PAKAN, 19 Feb – Chairman Kaunsil Industri Kayu Ramu Malaysia (MTIB) ke mega Kaban Parlimen Julau, Datuk Larry Sng Wei Shien udah nyuaka bantu belanja sepenyampau RM34,500 ngagai 69 iku nembiak nengah Wang Turu Pelajar Larry Sng (LSEF) ba sebengkah pengerami ditu, kemari.

Ari penyampau nya, 43 iku penerima iya nya nembiak renggat degree, 25 iku nampung pelajar diploma lalu siku agi nampung pelajar ba renggat master.

Bejaku ba pengerami nya, iya ngarapka bantu nya ulih ngelempungka tating belanja bala nembiak sereta nyadi pengeransing ngagai sida terus nyulut dalam pelajar, lalu ari nya ulih ngangkatka nama Julau, enggau Sarawak ungkup selampur.

Datuk Larry mega nyemetak madahka pemesai guna nampung pelajar ba universiti ke diempu Sarawak, kelebih agi dalam bidang Sains, Teknologi, Injinir enggau Matematik (STEM).

Ku iya, diatu perintah Sarawak nyendiaka bemacham perengka guna enggau insentif nyengkaum peluang belajar enda bebayar ungkup peranak Sarawak ti ngambi kus STEM ba palan pelajar tinggi ke diempu nengeri tu.

Nitihku iya, milih belajar di Sarawak ukai semina meri pengelebih ari sukut insentif, tang mega lebih lantang laban semak enggau diri sebilik sereta ngelimat ungkus pejalai, kelebih agi maya musin pengerami.

“Bala nembiak enggau apai indai patut berunding enggau dalam sebedau ngaga pemutus.Mayuh penguntung ulih diasaika enti kitai nyukung sereta ngena palan pelajar di nengeri kitai empu,” ku iya.

Program nya mandangka komitmen iya ti seruran ngenegapka pelajar nembiak di kandang menua Julau enggau kandang ngelingi nya. -RBI

#ruaiberitaiban#newsiban#beritaiban

Rindu | Titih | Kunsika

PAKAN, 18 Feb — Kaban Parlimen Kapit, YB Dato Sri Alexander Nanta Linggi, bejadika Pengerami Mankung Tiang Rumah Sara ba Nanga Dendang, Ulu Wak, Pakan, kelai terima kasih ngagai komuniti Iban sereta pemungkal pengidup ti lantang agi ba palan pengentap pendiau rumah panjai baru nya.

Pengerami nya mega digulu sekeda ketuai enggau orang ti dipebasa nyengkaum ADUN Katibas YB Lidam Assan, ADUN Baleh YB Nicholas Kudi enggau Sekretari Politik Menteri Kereja Raya Alvin Runggah Jimbun.

Dalam jaku dipansutka iya, Nanta ngenataika pengaga ati ngagai peranak Rumah Sara ti udah mujur nembuka rumah panjai baru ti bisi 31 pintu, bilik, penuh enggau perengka guna pemun nyengkaum kuasa karan, ai beresi enggau jalai semin nuju mua rumah.

Nitih ku iya, pemujur nya mandangka penyulut ti enda ngetu ba pemansang infrastruktur menua pesisir asil ari pengawa begempung perintah enggau komuniti.

Iya mega meri pengaga ati ngagai Sagu Anak Unting ke udah dipadu nyadi Direktor Wilayah URDA, seraya ngarapka palan pengentap pendiau baru nya seruran diisi enggau pemaik sereta pengelantang.

Berebak enggau nya, iya ngemeratka pemesai guna komuniti menilai guna ba jeman teknologi moden enggau pemintar tiru ngambika enda mudah tepejuh enggau berita ti enda dientaska ti tau ngeruga penyerakup.

Iya mega meri pengaga ati ngagai iring Premier Menua Sarawak Datuk Patinggi Tan Sri (Dr) Abang Haji Abdul Rahman Zohari

Bin Tun Datuk Abang Haji Openg, ti kenyau ari taun 2017 udah meri kelala bemacham inisiatif nyengkaum numbuhka ejensi pemansang kandang menua baka MIRDA dikena ngenyampatka pemansang menua pesisir.

Agih belanja sepenyampau RM1.5 bilion ngagai ejensi ke bekaul ku iya, nyata ngayanka komitmen perintah ba pengawa ngangkatka sosioekonomi rayat nyengkaum ba kandang menua Kapit.

Iya nyemetak madahka politik patut nyadi pelasar pemansang, ukai penyarut, lalu nesau semua piak enda ngira parti nyengkaum Gempung Parti Sarawak (GPS) terus bekerejasama ngetanka hak Sarawak sereta meransang pemansang nengeri ungkup pengelantang rayat. -RBI

#ruaiberitaiban#newsiban#beritaiban

Rindu | Titih | Kunsika

SPAOH, 18 Feb — Penatai Sapit Premier Sarawak, YB Datuk Amar Douglas Uggah Embas begulai enggau bini iya, Datin Amar Dato Doreen Mayang ngerichahka pengerami Taun Baru China ke diatur komuniti Cina di Spaoh sehari tu, lalu enggau nya mandangka semengat penyerakup enggau pengelantang komuniti pupu bansa ba Sarawak.

Penemuai nya mega disempulang Kaban Parlimen Betong, YB Dato Dr. Richard Rapu, enggau Sekretari Politik gagai Premier Sarawak, Roseline Mapong Sabai, ke sama bela ngerichah pengerami enggau pemanah ati.

Sepemanjai penemuai nya, Uggah bepeluang begulai enggau komuniti, ngenataika jaku pengerami sereta nanya pasal bekaul pemansang kemaya hari ba genturung pendiau nya.

Penatai iya dipeda nyadi kelai pengibuh ketuai nengeri ngagai rayat ti bemacham penatai asal, setipak enggau aspirasyen deka ngenegapka penyerakup enggau pengelantang rama. — RBI

#RuaiBeritaiban#Newslban

#Beritalban | Ruai Berita Iban

#Rinduka | #Titihka | #Kunsika

KUCHING, 18 Feb – AirBorneo minta ampun ngagai pesinjir berindik ari pengilap nganjung email notifikasyen bekaul enggau atur baru penerebai bilun sereta pengelaun penerebai bilun ti ditemu enda tembu.

Dalam penerang rasmi, kompeni penerebai bilun nya nerangka email nya dianjung enggau jaku ke beguna ke enda tembu, lalu enggau nya bisi potensial ngasuh penerima saru penemu.

Nitihka penerang nya, pekara nya pengilap teknikal ti enda sengaja lalu kompeni nya minta ampun enggau sebarang salah penemu ti tau nyadi ketegal penusah nya.

“Kami minta ampun ketegal pengilap tu sereta semua penyaru penemu ke nyadi.Kami beterima kasih ngagai penyabar enggau pemereti ati bala pesinjir,” ku penerang nya.

AirBorneo mega madahka atur ngemanahka ‘dalaman’ udah dipejalaika nyengkaum neritka agi proses meresa isi sebedau sebarang komunikasyen rasmi dianjung ngagai pengguna.

Kompeni nya ngemeratka komitmen sida ti seruran nentuka pengawa ngenataika penerang ti betul, sereta terang dikena ngetanka pengarap pesinjir ngagai servis sida. -RBI

#ruaiberitaiban#newsiban#beritaiban

Rindu | Titih | Kunsika

MIRI, 18 Feb – Sebengkah kes nyadi di Bandar Baru Permyjaya kemari lebuh siku lelaki peranak menua nya beumur 53 taun ditan polis pengudah enchuri ari sebuah kedai runchit di Jalai Dato Permaisuri.

Nitihka penerang ari Bagi Tasat Jenayah (BSJ) IPD Miri, saspek ditan berindik ari pansik ke silik, lalu polis mujur ngerampas sekeda barang enggi orang ke ngaga kompelin ari saspek.

Penusah nya nyadi kena 17 Februari 2026 urung pukul 1.30 lemai, ngujungka orang ke ngaga sebana nya lenyau kerepai ke ngundan dokumen diri enggau duit tunai ke berega RM350.

Mensia mayuh ba endur nya mega tekenyit meda polis mai saspek jauh ari palan nya, lalu mayuh muji pengawa piak bekuasa ti jampat bejalaika pengawa nya.

Saspek diatu ditan riman pengelama tiga hari ngambika dipansik silik agi. Kes tu dipansik nengah Seksyen 380 Kanun Keseksaan ti nyendiaka ukum jil nyentuk sepuluh taun enggau ukum mata duit. -RBI

Penatai Polis Daerah Miri

#ruaiberitaiban#newsiban#beritaiban

Rindu | Titih | Kunsika

BETONG, 18 Feb – Operasyen ngiga enggau nyelamat (SAR) benung dipejalai berindik ari penusah ke nyadi ke alai sebuah bot laju dipechayaka karam maya sesi nguji di Rumah Sitie, Tisak Ulu Sungai Skrang, tengahari tu tadi ngujungka siku lelaki beumur 20 taun diripotka lenyau.

Tudah nya dipadahka labuh ke sungai sebedau dipeda tekapai-kapai lalu udah nya lenyau ari peda urung pukul 3.51 lemai.

Nitihka penerang ari Palan Operasyen (PGO) Balai Bomba enggau Penyah Penusah (BBP) Betong Betong sida terus dianjung ngagai endur nya pengudah nerima kangau ngenyit.

Operasyen nya betuaika Yusof Tamin enggau lima iku kaban.

Pengawa ngiga keterubah iya nya fokus ngagai atas ai ngena chara ‘surface water searching’ bepelasarka penerang saksi sereta dibantu perau enggi peranak rumah panjai.

Bomba madah, kandang endur operasyen nya urung 21 kilometer ari tengah Pasar Betong lalu gaya arus sungai entara batang pemar ngagai tim penyelamat.

Pengawa SAR diatu benung dikerembaika ngelingi endur tudah kepenudi dipeda enggau kerejasama sekeda ejensi nyengkaum Raban Penyaga Orang Periman Malaysia (APM).

Naka berita tu ditulis, tudah bedau ditemu lalu operasyen diteruska enggau pengawa matau enggau silik kandang endur penusah nya nyadi.

JBPM Sarawak mega ngelalau mensia mayuh seruran ngemeratka pengelikun maya bejalaika bot nyengkaum nentuka ngena jaket pengelikun sereta meresa gaya bot sebedau nurun ke sungai. -RBI

#ruaiberitaiban#newsiban#beritaiban

Rindu | Titih | Kunsika

ASAJAYA, 18 Feb – Siku lelaki beumur 29 taun ke dipelabaka diserang baya maya nyala undang di Sungai Buluh udah ditemu lesi urung 200 meter ari endur penusah nyadi pukul 2.22 lemai sehari tu tadi.

Tudah ditemu seraban orang berikan ke mantu dalam operasyen ngiga enggau nyelamat (SAR) sebedau tubuh iya diserah ngagai polis ngambika atur nangkanka nya dipejalaika. Operasyen SAR udah tembu enggau rasmi urung pukul 3.15 lemai.

Sebedau tu, mansa diripotka lenyau urung pukul 11.55 pagi, 17 Februari 2026, pengudah bala bakih iya sedarka iya lenyau ngenyit lebuh sida benung nyala undang ba sungai.

Nitihka penerang Raban Penyaga Orang Periman Malaysia (APM) Pelilih Asajaya, sida nerima kangau ngenyit ari mensia mayuh sebedau seraban Tim Alpha dianjung ngagai endur nya bejalaika operasyen SAR.

Operasyen nya mega ngaul kerejasama Polis Diraja Malaysia (PDRM), Opis Bomba enggau Penyah Penusah Malaysia (JBPM), RELA enggau Kaunsil Pengintu Kampung Sarawak (SFC).

Pengawa nyidi nya dipejalaika ba sepemanjai Sungai Buluh dalam radius urung empat kilometer ari palan alai iya dipelabaka ditabanka jelu nya.

Operasyen hari keterubah diketuka urung pukul 7 lemai pengudah tudah enda mujur ditemu sebedau ditampung baru pagi tadi, ngujungka tubuh iya ditemu.

Piak bekuasa ngelalau mensia mayuh bejimat agi lebuh bejalaika aktiviti ba sungai kelebih agi ba kandang endur ke dikelala nyadi palan baya, dikena nyeliahka penusah ke sebaka nyadi baru. -RBI

#ruaiberitaiban#newsiban#beritaiban

Rindu | Titih | Kunsika

JOHOR BAHRU, 18 Feb – Yang di‑Pertuan Agong Sultan Ibrahim minta ngambika pengawa ngelaban penyalah makai suap dipejalaika enggau nadai belembut ba semua opis enggau ejensi Perintah Nengeri Johor.

Iya mega madah, integriti enggau pengawa ke terang dalam pentadbiran nyadi pelasar ke beguna dalam nentuka pengelantang enggau pengelikun nengeri nya dijaga.

Iya mega nyemetak madahka pentadbiran ti ngembuan integriti ukai semina ngenegapka pengarap rayat, tang mega nyadi pematak pemansang ti meruan sereta daya besemekih nengeri tu ba renggat nasional enggau antarabansa.

Iya mansutka penerang tu ba laman Facebook rasmi iya, lebuh iya nerima penatai Menteri Besai Johor, Datuk Onn Hafiz Ghazi enggau Sekretari Perintah Negeri, Datuk Mohammed Ridha Abd Kadir di Istana Pasir Pelangi, seharitu tadi.

Rambau aum semak dua jam nya, Sultan Ibrahim mega diberi penerang pasal pemansang ke diatu enggau penyulut ke jampat dijapai di Johor ulih Onn Hafiz.

Sama bisi datai Datuk Bandar Kaunsil Bandaraya Pasir Gudang, Datin Paduka Hazlina Jalil enggau Direktor Tanah enggau Galian Johor, Mohammed Shakib Ali. -RBI

Sumber Astro Awani

#ruaiberitaiban#newsiban#beritaiban

Rindu | Titih | Kunsika

PERANAK LAWAS DIPERANSANG NGUNA PEMANSANG INFRASTRUKTUR DIKENA NGEREMBAIKA EKONOMI

LAWAS, 18 Feb – Peranak di sitak Parlimen Lawas dipinta beambi ulih ari pengawa bejalaika projek pemansang jalai alun ke benung dipejalaika diatu sereta deka dipejalaika, lalu ari nya ulih meransang penumbuh ekonomi kandang menua.

Kaban Parlimen Lawas, Dato’ Henry Sum Agong madah, entara projek ke udah dikemendarka nyengkaum ngaga jalai nyambung Ba’kelalan ngagai Kalimantan enggau Bario, ke dipelabaka ulih muka akses ke lebih besai ngagai kandang menua ulu enggau garis entara menua.

Berebak enggau nya, iya mega ngemeratka pemesai guna neruska perambu projek jalai kereta api Trans Borneo, ti dianggap iya nyadi pematak strategik ungkup pemansang timpuh panjai pelilih menua tu.

Nitih ku iya, sistem pengangkut kereta api ulih ngenegapka rentayan penyambung entara pelilih menua di Borneo kelimpah ngurangka bepanggai ba perengka pengangkut darat ke udah bisi.

Ku iya nambah, projek ti meri empas tinggi nya bisi prospek besai dalam nyungkak sektor dagang temuai, ngenegapka industri pemakai sereta meransang pemansang teknologi enggau beranakka puku di serata Pulau Borneo.

Iya madah munyi nya pengudah nemuai beserimbai enggau Taun Baru Cina ngagai palan pengentap pendiau Penghulu Liaw Soon Teck di Trusan, ditu. -RBI

Sumber Jiwa Bakti

#ruaiberitaiban#newsiban#beritaiban

Rindu | Titih | Kunsika

NGEMAH, 18 Feb – Sebuah servis feri beungkus RM4.5 juta ba kandang endur N.49 Ngemah diatu meri pemaik ke besai ngagai peranak ari sukut komunikasyen enggau nyungkak aktiviti ekonomi kandang menua.

Kaban Kunsil Nengeri (ADUN) Ngemah, Anyi Jana madah, palan nya ngemudahka pengawa rayat ninting hari kelimpah nyadi pematak ngagai pemansang menua pesisir ke lebih nembam.

Iya mega madahka projek jalai alun sepemanjai tujuh kilometer di Simpang Nanga Jagau deka dipejalaika dalam timpuh ke semak ari baruh ejensi MiRRDA, dikena ngemanahka rentayan infrastruktur kandang menua nya.

Kelimpah ari nya, agih belanja sepenyampau RM3,000 mega udah dikenataika ngagai Komiti Pemansang enggau Pengelikun Genturung Pendiau (JKKK) dikena meli perengka dikena berami (PA Sistem) dikena nyukung ketuai renggat baruh.

Anyi madah munyi nya lebuh bejaku ba Program Ngabang Taun Baru Cina ungkup sitak N.49 Ngemah ke diatur enggau richah ba rumah kebun Kapitan Ngu Leong Hieh sehari tu enggau penatai bemacham renggat mensia mayuh.

Pengerami nya bela digulu bini iya, Gelim Utan, Ketuai Polis Pelilih Kanowit DSP Junical Ujal, Pemancha Leong Khing Hee, penghulu, kaunselor, kapitan, tuai-tuai rumah sereta mega Raban Nembiak N.49 Ngemah.

Dalam jaku pengelalu iya, Kapitan Ngu Leong Hieh ngenataika pengaga ati ke pemadu tinggi ngagai pengeran Anyi enggau raban iya ke udah ngelimpangka diri ngulu program nya, seraya nerangka penatai bala ketuai kandang menua nya nyadika bukti pengibuh ngagai komuniti pupu bansa di DUN Ngemah.

Ex-pengajar Benabas Alex ti ngarika komuniti China di DUN N.49 Ngemah mantaika pengandal iya, Anyi deka dichalunka baru nyadi pengari Gempung Parti Sarawak (GPS) ungkup sitak nya ba Pengawa Bepilih Nengeri (PRN) Sarawak ti deka datai.

Iya nerangka Anyi udah nyadi pengari rayat ti chakah sereta enda bechiping dalam merambu enggau bejalaika pemansang.

Pemancha Leong Khing Hee mega nesau semua peranak enggau penyukung komuniti Cina di kandang menua nya meri sukung penuh ngagai ketuai ke bisi diatu ungkup pemansang terus dipejalaika.

Berebak enggau nya, DSP Junical Ujal ngelalau rayat sitak N.49 Ngemah kelebih agi di Kanowit seruran ngemeratka pengelantang enggau pengelikun komuniti.

Iya mega ngingatka enti sema Pengawa Bepilih Nengeri Sarawak diatur taun tu, semua piak patut bekimpin enggau chara ti posifit, bejimat sereta dalam gaya ke likun.

Program Ngabang terang mandangka semengat beserakup, kerejasama enggau komitmen ti enda ngetu dalam ngemansangka N.49 Ngemah ungkup pengelantang rayat selampur. -RBI

#ruaiberitaiban#newsiban#beritaiban

Rindu | Titih | Kunsika