ASAJAYA, 18 Feb — Operasyen ngiga enggau nyelamat (SAR) siku lelaki ke dipelabaka diserang baya ba baruh Jematan Sungai Buloh, Sadong Jaya diteruska sehari tu enggau pengawa ngaul mayuh bengkah ejensi penyelamat enggau komuniti besemak.

Nitihka penerang ari Opis Pengerara Api enggau Penyah Penusah (JBPM) Sarawak, mansa dikelala enggau nama Mohd Faizal bin Abdilah, 30, diripotka lenyau maya berikan ba tebing sungai begulai enggau bakih iya.

Bala saksi ngeripotka mansa tama ke dalam ai enggau penalam paras punggung sebedau iya dipelabaka diserang jelu reptilia nya. Naka ke sehari tu mansa bedau ditemu.

Hari kedua operasyen berengkah pukul 9.30 pagi enggau ngena teknik ngiga atas ai ti ngaul radius ngiga lapan kilometer ari palan penusah nyadi.

Penyauh entara Palan Nagang Bomba (PKB) enggau palan penusah nyadi dipelabaka urung 20 kilometer.

Operasyen bersepadu nya mega digulu raban Polis Diraja Malaysia, Angkatan Pertahanan Awam Malaysia, Sarawak Forestry Corporation, volunteer RELA enggau peranak genturung tu.

Sepenyampau lapan iku raban bomba udah dianjung ngagai endur nya enggau bantu sebuah perengka pengangkut utiliti enggau sebuah bot aluminium dikena ngemudahka operasyen ngiga ba sepemanjai sungai nya.

Piak bekuasa madahka operasyen nya deka diteruska nyentukka mansa ditemu, seraya ngelalau mensia mayuh ngambika seruran bejejaga sereta nyeliahka aktiviti ti berisiko ba kandang sungai ti dikelala nyadi palan endur baya diau. — RBI

#RuaiBeritaiban#Newslban

#Beritalban | Ruai Berita Iban

#Rinduka | #Titihka | #Kunsika

Sumber, photo — BBP Asajaya

LIMBANG, 18 Feb — Siku sekuriti bebadi nyawa pengudah entukar ke ditepan iya lenyau ‘kawalan’ sereta tepawah ba penusah eksiden kediri ba Jalai Kampung Bakol, lemai kemari.

Ba penusah ke nyadi urung pukul 6.02 lemai nya, mansa ke beumur 24 taun ari Kampung Lubuk Tuan dipechayaka benung dalam pejalai deka ngepunka syif iya ba endur iya gawa.

Ketuai Polis Pelilih Limbang, Superintenden Parum Niot madah, asil pansik tumu tetemuka mansa ke deriba ari mengeri Limbang nuju ngagai Medamit dipelabaka lenyau ‘kawalan’ lebuh datai ba palan penusah nyadi.

“Entukar ke dideriba mansa tegelinchir ke sepiak kanan jalai lalu ngelantak paip besai sebedau tepawah ngagai semak ke besemak,” ku iya ba sebengkah penerang malam tu tadi.

Empas ti balat ketegal belantak nya ngujungka mansa balat bakal ba mua enggau pala.

Pemesai perubat ke datai ba palan penusah nyadi ngentaska mansa midang ba palan penusah nyadi.

Tubuh mansa udah dibai ngagai sepital ke besemak ngambika atur silik enggau pengawa buntas tasat dipejalaika.

Diatu kes nya benung dipansik ari baruh Seksyen 41(1) Akta Pengangkutan Jalan 1987.

Polis mega ngelalau penguna jalai alun ngambika seruran bejejaga sereta nentuka gaya perengka pengangkut sida enggau diri empu dalam gaya ke pemadu manah sebedau berengkah bejalai, kelebih agi maya jam mensia mayuh. — RBI

#RuaiBeritaiban#Newslban

#Beritalban | Ruai Berita Iban

#Rinduka | #Titihka | #Kunsika

Sumber, photo — IKBM

KANOWIT, 18 Feb — Atur jampat raban Opis Bomba enggau Penyah Penusah Malaysia (JBPM) mujur nagang penusah angus ti nuntung sebuah rumah peribit di Nanga Bawan, malam kemari (17 Februari).

Palan Operasyen nerima kangau ngenyit urung pukul 8.21 malam sebedau jentera ari Balai Bomba enggau Penyah Penusah Kanowit dianjung ngagai endur nya.

Tim nya datai urung pukul 9.08 malam pengudah bejalai urung 45 kilometer.

Nitihka penerang ari Komander Operasyen, penusah angus nya mungkur beranda belakang sebuah rumah tetap ke ngembuan pemesai 60 kaki x 40 kaki.

Taja pia, api mujur dijaga tumu agi ulih mensia mayuh sebedau penatai raban bomba.

Operasyen ngerara api nya dipejalaika ngena ‘hose reel’ enggau ai ari tangki jentera nyentukka api nya padam abis.

Penusah angus nya dipelabaka ngerusak urung 15 peratus struktur begunan lalu nadai ngaul sebarang bakal tauka bebadi nyawa.

Operasyen nya betuaika Pemesai Kanan Bomba, PPgB Rashid bin Songli begulai enggau tujuh iku kaban enggau dua jentera.

Sama bisi mantu ba endur nya iya nya empat iku pemesai polis enggau tiga iku pemesai ari SESCO dikena nentuka gaya likun.

Pengudah pengawa meresa pengelikun tembu, operasyen diketuka urung pukul 9.42 malam lalu semua kaban mulaika diri ngagai stesyen nya.

Penusah tu mandangka tikas penyikap raban penyelamat di Sarawak dalam nentuka pengelikun mensia mayuh seruran dijamin. —RBI

#RuaiBeritaiban#Newslban

#Beritalban | Ruai Berita Iban

#Rinduka | #Titihka | #Kunsika

Sumber, photo — BBP Kanowit

MIRI, 18 Feb — Pengawa jampat siku pengaji ngaga ripot polis bekaul enggau insiden enchuri ba palan pengentap pendiau iya ngujungka siku indu peranak Indonesia ke beumur 36 taun dipelabaka ngelarika diri mai barang berega pengaji iya ditangkap.

Penusah tu diripot nyadi urung pukul 5.30 lemai ensanus ba sebuah rumah ba Jalai Kampung Luak 3 ditu.

Penusah nya ngujungka pengerugi dipelabaka RM10,000 ti ngaul sekeda barang berega.

Saspek udah ditangkap lalu diatu diriman pengelama tiga hari dikena mantu pengawa mansik silik agi.

Kes tu dipansik ari baruh Seksyen 381 Kanun Keseksaan ti netapka ukum jil nyentuk tujuh taun enggau ukum mata duit nyema ditemu salah. — RBI

#RuaiBeritaiban#Newslban

#Beritalban | Ruai Berita Iban

#Rinduka | #Titihka | #Kunsika

Sumber, photo — Polis Pelilih Miri

BINTULU, 18 Feb — Program Beripai Perdana 2026 Pelilih Sebauh mujur dipejalaika enggau penyereta mayuh bengkah ejensi perintah, gerempung ukai dikuasa perintah (NGO), ketuai komuniti enggau peranak menua nya dalam pengawa ngenegapka semengat begulai enggau komuniti.

Program ke diatur kena 7 Februari tu tadi udah dipenyadi Menteri Industri Pemakai, Komoditi enggau Pemansang Kandang Menua Sarawak YB Dato Sri Dr. Stephen Rundi Anak Utom, ke mega Kaban Kunsil Nengeri (ADUN) sitak N.69 Kemena.

Pengawa ngatur program tu diatur berindik ari ampuh bah besai ke nuntung pelilih menua nya bulan Januari tu tadi, lalu enggau nya nyadi inisiatif ngangkatka rampa menua ti begempung.

Sama bisi datai pemesai ari Opis Nembiak enggau Lumba Bagi Menua Bintulu betuaika Pemesai Nembiak enggau Lumba, Kigen Anak Satong begulai enggau 10 iku volunteer nembiak ari Universiti Putra Malaysia Sarawak ti meri tenaga sida dalam bejalaika aktiviti servis komuniti.

Entara batang aktiviti ke dipejalaika nyengkaum meresi palan mensia mayuh, parit, palan endur bemain enggau kereja nyeruri perengka guna komuniti.

Program tu ukai semina mantu mulaika kandang endur ke kena penusah, tang mega ngangkatka penyedar mensia mayuh pasal pemesai guna nyaga pemeresi enggau rampa menua enggau chara ti meruan.

Inisiatif tu seriris enggau pengawa PBT dalam nempa rampa menua ti beresi, likun sereta kondusif ungkup pengelantang peranak.

Pengawa ngaul diri enggau chakah ari semua piak ngayanka komitmen bekunsi dikena nyapai agenda pemansang komuniti ti meruan sereta inklusif.

Dikearapka pengawa ngatur program ke bansa tu ulih dipajakka jemah ila nyadi pelasar dikena ngerapitka kaul entara ejensi enggau komuniti, kelimpah ari nerenakka rega tanggungpengawa bekunsi dalam nyaga pemeresi enggau pengelantang rampa menua. — RBI

#RuaiBeritaiban#Newslban

#Beritalban | Ruai Berita Iban

#Rinduka | #Titihka | #Kunsika

Sumber, photo — Jabatan Belia dan Sukan Negeri Sarawak – Rasmi