SARATOK, 26 Mac — Sepenyampau 280 iku penerima ari 105 buah rumah panjai nerima Surat Pala Tanah ari baruh Seksyen 18 Kanun Tanah Sarawak ba Pengerami Nyuaka Pala Tanah ungkup Kandang Pemansang SALCRA ba Wilayah Saratok ke diatur ba Dewan Serbaguna Ladang Kelapa Sawit Roban Selatan.
Pengerami nya dipenyadika Menteri Industri Pemakai, Komoditi enggau Pemansang Kandang Menua Sarawak YB Dato Sri Dr Stephen Rundi Utom, ke mega Chairman SALCRA.
Sama bisi diatur beserimbai enggau pengerami nya pengawa ngelancharka logo Pengerami Ulang Taun Ke-50 SALCRA, nyadi kelai pemujur ejensi nya dalam timpuh lima dekad meri kuasa ngagai pemansang tanah enggau ngangkatka tikas sosio-ekonomi komuniti menua pesisir kenyau ditumbuh kena 1 Mei 1976.
Dalam jaku dipansutka iya, Dato Sri Dr Stephen Rundi madahka pengawa nyerahka pala tanah nyadi bukti komitmen perintah ti terus ngenegapka pengawa ngaku hak ngempu tanah, kelebih agi ngaul tanah Hak Adat Bansa Asal (NCR).
“Pengawa nyerahka tanah tu meri kelala undang-undang ngagai pengempu tanah lalu nyadi penyungkak ngagai pemansang sosioekonomi menua pesisir ti lebih bestruktur sereta meruan,” ku iya.
Ku iya nerang, pengawa bejalaika pengawa nyukat tanah NCR seriris enggau Seksyen 19(1) B ari baruh Ordinan SALCRA, lalu pengawa ngeluarka pala tanah digaga ari baruh Seksyen 18 Kanun Tanah Sarawak pengudah nengah proses ngentas enggau dokumentasyen ke penuh.
Nitih ku iya, pengawa ngenyampatka proses nyukat tanah ditegapka nengah kerejasama entara SALCRA enggau Opis Tanah enggau Survei Sarawak (JTS) nyengkaum numbuhka Raban Penyukat ‘dalaman’ ba taun 2020 dikena nambahka penyikar ngelala enggau ngentaska tanah NCR.
Ungkup pengerami tu, sepenyampau 373 lot tanah ti ngaul 345 iku pengempu ti berejista dikelala enggau pemesai 626 hektar, ti mungkur kandang menua Rimbas, Saratok, Saribas, Roban enggau ke ngelingi.
Entara batang penguntung ari pengawa nyerahka pala tanah tu nyengkaum ngaku nengah chara undang-undang hak ngempu tanah NCR, ngurangka penyarut bekaul enggau tanah, nambahka pemansang sosioekonomi menua pesisir sereta ngenegapka kerejasama entara ejensi perintah.
Kelimpah ari nya, penatai ketuai raban bansa, tuai rumah, kaban Komiti Pemansang Ladang SALCRA enggau pesereta ngerichahka pengerami nya, ti mandangka komitmen perintah terus meransang pemansang menua pesisir.
Lebuh nyimpul jaku iya, Dr Stephen Rundi minta bala komuniti berani ngaga ubah sereta ngerebut peluang ngangkatka tikas pengidup diri nengah chara ngulihka penemu enggau peneleba ari sida ke udah mujur.
Sama bisi datai Sapit Menteri Industri Pemakai, Komoditi enggau Pemansang Kandang Menua Sarawak, Datuk Martin Ben, Penyanding Penemu di Opis Premier Sarawak (Industri Pemakai, Komoditi enggau Pemansang Kandang Menua) Tan Sri William Mawan Ikom ke mega ADUN Pakan, Kaban Parlimen Betong Dato Dr. Richard Rapu, ADUN Kabong Dato Mohd Chee bin Kadir, ADUN Krian Friday Belik, ADUN Kalaka Tuan Haji Mohamad bin Duri, Pengurus Besai SALCRA Datu Joseph Blandoi, Direktor Opis Betanam Betupi Sarawak Dominic Chunggat, Kaban Dewan Negara Senator Pele Peter Tinggom, Superintendent Morris Nayub Penguasa JTS Bagi Menua Betong, Ketuai-Ketuai Ejensi Perintah, Ketuai Raban Bansa sereta Penerima Pala Tanah Seksyen 18. – RBI
