SELANGAU, 15 Mac — Infrastruktur enggau pemansang ekonomi rayat nyadi batang fokus ba Dewan Undangan Negeri (DUN) N.59 Tamin, pia ku Kaban Kunsil Nengeri (ADUN), Tamin YB Christopher Gira Sambang.
Iya nesau rayat ngambika terus nyukung ketuai ke bisi diatu dikena nentuka agenda pemansang enggau pengelantang pendiau komuniti ulih diteruska enggau nadai penangul.
Iya madah munyi nya lebuh bejaku ba Pengerami Bejadika Kampung Sekeladan ba Rumah Umbu Anak Lang, Sungai Buloh, Selangau kemari.
Kenyau diberi mandat, bemacham pemansang asas udah dipejalaika nyengkaum perengka guna bekal kuasa karan ke diatu nyau deka manggai 95 peratus bungkur.
Beberapa projek besai mega udah dipejalaika dikena ngenegapka perengkaguna mensia mayuh enggau ekonomi menua tu, nyengkaum agih belanja RM38 juta ungkup projek Opis Pelajar, pemansang Palan Pemakai Selangau ke beungkus RM15 juta, pia mega projek jalai by-pass Selangau ke beungkus RM3 juta.
Ba pengawa ke sama, iya mega mantaika pengawa ngelancharka ‘Sumbangan Keperluan Asas Sarawak’ (SKAS) nengah aplikasyen SPay Global dikena ngelempungka ungkus pengidup rayat, kelimpah ari mantaika pangku pengawa Ejensi Pemansang Mid Rejang (MiRRDA) dalam ngenyampatka pemansang enggau pengawa bejalaika 15 projek jalai berenggat.
MiRRDA mega ngemeratka pemansang ekonomi rayat nengah agih belanja RM300 juta ungkup kebun sawit, RM10 juta ungkup jelu tupi, RM10 juta ungkup program nanam kupi, kelimpah ari tambah RM4.8 juta ari Perintah Sarawak.
YB Christopher mega ngenataika pengaga ati iya ngagai Opis Tanah enggau Survei Sarawak ti udah bebendar meri pala tanah nengah Seksyen 18 di Ili Oya enggau Ulu Oya, lalu ngarapka mayuh agi kandang menua dalam DUN Tamin deka diberi pala tanah, nyengkaum kandang menua Lemai.
Kelimpah ari pemansang infrastruktur, pengawa bejalaika Program MyLesen iya nya kerejasama entara Opis Perengka Pengangkut Jalai Malaysia (JPJ), Palan Servis DUN Tamin enggau Institut Memandu Ngu Chung Beng mantu raban nembiak ngulihka lisin mutosikal kelas B2.
Ngelansa pasal Pengawa Bepilih Nengeri Sarawak ke disadang taun tu, iya minta rayat terus meri sukung penuh ngagai iya enggau Gabungan Parti Sarawak (GPS) dikena nentuka agenda pemansang nengeri tu terus dipejalai.
Berebak enggau pengerami nya, pengawa mantaika agih belanja Projek Mit Menua Pesisir (MRP) penyampau RM24,000 ngagai Rumah Umbu Anak Lang dikena nyukung aktiviti enggau pemansang genturung pendiau rumah panjai nya.
Sama bisi nyempulang Kaban Senator Negara YB Senator Rita Sarimah Patrick Insol, Pemesai Pelilih Menua Selangau, Yalin Anak Assan, Ketua Raban Bansa sereta mega peranak menua nya. — RBI
