Keserak tu Ruai Berita Iban udah ngaga Randau Eksklusif begulai enggau pemenang Queen Kebaya Miri Fest 2025 ti negika pesaka asal nyadi kelai identiti, pengandal enggau pengidup dudi hari nembiak rebak baru.

Peranak Lun Bawang asal ari Lawas, pejalai Stacy Rosedyana Sigar ukai semina cherita menang ba pekit ratu kebaya aja, tang naratif transformasyen diri ti diisi enggau disiplin, pemerani sereta pengerindu ke dalam ngagai budaya.

Di belakang tuchum ti manis sereta narit ati bala akim enggau bala orang ke datai meda, bisi cherita siku nembiak indu ti kala napi pemalu pasal pengulih iya empu.

Taja pia, pengerindu iya ba pengawa pemerindang kenyau ari mit nyadika pun ubah.

Setiap renggat ari pekit sekula nyentuk ke pengawa budaya, iya ngambi bagi, nempa pengarap ati enggau identiti iya.

Ba iya, pemenang ukai tuju kepenudi, tang nyadika bukti pengawa ti terus ulih mutarka penakut ti nyadika pengerawan ati.

“Aku deka kebaya dipeda ukai semina selambar gari aja, tang nyadi lambang pengering, elegan enggau identiti budaya,” ku iya enggau andal.

PESAKA DI BELAKANG NGEPAN.

Ba Stacy, kebaya mai reti ti jauh ngelui ari ‘estetika’. Iya nyadi kelai penerus tradisyen entara rebak lama enggau rebak baru, siti tukuh seni ti seruran relevan taja pan jeman berubah.

Iya pechaya pemanah pekayan asal bisi ba cherita di belakang jait, motif enggau tukuh pekayan nya.

Sepemanjai pekit nya, pemar ke pemadu besai ditapi iya iya nya penanggul awak nyendiaka gari pengudah ‘tema’ berubah ba minit kepenudi.

Taja pia, enggau chara ngatur jam enggau bejimat sereta sukung ti tegap ari tim kreatif, iya mujur mantaika pengawa pemerindang ti narit ati.

Latih ‘catwalk’ ninting hari, latih komunikasyen enggau nyendiaka runding nyadi pengawa pengelama sebulan sebedau renggat kepenudi.

Iya nyemetak madahka sukut runding enggau pikir kebendar iya lebih mar ari sukut fizikal laban penyereta patut ngetanka fokus, pengarap ati enggau penelap lebuh diakim.

SUKUNG TI NEMPA PEMUJUR

Stacy enda nyangkal pemujur iya digaga bepelasarka sukung ari mayuh piak. Diri sebilik, bala bakih enggau tim kreatif nyadi tulang belakang ti ngeringka semengat iya lebuh napi penguji.

Kebendar iya, peluang betemu enggau penyereta bukai mega nyadi kenang pemadu berega sepemanjai pekit laban nya muka ruang kaul sereta betukar peneleba.

Pengudah bulih gelar nya, iya chakah ngulu program main asal enggau pengawa mandangka fesyen, nyengkaum ngelaluka pengawa ke diatur The Rotary Club of Miri Oil Town enggau Serakup Indu Orang Ulu Miri di Miri.

Ba iya, tetiap pelasar nyadi peluang dikena meri kelala pesaka budaya ngagai mensia mayuh ke lebih mayuh.

MISYEN BARU: PANGGAU TI BESAI AGI

Diatu, Stacy benung nyediaka diri enggau intensif napi pekit Miss Heritage Sarawak 2026.

Fokus iya ukai semina ba gamal aja, tang mega nguasa penemu budaya, sejarah enggau nilai asal ngambika iya ulih enggau temegah ati ngarika identiti nengeri Sarawak ba panggau ke besai agi.

Iya mega ngemeratka penyelai main asal menua tu baka asil pengelandik jari enggau pekayan etnik nyadi elemen beguna ti deka dikemeratka iya.

Ba iya, nembiak rebak baru mesti meretika pun budaya diri empu sebedau ulih mai iya ngagai renggat dunya.

INSPIRASYEN NGAGAI REBAK BIAK

Nyadi ikon budaya baru, Stacy meda gelar ke dimenang iya nya nyadika inspirasyen. Iya deka ngena pengulih iya meri inspirasyen ngagai raban nembiak ngambika lebih agi angkunka pesaka asal kelebih agi di Malaysia ti kaya enggau penyelai budaya.

Stacy ngelalau tetiap iku penyereta enggau nembiak rebak baru patut seruran nyadi diri empu sereta beterima kasihka penyelai diri, laban pengarap ati ke bendar ada ari nerima identiti diri.

Berebak enggau nya, pengawa nyendiaka diri enggau silik ari sukut runding, penemu enggau pengelandik beguna amat dikena nentuka setiap orang ulih ngayanka diri enggau pengarap ati.

Ke pemadu beguna ku iya, ngelantangka diri enggau tiap sikin pejalai laban peneleba ke ditengah nuan sekalika manis tauka mar, nyadi pengajar ke pemadu manah ti nempa pengering enggau pemansang nuan jemah ila.

PESAKA NYADI PUGU PENGERING

Ba Stacy, pesaka ukai utai ke udah lama. Tang ku iya, urat ti nentuka siku orang enda mudah rebah taja pan napi pemar jeman.

Enggau penetap ati sereta visi ti terang, iya diatu nyingkang ngagai renggat ke nangkanka nya ukai semina nguji ngulihka jumpang enggau gelar, tang mai enggau iya nyawa budaya ti deka terus idup sereta dipebasa.

“Ba aku, elegan ukai semina gaya aja, iya nya penerang identiti” ku Stacy ngujungka randau enggau Ruai Berita Iban seraya tuchum. — RBI

BINTULU, 2 Mac — Ejensi Penerit Adat Maritim Malaysia (APMM) Zon Maritim Bintulu ngetan sebuah kapal berikan menua tu pengudah dipelaba ngelanggar syarat lisin ke sah lebuh bejalaika aktiviti berikan ba palan 1.6 batu nautika barat laut Tanjung Payung, urung pukul 8.15 pagi, ditu kemari.

Direktor Zon Maritim Bintulu, Muhammad Suffian Eldine Abdullah madah, pengawa nya dipejalaika asil ari pengawa meresa ti dipejalaika sebuah bot Patrol Maritim Malaysia lebuh bejalaika pengawa matau Op Tiris 3.0, Op Permai 01/2019 enggau Op Pelantar Merah 03/2023 ba kandang endur nya.

Nitihku iya, pengawa meresa kapal nya tetemuka krew kapal ke bisi lima iku peranak Indonesia nyengkaum nakhoda ke beumur entara 21 ngagai 52 taun.

Ku iya nambah, kapal nya dipelaba ngereja penyalah ari baruh Seksyen 8(b) Akta Berikan 1985 laban bejalaika aktiviti berikan kurang ari tujuh batu nautika ari tebing tasik, lalu enggau nya ngelanggar syarat lisin ke entas.

“Enti dikenuku salah, pengempu kapal nya ulih diukum enda ngelui ari RM20,000 tauka dijil nyentuk dua taun, tauka kededua nya,” ku iya ba sebengkah penerang berita.

Kapal nya enggau semua kru ditan sereta diiring ngagai Palan Ngetanka Kapal Zon Maritim Bintulu sebedau diserah ngagai Pemesai Pemansik Maritim Malaysia ngambika bejalaika atur nangkanka nya.

Malaysian Maritime mega nyemetak madahka semua komuniti maritim meseti seruran nitihka atur enggau undang-undang ke udah dikena sereta ngemeratka prosedur pengelikun di tasik dikena nyeliahka penusah ke enda dikedekaka nyadi.

Mensia mayuh ke bisi penerang, sebana tauka napi penusah ngenyit di tasik tau betelefon ngagai lumur 999 tauka Palan Gerakan Maritim Zon Maritim Bintulu ba lumur 086-314254 enggau Palan Gerakan Maritim Nengeri Sarawak ba lumur 082-432544 ngambika atur jampat dipejalaika. — RBI

MANCHESTER, 2 Mac – Manchester United ngayanka semengat ngelaban ti kuat lebuh mujur ngalahka Crystal Palace 2-1 ba Liga Premier England di Old Trafford, lalu enggau nya niki ngagai penuduk lumur tiga atas Aston Villa.

Tim temuai keterubah iya ngasuh tim tuan rumah tekenyit lebuh pemain beretan Palace, Maxence Lacroix ngemasukka gol pemuka ari pasing Brennan Johnson pengudah iya ngelepaska diri ari pemain United.

Sepemanjai setengah main keterubah, Palace tampak agi teratur sereta suah nyerang enggau serang balas ti jampat betuaika Ismaïla Sarr.

United semina nempa sekeda peluang ke mimit, nyengkaum tanduk Benjamin Šeško ke mudah diselamatka penyaga gol Dean Henderson enggau sipak Casemiro ari semak mega ulih ditangkap.

United nguasa main nya berubah enggau naka pengelengkas lebuh setengah main kedua berengkah lebuh Lacroix dibuai ketegal ngelabuhka Matheus Cunha ba kandang penalti.

Bruno Fernandes enggau muntang nukar penalti nya ngagai gol lalu ngenyamaka gol.

Tim tuan rumah beambi ulih penuh ari pengelebih pemain lebuh lintang Fernandes disambut enggau tanduk ti deras ari Šeško ke mega meri gol ungkup pemenang Manchester United.

Carrick ngemasukka Amad Diallo mega nambahka mayuh macham serang United, tang United enda mujur nambahka penyampau gol.

Crystal Palace enda mujur ngelaban United ba setengah main kedua, enggau penyaga gol United Senne Lammens ti sikar nyaga pintu gol. -RBI

PAKAN, 1 Mac – Inisiatif Program My Lisin ba sitak Parlimen Julau dipeda nyadi singkang proaktif dikena mantu raban nembiak enggau peranak menua pesisir ngulihka lisin mutosikal nengah chara ti entas sereta teratur.

Kaban Parlimen Julau, Datuk Larry Sng Wei Shien madah, program nya ngembuan tuju deka nentuka mayuh agi orang ke ngena mutosikal ngembuan lisin ke entas, lalu ari nya ulih ngangkatka pengelikun jalai alun ba kandang menua nya.

Nitih ku iya, agi bisi peranak kelebih agi raban nembiak bedau bisi lisin ketegal bemacham penanggul nyengkaum ungkus enggau akses ngagai palan latih deriba.

“Program tu dikearap ulih mantu ngemuntangka atur pengawa minta lisin sereta meri peluang ngagai sida ke patut ngulihka lisin nengah chara entas,” ku iya.

Program tu dipejalaika enggau kerejasama akademi deriba menua tu ti nyendiaka servis ngerejista enggau ngatur peminta ngagai penyereta ke bisi ati.

Iya mega meransang peranak ba sitak Pakan enggau Meluan ngerebut peluang ungkup pengelikun diri empu enggau penguna jalai alun ke bukai.

Inisiatif tu mega setipak enggau pengawa ngenegapka komuniti menua pesisir nengah pengawa nitihka undang-undang enggau nambahka penyedar pengelikun jalai alun. -RB

KUCHING, 1 Mac — Sapit Premier Sarawak, Datuk Amar Douglas Uggah Embas udah ngabas kandang endur betanamka padi ke diempu Green World Genetics (GWG) Sdn Bhd di Simpang Bungin, Spaoh sehari tu tadi dikena meda kediri empu pejalai projek ngeluarka benih padi hibrid ba kandang menua nya.

Uggah, Menteri Infrastruktur enggau Pemansang Palan Penyangkai Kapal Sarawak ke mega Kaban Kunsil Nengeri (ADUN) Bukit Saban bisi datai begulai enggau bini iya, Datin Amar Dato Doreen Mayang.

Nitihka ripot Unit Komunikasyen Mensia Mayuh Sarawak (UKAS), penemuai nya ngembuan tuju deka meresa serera beratika aktiviti ngetau padi ngena chara moden ba plot ladang ti dipejalaika Stesyen GWG Debak, siti ari pampang kompeni nya di menua tu.

Dipelabaka Opis Betanam Betupi Nengeri Sarawak udah nyain sempekat pemereti ati enggau kompeni nya dalam bulan September 2020 ti ngujungka Stesyen GWG Debak ditumbuhka.

‘Enterprise’ ladang benih tu bepalan besemak enggau Simpang Debak lalu ngemeratka pengawa ngeluarka benih hibrid.

Plot nanam padi di Simpang Bungin, Spaoh mega siti pengawa ti beguna dalam pengawa ngasilka benih padi hibrid ti bekualiti tinggi.

Benih ke diasilka nya ditagit ngambika setipak enggau gaya tanah setempat, ulih ngelaban penyakit sereta ulih nambahka produktiviti padi.

Projek nya seruran nerima perati ari Sapit Premier Sarawak ti diripotka seruran nemuai matau pemansang kemaya hari bekaul enggau pengawa ngeluarka benih bemacham utai tanam ba endur ti dikerandau nya.

Sama bisi datai Ketuai Pemesai Eksekutif GWG Dr Chua Kim Aik, Pemesai Betanam Betupi Bagi Menua Betong Leo Toni enggau Menijar Projek Stesyen GWG Debak Low Kok Leong — RBI

MIRI, 1 Mac – Siku indu peranak menua tu beumur 35 taun diukum ukum mata duit RM2,500 tauka jil tiga bulan ketegal ti enda mayar Kort Majistret Miri pengudah ngaku salah ba dawa ari baruh Seksyen 7(2) Akta Rumah Judi Tebuka 1953.

Nitihka fakta kes, orang ke dituduh ngereja penyalah nya kena 17 Februari 2026 urung pukul 2.00 pagi lebuh seraban pemesai ari Bagi Mansik Jenayah, Indu Opis Polis Pelilih Miri betuaika siku Inspektor bejalaika pengawa meresa ngenyit ba sebuah premis dagang di Jalai Merbau.

Pengawa meresa nya tetemuka indu ke dituduh nya dipelabaka ngaga aktiviti judi online ngena telefon binching iya.

Polis mega ngerampas telefon pintar Realme enggau mata duit sepenyampau RM111 ti dipelabaka bisi kaul enggau aktiviti nya.

Kes tu ngayanka komitmen Polis Diraja Malaysia ti terus ngelaban aktiviti judi ti enda beradat ba pelilih menua tu.

Mensia mayuh diingat ngambika enda ngaul diri enggau sebarang bansa pengawa bejudi sekalika chara fizikal tauka ‘online’ laban atur ke terit deka dipejalai enggau nadai kompromi.

Sebarang penerang bekaul enggau aktiviti bejudi tau dikenataika ngagai polis tauka balai polis ke besemak. Kerejasama komuniti amat dikerindu dikena nentuka pengelikun enggau atur mensia mayuh seruran dijaga. — RBI

MIRI, 3 Feb — Siku lelaki peranak menua tu beumur 32 taun udah diukum jil pengelama empat bulan ulih Kort pengudah ngaku salah ba dawa ngemasukka dadah ti tau mai penusah ngagai tubuh iya empu.

Orang ke dituduh nya didawa ngereja penyalah ari baruh Seksyen 15(1)(a) Akta Dadah Berbahaya 1952 ketegal salah guna dadah bansa Amphetamine enggau Methamphetamine.

Kort mega ngasuh orang ke dituduh nya ngasaika Pengawa Dipatau Polis pengelama dua taun pengudah tembu ukum jil.

Penyalah iya ditemu kena 25 Oktober 2025 pengudah peresa keterubah ai kemi ti dipejalaika polis meri pemutus positif.

Pemutus nya udah nya dientaska Pemesai Sains, Jabatan Patologi, Sepital Besai Sarawak.

Polis nyemetak madahka pengawa salah guna dadah nya sebengkah penyalah ke berat ti ukai semina ngelanggar undang-undang, tang mega meri empas ke enda manah ngagai individu, ruang bilik enggau mensia mayuh.

Pengawa neritka atur deka terus diangkatka dikena ngelaban pengawa salah guna dadah ba pelilih tu.

Mensia mayuh ke bisi penerang bekaul enggau aktiviti salah guna dadah dilalau ngenataika penerang ngagai polis ngambika atur ke bukai dipejalaika.-RBI

LUBOK ANTU, 1 Mac – Kaban Parlimen Roy Angau Gingkoi ngemeratka komitmen perintah terus nentuka pemansang menua pesisir terus dikemerat dikena nentuka pengelantang pendiau rayat ba renggat pun menua.

Iya madah munyi nya lebuh bejadika Program Segulai Sejalai beserimbai enggau Pengerami Bejadika Program Transformasyen Menua Pesisir (RTP) ke diatur ba Rumah Lika, Lidong Baru, kemari.

Ba pengerami nya, iya madahka pemendar agih belanja penyampau RM100,000 dikena bejalaika projek ngangkatmanah sistem parit ba kandang endur pengentap pendiau nya.

Nitih ku iya, pengawa bejalaika projek infrastruktur nya ngembuan tuju deka ngangkatka pemanah sistem parit kelimpah ari nyendiaka kandang endur ti lantang sereta likun agi ngagai peranak.

Kelimpah ari nya, iya mega bisi nyuaka pemeri sepenyampau RM15,000 ngagai Komiti Pemansang enggau Pengelikun Genturung Pendiau (JKKK) dikena nyukung pengawa ngatur pentadbiran kandang menua, lalu Biro Indu mega nerima agih belanja sepenyampau RM5,000 dikena ngenegapka pengawa bejalaika aktiviti enggau program pemansang komuniti dalam penyereta raban indu, kelebih agi raban indu.

Iya mega meri besai terima kasih ngagai bala Tuai Rumah enggau semua peranak menua nya ketegal sambut enggau kerejasama ke diberi sepemanjai program ke diatur ba sitak Parlimen Lubok Antu.

Roy ngarapka semengat “Segulai Sejalai” terus diterenak ba raban bansa nyadika pelasar penyerakup sereta nyadi pemangkin ngagai penyulut enggau pengelantang begulai. — RBI

BETONG, 1 Mac — Program nemuai gawa mansik tu ngembuan tuju deka meresa gaya palan nya sereta nerangka enggau silik skop pengawa dikena nentuka pengawa bejalaika projek ti dikemendarka ari baruh RTP 2026 ulih dipejalaika enggau teratur, efektif sereta nangkup guna peranak menua nya,” nitihka penerang ari palan projek Jabatan Kereja Bagi Menua Betong ba DUN N.37 Bukit Saban, Hari Tiga tu tadi.

Penemuai nya dipejalaika begulai enggau pengari ari Palan Servis DUN meresa sekeda endur projek Transformasyen Menua Pesisir (RTP) 2026 ti udah dikemendarka, ti mungkur pengawa ngangkatmanah lantai konkrit rumah panjai, ngaga selapat tanah tusur, ngangkatmanah jematan enggau ngemanahka perengka guna lumba enggau main komuniti.

Nitihka penerang, penemuai nya bejalai enggau lanchar nengah kerejasama ke manah ari ketuai rumah enggau peranak menua nya, lalu enggau nya mandangka komitmen begulai entara ejensi ti bejalaika pengawa enggau komuniti dalam nentuka pemansang menua pesisir dipejalaika enggau efektif di Sarawak. — RBI

KUCHING, 1 Mac – Mensia mayuh diperansang bekunsi cherita sereta ngenataika bantu ngagai siku anak mit ti beumur setaun dua bulan, Maxy Perez Davis Mancha.

Tudah iya diatu benung ditepan igi penyakit Biliary Atresia, iya nya sebansa penyakit ti ngeruga tali seput enggau atau.

Turu bantu khas udah ditumbuhka dikena mantu Maxy lalu ngarapka mensia mayuh ulih nyaup meri pengidup ti meruan agi ngagai anak mit tu.

Maxy begunaka bantu RM180,000 dikena nampung ungkus berubat enggau beputung mindahka atau ti dipelaba urung RM200,000.

Maxy sebedau tu kala diputung ngena chara berubat dikumbai Kasai, tang gaya atau iya diripot belinsur enda manah.

Penusah nya ngujungka perut majak besai ketegal atau iya kembai sereta kering, kelimpah ari bacha tikas atau ti ngirauka ati.

Diatu, Maxy semina bepanggai ba chara berubat mindahka atau dikena meri peluang ngagai anak mit nya mansang besai enggau bepengerai.

Asil peresa perubat madah ke indai iya, Stephanie Munira Sulan Muking nyadi pemeri ati ti engkeman ngagai Maxy dikena nangkup prosedur nya.

Abis nadai, 20 peratus atau indai iya deka dipindah dikena nyilih atau Maxy ti udah jai.

Taja pia, sida begunaka belanja urung RM200,000 dikena berubat.

Naka diatu, sida sebilik agi begunaka urung RM180,000 dikena nangkup belanja ti diguna dikena nyaup enggau nyuman tudah Maxy.

Mensia mayuh ti deka meri pemeri tau meri ngagai akaun MAYBANK 5515 7530 7417 ngena nama Gerempung Pengintu Pengelantang Nadi Permata Malaysia ngena referens ‘Bantuan Maxy BA’.

Sebarang tanya bukai tau telefon nuju Stephanie Munira (indai Maxy) ba lumur 012-2964119 tauka Mars (NPM) ba lumur 013-7444501.