SARATOK, 4 Julai — Raban Penyaga Pengelikun Mensia Mayuh Malaysia (APM) Pelilih Saratok udah bejalaika operasyen ngenyit dikena mantu siku mansa dalam penusah jalai alun kediri empu ti ngaul sebuah mutosikal ke nyadi ba kandang menua Padang Kaunsil Pelilih Saratok (MDS), sehari tu.
Nitihka penerang ari Palan Kawalan Operasyen APM Saratok, kangau ngenyit bisi diterima ari mensia mayuh urung pukul 12.50 tengah hari sebedau raban penyelamat dianjung ngagai palan penusah nyadi.
Sebuah tim ti mungkur empat (4) iku raban APM datai ba palan nya urung pukul 12.52 tengahari lalu tekala nya bejalaika pengawa meresa keterubah mansa.
Asil pansik ba endur nya tetemuka siku indu ke besai tuai bakal mimit pengudah penusah ba jalai alun ngena mutosilal kediri empu.
Mansa diripotka sedar enggau bakal sereta rajai ba patung kiba enggau buku lali kiba ke bisi telih.
Tim APM udah nya bejalaika pengawa berubat keterubah nyengkaum meresi bakal enggau ngengkahka sukung ba kaki ke bakal dikena ngetanka gaya mansa sebedau dipindahka.
Pengudah perubat keterubah diberi, mansa dianjung ngagai Sepital Saratok ngena ambulans APM ngambika diperubat enggau silik sereta diserah ngagai sepital ngambika ulih bejalaika atur perubat silik agi.
Operasyen tembu urung pukul 1.14 lemai lebuh semua raban mulaika diri ngagai Palan Kawalan Operasyen Pelilih Saratok enggau likun.
APM Pelilih Saratok ngemeratka komitmen sida ti terus meri timbal tekala nya enggau servis penusah ngenyit ngagai komuniti lokal, setipak enggau pangku pengawa ejensi nya nentuka pengelikun komuniti seruran dijaga. — RBI
#Beritalban | Ruai Berita Iban
Rinduka | Titihka | Kunsika
