SRI AMAN, 2 Julai — Projek ngaga Jematan Batang Lupar 2 ngerikod siti agi pemujur ke beguna lebuh Pengerami ‘Final Stitching Ceremony’ dipenyadi Sapit Premier Sarawak, Datuk Amar Douglas Uggah Embas, kelai pengawa nyambung kepenudi struktur batang jematan nya.
Pengerami besejarah nya kelai pemujur bejalaika siti ari projek infrastruktur strategik Perintah Sarawak ti deka ngenegapka rentayan perengka pengangkut nengeri tu sereta ngemanahka agi penyambung entara Sri Aman enggau Betong nengah Jalai Besai Kedua (STR) Sarawak.
Jematan Batang Lupar 2 dipelaba deka dibuka ngagai mensia mayuh dalam bulan Ogos 2026 pengudah batang kereja ngaga Jematan udah mujur tembu nitihka perambu.
Digaga nitihka standard JKR R5, jematan nya ngembuan pemanjai sepenyampau 870 meter nyengkaum jalai navigasyen pemesai 200 meter enggau peninggi 23 meter dikena ngemendarka pejalai kapal.
Struktur ikonik nya mega disikap ngena dua menara kabel peninggi 145.5 meter ti nyadi entara kelai baru pemansang infrastruktur di Sarawak.
Kelimpah ari pengawa ngaga jematan nya, projek tu mega ngaul pengawa ngaga jalai tama sepemanjai 2.08 kilometer ti lengkap enggau sistem parit, perengka guna jalai alun enggau mayuh macham pekara pengelikun dikena nentuka pengelantang enggau pengelikun penguna.
Enti udah tembu penuh ila, Jematan Batang Lupar 2 deka nyendiaka jalai alternatif ti nyambung Sri Aman enggau Betong, lalu enggau nya ulih ngurangka penyauh pejalai ari 73 kilometer nengah Jalai Besai Pan Borneo ngagai semina 37 kilometer nengah Jalai Besai Kedua (STR) Sarawak.
Pengawa ngurangka penyauh pejalai tu dikearapka ulih meri empas ke manah ngagai pemansang ekonomi pelilih menua tu nengah chara ngenyampatka pejalai mensia mayuh enggau barang, kelimpah ari meransang penumbuh sektor dagang, betanam betupi enggau dagang temuai ba sepemanjai koridor Sri Aman–Betong.
Projek ti meri empas tinggi tu mega nyukung agenda pemansang sosio-ekonomi Sarawak ti meruan agi nengah pengawa nyendiaka infrastruktur moden enggau bekualiti, setipak enggau aspirasyen perintah ngenegapka penyambung sereta ngangkatka pengelantang pendiau rayat.
Pemujur tu mega ngayanka komitmen Opis Kereja Raya (JKR) Sarawak ti seruran bebendar nentuka tetiap projek infrastruktur strategik dipejalaika nitihka standard pemadu tinggi ari sukut kualiti, pengelikun enggau injinir, lalu enggau nya nyendiaka perengka guna ti meri penguntung timpuh panjai ngagai rayat sereta nyukung pemansang nengeri ti meruan. — RBI
