendiaka pelasar belajar ti sistematik sereta betukuh, kelebih agi ungkup rebak baru enggau mensia mayuh ti rindu deka belajar pasal seni main asal.
Sepemanjai pengawa ngatur pengawa nya, bala pesereta dipandangka enggau sekeda bansa main Ngajat, nyengkaum Ngajat Asas ungkup lelaki enggau indu, Ngajat Pua Kumbu, Ngajat Atas Pinggai, Ngajat Orang Ulu, Kuntau, Betaboh enggau Ngajat Terabai, tiap bengkah nya ngembuan rega enggau simbolik kediri empu dalam budaya Dayak.
Nitihku pengajar, Korea Musit, pengawa ngatur kelas nya ukai semina betuju ngadaka orang ke landik ngajat aja, tang mega meri tuju dikena ngenegapka identiti enggau semengat begulai dalam komuniti.
“Ngajat nyadi kelai pesaka asal ke penuh enggau reti, ukai semina ajat tang mega nyadi kelai penegap enggau pemanah budaya Dayak ke meseti terus ditanka,” ku iya lebuh di Randau Ruai Berita Iban.
Latih kepenudi diatur ba endur ke sama malam tu dikena nyendiaka diri ngatur Pengawa Makai Lemai enggau nutup rasmi siri kelas ti diperambu deka diatur kena Hari Enam tu.
Semua iya, program tu narit 216 iku pesereta, lalu enggau nya ngayanka pengerindu ke tinggi ba pengawa ngetanka seni enggau budaya asal ba komuniti lokal.
Berindik enggau nya, piak pengatur nesau mensia mayuh anang muai awak nyereta sesi baru ti deka datai, nyadi penerus pengawa ngenegap sereta ngetanka pesaka seni enggau budaya Dayak nengah pengawa belajar bestruktur main Ngajat. — RBI
