JULAU, 4 Mac – Siku lelaki peranak menua nya beumur 43 taun udah didawa ba Kort Majistret Sarikei sehari tu berindik ari dawa munuh siku orang tuai ba penusah ke nyadi di Julau kena 24 Februari tu tadi.
Ketuai Polis Pelilih Menua Julau, DSP Alif Haiqal Ramesh bin Abdullah madahka, orang ke dituduh nya napi dawa ari baruh Seksyen 302 Kanun Keseksaan ti nyendiaka ukum mati tauka jil entara 30 ngagai 40 taun enggau minimum 12 kali sipat ngena rutan, enti enda diukum mati, enti ditemu salah.
Tuduh nya nunjukka penyalah munuh enggau niat deka ngujungka pemati.
Kelimpah ari nya, orang ke dituduh mega didawa ari baruh Seksyen 506 Kanun Keseksaan ketegal penyalah ngenakutka anak niang enggau Seksyen 39 Akta Senjata 1960.
Kort nadai meri sebarang jamin laban penyalah ari baruh Seksyen 302 diklasifikasyenka enda ulih dijamin. Nya alai, orang ke dituduh deka mengkang ditan ba rumah jil nganti prosiding ke bukai.
Akim Stella Augustine Druce netapka 5 Mei 2026 nyadi haribulan kes nya deka disebut baru, lalu pengawa bedawa deka dipejalaika Sapit Pendawa Raya Aiman Zarith bin Zahrulail. -RBI
