MERADONG, 28 Feb – Tiga iku lelaki ke beumur 34 ngagai 35 taun ditan Tim Petugas IPD Meradong maya operasyen “Ops Saringan Khas Sarawak.

Saspek dipelaba bisi kaul enggau aktiviti nyadung dadah lalu dibai pulai ngagai IPD Meradong ngambika dipansik enggau silik agi.

Asil peresa ai kemi ba Opis Bagian Tasat Jenayah Narkotik (BSJN) Pelilih Meradong tetemuka ketiga-tiga saspek nya positif Amphetamine enggau Methamphetamine.

Pengawa meresa baru rikod ke udah mandangka dua iku saspek sama bisi rikod jenayah bekaul enggau dadah, lalu siku saspek nadai rikod jenayah.

Kes tu dipansik ari baruh Seksyen 15(1)(a) Akta Dadah Berbahaya 1952, enggau ukum maksimum iya nya ukum mata duit RM5,000 tauka jil enda ngelui dua taun enti dikenuku salah.

Ketuai Polis Pelilih Meradong, DSP Tansli Mering nyemetak madahka polis enda belembut bekaul enggau penanggul dadah ba kandang menua Meradong.

Iya nesau bala komuniti ngambika ngenataika sebarang penerang bekaul enggau aktiviti dadah ngagai Balai Polis Bintangor nengah lumur 084-693222 dikena mantu pengawa ngelaban penyalah dadah.

Polis ngingatka pengawa ngaul diri enggau dadah ukai semina ngelanggar undang-undang tang mega meri empas ke enda manah ngagai mensia mayuh. -RBI

KOTA SAMARAHAN, 1 Mac — Siku lelaki napi pengirau ati lebuh mutosikal ke ditepan iya labuh ke dalam parit besai pengudah betempuh enggau sebuah kerita di Taman Merdang Fasa 1, ditu kemari.

Ba penusah ke nyadi urung pukul 5.45 lemai nya, tudah ke nepan mutosikal diripotka semina bakal mimit aja, tang gaya ba endur nya ngasuh orang betanya lebuh deriba kerita ke bisi kaul nya dipelabaka ‘lenyau’ ari palan penusah nyadi.

Pengari Opis Bomba enggau Penyah Penusah Malaysia (JBPM) Sarawak madah, sida nerima kangau ngenyit urung pukul 5.48 lemai sebedau nganjung raban ngagai endur nya ngambi bantu enggau lengkas.

Lebuh raban penyelamat datai dia, sida tetemuka sebuah mutosikal ba dalam parit besai ba tisi jalai.

“Komander Operasyen ngeripotka orang ke ngena mutosikal nya betuah laban semina bakal mimit aja.

“Taja pia, deriba kerita ke bisi kaul enggau penusah nya dipelabaka udah pansut ari endur nya sebedau piak bekuasa datai,” ku iya nengah siti penerang.

Piak bomba ngentaska nadai operasyen teknikal nyelamat dipejalaika laban mansa enda tepekul dalam penusah nya.

Tudah diberi bantu keterubah sebedau pekara tu disua ngagai piak bekaul.

Penusah tu nyadika pengingat ngagai peranak menua nya ngambika bejejimat agi lebuh nengah kandang genturung pendiau, kelebih agi maya jam peak dikena nyeliahka penusah ke enda dikedekaka nyadi. — RBI

KANOWIT, 1 Mac – Dato’ Sri Gramong Juna, ex-Kaban Kunsil Nengeri (ADUN) Machan nyemetak madahka pengerami Taun Baru Cina ukai semina diempu komuniti Cina aja, tang nyadi pelasar ke beguna dikena ngerapitka kaul entara bansa di Kanowit.

Berebak enggau nya, iya nesau komuniti ngambika terus ngenegapka penyerakup enggau pemereti ati ke pemaik begulai.

Iya ngenataika pesan nya lebuh ngulu pengerami ngintu Taun Baru Cina ke diatur ba Dewan Opis Pelilih Menua Kanowit bedau lama ke udah, lalu nerangka penatai pemayuh raban nya kelai tegap semengat penyerakup komuniti.

“Kanowit dikelala enggau komuniti pupu bansa, lalu kitai patut ngetanka pengelantang ke udah lama bisi ba peranak menua nya,” ku iya.

Dato’ Sri Gramong Juna mega meri Selamat Taun Baru Cinangagai semua, kelebih agi bala bakih komuniti Cina di Kanowit, sekalika bisi datai ba dia tu tauka ba endur bukai, enggau pengarap taun tu deka mai pengelantang, pemujur enggau pengelikun ngagai semua.

Pengerami nya mega digulu bala ketuai komuniti, ketuai gerempung enggau peranak menua nya, ti besaup nentuka pemujur pengawa nya. -RBI

BETONG, 28 Feb — Pengerami Merarau Gerempung Tuai Rumah (GTR) N.36 Layar udah diatur enggau penuh adat, basa, sereta semengat begulai ba Parish Hall Gereja St. Augustine, Betong.

Pengerami nya dipunka enggau jaku pengelalu ari Tuai Rumah Gebriel Spencer anak Sang ke nyadi Chairman GTR N.36 Layar lalu ditangkan enggau jaku ari Penyanding Penemu I, SAO Christina anak Peter, enggau Penyanding Penemu II, Pemanca Norman Ngumbang.

Sama bisi datai sereta ngenataika jaku sida iya nya Sapit Menteri Pemansang Nembiak Lumba enggau Main YB Datuk Gerald Rentap Jabu, sereta Kaban Kunsil Nengeri ( ADUN) N.36 Layar, ke udah nya bejadika pengerami nya.

Pengerami nya mega diias enggau pengawa pemerindang Kuntau, pengawa nyuaka setipikit ngagai Ex-Tuai Rumah 2025, sereta nyuaka plak ngagai Ex-EXCO GTR N.36 Layar sesi 2024/2025 kelai terima kasih ngagai jasa enggau pemeri sida.

Dalam jaku iya, YB Dato’ Dr.Richard Rapu ngenataika pengaga ati iya ngagai Tuai Rumah ke dulu suba ketegal semua pemeri enggau iring ti udah dituang, lalu ngelalu penatai Tuai Rumah ti baru dipaduka.

Iya ngemeratka pemesai guna nyadi ketuai ti tau dikearap sereta dedikasyen ti tinggi dalam ngiring komuniti.

Setipak enggau rambai jaku GTR N.36, “Tuai Tegap, Rayat Entap”, pengawa tu ngemeratka iring ti tegap sereta penyerakup rayat ungkup penyulut enggau pengelantang begulai.

Tabi Puji enggau terima kasih ngagai GTR N.36 Layar laban udah ngangau sereta nerima temuai enggau chukup manah sepemanjai pengawa tu. — RBI

SIBU, 28 Feb – Siku lelaki ke beumur urung 24 taun ditemu bebadi pengudah dipechayaka aksiden ngena mutosikal kediri empu ba Jalai Kuari nuju Bukit Aup, lemai tu tadi.

Balai Bomba enggau Penyah Penusah (BBP) Sungai Merah nerima kangau ngenyit ari Sepital Sibu pukul 3.39 lemai sebedau luching penusah ngenyit bemunyi 30 sikin udah nya.

Berebak enggau nya, bisi lima iku kaban betuaika PBK I Yaakub tekala nya ngesah ngagai endur ke bepalan urung lima kilometer ari stesyen nya lalu datai enda lama udah nya.

Nitihka ripot komander operasyen, lebuh datai ba endur nya sereta bejalaika pengawa ‘size-up’, raban nya tetemuka siku lelaki dalam parit lalu dientaska bebadi ulih pemesai ari Opis Menteri Pengerai Malaysia (KKM) ke bisi ba palan penusah nyadi.

Tudah dipelabaka aksiden ngena mutosikal kediri empu sebedau labuh ngagai parit.

Raban bomba ngena kereban pengelikun diri (PPE) penuh lalu ngangkatka tubuh tudah ngena ‘scoop stretcher’ sebedau nyerahka tubuh tudah ngagai Opis Menteri Pengerai ngambika atur nangkan ke nya dipejalai. -RBI

LUMUT, 28 Feb — Soldadu Tasik Diraja Malaysia (TLDM) kena Hari Empat tu tadi udah bejalaika Pengerami Ngelepaska Tali KD LEKIR nyadi pemungkal simbolik ngagai pengawa Lekir Australia Deployment 2026 (LEAD ’26), misi strategik ti nyengkaum ngambi bagi dalam latih multilateral, aktiviti diplomatik pengelikun takah jauh ba renggat entarabansa.

Nitihka penerang rasmi Markas Pemerintah Armada Barat misi strategik lebih dua bulan nya mungkur 150 iku pemesai enggau raban begulai enggau tim sukung, betuaika Pemesai Pemerintah KD LEKIR, Komander Megat Mohamad Sofwan Firdaus bin Megat Mohamad Yunus TLDM.

Sepemanjai timpuh nyendiaka diri, raban kapal nya ngasaika latih intensif ti mungkur penyedia operasyen, taktikal, teknikal enggau logistik dikena nentuka aset ba tikas ti optimum sebedau meraka tasik pelilih menua enggau antarabansa.

Pengawa keterubah KD LEKIR ngaul diri iya nya ‘International Fleet Review’ beserimbai enggau genap 125 taun penumbuh Soldadu Tasik Diraja Australia di Sydney kena 21 Mac, ti deka ngempuruka 35 buah kapal ari 20 buah menua.

Penyereta tu mandangka komitmen Malaysia nyadi kaban maritim ti chakah, kredibel sereta dikearapka ba renggat global.

Kapal nya udah nya deka nyereta Eksesais Kakadu 26 berengkah 22 ngagai 30 Mac, ti ngaul 21 buah kapal enggau sebuah kapal selam ari 14 buah menua.

Latih dua taun sekali tu ngemeratka pengawa ngangkatka interoperabiliti, bekunsi pengelandik sereta ngenegapka kerejasama pengelikun maritim serantau.

Pengudah tembu program nya di Sydney, KD LEKIR deka bejalaika pejalai ngelingi benua Australia, ti dikearapka ulih nguji pengeliat tubuh enggau runding bala kru kelimpah ari meri eksposur operasyen dalam mayuh macham gaya rampa menua maritim nyengkaum kandang endur Great Barrier Reef enggau Great Australian Bight. Kepenudi misi baka tu dipejalaika TLDM iya nya ba taun 1991 suba.

Ba pengujung pengawa nya, KD LEKIR diperambu deka ngambi bagi ba Latih Malaysia–Australia 26 di Perth ari 14 ngagai 20 April, sebedau ngaga penemuai palan penyangkai kapal ngagai Jakarta, Indonesia ari 26 ngagai 29 April nyadi sebagi ari pengawa ngenegapka kaul dua piak enggau diplomasi pengelikun serantau.

Ba pejalai ke Jakarta, kapal nya mega deka ngatur pengawa ngingatka khas ba kandang tasik barat laut Australia dikena ngingatka penusah MH370 nyadika tanda penyiru enggau solidariti enggau mansa sereta meri terima kasih ngagai aset TLDM ke bisi enggau dalam misi ngiga bilun nya.

Penerang nya ngemeratka pengawa ngambi bagi dalam latih enggau pengawa entarabansa baka LEAD ’26 setipak enggau aspirasyen Opis Menteri Pertahanan Malaysia ngenegapka strategi kerejasama bekuasa, kelimpah ari nambahka penau operasyen enggau kaling maritim sereta ngenegapka pengelikun enggau pertahanan menua.

“Berindik ari nya, misi LEAD ’26 dikearapka ulih terus ngetanka imej profesional TLDM ba renggat entarabansa sereta nambahka pengarap komuniti maritim ngagai penau enggau komitmen soldadu tasik menua tu” ku penerang nya. — RBI

BINTANGOR, 28 Feb – Siku pengajar lelaki beumur 39 taun ditan polis pengudah dipelaba bisi kaul enggau kes kachau seksual ngagai siku nembiak indu ba sebuah sekula di pelilih menua nya.

Ketuai Polis Pelilih Meradong, Sapit Superintenden Tansli Mering, lebuh dikerandau media sehari tu ngentaska pengawa ngetan nya digaga berindik ari ripot ke diterima ari indai nembiak nya.

Nitihku iya, ripot nya digaga sepengudah sida sebilik dipadah bekaul enggau pengawa ke didawa enda beradat nya.

Pansik keterubah tetemuka kes tu berengkah tebuka lebuh nembiak ke bisi kaul nya enda datai ngagai sekula baka selama, lalu enggau nya ngasuh orang betanya ngagai raban pengatur sekula.

“Piak sekula udah bejalaika pansik sebedau madah ngagai sida sebilik tudah nembiak nya pasal pekara nya. Berindik ari nya, ripot polis udah digaga ngambika atur ke bukai dipejalaika,” ku iya.

Kes tu diatu benung dipansik ari baruh Seksyen 14(a) Akta Penyalah Seksual Ngagai Nembiak Mit 2017.

Berindik enggau nya, iya ngelalau mensia mayuh anang ngaga spekulasyen tauka ngerembaika penerang ti enda entas ti tau ngeruga pansik sereta ngachau proses undang-undang.

Pansik ke silik agi benung dipejalaika ku DSP Tansli Mering. -RBI

SEBAUH, 28 Feb — Komuniti Cina lokal mantaika sukung enggau pengarap sida ngagai iring Kaban Kunsil Nengeri (ADUN) Dato Sri Dr Stephen Rundi anak Utom, ti dianggap seruran komited dalam ngemai agenda pemansang enggau pengelantang rayat enda ngira penatai.

Pekara nya dikenataika lebuh penemuai Rundi ke mega Menteri Industri Pemakai, Komoditi enggau Pemansang Kandang Menua Sarawak ngagai palan pengentap pendiau komuniti Cina, Kapitan Chang Awan, ditu sehari tu.

Penemuai nya disempulang raban ketuai komuniti enggau ketuai raban bansa (KMKK) begulai enggau peranak menua nya.

Penemuai tu mega ngayanka semengat begulai sereta tegap enggau penyerakup entara mayuh macham komuniti etnik di kandang menua nya.

Pengudah sesi nemuai nya, iya mega bisi ngambi awak ngabas sebuah premis dia meri basa kepenudi ngagai siku peranak menua nya ke udah nadai, kelai pemerat ati ngagai komuniti.

Chara ngelawa rayat tu dipeda ukai semina ulih ngerapitka kaul entara ketuai enggau rayat, tang mega ulih ngerapitka pengelantang rama sereta nempa pengarap ti terus ngagai ketuai nengeri. -RBI

KUCHING, 28 Feb – Sepenyampau 45 iku individu udah diperesa seraya 30 iti saman udah dikeluarka dalam Op Mutosikal (Op Samseng Jalanan) ti dipejalaika Bagi Tasat enggau Penerit Adat Trafik IPD Kuching ari pukul 10 malam nyentuk 2 pagi, kena 27 ngagai 28 Februari tu tadi.

Operasyen tu ngemeratka sekeda ‘palan angat’ ngelingi mengeri tu nyengkaum Jalai Tun Abdul Rahman Yaakub, kandang endur MASJA, stesyen PETROS enggau Pangkalan Sapi ke dikelala nyadi palan ke suah dilawa sida ke ngena mutosikal.

Nitihka penerang berita ari Indu Opis Polis Pelilih Kuching, sepenyampau 35 buah entukar udah diperesa maya operasyen nya. Asil peresa nya tetemuka bemacham penyalah trafik bisi dikereja ngujungka 30 iti saman PDRM (K) 257 dikeluarka.

Ba operasyen ke sama, tujuh buah mutosikal mega dirampas ari baruh Seksyen 60 Akta Pengangkutan Jalan 1987 ketegal ngereja penyalah ti ngelanggar atur undang-undang ke udah bisi.

Entara batang penyalah ke ditemu iya nya deriba kerita nadai lisin deriba, nadai lindung insurans, nadai lumur ngerejista, ngena lumur plat ke enda nitihka spesifikasyen, Lisin Perengka Pengangkut Bemotor (LKM) ke udah abis timpuh, nadai cheremin tisi, ngubah struktur ekzos enggau akses perengka, enda mandangka tanda lisin deriba sementara L enggau P.

Polis nyemetak madahka operasyen baka nya deka terus chakah agi dipejalaika ari setiap maya dikena ngelaban aktiviti geng jalai alun sereta nentuka pengelikun penguna jalai alun seruran dijamin.

Mensia mayuh mega dilalau ngambika seruran ngasika undang-undang jalai alun sereta anang ngaul diri enggau sebarang aktiviti ti tau ngeruga pengelikun diri empu tauka penguna bukai. -RBI

LUNDU, 28 Feb — Rumah Adat Kampung Sebako ti ba pelilih menua tu deka digaga baru nengah agih belanja sepenyampau RM100,000 ari baruh dana Unit Pekara Jalai Pengarap Bukai (UNIFOR).

Kaban Kunsil Nengeri (ADUN) Opar, Billy Sujang madahka pengawa ngaga baru Rumah Adat tu ukai semina nirika sebuah begunana fizikal, tang mega nyadika simbol pemeruan budaya enggau sejarah penatai asal komuniti Kampung Sebako ti ari bansa Salako.

“Taja majoriti peranak genturung pendiau tu diatu udah megai jalai pengarap Kristian, Rumah Adat tu megai pangku pengawa ti beguna nyadika kelai adat enggau budaya ti ngayanka pemanah ulah komuniti tu.

“Jalai pengarap enggau adat iya nya dua pekara ti enda sama, tang bela ngelengkapka sama diri. Megai jalai pengarap nentuka pemanah dalam pengidup, lalu adat enggau budaya ngayanka pemesai reti enggau tradisyen bala aki ini ke patut dipeturunka enggau ditegika,” ku iya.

Iya madah munyi tu maya ti bejaku ba Pengerami Bejadi enggau Nasih Tanah Nirika Baru Rumah Adat Kampung Sebako di Lundu kena Hari Empat.

Bejaku silik, Billy madahka Rumah Adat tu ila deka nyadi palan bejalaika pengawa proses adat enggau pesaka, palan berandau komuniti sereta ngatur pengawa aktiviti main asal dalam nentuka rebak nembiak enda ngelengkaka penatai asal sida.

Iya mega madahka agih belanja tumu RM100,000 ari UNIFOR tu bedau chukup dalam nangkup semua ungkus bejalaika projek tu.

Berindik ari tu ku iya, pengeransing tu deka diteruska dalam ngulihka dana tambah ungkup renggat ke nangkanka tu, nyengkaum pemeri ari iya ti nyadi pengari rayat ba kandang menua tu.

Billy mega meri besai terima kasih ngagai raban pengatur UNIFOR ari baruh Opis Premier Sarawak sereta semua raban ti bekaul terus tauka enda dalam ngemujurka projek ngaga baru Rumah Adat Kampung Sebako.

Iya muji pengeransing bekerejasama peranak Kampung Sebako ti bejalaika projek tu nengah chara beripai lalu ngena memanah pengelandik ti bisi di kandang menua nya.