SIMANGGANG, 30 Jun — Sepenyampau 468 iku penerima ari sitak Kunsil Nengeri (DUN) Bukit Begunan, Simanggang enggau Lingga nerima 620 Surat Pala Tanah ari baruh Seksyen 18 Kanun Tanah Sarawak (KTS) ba Pengerami Nyerahka Warta Rizab Komunal Bumiputera Seksyen 6 KTS enggau Surat Pala Tanah Seksyen 18 KTS bagi menua Sri Aman, sehari tu.
Pengerami nya dipenyadika Sapit Premier Sarawak, Datuk Amar Awang Tengah Ali Hasan ti ngemeratka komitmen Perintah Sarawak terus ngenegapka hak ngempu tanah rayat kelebih agi tanah Hak Adat Bansa Asal (NCR) nengah pengawa bejalaika Program Inisiatif Baru Nyukat Tanah.
Nitih ku iya, naka 31 Mei 2026, Opis Tanah enggau Survei (JTS) Sarawak udah mujur nyukat sepenyampau 1,238,159 hektar tanah NCR di serata Sarawak iya nya nambah ari 1,217,766 hektar ti dirikod kena 30 September 2025.
Ari penyampau nya, 966,938 hektar udah digazet ari baruh Seksyen 6 Kanun Tanah Sarawak nyadi Rizab Komunal Bumiputera.
Ku iya, sebedau Program Nyukat Tanah NCR Inisiatif Baru diberi kelala dalam taun 2010, semina urung 260,000 hektar tanah NCR udah mujur disukat.
“Taja pia, nengah pengawa bejalaika program nya, lebih 1.2 juta hektar tanah NCR udah mujur disukat dalam timpuh 15 taun” ku iya.
Berindik enggau nya, Datuk Amar Awang Tengah ngelalau pengempu tanah NCR ke bedau nyereta program tu ngambika lengkas nganjung peminta dikena nentuka hak ngempu tanah diri sebilik terus diintu ungkup rebak dudi hari.
Ku iya, pengawa nya beguna amat berindik ari mayuh rebak baru diatu diau ba mengeri, luar nengeri tauka menua luar lalu nyangka kurang nemu garis entara tanah adat sida sebilik ke bendar.
“Pengawa nyukat sereta ngentaska adan tanah deka meri penetap pasal pengempu sereta mantu nyeliahka penyarut tauka enda sepenemu bekaul enggau tanah jemah ila,” ku iya.
Kelimpah ari pengawa nyuaka Surat Pala Tanah Seksyen 18, pengerami nya mega bisi nyuaka 72 Gazet Rizab Komunal (Betanam Betupi) Bumiputera ari baruh Seksyen 6 Kanun Tanah Sarawak ngagai penerima ari sitak DUN Balai Ringin, Bukit Begunan enggau Simanggang.
Sama bisi datai iya nya Sapit Menteri Pelajar, Inovasyen enggau Pemansang Bakat Sarawak Datuk Francis Harden Hollis, Kaban Kunsil Nengeri (ADUN) Bukit Begunan Datuk Mong Dagang, ADUN Lingga Dayang Noorazah Awang Sohor, Direktor Pemansang Nengeri Sarawak Dato Jasni Jubli, Residen Bagi Menua Sri Aman Mahra Salleh, Pengari Direktor JTS Sarawak Sr Roslan Putit, Pemesai Pelilih Sri Aman Shariff Bujang enggau Penguasa Opis Tanah enggau Survei Sri Aman Michaelson Nyisin. — RBI
#Beritalban | Ruai Berita Iban
Rinduka | Titihka | Kunsika
